Koutou Nofo Teuteu Ki Te ʼAho ʼo Sehova

“Koutou nofo teuteu, koteuhi e haele mai te Foha o te tagata i te hola e mole koutou manatu ki ai.”​—Mateo 24:44.

1. He koʼe ʼe tonu ke tou tokagaʼi te ʼaho ʼo Sehova?

KO TE ʼaho fakamataku ʼo Sehova ʼe ko he ʼaho ʼo te tau pea mo te hāūhāū, ʼo te tuʼania pea mo te mamahi, ʼo te fakapōʼuli pea mo te maumau. Ko te “ ʼaho lahi pea mo fakamataku” ʼo Sehova ʼe hoko moʼoni anai ki te tuʼu agakovi ʼaenī, ohage pe ko te hoko ʼo te Tulivio ki te mālama agakovi ʼo te temi ʼo Noe. ʼE hoko moʼoni mai anai. Kae “ko ʼaē ʼe fetapā ki te huafa ʼo Sehova ʼe hāo anai ia.” (Soele 2:​30-32; Amosi 5:​18-20) ʼE fakaʼauha anai e te ʼAtua tona ʼu fili pea mo hāofaki tana hahaʼi. ʼI te maʼuhiga ʼo te temi, ʼe tala fēnei e te polofeta ko Sofonia: “Ko te ʼaho lahi ʼo Sehova kua ōvi mai. Kua ōvi mai, pea ʼe fakavilivili ʼaupito mai.” (Sofonia 1:​14) Kae ʼe hoko anai afea te fakamāu ʼaia?

2, 3. He koʼe ʼe maʼuhiga ke tou nofo teuteu ki te ʼaho ʼo Sehova?

² Neʼe ʼui fēnei e Sesu: “O uhiga leva mo te aho alâ pea mo te hola, e mole iloi e he tahi, e mole iloi e te kau aselo i Selo pea mo te Alo, gata tahipe ki te Tamai.” (Mateo 24:36) ʼUhi ʼaē heʼe mole tou ʼiloʼi te temi totonu, ʼe maʼuhiga ke tou tokagaʼi totatou vaega ʼo te taʼu 2004: “Koutou alaʼala . . . Koutou nofo teuteu.”​—Mateo 24:42, 44.

³ ʼI tana fakahā te tānaki fakapunamaʼuli ʼo nātou ʼaē kua nofo teuteu ki te hāofaki kae līaki anai ʼihi, neʼe ʼui fēnei e Sesu: “Koia, kia tagata anai e lua i te gaueʼaga, e too he tahi pea e tuku he tahi. Kia fafine anai e lua e lomi fulumeto i te maka lomi-fulumeto, e too he tahi, pea tuku he tahi.” (Mateo 24:40, 41) ʼI te temi maʼuhiga ʼaia, ʼe feafeaʼi anai koa tokita ʼaluʼaga? ʼE tou nofo teuteu anai koa peʼe tou punamaʼuli anai koa mokā hoko mai te ʼaho ʼaia? ʼE fakalogo tāfito te faʼahi ʼaia ki te ʼu meʼa ʼaē ʼe tou fai ʼi te temi nei. Ke feala hatatou nofo teuteu ki te ʼaho ʼo Sehova, ʼe tonu ke tou tekeʼi te faʼahiga aga ʼaē ʼe mafola ia ʼaho nei, mo tou faiga ke mole tou tō ki he ʼaluʼaga fakalaumālie ʼe kovi, pea mo tou fakamamaʼo mai te ʼu faʼahiga maʼuli heʼeʼaoga.

