Tou Haga Tauhi Kia Sehova ʼAki He Loto ʼe Mālohi

“Kua mālohi toku loto, Ê ʼAtua, kua mālohi toku loto.”—Pesalemo 57:7.

1. He koʼe ʼe feala ke tou falala ohage ko Tavite?

ʼE LAVA fakaliliu tatou e Sehova ke tou mālohi ʼi te tui, ke feala ai hatatou pipiki ki te lotu faka Kilisitiano moʼoni, heʼe ko tatou ko tana ʼu kaugana kua foaki totatou maʼuli kia te ia. (Loma 14:4) Koia ʼe feala hatatou falala ohage ko te tagata fai pesalemo ko Tavite, ʼaē neʼe hiva fēnei: “Kua mālohi toku loto, Ê ʼAtua.” (Pesalemo 108:1) Kapau ʼe mālohi totatou loto, pea ʼe tou agatonu anai ki tatatou foaki ʼo totatou maʼuli ki te ʼAtua. Pea ʼi tatatou kumi tana takitaki pea mo tona mālohi, ʼe mole tou vaivavai anai, kae ʼe tou taupau mālohi anai tatatou fakatotonu ʼaia, pea mo tou falala ʼo nonofo agatonu, pea mo “lahi tuʼumaʼu [tatatou] ʼu gāue ʼi te ʼAliki.”—1 Kolonito 15:58, MN.

2, 3. Koteā te faka ʼuhiga ʼo te ʼu tokoni ʼa Paulo ʼaē ʼe tuʼu ia 1 Kolonito 16:13?

² ʼI tana ʼu tokoni ki te ʼu tisipulo ʼa Sesu ʼo te kolo ʼāfea ʼo Kolonito, ʼaē ʼe toe ʼaoga pe foki ki te kau Kilisitiano ia ʼaho nei, neʼe ʼui fēnei e te ʼapositolo ko Paulo: “Koutou nonofo ʼalaʼala, koutou nonofo mālohi ʼi te tui, koutou aga ohage ni tagata, koutou liliu ʼo mālolohi.” (1 Kolonito 16:13, MN ) ʼI te faka Keleka, ko te ʼu fakatotonu ʼaenī ʼa te ʼapositolo ko Paulo ʼe ina uga ai tatou ke hoko atu tatatou ʼu faiga. Koteā te faka ʼuhiga ʼo te tokoni ʼaia?

³ ʼE feala ke tou “nonofo ʼalaʼala” ʼi te faʼahi fakalaumālie, mo kapau ʼe tou fakafeagai ki te Tevolo pea mo tou fakaōvi ki te ʼAtua. (Sakopo 4:7, 8) Kapau ʼe tou falala kia Sehova pea ʼe mole feala anai ke maumauʼi totatou logo tahi, pea ʼe tou ‘nonofo mālohi anai ʼi te tui faka Kilisitiano.’ Ko tatou—ʼo feiā mo te ʼu fafine kaugamālie ʼo totatou ʼu kokelekasio—ʼe tou “aga ohage ni tagata” ʼo tou tauhi ʼaki he lototoʼa ki te ʼAtua, ʼi totatou ʼuhiga kaugā fai faka mafola ʼo te Puleʼaga. (Pesalemo 68:11) ʼE tou “liliu ʼo mālolohi” heʼe tou kole tuʼumaʼu ki tatatou Tāmai ʼaē ʼi selo, ke ina foaki mai tona mālohi moʼo fai tona finegalo.—Filipe 4:13.

