Tou Tala Te Logo Lelei ʼAki He Lotomālohi
“Koutou ulo ʼi te laumālie. Koutou kaugana kia Sehova.”—Loma 12:11, MN.
1, 2. Koteā te aga ʼaē ʼe fia taupau e te kau Kilisitiano ʼi tonatou ʼuhiga kau fai faka mafola ʼo te logo lelei?
ʼE FIAFIA he tūpulaga mokā maʼu hana gāue foʼou. ʼI te ʼuluaki ʼaho ʼaē ʼe gāue ai, ʼe talitali ʼaki he loto tuʼania ki te ʼu meʼa ʼaē ka fakatotonu age e tona patolo. ʼE ina loto ke foimo ʼavage te gāue ʼaē ka ina fai, pea ʼe ina fai fakalelei. ʼE ina fakaʼamu ke lelei ʼaupito tana gāue.
2 ʼO toe feiā pe, ko tatou kau Kilisitiano ʼe tou hage ko he kau gāue foʼou. Mai tona ʼuhiga ʼaē ʼe tou ʼamanaki ke tou maʼuʼuli ʼo heʼegata, koia ʼe feala ai hatatou ʼui, neʼe hoki tou kamata age pe tatatou gāue maʼa Sehova. ʼE mahino ia, ʼe lahi te ʼu gāue kua fakatuʼutuʼu e totatou Tupuʼaga maʼa tatou, ke feala hatatou maʼumaʼua ʼo talu ai. Kae ko te ʼuluaki gāue ʼaē neʼe ina tuku mai, ʼe ko te tala ʼo te logo lelei ʼo tona Puleʼaga. (1 Tesalonika 2:4) ʼE tou fakahoko feafeaʼi te gāue fakaʼatua ʼaia? Ohage ko te tūpulaga, ʼe tou fia fakahoko lelei te gāue ʼaia ʼo mulimuli ki totatou ʼu fealagia, mo fai ʼaki he loto faʼafai pea mo he loto fiafia—ei, ʼaki he lotomālohi!
3. Koteā ʼaē ʼe fakamaʼua mai kia tatou, ke lava lelei totatou ʼuhiga minisi ʼo te logo lelei?
3 ʼE moʼoni, ʼi ʼihi temi ʼe faigataʼa te taupau ʼo te taʼi lotomālohi ʼaia. ʼO hilifaki ki totatou minisitelio, ʼe lahi totatou tahi ʼu maʼua, ʼe lagi tupu ai hatatou gaʼegaʼe ʼi te faʼahi fakasino pea gaʼegaʼe ai mo totatou ʼatamai. Kae ʼi te agamāhani, ʼe tou lava fakahoko te ʼu maʼua ʼaia, pea mo tou tokaga tāfito ki totatou minisitelio. Kae ʼe mole ko he meʼa faigafua. (Maleko 8:34) Neʼe fakahā lelei mai e Sesu, mo kapau ʼe tou loto ke lava lelei totatou ʼuhiga Kilisitiano, pea ʼe tonu anai ke tou faiga mālohi.—Luka 13:24.
4. ʼE feala ke malave feafeaʼi ki tatatou sio fakalaumālie te ʼu tuʼania ʼaē ʼe hoko ʼi te ʼaho fuli?
4 ʼE lahi ʼaupito te ʼu meʼa ʼaē ʼe tonu ke tou fai, koia ʼe feala ʼi ʼihi temi, ke tou loto taʼomia peʼe tou ogosia. ʼE feala ki “te u fakahoha o te mauli” ke nātou fakavaivaiʼi tatatou faʼafai pea mo tatatou leleiʼia ia te ʼu gāue faka teokalatike. (Luka 21:34, 35; Maleko 4:18, 19) ʼUhi ko totatou ʼuhiga agahala, ʼe feala ai ke ‘tou līaki te ʼofa ʼaē neʼe tou maʼu ʼi te kamata.’ (Apokalipesi 2:1-4) ʼI ihi temi, ʼe lava liliu ʼihi gāue ʼo tatatou tauhi, ko he ʼu meʼa ʼe tou fai māhani, ka mole kei ʼalu ai totatou loto. Koteā te ʼu tokoni ʼaē ʼe foaki mai e te Tohi-Tapu moʼo fakaloto mālohiʼi ʼo tatou ke tou haga taupau maʼu tatatou faʼafai ʼi te minisitelio?