Tou Tekeʼi Te Lotonoa

4. Neʼe feafeaʼi te aga ʼa te hahaʼi ʼi te temi ʼo Noe?

⁴ Tou vakaʼi te temi ʼo Noe. ʼE ʼui e te Tohi-Tapu: “Aki te tui, ko Noe, i te fai o te fakatokaga fakaʼatua kia te ia, o uhiga mo mea nee heeki mo siomata ki ai, nee teki o fakalogo kia te ia, nee ina faù he aleka ki te haofaki o tona lotofale.” (Hepeleo 11:7) Ko te aleka neʼe ko he meʼa makehe pea neʼe tokagaʼi vave e te hahaʼi. Tahi ʼaē meʼa, ko Noe neʼe ko te “tagata fai faka mafola faitotonu.” (2 Petelo 2:5, MN ) Kae ko te faʼu ʼaē e Noe te aleka pea mo tana fai faka mafola neʼe mole ina uga ai te hahaʼi ʼo tona temi ke nātou fetogi. Koteā tona tupuʼaga? Koteʼuhi neʼe nātou “kakai pea mo ʼiʼinu, ko te hahaʼi tagata neʼe nātou ʼohoana pea ko te hahaʼi fafine neʼe foaki ke ʼohoanaʼi.” Ko te hahaʼi ʼaē neʼe fai faka mafola ki ai ia Noe neʼe tokaga tāfito pe nātou ki tanatou ʼu gāue pea mo tanatou ʼu fakafiafia, ʼo “mole nātou fakatokagaʼi he meʼa ʼo aʼu ki te haʼu ʼa te tulivio pea neʼe ʼave fuli ai ia nātou.”​—Mateo 24:38, 39, MN.

5. Koteā ʼaē neʼe hoko ki te hahaʼi ʼo Sotoma ʼi te temi ʼo Lote?

⁵ Neʼe toe feiā ʼi te temi ʼo Lote. ʼE ʼui fēnei mai e te Tohi-Tapu: “Neʼe nātou kakai, neʼe nātou ʼiʼinu, neʼe nātou totogi, neʼe nātou fakatau, neʼe nātou to gāue, neʼe nātou laga fale. Kaʼe ʼi te ʼaho ʼaē neʼe mavae ai Lote ʼi Sotoma, neʼe tō ifo mai te lagi te ʼua afi mo te sulifa, ʼo fakaʼauha fuli ai ia nātou.” (Luka 17:28, 29, MN ) ʼI te ʼosi fakatokaga age e te kau ʼaselo kia Lote te vave hoko mai ʼo te fakaʼauha, neʼe palalau ai ki te ʼu ʼohoana ʼo tona ʼu ʼofafine ʼo ʼuhiga mo te meʼa ʼaē ka hoko mai. Kae neʼe nā manatu nāua neʼe “ko hana fakahuahua.”​—Senesi 19:14.

6. Koteā te aga ʼaē ʼe tonu ke tou tekeʼi?

⁶ Neʼe ʼui e Sesu, ohage pe ko te ʼaho ʼo Noe pea mo Lote, ʼe toe “feiā pe anai mo te ʼi henī ʼo te Foha ʼo te tagata.” (Mateo 24:39, MN; Luka 17:30) Koia ko te aga ʼaē kua mulimuli kiai te tokolahi ia ʼaho nei, ko te lotonoa. ʼE tonu ke tou tokakaga ke mole tou pikisia ʼi te aga ʼaia. ʼE mole kovi te kai ki he meʼa kai lelei pea mo ʼinu fakapotopoto. ʼO toe feiā pe, ko te ʼohoana ʼe ko he fakatuʼutuʼu ʼa te ʼAtua. Kae kapau kua maʼuhiga ʼaupito te ʼu meʼa ʼaia ʼi totatou maʼuli pea mo tou tuku ki muli te ʼu gāue fakalaumālie, pea ʼe feala koa ke tou nofo teuteu ai ki te ʼaho fakamataku ʼo Sehova?

