Kei Koutou Manatuʼi Koa?

Neʼe koutou leleiʼia koa takotou lau te ʼu Tule Leʼo fakamuli? Pea koutou vakaʼi la peʼe koutou lava tali ki te ʼu fehuʼi ʼaenī:

• Koteā ʼaē ʼe maʼuhiga ki tatatou fakatokatoka ʼo he fihifihia mo he tahi?

ʼE tonu muʼa ke mahino kia tatou fuli, ʼe feala pe ke tou faihala ʼi tatatou ʼu manatu pea mo tatatou ʼu aga. Koia ʼe tonu ai ke tou vakavakaʼi fakalelei heʼe lagi haʼu pe te fihifihia mai ia kita totonu.​—15/8, pasina 23.

• ʼE hoko ʼafea ‘te ʼu temi ʼo te fakafoʼou ʼo te meafuape,’ ʼaē ʼe tuʼu ia Gaue 3:21?

Ko te fakafoʼou ʼaia ʼe hoko ʼi ʼona ʼaluʼaga e lua. ʼUluaki, ʼe ʼi ai te fakafoʼou ʼi te palatiso fakalaumālie, ʼaē ʼe lolotoga hoko talu mai te 1919. Ko te tahi fakafoʼou ʼe hoko anai mokā fakatuʼu te palatiso ʼi te kele.​—1/9, pasina 17, 18.

• Ia Tāʼaga Lea 6:6-8, koteā te faʼifaʼitaki lelei ʼaē ʼe tuku mai e te foʼi lō ʼaē ʼe mole hona kamutoa?

ʼI te nofoʼaga ʼo te ʼu lō, ʼe ʼi ai te fineʼaliki, kae ʼe fineʼaliki pe ia mai tona ʼuhiga ʼaē ʼe ina fakatō tona ʼu fua, pea ʼe ko ia te faʼe ʼo te ʼu lō ʼo te nofoʼaga ʼaia. ʼE faʼa gāue te ʼu foʼi lō, pea ʼe tonu mo tatou ke tou feiā, ʼo tou faigaʼi ke hikihiki tatatou gāue, tatau aipe peʼe mole leʼoleʼo tatou.​—15/9, pasina 26.

• Neʼe moʼoni koa te lea faka polofeta ʼa Ulita, ʼaē ʼe fakamatala ia 2 Hau 22:20, ʼi tana ʼui ʼaē neʼe mate “fīmālie” ia mai te ʼaluʼaga ʼaē neʼe mate lavea ʼi te tau?

Ei, neʼe mate fīmālie mai tona ʼuhiga ʼaē neʼe mate ʼi muʼa ʼo te hoko ʼo te malaʼia ʼi te ʼu taʼu 609-607 ʼi muʼa ʼo totatou temi, ʼi te temi ʼaē neʼe puleʼi ai pea mo fakaʼauha ai ia Selusalemi e te kau Papiloni.​—15/9, pasina 30.

• He koʼe ʼe tou ʼui neʼe ko he vikiviki ʼa Salomone tana fakatatau ia he fafine ʼohoana ki he “tia fafine agalelei pea mo he tao fafine matalelei ʼo te ʼu moʼuga”? (Tāʼaga Lea 5:18, 19)

ʼE matalelei te agaaga ʼo te sino ʼo te tao fafine ʼo te ʼu moʼuga. Kae ʼe lava maʼuli pea mo ina faʼeleʼi tona ʼu kiʼi ʼuhi ʼi te ʼu mata maka, ʼaē ʼe faigataʼa he fakakaku kiai pea maʼugataʼa ʼi ai te meʼa kai.​—1/10, pasina 30, 31.

• Neʼe ko ai ia Henry Grew pea mo George Storrs?