Ohage “Ko He Afi Kakaha” ʼi Totatou Loto
5, 6. Neʼe faka ʼuhiga feafeaʼi e te ʼapositolo ko Paulo tana pilivilesio ʼaē ko te fai faka mafola?
5 ʼE maʼuhiga ʼaupito te minisitelio ʼaē neʼe tuku mai e Sehova ke tou fai, pea ʼe mole tonu ke liliu ko he meʼa noa. Neʼe ko he pilivilesio lahi maʼa te ʼapositolo ko Paulo te faka mafola ʼo te logo lelei, pea neʼe manatu ia ʼe mole tāu mo ia ke tuku age ki ai te gāue ʼaia. Neʼe ina ʼui fēnei: “Kia te au, ko te siʼi pau o te kaigalotu, nee foaki mai te [“ ʼofa makehe,” MN ] aeni ke [ʼau] fagonogono ki te hahai pagani te u koloa hee fakafuafua o Kilisito, pea mo fakamalamai te gaue o te misitelio nee fufu talu mai te u sekulo i te Atua, te Tupuaga o meafuape.”—Efeso 3:8, 9.
6 Ko te manatu lelei ʼaē neʼe maʼu e te ʼapositolo ko Paulo ʼo ʼuhiga mo tona minisitelio, ʼe ko he faʼifaʼitaki lelei kia tatou. ʼI tana tohi ki te kau Loma, neʼe ina ʼui fēnei: “E au loto mafana ai ke au fagonogono te Evaselio.” Neʼe mole ufiufi ʼi te logo lelei. (Loma 1:15, 16) Neʼe lelei tana manatu ʼo ʼuhiga mo te minisitelio, pea neʼe lotomālohi ke ina fakahoko.
7. ʼI tana tohi ki te kau Loma, koteā te fakatokaga ʼaē neʼe fai e Paulo?
7 Neʼe ʼiloʼi e te ʼapositolo ko Paulo, neʼe tonu ke ina taupau he lotomālohi, pea neʼe ina fai te tokoni ʼaenī ki te kau Kilisitiano ʼo Loma: “[ʼAua] naʼa vaivai tautou faafai, pea i toutou loto mafana koutou tauhi ki te Aliki.” (Loma 12:11) Ko te kupu faka Keleka ʼaē neʼe fakaliliu ʼi henī ʼaki te kupu “vaivai,” ʼe faka ʼuhiga ki he tahi “ ʼe gāue fakapikopiko, ʼe fakatotoho.” Logola ʼe mole lagi tou vaivavai ʼi tatatou minisitelio, kae ʼe tonu kia tatou fuli ke tou nofo tokaga ki te ʼu ʼuluaki fakaʼiloga ʼo he gāue fakapikopiko ʼi te faʼahi fakalaumālie, pea ke tou fetogi tatatou aga mokā tou fakatokagaʼi te ʼu fakaʼiloga ʼaia ia tatou.—Tāʼaga Lea 22:3.
8. (a) Koteā ʼaē neʼe liliu ohage ko “he afi kakaha” ʼi te loto ʼo Selemia, pea koteā tona tupuʼaga? (b) Koteā ʼaē ʼe tou lava ako ʼi te meʼa ʼaē neʼe hoko kia Selemia?