7. Koteā te fehuʼi maʼuhiga ʼe tonu ke tou fai ʼi muʼa ʼo hatatou fai he fakatuʼutuʼu, pea koteā tona tupuʼaga?

⁷ Neʼe ʼui fēnei e te ʼapositolo ko Paulo: “Kua nounou te temi. Koia, ko nātou fuli ʼe maʼu ʼohoana ke nātou maʼuʼuli ohage ʼe mole honatou ʼu ʼohoana.” (1 Kolonito 7:​29-​31, MN ) Kei toe pe he kiʼi temi veliveli moʼo fakaʼosi te gāue ʼaē neʼe foaki mai e te ʼAtua, ʼaē ko te faka mafola ʼo te Puleʼaga. (Mateo 24:14) Neʼe tokoni Paulo ke māʼia pe la mo nātou ʼaē kua ʼohoana, ke ʼaua nā tokakaga fau kia nāua, ʼo mole kei nā fakamuʼamuʼa ʼi tonā maʼuli te gāue ʼo te Puleʼaga. Koia ko te manatu ʼaē neʼe tokoni mai e Paulo ke tou maʼu, ʼe mole ʼalutahi mo te lotonoa. Neʼe ʼui fēnei e Sesu: “Ke koutou haga kumi muʼa te puleʼaga pea mo [te] faitotonu [ʼa te ʼAtua].” (Mateo 6:​33, MN ) Ka koutou fai he ʼu tonu, peʼe ʼi muʼa ʼo hakotou fai he fakatuʼutuʼu, koutou fai te fehuʼi maʼuhiga ʼaenī: ‘Koteā anai tona fua ki taku haga fakamuʼamuʼa ʼi toku maʼuli te ʼu gāue ʼo te Puleʼaga?’

8. Kapau kua tou tokaga pe tatou ki te ʼu gāue māhani ʼo te ʼaho fuli, koteā ʼaē ʼe tonu ke tou fai?

⁸ E feafeaʼi mo kapau ʼe tou tokagaʼi ʼe lahi age tatatou tokaga ki tatatou ʼu gāue ʼo te ʼaho fuli, pea ʼe mole kei tou kau ki te ʼu gāue fakalaumālie? Kua teitei tatau koa totatou faʼahiga maʼuli mo te hahaʼi ʼaē ʼe mole nātou maʼu te ʼatamai mālama ʼo te Tohi-Tapu, pea ʼe mole ko he kau fai faka mafola ʼo te Puleʼaga? Kapau ko ia, pea ʼe ʼaoga ke tou palalau ki te faʼahi ʼaia ʼi tatatou ʼu faikole. ʼE feala ke tokoni mai ia Sehova ke tou maʼu te manatu ʼaē ʼe lelei. (Loma 15:5; Filipe 3:​15) ʼE feala ke tokoni mai kia tatou ke tou fakamuʼamuʼa tuʼumaʼu te ʼu gāue ʼo te Puleʼaga, ke tou fai te meʼa ʼaē ʼe lelei, pea mo fakahoko totatou maʼua ʼaē kia te ia.​—Loma 12:2; 2 Kolonito 13:7.

Tou Tauʼi Te Tulemoe Fakalaumālie

9. Ohage ko tona ʼui ia Apokalipesi 16:14-​16, he koʼe ʼe maʼuhiga ke tou tauʼi te tulemoe fakalaumālie?

⁹ Ko te lea faka polofeta ʼaē ʼe talanoa ki te “tau ʼo te ʼaho lahi ʼo te ʼAtua Māfimāfi” ʼaē ka hoko ʼi Halamaketone, ʼe ina fakatokaga ki te feala ʼaē ki ʼihi ke mole nonofo ʼalaʼala. ʼE ʼui fēnei e te ʼAliki ko Sesu Kilisito: “Koeni, e au haele mai o hage he tagata kaihaa. Manuia ae e alaʼala pea e ina taupau ona teu, ke aua naa alu telefua pea mo fakaha tona ufiufi.” (Apokalipesi 16:14-​16, MN ) Ko te teu ʼaē ʼe talanoa kiai ʼi te vaega ʼe ko te fakaʼiloga ʼaē ko tatou ko he kau Fakamoʼoni Kilisitiano ʼa Sehova. ʼE kau kiai tatatou gāue ʼi totatou ʼuhiga kau fai faka mafola ʼo te Puleʼaga pea mo tatatou aga faka Kilisitiano. Kapau ʼe mole tou gāue, ohage ʼe tou tulemoe, pea ʼe feala ke toʼo ia tatou te fakaʼiloga ʼaē ko tatou ko he kau Kilisitiano. ʼE ko he meʼa fakaufiufi pea mo fakatupu tuʼutāmaki. ʼE tonu ke tou faiga ke mole tou tulemoe ʼi te faʼahi fakalaumālie. ʼE tou lava tauʼi feafeaʼi te faʼahi ʼaia?