4. Koteā ʼaē neʼe ina taki tatou ki te papitema?

⁴ Neʼe tou fakahā tatatou tali te tui moʼoni ʼi te temi ʼaē neʼe tou foaki ai totatou maʼuli katoa kia Sehova pea mo fakahā ʼi tatatou papitema. Kae koteā ʼaē neʼe ina taki tatou ki te papitema? ʼUluaki, neʼe tou maʼu te ʼatamai mālama totonu ʼo ʼuhiga mo te Folafola ʼa te ʼAtua. (Soane 17:3) Neʼe tou maʼu ai leva te tui pea uga ai tatou ke tou fakahemala, ʼo tou lotomamahi moʼoni ʼo ʼuhiga mo te ʼu aga kovi ʼo totatou maʼuli ʼāfea. (Gaue 3:19; Hepeleo 11:6) Pea neʼe tou tafoki, he neʼe tou maliu mai te ʼu aga kovi ʼaē neʼe tou fai, ʼo tou faka ʼalutahi totatou maʼuli mo te finegalo ʼo te ʼAtua. (Loma 12:2; Efeso 4:23, 24) ʼOsi ʼaia pea neʼe tou faikole ʼo foaki totatou maʼuli kia Sehova. (Mateo 16:24; 1 Petelo 2:21) Neʼe tou kole ki te ʼAtua he leʼo ʼo loto ʼe maʼa pea mo tou papitema moʼo fakahā kua tou foaki totatou maʼuli kia te ia. (1 Petelo 3:21) Kapau ʼe tou fakakaukauʼi te ʼu faʼahi ʼaia, pea ʼe tokoni mai anai kia tatou ke tou tokaga ʼo faiga tuʼumaʼu ke tou agatonu ki te kua foaki ʼo totatou maʼuli, pea mo tou haga tauhi kia Sehova ʼaki he loto ʼe mālohi.

Tou Haga Kumi Te ʼAtamai Mālama Totonu

5. He koʼe ʼe tonu ke hoko atu tatatou mahino ki te ʼatamai mālama ʼo te Tohi-Tapu?

⁵ Moʼo fakahā kua tou foaki totatou maʼuli ki te ʼAtua, ʼe tonu ke hoko atu tatatou maʼu te ʼatamai mālama ʼo te Tohi-Tapu, moʼo fakaloto mālohiʼi tatatou tui. Neʼe tou fiafia ʼaupito ʼi tatatou kai te meʼa kai fakalaumālie, ʼi te temi ʼaē neʼe tou ʼuluaki ʼiloʼi ai te moʼoni ʼo ʼuhiga mo te ʼAtua! (Mateo 24:45-47) Neʼe tou leleiʼia ʼaupito te ʼu “meʼa kai” ʼaia—pea neʼe tou makokona ai ʼi te faʼahi fakalaumālie. ʼI te temi nei, ʼe maʼuhiga ke tou haga kai te meʼa kai fakalaumālie, ke mālohi tuʼumaʼu totatou loto, heʼe ko tatou ko te ʼu kaugana kua foaki totatou maʼuli kia Sehova.

6. Koteā ʼaē neʼe lagi tokoni atu ke koutou loto fakafetaʼi ʼo ʼuhiga mo te moʼoni ʼo te Tohi-Tapu?

⁶ ʼE tonu ke tou faiga lahi ke hoko atu tatatou mahino ki te Tohi-Tapu. ʼE hage ko hatatou faiga mālohi moʼo kumi he ʼu koloā neʼe fufū. Kae ʼe lahi tatatou fiafia mokā tou maʼu “te ʼatamai mālama ʼo ʼuhiga mo te ʼAtua.” (Tāʼaga Lea 2:1-6) Ko ia ʼaē neʼe ina kamata fai takotou ako Tohi-Tapu, neʼe lagi ina fai ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Neʼe lagi loaloaga takotou fai palalau ki he kapite, pea neʼe mole lagi fai tuʼa tahi pe. Neʼe fua lelei kia koutou takotou lau pea mo fai palalau ki te ʼu vaega Tohi-Tapu ʼaē ʼe tuʼu ai. Ko te ʼu puani ʼaē neʼe mole koutou mahino kiai, neʼe fakamahino atu. Ko ia ʼaē neʼe ina fai takotou ako, neʼe ina teuteuʼi lelei, mo ina kole te laumālie ʼa te ʼAtua, pea mo tokoni atu ke tupu ia koutou he loto fakafetaʼi ʼo ʼuhiga mo te moʼoni.