8 Tahi ʼaē meʼa, ʼe feala ki te laumālie ʼo te ʼAtua, ke tokoni mai kia tatou mokā tou lotovaivai. Ohage la, ʼi te tahi lakaga, neʼe lotovaivai ai te polofeta ko Selemia, pea neʼe ina manatu ke tuku la tana gāue faka polofeta. Neʼe ina ʼui fēnei kia Sehova: “ ʼE mole ʼau talanoa anai ʼo ʼuhiga mo ia, pea ʼe mole ʼau toe palalau anai ʼo ʼuhiga mo tona huafa.” Ko tona faka ʼuhiga koa neʼe kua lotovaivai ia Selemia ʼi te faʼahi fakalaumālie? Kailoa, he ko te mālohi ʼo Selemia ʼi te faʼahi fakalaumālie, tana ʼofa kia Sehova, pea mo tana faʼafai ki te moʼoni, neʼe nātou fakaloto mālohiʼi ia ia ke ina hoko atu tana gāue faka polofeta. Neʼe ina fakamahino fēnei: “ ʼI toku loto neʼe hage [te folafola ʼa Sehova] ko he afi kakaha, ʼe nofo ʼi toku ʼu hui; pea neʼe ʼau fiu ʼi tona tāʼofi, pea neʼe mole feala haku kātakiʼi.” (Selemia 20:9) ʼI ʼihi temi ʼe lotovaivai ai te ʼu kaugana agatonu ʼa te ʼAtua, heʼe feiā te natula ʼo te tagata. Kae ʼi te temi ʼaē ka nātou kole ai kia Sehova ke tokoni age kia nātou, ʼe ina vakaʼi anai tonatou loto, pea ʼe ina foaki lahi anai kia nātou tona laumālie maʼoniʼoni, mo kapau ohage ko Selemia, ʼe nātou taupau tana folafola ʼi tonatou loto.—Luka 11:9-13; Gaue 15:8.
“ ʼAua Naʼa Koutou Tāmateʼi Te Afi ʼo Te Laumālie”
9. Koteā ʼaē ʼe nātou lava tāʼofi te tokoni mai ʼa te laumālie maʼoniʼoni?
9 Neʼe fai e te ʼapositolo ko Paulo te tokoni ʼaenī ki te kau Tesalonika: “ ʼAua naʼa koutou tāmateʼi te afi ʼo te laumālie.” (1 Tesalonika 5:19, MN ) Ei, ko te ʼu gāue pea mo te ʼu aga ʼaē ʼe mole ʼalutahi mo te ʼu pelesepeto fakaʼatua, ʼe nātou lava tāʼofi te tokoni mai ʼa te laumālie maʼoniʼoni. (Efeso 4:30) Neʼe fakatotonu ki te kau Kilisitiano ʼo te temi ʼaenī, ke nātou faka mafola te logo lelei. ʼE tou fakaʼapaʼapa ʼaupito ki te pilivilesio ʼaia. ʼE mole tou punamaʼuli ʼi te fakalainoaʼi ʼo tatatou fai faka mafola e te hahaʼi ʼaē ʼe mole nātou ʼiloʼi te ʼAtua. Kae kapau ʼe fakaʼaoʼaoganoa he Kilisitiano ki tona minisitelio, pea ʼe lava mate ai te afi ʼo te laumālie ʼo te ʼAtua, ʼaē ʼe ina uga tatou.
10. (a) ʼE feala ke malave feafeaʼi kia tatou te manatu ʼa te hahaʼi? (b) Koteā te manatu maʼuhiga ʼaē ʼe tou maʼu ia 2 Kolonito 2:17 ʼo ʼuhiga mo totatou minisitelio?
10 Ko ʼihi hahaʼi ʼo te mālama, ʼe lagi nātou manatu ko totatou minisitelio ʼe ko te tufa pe ia ʼo te ʼu tohi. Ko ʼihi ʼe lagi nātou manatu ʼe tou ʼolo ki te ʼu ʼapi ke ʼaumai hatatou paʼaga. Kapau ʼe tou tuku te ʼu manatu hala ʼaia ke nātou fetogi tatatou manatu, pea ʼe feala ai ke fakasiʼisiʼi tatatou faiva ʼi te minisitelio. ʼAua naʼa tou tuku te taʼi ʼu manatu ʼaia ke nātou fakavaivaiʼi tatou, kae ke tou haga manatuʼi te faʼahiga sio ʼa Sehova pea mo Sesu ki totatou minisitelio. Neʼe fai e te ʼapositolo ko Paulo te manatu maʼuhiga ʼaenī, ʼo ina ʼui fēnei: “He mole matou hage ko te tokolahi ae e natou [“fakatotogi,” MN ] te Folafola a te Atua; kae aki te mooni, pea aki te higoa o te Atua, ia muà o te Atua e matou akonaki ia Kilisito.”—2 Kolonito 2:17.