10. He koʼe ko te lau ʼo te Tohi-Tapu ʼi te ʼaho fuli ʼe tokoni mai ke tou nonofo ʼalaʼala ʼi te faʼahi fakalaumālie?

¹⁰ ʼE fakahā liuliuga e te Tohi-Tapu te ʼaoga ʼaē ke tou nonofo ʼalaʼala pea mo aga fakapotopoto. Ohage la, ʼe ʼui fēnei mai ʼi te ʼu Evaselio: “Koutou alaʼala” (Mateo 24:42; 25:13; Maleko 13:35, 37, MN ); “Koutou nofo teuteu” (Mateo 24:44); “Koutou haga lamalama, pea ke koutou nonofo ʼalaʼala” (Maleko 13:33, MN ); “Koutou nofo teuteu” (Luka 12:40). ʼI tana ʼosi ʼui ʼaē ʼe haʼu fakapunamaʼuli anai te ʼaho ʼo Sehova ki te mālama ʼaenī, ʼe uga fēnei e te ʼapositolo ko Paulo ia te kau Kilisitiano: “ ʼAua naʼa tou momoe ohage ko ʼihi, kae ke tou nonofo ʼaʼala pea mo tou aga fakapotopoto.” (1 Tesalonika 5⁠:​6, MN ) ʼI te tohi fakaʼosi ʼo te Tohi-Tapu, ko Sesu Kilisito ʼaē kua faka kolōliaʼi ʼe ina fakahā lelei te hoko fakapunamaʼuli mai ʼo tana haʼu, ʼo ina ʼui fēnei: “E au alu vave atu.” (Apokalipesi 3:​11; 22:​7, 12, 20) Tokolahi te kau polofeta Hepeleo neʼe nātou fakamatala pea mo fai he ʼu fakatokaga ʼo ʼuhiga mo te ʼaho lahi ʼo te fakamāu ʼa Sehova. (Isaia 2:​12, 17; Selemia 30:7; Soele 2:​11; Sofonia 3:8) Ko tatatou lau te Folafola ʼa te ʼAtua, te Tohi-Tapu ʼi te ʼaho fuli pea mo te fakakaukauʼi ʼo te meʼa ʼaē neʼe tou lau, ʼe tokoni mai ke tou nonofo ʼalaʼala ʼi te faʼahi fakalaumālie.

11. He koʼe ʼe maʼuhiga te ako takitokotahi ʼo te Tohi-Tapu ke tou nonofo ʼalaʼala ʼi te faʼahi fakalaumālie?

¹¹ Koia ʼe tou nonofo ʼalaʼala ʼi te faʼahi fakalaumālie mokā tou fai hatatou ako takitokotahi ʼo te Tohi-Tapu, ʼo tou fakaʼaogaʼi te ʼu tohi faka Tohi-Tapu ʼaē ʼe tufa e “te tagata kaugana agatonu mo poto”! (Mateo 24:45-47, MN ) Kae ke tou maʼu he ʼu fua lelei ʼo tatatou ako takitokotahi, ʼe tonu ke loloto pea mo tuputupu māmālie. (Hepeleo 5:⁠14–​6:3) ʼE tonu ke tou kai he meʼa kai mālohi ʼi te ʼaho fuli. Ia ʼaho nei, ʼe lagi faigataʼa te maʼu ʼo he temi ki te faʼahi ʼaia. (Efeso 5:​15, 16) Kae ʼe mole feʼauga te lau ʼo te Tohi-Tapu pea mo te ʼu tohi ʼi te temi pe ʼaē ʼe tou feala ai. Ko te ako takitokotahi ʼe maʼuhiga mo kapau ʼe tou loto ke tou “haohaoa i te tui” pea mo nonofo ʼalaʼala.​—Tito 1:​13.