7. Koteā ʼaē ka tokoni anai ki he tahi ke ina lava ako ki te hahaʼi te moʼoni ʼo ʼuhiga mo te ʼAtua?

⁷ Neʼe ʼaoga te faiga ʼaia, he neʼe tohi fēnei e Paulo: “Ko ʼaē ʼe ako ki ai te folafola, ke ina vaevae te ʼu meʼa lelei fuape mo ia ʼaē ʼe ina fai te ako ʼaia.” (Kalate 6:6, MN ) Ko te vaega ʼaia faka Keleka ʼe ina fakahā mai ko te akoʼi ʼo te Folafola ʼa te ʼAtua neʼe fai ki te ʼatamai pea mo te loto ʼo ia ʼaē “neʼe fakaʼako.” ʼE akoʼi ai koutou ke feala hakotou akoʼi he tahi age ʼu hahaʼi. (Gaue 18:25) Ke koutou agatonu ki takotou foaki ʼo tokotou maʼuli ki te ʼAtua, ʼe tonu ke lelei pea mo mālohi tokotou maʼuli fakalaumālie, ʼo koutou haga ako te Folafola ʼa te ʼAtua.—1 Timoteo 4:13; Tito 1:13; 2:2.

Koutou Manatuʼi Takotou Fakahemala Pea Mo Takotou Tafoki

8. ʼE lava feafeaʼi hatatou taupau he aga ʼe leleiʼia e te ʼAtua?

⁸ ʼE kei koutou manatuʼi koa takotou logo fīmālie ʼi takotou ʼiloʼi ia te moʼoni, mo takotou fakahemala, pea mo takotou ʼiloʼi te fakamolemole ʼa te ʼAtua ʼaē ʼe fakatafito ki te tui ki te sakilifisio faitotogi ʼa Sesu? (Pesalemo 32:1-5; Loma 5:8; 1 Petelo 3:18) ʼE mahino papau ia ʼe mole koutou loto ke koutou toe liliu ki tokotou maʼuli agahala. (2 Petelo 2:20-22) Ko takotou faikole tuʼumaʼu kia Sehova ʼe tokoni lahi anai kia koutou ke koutou fai tuʼumaʼu te aga ʼaē ʼe leleiʼia e te ʼAtua, ke koutou agatonu ki takotou foaki ʼo tokotou maʼuli kia te ia, pea mo koutou haga tauhi agatonu kia Sehova.—2 Petelo 3:11, 12.

9. ʼI takotou maliu mai te ʼu aga ʼaē ʼe kovi, koteā ʼaē ʼe tonu ke koutou mulimuli kiai?

⁹ Kua koutou tafoki heʼe kua koutou maliu mai takotou ʼu aga ʼaē ʼe kovi, koia ʼe tonu ai ke koutou haga kole ki te ʼAtua ke tokoni atu ke mālohi tuʼumaʼu tokotou loto. ʼI hona ʼaluʼaga fakatātā, neʼe mole tonu te ala ʼaē neʼe koutou haʼele ai, kae neʼe koutou vakaʼi te mape pea neʼe koutou kamata haʼele ai leva ʼi te ala ʼaē ʼe totonu. ʼE mole ko he temi ʼaenī ke koutou hēhē ai. Koutou haga falala ki te takitaki ʼa te ʼAtua, pea mo koutou fakatotonu ke koutou haʼele tuʼumaʼu ʼi te ala ʼo te maʼuli.—Isaia 30:20, 21; Mateo 7:13, 14.