11. Koteā ʼaē neʼe tokoni ki te kau ʼuluaki Kilisitiano ke nonofo mālohi logola te ʼu fakataga, pea ʼe tonu ke malave feafeaʼi kia tatou tanatou faʼifaʼitaki?
11 Mole fualoa ʼi te ʼosi mate ʼa Sesu, neʼe hoko te ʼu fakataga ki tana kau tisipulo ʼi Selusalemi. Neʼe fai te ʼu fakamatakutaku kia nātou, pea neʼe fakatotonu age ke tuku tanatou fai faka mafola. Kae ʼe ʼui e te Tohi-Tapu, “nee natou fonu katoa i te Laumalie-Maonioni pea nee natou fakaha [“ ʼaki he lototoʼa,” MN ] te Folafola a te Atua.” (Gaue 4:17, 21, 31) Ko te ʼu palalau ʼaē neʼe fai ki muli age e Paulo kia Timoteo, ʼe ina fakahā mai te manatu lelei ʼaē ʼe tonu ke taupau e te kau Kilisitiano. Neʼe ʼui fēnei e Paulo: “Nee mole foaki mai kia tatou e te Atua he laumalie o te mataku, kae o te malohi mo te ofa pea mo te fakatokatoka. Koia, aua naa ke ufiufi i te fai o te fakamooni o totatou Aliki mo au ko tana tagata pilisoni, kae ke ke tali mamahi mo au o uhiga mo te Evaselio, pea mo falala ki te mafimafi o te Atua.”—2 Timoteo 1:7, 8.
Koteā ʼAē ʼe Tonu Ke Tou Fai Maʼa Te Hahaʼi?
12. Koteā te tupuʼaga tāfito ʼo tatatou faka mafola te logo lelei?
12 Kapau ʼe tou fia maʼu te manatu ʼaē ʼe lelei ki tatatou minisitelio, pea ʼe tonu ke lelei te manatu ʼaē ʼe ina uga tatou ke tou fai te gāue ʼaia. He koʼe ʼe tou fai faka mafola? ʼE tou maʼu tona tupuʼaga tāfito ʼi te ʼu palalau ʼaenī ʼa te tagata fai pesalemo: “Ko tau hahaʼi agatonu, ʼe nātou fakavikiviki anai kia te koe [Sehova]. Pea ʼe nātou palalau anai ki te kolōlia ʼo tou ʼafioʼaga, pea ʼe nātou fakamatala anai tou mālohi, moʼo fakahā ki te ʼu foha ʼo te ʼu tagata tana ʼu gāue mālohi pea mo te kolōlia ʼo te taulekaleka ʼo tana ʼafio.” (Pesalemo 145:10-12) Ei, ʼe tou faka mafola heʼe tou fia fakavikiviki kia Sehova ia muʼa ʼo te hahaʼi, pea mo tou tāpuhā tona huafa ia muʼa ʼo te malamanei katoa. Tatau aipe peʼe tokosiʼi te hahaʼi ʼaē ʼe nātou fakalogo kia tatou, kae ko tatatou agatonu ʼo kalagaʼi te logo ʼo te hāofaki, ʼe fakavikiviki kia Sehova.