12. ʼE tokoni feafeaʼi mai te ʼu fono pea mo te ʼu fakatahi ke ʼaua naʼa tou tulemomoe ʼi te faʼahi fakalaumālie?

¹² Ko te ʼu fono pea mo te ʼu fakatahi ʼe toe tokoni mai ke ʼaua naʼa tou tulemomoe ʼi te faʼahi fakalaumālie. ʼO feafeaʼi? ʼAki te ʼu faiakonaki ʼaē ʼe tou logo kiai. ʼI te ʼu fakatahi ʼaia, ʼe mole fakamanatuʼi mai koa la te ōvi mai ʼo te ʼaho ʼo Sehova? Ko te ʼu fono ʼi te vāhaʼa ʼe nātou toe foaki mai te ʼu fealagia ke tou ‘feʼugaʼaki ki te ʼofa pea mo te ʼu gāue lelei.’ Ko te fakaloto mālohi ʼaia, ʼe tokoni ki he tahi ke nofo ʼalaʼala ʼi te faʼahi fakalaumālie. ʼE mole tou punamaʼuli ai ʼi te tokoni mai ʼaē ke tou fakatahi tuʼumaʼu ʼi tatatou “mamata ki te fakaovi mai o te Aho.”​—Hepeleo 10:24, 25.

13. ʼE tokoni feafeaʼi mai te minisitelio faka Kilisitiano ke tou nonofo ʼalaʼala ʼi te faʼahi fakalaumālie?

¹³ ʼE toe tokoni mai ke tou nonofo ʼalaʼala mokā tou kau ʼaki tokita loto katoa ki te minisitelio faka Kilisitiano. Ko te faʼahiga fai ʼaē ʼe lelei ʼaupito moʼo manatuʼi te ʼu fakaʼiloga ʼo te temi pea mo tonatou faka ʼuhiga, ʼe ko tatatou palalau ki te hahaʼi ʼo ʼuhiga mo te ʼu meʼa ʼaia. Pea ka tou sio ki tatatou kau ako Tohi-Tapu ʼe nātou tuputupu pea mo kamata maʼuliʼi te ʼu meʼa ʼaē ʼe nātou ako, pea ʼe toe lahi age tatatou mahino ki te maʼuhiga ʼo te ʼu temi. Neʼe ʼui fēnei e te ʼapositolo ko Petelo: “Koutou fakagaūgaūe takotou fakakaukau ʼo ʼuhiga mo te gāue, koutou nonofo katoa ʼi te agapoto.” (1 Petelo 1:​13, MN ) Ke mole koutou tulemomoe ʼi te faʼahi fakalaumālie, ʼe tonu “ke lahi tuʼumaʼu takotou ʼu gāue ʼi te ʼAliki.”​—1 Kolonito 15:58, MN.

Tou Tekeʼi Te ʼu Faʼahiga Maʼuli ʼAē ʼe Fua Kovi Ki Totatou Maʼuli Fakalaumālie

14. Ohage ko tona fakamatala ia Luka 21:34-​36, ko te faʼahiga maʼuli fea ʼaē ʼe fakatokaga mai kiai ia Sesu?

¹⁴ ʼI tana lea faka polofeta lahi ʼo ʼuhiga mo te fakaʼiloga ʼo tana ʼi henī, neʼe fai e Sesu te tahi fakatokaga. Neʼe ina ʼui fēnei: “Koutou tokaga kia koutou totonu, naʼa mamafa tokotou ʼu loto ʼi te lahi fau ʼo te kai, pea mo te lahi fau ʼo te ʼinu, pea mo te ʼu tuʼania ʼo te maʼuli, pea mo fokifā pe kua hoko fakapunamaʼuli mai kia koutou te ʼaho ʼaia ohage ko he hele. Heʼe haʼu anai kia nātou fuli ʼaē ʼe nonofo ʼi te kele katoa. Koia ke koutou nonofo ʼalaʼala pea mo koutou kole mamahi ʼi te temi fuli pe, ke feala ai hakotou hāo ʼi te ʼu meʼa fuli ʼaia ʼaē ʼe tonu ke hoko mai, pea mo koutou tutuʼu ia muʼa ʼo te Foha ʼo te tagata.” (Luka 21:34-​36, MN ) Neʼe talanoa fakalelei ia Sesu ki te faʼahiga maʼuli ʼaē ʼe mulimuli kiai te hahaʼi: te lahi fau ʼo te kai, mo te ʼinu, pea mo te faʼahiga maʼuli ʼe iku ai ki te ʼatu ʼu tuʼania.