ʼAua Naʼa Galo Kia Koutou Kua Foaki Tokotou Maʼuli Pea Kua Koutou Papitema

10. Koteā te ʼu faʼahi ʼe tonu ke tou manatuʼi ʼo ʼuhiga mo te foaki ʼo totatou maʼuli ki te ʼAtua?

¹⁰ Koutou manatuʼi neʼe koutou foaki tokotou maʼuli kia Sehova ʼi te faikole, ʼaki te fakatuʼutuʼu ʼaē ke koutou tauhi ʼo heʼegata kia te ia. (Suta 20, 21) Ko te foaki ʼo tokita maʼuli ki te ʼAtua, ko tona faka ʼuhiga ʼe tuku keheʼi kita, ke fakaʼaogaʼi ki he gāue taputapu. (Levitike 15:31; 22:2) Neʼe mole koutou foaki tokotou maʼuli ki he kiʼi temi nounou pea neʼe mole ko hakotou fakapapau ki he tagata. Neʼe koutou foaki tokotou maʼuli ʼo talu ai ki te Tuʼi ʼAliki ʼo te ʼAtulaulau, pea moʼo fakahoko te faʼahi ʼaia, ʼe tonu ke koutou agatonu ki te ʼAtua ʼo aʼu ki takotou mate. Ei, ‘peʼe tou maʼuʼuli peʼe tou mamate, ko tatou ʼe ʼa Sehova.’ (Loma 14:7, 8) ʼE fakalogo totatou fiafia ki tatatou mulimuli ki tona finegalo pea mo tatatou haga tauhi kia te ia ʼaki he loto ʼe mālohi.

11. He koʼe ʼe tonu ke koutou manatuʼi takotou papitema pea mo tona faka ʼuhiga?

¹¹ Koutou manatuʼi tuʼumaʼu takotou papitema moʼo fakahā takotou kua foaki katoa ʼo tokotou maʼuli ki te ʼAtua. Neʼe mole fakakinauʼi koutou, he neʼe ko te tonu neʼe koutou fai tokotahi. ʼI te temi nei, ʼe koutou loto moʼoni koa ke mulimuli tokotou loto ki te finegalo ʼo te ʼAtua ʼo aʼu ki takotou mate? Neʼe koutou kole ki te ʼAtua he leʼo ʼo loto ʼe maʼa pea neʼe koutou papitema moʼo fakahā kua foaki tokotou maʼuli kia te ia. Koutou taupau tokotou leʼo ʼo loto ke maʼa, ʼo koutou agatonu ki takotou foaki ʼo tokotou maʼuli ki te ʼAtua, pea ʼe koutou maʼu anai te ʼu tapuakina lahi ʼa Sehova.—Tāʼaga Lea 10:22.

ʼE Maʼuhiga Ke Koutou Fakakaukau

12, 13. ʼE pipiki feafeaʼi tatatou fakakaukau ki tatatou foaki ʼo totatou maʼuli ki te ʼAtua pea mo papitema?

¹² ʼI tanatou foaki tonatou maʼuli pea mo nātou papitema, neʼe maʼu ai e te lauʼi miliona hahaʼi ʼi te kele katoa te ʼu fua lelei. ʼI tatatou fakahā tatatou kua foaki totatou maʼuli ki te ʼAtua ʼi te papitema, neʼe tou līaki ai totatou maʼuli ʼāfea, kae neʼe kei feala pe ke tou fakaʼaogaʼi tatatou fakakaukau. Neʼe akoʼi fakalelei tatou ʼo ʼuhiga mo te ʼAtua, koia neʼe ko tatou totonu ʼaē neʼe tou foaki totatou maʼuli ki te ʼAtua ʼi te faikole pea mo tou papitema. Ke tou foaki totatou maʼuli ki te ʼAtua pea mo papitema, ʼe tonu ke tou ʼiloʼi pe koteā te finegalo ʼo te ʼAtua pea ke tou filifili totonu ke tou mulimuli kiai. (Efeso 5:17) ʼE tou faʼifaʼitaki ai kia Sesu, ʼaē neʼe ina filifili totonu ke ina tuku tana gāue tufuga ʼakau, ke ʼalu ʼo papitema, pea mo ina foaki katoa ia ia moʼo fai te finegalo ʼo tana Tāmai ʼi selo.—Pesalemo 40:7, 8; Soane 6:38-40.

¹³ Neʼe fakatuʼutuʼu e Sehova ʼAtua ke liliu tona ʼAlo ʼo “haohaoa . . . [ʼi te] ʼu mamahi.” Pea neʼe tonu ke mulimuli kiai te loto ʼo Sesu ke agatonu ʼo kātakiʼi te ʼu mamahi ʼaia. Moʼo fakahoko te faʼahi ʼaia, neʼe “ina momoli ʼaki te ʼu lāuga mālohi pea mo te ʼu loʼimata, tana ʼu kole mamahi pea mo tana ʼu tagi . . . pea neʼe tali lelei ia ia ʼuhi ko tana manavasiʼi.” (Hepeleo 2:10, 18; 5:7, 8, MN ) Kapau ʼe tou maʼu mo tatou te manavasiʼi ʼaia ki te ʼAtua, pea ʼe mahino ia ʼe ‘tali anai’ tatou, pea ʼe feala ke tou falala ko Sehova ʼe ina foaki mai anai te mālohi, he ko tatou ko tana ʼu Fakamoʼoni kua tou foaki totatou maʼuli kia te ia.—Isaia 43:10.

