“Ko Toku Tokoni ʼe Haʼu Mai Ia Sehova”

Selipatea Pea Mo Fiafia ʼi Te Selevisi Kiā Sehova

NEʼE ʼui fēnei e te tuʼagaʼane Kilisitiano ʼi Sepania: “Tokolahi ia mātou ʼe mātou fiafia ʼaupito ʼi tamatou nonofo selipatea.” Koteā te meʼa ʼaē ʼe tupu ai tana fiafia? “ ʼE lahi te ʼu hoha ʼe mātou ʼāteaina mai ai ke feala hamatou ʼāteaina lahi age moʼo fai tamatou gāue ʼaē kiā Sehova totatou ʼAtua.”

ʼE ʼalutahi te ʼu manatu ʼaia pea mo te manatu ʼa te Folafola ʼa te ʼAtua ʼo ʼuhiga mo te nofo selipatea. ʼI te talanoa ʼa te ʼapositolo ko Paulo ʼo ʼuhiga mo te ʼu fihifihia ʼaē ʼe pipiki ki te nofo ʼohoana, neʼe ina fai te tokoni fakapotopoto ʼaenī ʼaē ʼe haʼu mai te ʼAtua: “E au tala atu ki te hahai tagata selipatea pea mo te hahai fafine [vītua], e lelei kia natou ke natou nonofo feia [ohage ko au].” Neʼe selipatea ia Paulo. Kae he koʼe neʼe ina uga te nofo selipatea? Heʼe ko te hahaʼi ʼohoana ʼe mole nātou ʼāteaina pe ki te ʼu gāue fakalaumālie, kae ko te kau selipatea ʼe nātou “hoha [pe] kia mea a te Aliki.” (1 Kolonito 7:​8, 32-34) Pea ko he tahi ʼe nofo selipatea, ʼe tupu tāfito tana fiafia pea mo tana maʼuli faka feʼauga ʼuhi ko tana gāue ʼaē kiā Sehova.

ʼE Nātou Nonofo Selipatea ʼUhi Ko Te Puleʼaga

ʼE lagi mata faigataʼa anai ki ʼihi ia te ʼu palalau ʼa Paulo, heʼe ʼi tanatou agaʼi fenua ʼe maʼuhiga te ʼohoana pea mo te maʼuli faka famili. Neʼe fiafia pea mo maʼuli faka feʼauga ia Sesu Kilisito ʼaē neʼe mole ʼohoana, pea neʼe talanoa ki te fakatuʼutuʼu ʼaē ʼe lelei maʼa te kau Kilisitiano ʼaē ʼe nonofo selipatea. Neʼe ina ʼui fēnei: “ ʼE ʼi ai te ʼu enuke neʼe nātou gaohi pe ia nātou totonu ke nātou enuke ʼuhi ko te puleʼaga ʼo selo. Ko ʼaē ʼe feala ke ina tuku ke hoko te meʼa ʼaia, ke ina tuku ke hoko te meʼa ʼaia.”​—Mateo 19:​12, MN.

ʼO ʼuhiga mo te ʼu palalau ʼaia, neʼe ʼui e te tokolahi ko te nofo selipatea ʼe ko he faigamālie ʼaia moʼo gāue ki te ʼAtua, heʼe mole nātou hoha faimate ki te ʼu meʼa ʼaē ʼe fakamaʼua ki te nofo ʼohoana. (1 Kolonito 7:35) Logola ko te toko lauʼi afe Kilisitiano ʼe mole heʼeki nātou ʼohoana, kae ʼe nātou tauhi fiafia kiā Sehova, heʼe nātou fiafia ʼi tanatou tokoni ki niʼihi.a

ʼE mahino ki te tokolahi ʼo te kau Kilisitiano ʼaē ʼe selipatea, ʼe mole ko te hahaʼi ʼohoana pe ʼaē ʼe māʼuʼuli fiafia, pea ʼe mole ko te kau selipatea fuli ʼaē ʼe māʼuʼuli mo te ʼu mamahi. ʼE feala pe ʼi ʼihi temi ʼi te hahaʼi ʼohoana pea mo te hahaʼi selipatea, ke nātou fiafia pea mo lotomamahi. Kae ʼe fakahā lelei ʼi te Tohi-Tapu, ko te nofo ʼohoana ʼe kita maʼu ai te ʼu “mamahi fakasino.”​—1 Kolonito 7:⁠28.

ʼE Nātou Selipatea ʼUhi Ko Te ʼu ʼAluʼaga ʼo Te Maʼuli

Tokolahi ʼe nātou selipatea ʼuhi ko te ʼu ʼaluʼaga ʼo te maʼuli. ʼE lagi nātou fakaʼamu ki te ʼofa, te fakakaumeʼa pea mo te loto tokaga ʼaē ʼe maʼu ʼi te nofo ʼohoana. Kae ko ʼihi ʼuhi ko te ʼu faigataʼaʼia ʼo te maʼuli faka paʼaga ʼe lagi mole heʼeki nātou fia ʼohoana. Ko ʼihi Kilisitiano​—tokolahi iā nātou ko te ʼu tuagaʼane fakalaumālie ʼe tou ʼoʼofa ai​—ʼe nātou nonofo selipatea heʼe nātou fakalogo ki te fakatotonu ʼaē ʼe tuʼu ʼi te Tohi-Tapu ʼaē ke ʼohoana “i te Aliki” pe. (1 Kolonito 7:39) ʼE nātou nonofo agatonu, ʼo kumi pe honatou ʼohoana ʼi te kau atolasio ʼaē kua foaki tonatou maʼuli kiā Sehova pea kua nātou papitema.