15. He koʼe ʼe mole tonu ke lahi fau tatatou kai pea mo tatatou ʼinu?

¹⁵ Ko te lahi fau ʼo te kai pea mo te ʼinu ʼe mole ʼalutahi mo te ʼu pelesepeto ʼo te Tohi-Tapu pea ʼe tonu ke tou tekeʼi. ʼE ʼui fēnei e te Tohi-Tapu: “ ʼAua naʼa ke nofo ʼi te lotolotoiga ʼo te kau hahaʼi ʼinu vino, ia nātou ʼaē ʼe nātou kai fakavale te kanomate.” (Tāʼaga Lea 23:20) Kae tatau aipe peʼe mole kita kaku ki te ʼu ʼaluʼaga ʼaia, kae ʼe feala ke kita tuʼutāmakiʼia, ʼi te kai pea mo te ʼinu. Ko te ʼinu pea mo te kai ʼe feala ke ina faka tulemoe he tahi pea mo ina fakaliliu he tahi ʼo piko ʼi muʼa ʼo tana liliu ʼo kai pea mo ʼinu fakavale. ʼE ʼui e te tāʼaga lea ʼo te Tohi-Tapu: “Ko ia ʼaē ʼe piko ʼe fonu ʼi te mānumānu, kae ʼe mole ina maʼu hana meʼa.” (Tāʼaga Lea 13:4) Ko ia ʼaia ʼe lagi ina fia fai te finegalo ʼo te ʼAtua, kae ʼe mole feala ʼuhi ko tana mole nofo tokaga ki te ʼu faʼahi ʼaia.

16. Koteā ʼaē ʼe feala ke tou fai ke mole lahi fau tatatou ʼu tuʼania ʼo ʼuhiga mo totatou loto fale?

¹⁶ Ko te ʼu tuʼania fea ʼo te maʼuli ʼaē neʼe fakatokaga mai kiai ia Sesu? ʼE ko te ʼu meʼa ʼo ʼuhiga mo kita totonu, te tokaga ki te loto fale, pea mo te tahi ʼatu ʼu meʼa feiā. ʼE mole ko he aga fakapotopoto hatatou tuku ke tou mafasia ʼi te ʼu tuʼania ʼaia. Neʼe fehuʼi fēnei e Sesu: “Ko ai ae i tana hoha, e ina mafai te fakaloaloa atu tona mauli i he gafa e tahi?” Neʼe tokoni fēnei kia nātou neʼe fakalogo: “Aua tautou hoha mo lau: Pe kotea anai ka matou kai? Pe kotea anai ka matou inu? Pe kotea ka matou tui anai? Koteuhi, ko meafuape alâ e fekumi e te u puleaga pagani; e iloi e tautou Tamai i Selo e aoga kia koutou ia meafuape aia.” Tou fakamuʼamuʼa te ʼu gāue ʼo te Puleʼaga pea mo tou falala ʼe tokoni mai anai Sehova ke ʼaua naʼa tou tuʼania fau kae ke tou nonofo ʼalaʼala.​—Mateo 6:​25-​34.