ʼE Feala Ke Koutou Taupau He Loto ʼe Mālohi

14. He koʼe ʼe tonu ke tou lau te Tohi-Tapu ʼi te ʼaho fuli?

¹⁴ Koteā ʼaē ka tokoni anai kia koutou ke koutou taupau he loto ʼe mālohi pea mo koutou agatonu ki takotou foaki ʼo tokotou maʼuli ki te ʼAtua? Koutou lau ʼi te ʼaho fuli te Tohi-Tapu, ʼaki te fakatuʼutuʼu ʼaē ke tuputupu tuʼumaʼu takotou ʼatamai mālama ʼo ʼuhiga mo te Folafola ʼa te ʼAtua. ʼE fakaloto mālohiʼi tuʼumaʼu tatou e te “kaugana agatonu mo fakapotopoto” ke tou fai te faʼahi ʼaia. ʼE fai mai te tokoni ʼaia, koteʼuhi kapau ʼe tou fia agatonu ki tatatou foaki ʼo totatou maʼuli ki te ʼAtua, pea ʼe tonu ke tou haga haʼele ʼi te moʼoni ʼa te ʼAtua. Kapau la neʼe fakagafua e te kautahi ʼa Sehova te ʼu akonaki loi, pea ʼe mole ina fakaloto mālohiʼi anai ke lau te Tohi-Tapu e te kau Fakamoʼoni ʼa Sehova pea mo te hahaʼi ʼaē ʼe nātou fai faka mafola ki ai.

15. (a) Koteā ʼaē ʼe tonu ke tou vakaʼi mokā tou fai he ʼu tonu? (b) He koʼe ʼe feala ke tou ʼui ko te gāue fakamālama ʼe mole ko te meʼa tāfito ʼaē ʼe tokaga kiai te Kilisitiano?

¹⁵ Ka koutou fai he ʼu tonu, pea koutou vakaʼi tuʼumaʼu peʼe feala anai ke koutou agatonu ki takotou foaki ʼo tokotou maʼuli kia Sehova. Ohage la ko takotou gāue fakamālama. ʼE koutou faiga koa ke tokoni atu te gāue ʼaia ke fakahaʼele ki muʼa ia te tauhi moʼoni? ʼE tokagaʼi e te ʼu patolo ko te kau Kilisitiano ʼaē kua foaki tonatou maʼuli ki te ʼAtua, ʼe nātou fakalogo pea mo gāue lelei, pea ʼe nātou toe tokagaʼi foki ko te kau Fakamoʼoni ʼa Sehova ʼe mole nātou kumi ke nātou maʼu tuʼulaga pea ʼe mole nātou fakataupiepie mo ʼihi ke lahi age tonatou totogi. Koteʼuhi ʼe mole faiga e te kau Fakamoʼoni ke nātou maʼu koloā, ke nātou ʼiloa peʼe maʼu tuʼulaga. Kia nātou ʼaē ʼe nātou agatonu ki tanatou foaki ʼo tonatou maʼuli ki te ʼAtua, ko te meʼa ʼaē ʼe maʼuhiga tāfito ʼe ko te fai ʼo te finegalo ʼo te ʼAtua. ʼE mole nātou fakamuʼamuʼa tāfito tanatou gāue fakamālama ʼaē ʼe ʼaoga moʼo taupau tonatou maʼuli. Ohage ko te ʼapositolo ko Paulo, ko te gāue ʼaē ʼe nātou tokakaga tāfito kiai ʼe ko te minisitelio. (Gaue 18:3, 4; 2 Tesalonika 3:7, 8; 1 Timoteo 5:8) ʼE koutou fakamuʼamuʼa tuʼumaʼu koa te gāue ʼo te Puleʼaga ʼi tokotou maʼuli?—Mateo 6:25-33.

