‘Koutou Tali Te Fealagia ʼAia’
1 ʼI tana fai palalau mo tana kau tisipulo ʼo ʼuhiga mo te nofo ʼohoana, neʼe ʼui e Sesu ko te nofo selipatea ʼe ko ‘he fealagia.’ Pea neʼe ina ʼui fēnei: ‘Ko ʼaē ʼe ina lava tali te faʼahi ʼaia, ke ina tali te faʼahi ʼaia!’ (Mat. 19:10-12) ʼI ni ʼu taʼu ki muli age, neʼe faitohi te ʼapositolo ko Paulo ʼo ʼuhiga mo te ʼu lelei ʼo te nofo selipatea, pea mo ina fakaloto mālohiʼi ʼihi ke nātou mulimuli ki tana faʼifaʼitaki, ke mole nātou ʼohoana. (1 Ko. 7:7, 38) Tokolahi ia ʼaho nei neʼe nātou ‘tali te fealagia ʼaia’ ke nātou nonofo selipatea, pea ʼe nātou maʼu ai he ʼu fua lelei. Koteā ʼihi ʼo te ʼu fua lelei ʼaia?
2 ʼE “Mole Fakaleluʼi” Tanatou Tauhi: Neʼe mahino kia Paulo ʼi tana nofo selipatea neʼe “mole fakaleluʼi” ai tana tauhi kia Sehova. ʼO toe feiā ia ʼaho nei, ko he tēhina selipatea ʼe feala ke kau ki te Ako ʼAē ʼe Ina Teuteuʼi Ki Te Minisitelio, pea ʼi te agamāhani ko he tahi ʼe selipatea ʼe lahi age tana ʼāteaina ke kau ai ki te selevisi pionie, ke ina ako he tahi lea, ke ʼalu ki he koga meʼa ʼe ʼaoga ai he kau gāue, ke gāue ʼi te Petele, peʼe ina fakahoko he tahi ʼu pilivilesio makehe ʼi te selevisi. ʼE lahi age tona temi pea mo tona ʼu faigamālie moʼo fakaloloto age tana ako pea mo tana metitasio tokotahi, pea mo fai hana ʼu kole loloto kia Sehova. ʼI te agamāhani ko he tahi ʼe mole ʼohoana ʼe lahi age tona temi moʼo tokoni ki ʼihi. Ko te ʼu gāue fuli ʼaia ʼe “fua lelei” kia tatou takitokotahi.—1 Ko. 7:32-35, MN; Gaue 20:35.
3 Ko he tahi ʼe tauhi feiā kia Sehova ʼe ina maʼu ai hana ʼu fakapale lahi. Hili tana gāue taʼu e 27 ʼi Kenia, neʼe tohi fēnei e te tuagaʼane: “Neʼe lahi taku ʼu kaumeʼa ʼi te fenua ʼaia pea neʼe lahi mo te gāue! Neʼe mātou gāue fakatahi [pea] mo ʼau ʼalu ʼo fakasiosio nātou pea mo nātou ʼōmai ʼo fakasiosio mai. . . . ʼUhi ko taku selipatea, neʼe feala ai haku fakaʼaogaʼi taku ʼāteaina pea mo taku lava feʼaluʼaki ke ʼau maʼumaʼua ʼi te minisitelio, pea neʼe lahi ai taku fiafia.” ʼE ina toe ʼui fēnei: “ ʼAki te ʼu taʼu, neʼe loloto age taku ʼu felogoi mo Sehova.”
4 Koutou Fakaʼaogaʼi Lelei Tokotou Temi Selipatea: Neʼe ʼui e Sesu ko te faʼahi ʼaē ʼe tonu ke ina uga he tahi ke fia nofo selipatea, ʼe “ko te puleʼaga ʼo selo.” (Mat. 19:12, MN ) Ohage ko te ʼu fealagia fuli, ko te nofo selipatea ʼe tonu ke fakaʼaogaʼi lelei ke maʼu ai te fiafia pea mo te ʼu lelei. ʼI tanatou fakaʼaogaʼi lelei te ʼu fealagia ʼo te nofo selipatea pea mo nātou falala kia Sehova ke nātou maʼu te poto pea mo te mālohi, tokolahi te kau selipatea kua nātou mahino ki te maʼuhiga ʼo tanatou tali te fealagia ʼaē ko te nofo selipatea.