17. He koʼe ʼe feala ke tou maʼuli tuʼania mo kapau ʼe tou kumi te ʼu koloā?

¹⁷ ʼE toe feala ke tupu tatatou ʼu tuʼania ʼuhi ko tatatou kumi te ʼu koloā. Ohage la, ko ʼihi neʼe nātou fakatupu he ʼu faigataʼaʼia ʼi tonatou ʼu maʼuli ʼuhi ko tanatou totogi he ʼu meʼa kae mole nātou lavaʼi. Ko ʼihi ʼe nātou fia maʼu paʼaga ʼi he kiʼi temi nounou pea mo nātou tuku tanatou paʼaga ki he ʼu sosiete ke maʼu ai hona tupu. Ko ʼihi, neʼe liliu ko he hele te hoko atu ʼo tanatou ako koteʼuhi neʼe tupu ai leva hanatou fia maʼu paʼaga. ʼE moʼoni, ʼe ʼaoga ke kita ʼalu ʼo ako ke maʼu gāue. Kae ko ʼihi, ʼi tanatou hoko atu tanatou ako ʼi te ʼu kalasi lalahi pea mo nātou fakaʼaogaʼi lahi tonatou temi kiai, neʼe fua kovi ai ki tonatou maʼuli fakalaumālie. ʼE tou tuʼutāmakiʼia anai mo kapau ʼe tou nonofo ʼi te ʼaluʼaga ʼaia kae kua ōvi mai te ʼaho ʼo Sehova! ʼE fai e te Tohi-Tapu te fakatokaga ʼaenī: “Ko nātou ʼaē kua nātou fakapapau ke nātou maʼu koloā ʼe nātou higa ki te fakahala, ki he hele pea mo te ʼu holi fakavale lahi pea mo fakatupu kovi, ʼe nātou fakauku te tagata ki te fakaʼauha pea mo te pulinoa.”​—1 Timoteo 6:9, MN.

18. Ke ʼaua naʼa tou to ki te fia maʼu koloā, koteā te poto ʼe tonu ke tou maʼu?

¹⁸ Ke mole to he tahi ki te fia maʼu koloā, ʼe tonu ke poto ʼi te ʼiloʼi ʼo te meʼa ʼaē ʼe lelei pea mo te meʼa ʼaē ʼe kovi mokā ina fai he ʼu tonu. Ko te fealagia ʼaia ʼe maʼu ʼaki te kai tuʼumaʼu ki ‘te meʼa kai fakalaumālie mālohi ʼaē ʼe kai e te hahaʼi fakapotopoto’ pea mo ‘māhani ʼi te fakaʼaogaʼi ʼo tanatou fakakaukau.’ (Hepeleo 5:13, 14) Ko tatatou ʼiloʼi papau “te meʼa ʼaē ʼe maʼuhiga” mokā kita fai he ʼu fakatuʼutuʼu, ʼe toe tokoni mai anai ke mole tou fai he ʼu tonu ʼe kovi.​—Filipe 1:​10.

19. Kapau ʼe tou tokagaʼi ʼe veliveli ʼaupito totatou temi ki te ʼu gāue fakalaumālie, koteā ʼaē ʼe tonu ke tou fai?

¹⁹ ʼE feala ke tou liliu ʼo kivi ʼi tatatou kumi te ʼu koloā, peʼe mole kei maʼu hotatou temi ki te ʼu meʼa fakalaumālie. ʼE tou lava vakavakaʼi feafeaʼi ia tatou pea mo tou tokaga ke mole tou tō ki te hele ʼo te faʼahiga maʼuli ʼaia? ʼI te faikole, ʼe tonu ke tou vakaʼi peʼe tou lava faka faigafua feafeaʼi tokita maʼuli, pea koteā ʼaē ʼe tonu ke tou līaki. Neʼe ʼui fēnei e te Hau ʼo Iselaele ko Salomone: “ ʼE moe fīmālie ia ia ʼaē ʼe kaugana, peʼe veliveli peʼe lahi tana kai; kae ko te mahu ʼo ia ʼaē ʼe maʼu koloā ʼe mole ina fakagafua kia ia ke moe.” (Tagata Tānaki 5:​12) ʼE lahi koa totatou temi pea mo totatou mālohi ʼaē ʼe tou fakaʼaogaʼi moʼo tokaga ki te ʼu koloā ʼaē ʼe mole maʼuhiga? Kapau ʼe lahi totatou ʼu koloā, pea ʼe tou toe maʼumaʼua lahi anai moʼo gaohi te ʼu meʼa ʼaia, moʼo totogi he ʼu assurances, pea mo fai he ʼu fakatuʼutuʼu moʼo puipui te ʼu koloā ʼaia. ʼE feala koa ke fua lelei kia tatou mokā tou faka faigafua tokita maʼuli ʼo tou līaki ʼihi ʼu koloā?