16. Koteā ʼe feala ke koutou fai mo kapau ʼe hoha tokotou loto ʼo faigataʼa ai takotou agatonu ki takotou foaki ʼo tokotou maʼuli ki te ʼAtua?

¹⁶ ʼI muʼa ʼo tanatou ʼiloʼi te moʼoni, ko ʼihi neʼe lagi lahi fau tanatou loto tuʼania. Kae neʼe fonu tonatou loto ʼi te fiafia, mo te fakafetaʼi pea mo te ʼofa ki te ʼAtua ʼi tanatou ʼiloʼi te ʼamanaki ʼo te Puleʼaga! ʼI tanatou fakakaukauʼi te ʼu fua lelei ʼaē neʼe nātou maʼu talu mai ai, ʼe feala ke tokoni kia nātou ke nātou agatonu ki tanatou foaki ʼo tonatou maʼuli kia Sehova. Kae ʼe feafeaʼi anai mo kapau ko te hoha ʼo ʼuhiga mo te ʼu fihifihia ʼo te maʼuli ʼi te tuʼu ʼaenī, ʼe ina taʼomia “te folafola a te Atua,” ohage ko te ʼu vao talatala ʼaē ʼe nātou tāʼofi te homo lelei ʼo te fulumeto? (Luka 8:7, 11, 14; Mateo 13:22; Maleko 4:18, 19) Kapau ʼe koutou tokagaʼi ʼe kamata hoko te faʼahi ʼaia kia koutou peʼe ki tokotou famili, pea koutou tuku takotou ʼu tuʼania kia Sehova pea mo faikole ke tokoni atu anai ke lahi age tokotou ʼofa pea mo tokotou loto fakafetaʼi. Kapau ʼe koutou tuku kia te ia takotou kavega, pea ʼe tokoni anai kia koutou pea mo foaki atu te mālohi ke koutou haga tauhi fiafia kia te ia ʼaki he loto ʼe mālohi.—Pesalemo 55:22; Filipe 4:6, 7; Apokalipesi 2:4.

17. ʼE tou lava tauʼi feafeaʼi te ʼu ʼahiʼahi faigataʼa?

¹⁷ Koutou haga faikole tuʼumaʼu kia Sehova ʼAtua, ohage pe ko te temi ʼaē neʼe koutou faikole ai moʼo fakahā ʼe koutou foaki tokotou maʼuli kia te ia. (Pesalemo 65:2) Ka fakahalaʼi koutou peʼe hoko mai he ʼahiʼahi lahi, koutou kole ki te ʼAtua ke ina takitaki koutou pea ke tokoni atu ke koutou mulimuli kiai. Koutou manatuʼi ʼe tonu ke koutou maʼu te tui, he neʼe tohi fēnei e te tisipulo ko Sakopo: “Kapau ko he tahi ia koutou e ina fia mau te poto [moʼo kātakiʼi te ʼahiʼahi], ke ina kole ki te Atua, e ina foaki mo te ofa ki te tagata fuape pea e mole ina valoki, e ina foakiʼage anai kia te ia. Kae ke ina kole mo tui, aua naa lotolotolua i he mea, koteuhi ko ae e lotolotolua, e hage ia ko te galu o te moana e lagai e te matagi o fakahou. Pea naa amanaki te tagata aia e ina tali anai he mea mai te Aliki: ko he tagata e lotolotolua pea e lotomaveu i ana gaue fuape.” (Sakopo 1:5-8) Kapau ʼe lahi fau kia tatou he ʼahiʼahi, pea ʼe tou lava tui papau ki te faʼahi ʼaenī: “ ʼE mole he fakahala kua hoko kia koutou ka mole heʼeki hoko ki he tagata. Kae ko te ʼAtua ʼe agatonu, ʼe mole ina tuku anai ke fakahalaʼi koutou ʼo laka age ʼi te meʼa ʼaē ʼe koutou lava tali, kae ʼaki te fakahala ʼe ina toe foaki atu anai mo he puleʼaki.”—1 Kolonito 10:13, MN.