ʼI ʼihi temi, ko ʼihi ʼi te kau selipatea ʼaia ʼe nātou logoʼi tanatou maʼuli tokotahi. Ko te tahi tuagaʼane neʼe ina logoʼi ia te faʼahi ʼaia, neʼe ina ʼui fēnei: “ ʼE mātou ʼiloʼi te lao ʼa Sehova pea ʼe mole mātou fia fai he meʼa ʼe ina fakaloto mamahiʼi ia ia. ʼE lagi mātou fia ʼohoana, kae ʼe mātou nonofo agatonu aipe logola te ʼu faiga tuʼumaʼu ʼa te hahaʼi ʼo te mālama ke mātou ʼohoana. ʼE mole mātou fia ʼohoana mo he tahi ʼe mole tauhi kiā Sehova.” Ko te ʼu Kilisitiano ʼaia ʼe tāu mo he fakavikiviki, ʼi tanatou maʼuliʼi te ʼu tokoni ʼa te Tohi-Tapu, pea mo tanatou taupau te ʼu pelesepeto māʼoluga moʼo fakafiafia ia Sehova logola te ʼu hoha ʼaē ʼe nātou logoʼi ʼi te faʼahi ʼaia.

Ko Sehova ʼe Tokoni ʼAupito Kiā Nātou ʼAia

Ko Sehova ʼe ʼofa kiā nātou ʼaē ʼe nonofo agatonu kiā te ia, ʼi tanatou mole fia ʼohoana mo he tahi ʼe mole tauhi kiā te ia. Ko te Hau ko Tavite ʼaē neʼe hoko ki ai te ʼu meʼa ʼaia, neʼe feala ke ina ʼui fēnei: “ ʼAki ia ia ʼaē ʼe faitotonu ʼe ke [Sehova] faitotonu anai.” (Pesalemo 18:25) Pea kiā nātou ʼaē ʼe agatonu ʼo fakalogo kiā te ia, ʼe fakapapau fēnei e te ʼAtua: “E mole au tukunoa anai [koutou], pea e mole au liaki anai [koutou].” (Hepeleo 13:5) Kapau ʼe tou mulimuli ki te faʼifaʼitaki ʼa Sehova, pea ʼe feala ke tou vikiʼi ʼaupito te kau Kilisitiano selipatea fuli, ʼaē ʼe nātou pipiki tuʼumaʼu ki te Folafola ʼa te ʼAtua. ʼE feala ke tou toe faikole kiā Sehova ke ina foaki kiā nātou he mālohi mokā nātou tau mo he ʼu faigataʼaʼia.​—Kau Tuʼi Fākamau 11:​30-40.

Tokolahi te kau Kilisitiano selipatea ʼe nātou fiafia ʼi te akoʼi ia te Tohi-Tapu ki te hahaʼi. Ohage la ko te faʼifaʼitaki ʼa Patricia, te tuagaʼane selipatea ʼe taʼu 30 tupu pea ʼe pionie, peʼe kau ki te selevisi temi kātoa. ʼE ina ʼui fēnei: “Logola te ʼu ʼahiʼahi ʼaē ʼe tau mo kita ʼi tata nofo selipatea, kae neʼe ko he faigamālie ʼaia kiā au ke au pionie vaeluaʼi temi. Mai tona ʼaluʼaga ʼaē ʼe au selipatea, ʼe faigafua taku mulimuli ki taku polokalama, heʼe lahi toku temi ke au ako ai te Tohi-Tapu. Neʼe toe lahi age taku falala ʼaē kiā Sehova, tāfito la ʼi te ʼu temi faigataʼa.”

Ko nātou ʼaē ʼe nātou maʼu te ʼu manatu ʼaia, ʼe nātou falala ki te fakapapau faka Tohi-Tapu ʼaenī: “Tuku tou maʼuli kiā Sehova, pea ke ke falala kiā te ia, pea ʼe ina fakahoko anai.” (Pesalemo 37:5) ʼIo, ko te kau atolasio fuli ʼa Sehova, te hahaʼi ʼohoana pea mo te kau selipatea, ʼe feala ke nātou fiafia pea mo lotomālohi ʼaki te ʼu palalau ʼaenī: “Ko toku tokoni ʼe haʼu mai iā Sehova.”​—Pesalemo 121:⁠2.

[Kiʼi nota]

[Fakamatala ʼo te pasina 9]

“Kia ia ae e heeki ohoana e hoha kia mea a te Aliki: pe feafeai hana fai ke leleiʼia e te Aliki.”​—1 KOLONITO 7:32

[Talanoa ʼo te pasina 8]

KO TE NOFO SELIPATEA ʼE KO HE TAPUAKINA

Ko Sesu ʼaē neʼe mole ʼohoana, neʼe ina ʼui fēnei: “Ko taku meakai e ko taku fai te finegalo o ia ae nee ina fekaui au pea mo au fakakatoa tana gaue.”—Soane 4:⁠34.

Ko te ʼu ʼofafine ʼa Filipo neʼe nātou maʼumaʼua ki te ‘fai fakakikite.’—Gaue 21:​8, 9.

Ko te ʼu tuagaʼane selipatea ʼaē ʼe nātou tala te logo ʼo te Puleʼaga ʼe ko ‘he foʼi kautau lahi fafine ʼe nātou faka mafola te logo lelei.’—Pesalemo 68:⁠11.