13. Koteā ʼaē ʼe tupu ai tatatou tala ki te hahaʼi te ʼamanaki ʼo te hāofaki?
13 Tahi ʼaē meʼa, ʼe tou faka mafola heʼe tou ʼofa ki te hahaʼi, pea ʼe mole tou fia kau ki he ligi toto. (Esekiele 33:8; Maleko 6:34) ʼE pipiki kiai te ʼu palalau ʼaē neʼe fai e Paulo ki te hahaʼi ʼaē ʼe mole kau ki te kokelekasio faka Kilisitiano: “E au maua tataupe ki te hahai keleka, mo te hahai matapule, ki te hahai poto mo te hahai vale.” (Loma 1:14) Maʼa Paulo neʼe ko hona maʼua ki te hahaʼi ʼaia ke ina tala age te logo lelei, heʼe ko te finegalo ʼo te ʼAtua ke “hāofaki te faʼahiga tagata fuape.” (1 Timoteo 2:4, MN ) Ia ʼaho nei, ʼe tou maʼu te taʼi ʼofa ʼaia pea mo te maʼua ʼaia ki te hahaʼi. Ko te ʼofa ʼa Sehova ki te malamanei, neʼe ina uga ia ia ke ina momoli ifo tona ʼAlo ki te kele, ke haʼu ʼo mate maʼa tatou. (Soane 3:16) Neʼe ko he sakilifisio lahi ʼaē neʼe ina fai. ʼE tou faʼifaʼitaki te ʼofa ʼa Sehova, mokā tou fakaʼaogaʼi totatou temi pea mo tatatou mālohi moʼo tala ki te hahaʼi, te logo lelei ʼo te hāofaki ʼaē ʼe fakatafito ki te sakilifisio ʼa Sesu.
14. ʼE talanoa feafeaʼi te Tohi-Tapu ʼo ʼuhiga mo te hahaʼi ʼaē ʼe mole kau ki te kokelekasio faka Kilisitiano?
14 Ki te kau Fakamoʼoni ʼa Sehova, ʼe feala ki te hahaʼi fuli ke nātou kau ki te foʼi famili ʼa te kau Kilisitiano. ʼE tonu ke tou faka mafola ʼaki he lototoʼa, kae ko totatou lototoʼa, ʼe mole tonu ke fai ʼaki he agamālohi. ʼE moʼoni ko te Tohi-Tapu ʼe ina fakaʼaogaʼi te kupu fefeka mokā talanoa ki te hahaʼi ʼo te mālama. Ko te kupu “malama” ʼe fakaʼaogaʼi e Paulo ki hona faka ʼuhiga kovi, ʼi tana talanoa ki “te poto o te malama aeni” pea mo “te u holi fakamalama.” (1 Kolonito 3:19; Tito 2:12) Tahi ʼaē meʼa, neʼe fakamanatuʼi e Paulo ki te kau Kilisitiano ʼo Efeso, ʼi te temi ʼaē neʼe nātou haʼele ai “o fai ki te aluaga o te malama-nei,” neʼe nātou “mamate” ʼi te faʼahi fakalaumālie. (Efeso 2:1-3) Ko te ʼu palalau ʼaia pea mo te tahi ʼu palalau feiā, ʼe ʼalutahi mo te ʼu palalau ʼa te ʼapositolo ko Soane: “E mauli te malama-nei katoa i te Kovi.”—1 Soane 5:19.
15. ʼO ʼuhiga mo te hahaʼi ʼaē ʼe mole kau ki kokelekasio faka Kilisitiano, koteā ʼaē ʼe mole tou fai pea koteā tona tupuʼaga?