18. Koteā ʼaē ʼe feala ke tou fai mo kapau ʼe vaivai tatatou fakatotonu ʼaē ke tou agatonu ki te foaki ʼo totatou maʼuli kia Sehova, ʼuhi ko he agahala mamafa neʼe fufū?

¹⁸ E feafeaʼi mo kapau, ʼuhi ko he agahala mamafa neʼe fufū, ʼe hoha ai tokotou leʼo ʼo loto pea mo vaivai ai takotou fakatotonu ʼaē ke koutou agatonu ki te foaki ʼo tokotou maʼuli ki te ʼAtua? Kapau ʼe koutou fakahemala, ʼe feala ke koutou maʼu he fīmālie ʼi takotou ʼiloʼi ʼaē ko Sehova ‘ ʼe mole fehiʼa anai ki he loto lavea mo taʼomia.’ (Pesalemo 51:17) Koutou kole tokoni ki te ʼu tagata ʼāfea ʼofa, koteʼuhi—ohage pe ko Sehova—ʼe nātou tokagaʼi anai takotou toe fia maʼu he ʼu felogoi lelei mo takotou Tāmai ʼaē ʼi selo. (Pesalemo 103:10-14; Sakopo 5:13-15) Pea ʼaki te mālohi fakalaumālie foʼou ʼaē ka foaki atu pea mo he loto ʼe mālohi, ʼe koutou lava fakatonutonuʼi anai takotou ala foufou pea mo nofo agatonu ki takotou foaki ʼo tokotou maʼuli ki te ʼAtua.—Hepeleo 12:12, 13.

Tou Haga Tauhi ʼAki He Loto ʼe Mālohi

19, 20. He koe ʼe maʼuhiga ke tou agatonu tuʼumaʼu ki tatatou foaki totatou maʼuli ki te ʼAtua?

¹⁹ ʼI te ʼu temi faigataʼa ʼaenī, ʼe tonu ke tou faiga lahi ke tou agatonu ki tatatou foaki ʼo totatou maʼuli ki te ʼAtua, pea mo tou haga tauhi kia te ia ʼaki he loto ʼe mālohi. Neʼe ʼui fēnei e Sesu: “Ko ae e kataki anai ki te gataʼaga, e mauli anai.” (Mateo 24:13) ʼI tatatou maʼuli ʼi “te u aho fakamuli,” ʼe lava hoko fakafokifā ia te fakaʼosi. (2 Timoteo 3:1) Tahi ʼaē meʼa, ʼe mole he tahi ia tatou ʼe feala ke ina ʼiloʼi peʼe maʼuli anai ʼapogipogi. (Sakopo 4:13, 14) Koia ʼe maʼuhiga ai ia ʼaho nei, ke tou haga nofo agatonu ki tatatou foaki ʼo totatou maʼuli ki te ʼAtua!

²⁰ Neʼe fakahā lelei e te ʼapositolo ko Petelo te faʼahi ʼaia ʼi tana lua tohi. Neʼe ina fakahā, ohage pe ko te mamate ʼa te kau agakovi ʼi te Tulivio, ko te kele fakatātā, ʼaē ko te hahaʼi agakovi fuli, ʼe fakaʼauha anai nātou ʼi “te ʼaho ʼo Sehova.” Neʼe ʼui fēnei e Petelo: “Ko te ʼu faʼahiga tagata feafeaʼi anai ia koutou ʼi te aga fakamaʼoniʼoni pea mo te ʼu gāue ʼaē ʼe fakaʼiloga ʼaki takotou pipiki ki te ʼAtua”! Neʼe ina toe fakaloto mālohiʼi fēnei nātou: “Kau ʼofaina, ʼaē ʼe koutou ʼiloʼi fakatomuʼa te meʼa ʼaia, koutou nonofo tokaga, naʼa toho koutou [e he kau faiako loi pea mo he ʼu tagata ʼe agakovi] pea koutou hēʼia mai takotou nonofo mālolohi.” (2 Petelo 3:5-17, MN ) ʼI meʼa fakaʼofaʼofa mo kapau ko he tahi neʼe papitema ʼe hēhē pea mate, koteʼuhi neʼe mole ina lava taupau tona loto ke mālohi!