Tāfito Ke Koutou Nofo Teuteu

20, 21. (a) Koteā ʼaē ʼe ʼui papau e te ʼapositolo ko Petelo ʼo ʼuhiga mo te ʼaho ʼo Sehova? (b) Koteā te ʼu gāue pea mo te ʼu aga ʼe tonu ke tou fai moʼo fakamoʼoni ai ʼe tou nofo teuteu ki te ʼaho ʼo Sehova?

²⁰ Neʼe fakaʼauha te mālama ʼi te temi ʼo Noe, pea ʼe toe fakaʼauha anai mo te tuʼu ʼaenī. ʼE ʼui papau fēnei mai e te ʼapositolo ko Petelo: “Ko te ʼaho ʼo Sehova ʼe haʼu anai ohage ko he tagata kaihaʼa, pea ʼi te ʼaho ʼaia ko te ʼu lagi ʼe puli anai ʼi he logoaʼa, kae ko te ʼu meʼa ʼaē kua kakaha ʼe mavetevete anai, pea ko te kele pea mo te ʼu gāue ʼaē ʼe fai ʼi ai ʼe hā anai.” ʼI te hāūhāū lahi ʼo te ʼAtua, ʼe mole hāo anai te lagi fakatātā​—te ʼu puleʼaga agakovi​—pea mo te kele fakatātā​—te hahaʼi ʼaē ʼe mamaʼo mai te ʼAtua. ʼI tana fakahā ʼaē peʼe lava feafeaʼi hatatou teuteu ki te ʼaho ʼaia, neʼe ʼui fēnei e Petelo: “Mai tona ʼuhiga ʼaē ʼe tonu ki te ʼu meʼa fuli ʼaia ke mavetevete, ko te ʼu faʼahiga tagata feafeaʼi anai ia koutou ʼi te ʼu aga fakamaʼoniʼoni pea mo te ʼu gāue ʼaē ʼe ʼiloga ai ʼe koutou pipiki ki te ʼAtua, ʼo talitali pea mo koutou taupau tuʼumaʼu ʼi tokotou ʼatamai te hoko mai ʼo te ʼaho ʼo Sehova!”​—2 Petelo 3:​10-​12, MN.

²¹ Ko tatatou kau tuʼumaʼu ki te ʼu fono pea mo te faka mafola ʼo te logo lelei, ʼe kau ki te ʼu gāue pea mo te ʼu aga ʼaē ʼe ʼiloga ai takita pipiki ki te ʼAtua. Tou fai te ʼu gāue ʼaia ʼaki tokita ʼofa moʼoni ki te ʼAtua, ʼo tou fakatalitali ki te ʼaho lahi ʼo Sehova. Tou “faiga ke mau mai [tatou e te ʼAtua], e [tou] heʼe mele mo maʼa mo mauli i te tokalelei.”​—2 Petelo 3:​14.

ʼE Kei Koutou Manatuʼi Koa?

• He koʼe ʼe tonu ke tou nofo teuteu ki te ʼaho ʼo Sehova?

• Kapau kua tou tokaga pe tatou ki te ʼu meʼa māhani ʼo te maʼuli, koteā ʼaē ʼe tonu ke tou fai?

• Koteā ʼaē ka tokoni mai ke ʼaua naʼa tou tulemoe ʼi te faʼahi fakalaumālie?

• Koteā te ʼu faʼahiga maʼuli ʼe kovi ʼe tonu ke tou tekeʼi, pea ʼo feafeaʼi?

[Paki ʼo te pasina 21]

Ko te hahaʼi ʼo te temi ʼo Noe neʼe mole nātou tokagaʼi te kua vave hoko ʼo te fakamāu​—kaeā ia koutou?

[Paki ʼo te pasina 23]

ʼE feala koa ke koutou faka faigafua tokotou maʼuli ke lahi age tokotou temi ki te ʼu gāue fakalaumālie?