15 Kae koutou manatuʼi, ko te ʼu palalau ʼaia ʼe faka ʼuhiga ki te mālama katoa ʼaē ʼe mamaʼo ʼi te ʼAtua, ka mole faka ʼuhiga ki te hahaʼi takitokotahi. ʼE mole tonu ki te kau Kilisitiano ke nātou ʼui fakatomuʼa pe ko ai ʼaē ka ina tali anai te gāue fai faka mafola. ʼE mole feala ke nātou ʼiloʼi papau pe ko ai te ʼu hahaʼi ʼaē ʼe hage ko he ʼu tao. ʼE mole ʼa tatou te ʼui peʼe iku feafeaʼi anai te vaheʼi kehe e Sesu “te u ovi” mai “te u tao.” (Mateo 25:31-46) Ko Sesu ʼaē neʼe fakanofo ke tuʼi fakamāu, ka mole ko tatou. Tahi ʼaē meʼa, ʼe lahi te ʼu faʼifaʼitaki neʼe nātou fakahā mai, ko ʼihi hahaʼi neʼe nātou fai te ʼu meʼa kovi ʼaupito, kae neʼe nātou tali te logo ʼo te Tohi-Tapu, mo nātou fetogi tonatou maʼuli, pea kua nātou liliu ko he kau Kilisitiano ʼe maʼuli maʼa. Koia, logola ʼe ʼi ai te ʼu hahaʼi ʼe mole tou fakakaugā anai mo nātou, kae ʼe tou palalau age anai kia nātou ʼo ʼuhiga mo te ʼamanaki ʼo te Puleʼaga, mo kapau ʼe tou maʼu he temi faigamālie ki te faʼahi ʼaia. ʼE talanoa te Tohi-Tapu ki te ʼu hahaʼi, logola neʼe mole heʼeki nātou tui, kae “neʼe nātou lotolelei ki te maʼuli heʼegata.” Ki muli age neʼe nātou liliu ko te kau Kilisitiano. (Gaue 13:48, MN ) ʼE mole tou lava ʼiloʼi papau pe ko ai ʼaē ʼe lotolelei ki te moʼoni, koia ʼaē ʼe tonu ai ke tou faka mafola kia nātou—ʼo lagi tou fai liuliuga anai. Kapau ʼe tou manatuʼi te faʼahi ʼaia, pea ʼe tonu anai ke tou “agamālū” pea mo “fakaʼapaʼapa lahi” ki te hahaʼi ʼaē ʼe mole heʼeki nātou tali te logo ʼo te hāofaki, ʼo tou fakaʼamu ko ʼihi ia nātou ʼe nātou tali anai te logo ʼo te maʼuli.—2 Timoteo 2:25, MN; 1 Petelo 3:15, MN.
16. He koʼe ʼe tou fia fakatuputupu tatatou “poto faiakonaki”?
16 Kapau ʼe tou gāueʼi totatou ʼu fealagia ʼo totatou ʼuhiga faiako, pea ʼe tou fakaʼāsili anai totatou lotomālohi ke tou tala te logo lelei. Ohage la: ʼE mole lagi leleiʼia e he tahi he faʼahiga gaoʼi pe ko he faigaoʼi, koteʼuhi ʼe mole poto ʼi te gaoʼi ʼaia. Kae ko he tahi ʼe poto lelei ʼi te gaoʼi ʼaia, ʼe ina leleiʼia. ʼO toe feiā pe, ko te kau Kilisitiano ʼaē ʼe nātou gāueʼi te “poto faiakonaki,” ʼe nātou fakaʼāsili anai tanatou fiafia ʼi te minisitelio. (2 Timoteo 4:2, MN; Tito 1:9, MN ) Neʼe tokoniʼi fēnei e Paulo ia Timoteo: “Faigai ia koe, o hage ko he tagata kua tuha ke ke tuu ia mua o te Atua, ko he tagata gaue e mole ufiufi, e ina [“fakaʼaogaʼi lelei,” MN ] te folafola o te mooni.” (2 Timoteo 2:15) ʼE tou lava fakatuputupu feafeaʼi totatou ʼu fealagia ʼi te faiakonaki?
17. Koteā ʼaē ʼe tonu ke tou fai moʼo “holi mālohi” ki te ʼatamai mālama ʼa te Tohi-Tapu, pea ʼe ʼaoga feafeaʼi anai te ʼatamai mālama ʼaia ki totatou minisitelio?