Ko te ʼu tagata ʼaia e lua neʼe maʼuʼuli ʼi te ʼu taʼu 1800 pea neʼe ko te ʼu tagata ako Tohi-Tapu fakamalotoloto. Neʼe ako e Grew ko te Tahitolu, mo te nefesi tuputupua pea mo te ʼifeli neʼe ko te ʼu akonaki ʼe mole fakatafito ki te Tohi-Tapu. Neʼe mahino kia Storrs ʼe ʼi ai te hahaʼi ʼe nātou maʼuʼuli anai ʼo heʼegata ʼi te kele. Neʼe nā muʼamuʼa ia Charles Taze Russell, ʼaē neʼe ina kamata tā te nusipepa ʼaenī ʼi te 1879.​—15/10, pasina 26 ki te 30.

• Koteā te manatu ʼa te kau Fakamoʼoni ʼa Sehova ʼo ʼuhiga mo te ʼu faitoʼo ʼaē ʼe nātou fakaʼaogaʼi ai tokita toto?

ʼI tanatou fakatafito tanatou tui ki te Tohi-Tapu, ʼe mole nātou tānaki tonatou toto pea ki muli age ʼo nātou toe ʼai ohage ko he foʼi huki toto. ʼE ʼa te Kilisitiano takitokotahi te vakaʼi ʼo te faʼahi ʼaia, peʼe gaohi feafeaʼi anai tona toto lolotoga he tafa, peʼe lolotoga he sivi, peʼe lolotoga he faitoʼo. ʼE tonu ke ina tokagaʼi te manatu ʼa te Tohi-Tapu ʼo ʼuhiga mo te toto, pea mo manatuʼi kua ina foaki tona maʼuli katoa ki te ʼAtua.​—15/10, pasina 30, 31.

• ʼI te sivi ʼaē neʼe fai ʼi te kamataʼaga ʼo te taʼu 2000, koteā te koga maʼuhiga ʼaē ʼe ʼaoga ki te kau Fakamoʼoni ʼa Sehova ʼi te kele katoa?

ʼE ʼaoga ke laga he ʼu Fale ʼo te Puleʼaga e 11 000 tupu ʼi te ʼu fenua ʼaē ʼe faigataʼa ai te maʼuli, ʼaē ʼe mole faʼa lelei ai te ʼaluʼaga faka ekonomika. Ko te ʼu meʼa ʼofa ʼaē mai te kau Kilisitiano ʼo te ʼu fenua kehekehe, ʼe fakaʼaogaʼi moʼo lagolago ki te laga ʼo he ʼu fale fono ʼe tau mo feʼauga.​—1/11, pasina 30.

• Koteā te ʼu kupuʼi palalau ʼo te lea faka Keleka ʼaē ʼe fakaʼaogaʼi e te Tohi-Tapu moʼo palalau ki te tauhi?

ʼE ʼi ai te kupu lei·tour·giʹa, ʼaē ʼe fakaliliu ʼaki te kupu ʼaē ko te “tauhi ki te hahaʼi.” Ko te lua kupu ko te la·treiʹa, ʼaē ʼe fakaliliu ʼaki te kupu “tauhi taputapu.” (Hepeleo 10:11; Luka 2:36, 37)​—15/11, pasina 11, 12.

• Koteā te ako maʼuhiga ʼaē ʼe tou maʼu ʼi te fakamatala faka Tohi-Tapu ʼaē ʼo ʼuhiga mo Atama pea mo Eva?

Ko te faiga fuli ke kita faʼifaʼitaliha mai ia Sehova ʼAtua ʼe ko he aga fakavale ia.​—15/11, pasina 24 ki te 27.

• ʼE ʼi ai he fakamoʼoni faka Tohi-Tapu ʼo te fakamālohiʼi e te ʼAtua tana kau kaugana?

Neʼe fakahā e Tavite, mo Hapakuke, pea mo te ʼapositolo ko Paulo te ʼu fakamoʼoni ʼo te fakamālohiʼi ʼo nātou fuli ʼaia e Sehova ʼAtua. (Pesalemo 60:12; Hapakuke 3:19; Filipe 4:13) Koia, ʼe feala hatatou falala ki te lotolelei ʼa te ʼAtua pea mo tana lava fakamālohiʼi ʼo tatou.​—1/12, pasina 10, 11.