21, 22. Neʼe moʼoni feafeaʼi te ʼu palalau ʼaē ʼe tuʼu ia Pesalemo 57:7 ʼo ʼuhiga mo Tavite pea mo te kau Kilisitiano moʼoni?

²¹ ʼE feala ke mālohi takotou fakatotonu ʼaē ke koutou agatonu ki takotou foaki tokotou maʼuli ki te ʼAtua, mo kapau ʼe koutou manatuʼi tuʼumaʼu te ʼaho fiafia ʼo tokotou papitema, pea mo koutou kumi te tokoni ʼa te ʼAtua, ke fiafia ai tona loto ʼaki takotou ʼu palalau pea mo takotou ʼu aga. (Tāʼaga Lea 27:11) ʼE mole he temi ʼe fakaloto mamahi ai e Sehova tana hahaʼi, pea ʼe mahino ia ʼe tonu ke tou nofo agatonu kia te ia. (Pesalemo 94:14) Neʼe manavaʼofa pea mo lotoʼofa he neʼe ina fakaiku noaʼi te ʼu fakatuʼutuʼu ʼa te ʼu fili ʼa Tavite pea mo ina hāofaki ia ia. ʼI tana loto fakafetaʼi ki te faʼahi ʼaia, neʼe tala ai e Tavite ʼe mālohi tana ʼofa pea ʼe mole fetogi tana ʼofa ʼaia kia Ia ʼaē neʼe ina Hāofaki ia ia. ʼAki tona loto katoa, neʼe hiva fēnei: “Kua mālohi toku loto, Ê ʼAtua, kua mālohi toku loto. ʼE ʼau hiva anai pea mo mahōlō.”—Pesalemo 57:7.

²² Ohage ko Tavite, ʼe mole tonu ke hēhē te kau Kilisitiano moʼoni mai tanatou tauhi ki te ʼAtua. ʼAki he loto ʼe mālohi, ʼe nātou ʼiloʼi neʼe hāofaki pea mo puipui nātou e Sehova, pea ʼe nātou hiva fakafiafia he ʼu fakavikiviki kia te ia. Kapau ʼe mālohi tokotou loto, pea ʼe koutou falala anai ki te ʼAtua, pea ʼaki tana tokoni ʼe feala anai ke koutou agatonu ki takotou foaki ʼo tokotou maʼuli kia te ia. Ei, ʼe feala ke koutou hage ko “te tagata agatonu” ʼaē neʼe hiva fēnei ki ai te tagata fai pesalemo: “ ʼE mole tuʼania anai ki he ʼu logo ʼe kovi. ʼE mālohi tona loto, ʼe falala kia Sehova.” (Pesalemo 112:6, 7) Kapau ʼe koutou tui ki te ʼAtua pea mo koutou falala katoa kia te ia, pea ʼe feala ke koutou agatonu ki takotou foaki ʼo tokotou maʼuli kia te ia, pea mo koutou haga tauhi kia Sehova ʼaki he loto ʼe mālohi.

Kei Koutou Manatuʼi Koa?

• He koʼe ʼe tonu ke tou maʼu tuʼumaʼu te ʼatamai mālama totonu ʼo ʼuhiga mo te Tohi-Tapu?

• He koʼe ʼe tonu ke tou manatuʼi tuʼumaʼu tatatou fakahemala pea mo tatatou tafoki?

• ʼE fua lelei feafeaʼi kia tatou mokā tou manatuʼi tatatou foaki totatou maʼuli kia Sehova pea mo tatatou papitema?

• Koteā ʼaē ka tokoni mai anai ke tou haga tauhi kia Sehova ʼaki he loto ʼe mālohi?

[Paki ʼo te pasina 18]

ʼE koutou tokakaga koa ke koutou lelei pea mo mālohi ʼi te faʼahi fakalaumālie ʼo koutou ako tuʼumaʼu te Folafola ʼa te ʼAtua?

[Paki ʼo te pasina 18]

Kapau ʼe tou tokaga tāfito ki te minisitelio pea ʼe tokoni mai anai kia tatou ke tou haga tauhi kia Sehova ʼaki he loto ʼe mālohi