17 Moʼo fai te faʼahi ʼaia, ʼe lelei ke tou fakalahi totatou ʼatamai mālama totonu. Neʼe fai mai e te ʼapositolo ko Petelo te fakaloto mālohi ʼaenī: “Ohage ko he ʼu fanau meamea, koutou holi mālohi ki te huʼa pipi maʼa ʼo te folafola, ke feala ʼaki te meʼa ʼaia ke koutou tuputupu ki te hāofaki.” (1 Petelo 2:2, MN ) Ko te kiʼi tamasiʼi ʼaē ʼe kei meamea, ʼe mole ko he meʼa ʼe fakakinauʼi tana ʼinu te huʼa pipi. Kae ko he Kilisitiano ʼe lagi tonu anai ke “maʼu [hona] holi mālohi” ki te ʼatamai mālama ʼo te Tohi-Tapu. Moʼo fai te faʼahi ʼaia, ʼe tonu ke ina taupau he ʼu agamāhani lelei, ohage ko te ako takitokotahi pea mo te lautohi. (Tāʼaga Lea 2:1-6) ʼE maʼua ke tou faiga mālohi pea mo tou fakakinauʼi tatou, mo kapau ʼe tou fia liliu ko he kau faiako faiva ʼo te Folafola ʼa te ʼAtua, pea ʼe fakapale anai tatou ʼi tatatou ʼu faiga ʼaia. ʼUhi ko te fiafia ʼaē ʼe tou maʼu mokā tou lau ia te Folafola ʼa te ʼAtua, ʼe tou ulo anai ʼi te laumālie ʼo te ʼAtua pea mo tou lotomālohi anai ke tou fakahā ki te hahaʼi te ʼu meʼa ʼaē ʼe tou ako.
18. ʼE lava tokoni feafeaʼi mai te ʼu fono faka Kilisitiano ke tou popoto ʼi te fakaʼaogaʼi lelei te folafola ʼo te moʼoni?
18 Tahi ʼaē meʼa, ko te ʼu fono ʼe nātou maʼuhiga, heʼe nātou akoʼi tatou ke tou popoto ʼi te fakaʼaogaʼi ia te Folafola ʼa te ʼAtua. Ka lau he ʼu vaega Tohi-Tapu lolotoga he akonaki, pea ʼe lelei ke tou mulimuli ʼi tatatou Tohi-Tapu. ʼE lelei ke tou fakalogo lelei ki te ʼu koga kehekehe ʼo te ʼu fono, ʼo feiā mo te ʼu koga ʼaē ʼe pipiki tāfito ki tatatou gāue faka mafola. ʼAua naʼa tou manatu, ʼe mole maʼuhiga peʼe mole tou sioʼi fakalelei te ʼu faʼifaʼitaki ʼaē ʼe fai ʼo ʼuhiga mo te minisitelio. Koia ʼe maʼua ai ke kita lolomi ia kita pea mo kita fakalogo lelei. (1 Timoteo 4:16) Ko te ʼu fono faka Kilisitiano ʼe nātou fakamālohiʼi tatatou tui, ʼe tokoni mai ke tou fia ako fakamalotoloto te Folafola ʼa te ʼAtua, pea ʼe ina akoʼi tatou ke tou liliu ko he kau fai faka mafola mālohi ʼo te logo lelei.
Tou Falala ʼe Lagolago Anai Sehova Kia Tatou
19. He koʼe ʼe maʼuhiga ke tou kau tuʼumaʼu ki te fai faka mafola?
19 Ko te kau Kilisitiano ʼaē ʼe nātou “ulo ʼi te laumālie” pea mo nātou fia tala te logo lelei ʼaki he lotomālohi, ʼe nātou faiga mālohi ke nātou kau tuʼumaʼu ki te minisitelio. (Efeso 5:15, 16) ʼE moʼoni, ʼe kehekehe te ʼu ʼaluʼaga ʼo te kau Kilisitiano, pea ʼe mole feala ke tatau fuli te temi ʼaē ʼe tou fakaʼaogaʼi ki te gāue ʼaē ko te hāofaki ʼo te hahaʼi. (Kalate 6:4, 5) Ko tatatou palalau tuʼumaʼu ki te hahaʼi ʼo ʼuhiga mo tatatou ʼamanaki ʼe maʼuhiga age ia ʼi te temi ʼaē ʼe tou fakaʼaogaʼi ki te fai faka mafola. (2 Timoteo 4:1, 2) Kapau ʼe lahi tatatou fai faka mafola, pea ʼe tou mahino lahi anai ki te maʼuhiga ʼo te gāue ʼaia. (Loma 10:14, 15) ʼE lahi anai totatou manavaʼofa pea mo totatou ʼofa, mokā tou felāveʼi anai mo te hahaʼi fakamalotoloto, ʼaē ʼe toʼetoʼe mo lotomamahi pea ʼe mole ʼi ai hanatou ʼamanaki.—Esekiele 9:4; Loma 8:22.
20, 21. (a) Koteā te gāue ʼaē ʼe kei toe ke fai? (b) ʼE lagolago feafeaʼi ia Sehova ki tatatou faiga?
20 Neʼe tuku mai e Sehova te logo lelei kia tatou. ʼE ko te ʼuluaki gāue ʼaia ʼaē neʼe ina tuku mai, heʼe tou “kauga gaue” mo ia. (1 Kolonito 3:6-9) ʼE tou fia fakahoko ʼaki totatou nefesi katoa, pea mo totatou ʼu fealagia fuli, te gāue ʼaē neʼe tuku mai e te ʼAtua. (Maleko 12:30; Loma 12:1) ʼE kei lahi te hahaʼi ʼi te malamanei, ʼe nātou lotolelei pea mo fia fai ki te moʼoni. ʼE kei lahi te gāue ʼaē ʼe tonu ke fai, kae ʼe tou lava falala ʼe lagolago anai ia Sehova kia tatou, mo kapau ʼe tou fakahoko katoa totatou minisitelio.—2 Timoteo 4:5.
21 ʼE tuku mai e Sehova tona laumālie, pea mo “te heleta a te Laumalie,” ʼaē ko te Folafola ʼa te ʼAtua. ʼAki tana tokoni, ʼe tou lava palalau “ ʼaki he lototoʼa moʼo fakahā te meʼa fakalilo ʼo te logo lelei.” (Efeso 6:17-20, MN ) ʼOfa pe ke fakaʼaogaʼi te ʼu palalau ʼaē neʼe fai e te ʼapositolo ko Paulo ki te kau Kilisitiano ʼo Tesalonika: “Ko te logo lelei ʼaē ʼe mātou faka mafola, neʼe mole fakahā atu kia koutou, ʼaki pe te ʼu palalau, kae neʼe toe fai foki ʼaki te mālohi, ʼaki te laumālie maʼoniʼoni pea mo he tui papau.” (1 Tesalonika 1:5, MN ) Ei, tou tala te logo lelei ʼaki he lotomālohi!
Te Fakamanatu Fakanounou
• ʼAki te ʼu tuʼania ʼo te maʼuli, koteā ʼaē ʼe lava hoko ki tatatou faʼafai ʼi te minisitelio?
• Ko te ʼaluʼaga fea ʼaē ʼe tonu ai ke hage tatatou fia tala te logo lelei, “ko he afi kakaha” ʼi totatou loto?
• ʼO ʼuhiga mo te minisitelio, koteā te ʼu manatu kovi ʼaē ʼe tonu ke tou tekeʼi?
• Koteā te manatu ʼaē ʼe tonu ke tou maʼu ʼo ʼuhiga mo te hahaʼi ʼo te mālama?
• ʼE tokoni feafeaʼi mai ia Sehova ke tou taupau tatatou faʼafai ʼi te fai faka mafola?
[Paki ʼo te pasina 9]
Ko te kau Kilisitiano ʼe nātou faʼifaʼitaki ki te faʼafai ʼa Selemia mo Paulo
[Paki ʼo te pasina 10]
ʼE tou gāue mālohi ʼi te minisitelio, heʼe tou ʼofa ki te ʼAtua pea mo te hahaʼi