ʼE Hā Anai Koa Iā Koutou Ia Te ʼAta ʼo Te Kolōlia ʼo Te ʼAtua?
“ ʼE hā iā tatou ohage he ʼu sioʼata, te ʼata ʼo te kolōlia ʼo Sehova.”—2 Kolonito 3:18, MN.
1. Koteā ʼaē neʼe sio kiai ia Moisese, pea koteā ʼaē neʼe hoko ki muli age?
NEʼE hā te meʼa fakaofoofo ʼaupito. ʼI te tumutumu ʼo te Moʼuga ʼo Sinai, neʼe tuʼu tokotahi ai ia Moisese, pea neʼe ina kole ia te meʼa fakatalakitupua ki te ʼAtua pea neʼe tali ia tana kole. Neʼe faka fealagia age kiā ia ke sio ki te meʼa neʼe mole heʼeki sio kiai he tagata—ia te kolōlia ʼo Sehova. Kae neʼe mole sio mata ia Moisese kiā Sehova. Neʼe mole feala kiā Moisese ke sio ki te ʼAtua pea mo maʼuli, he neʼe fakaofoofo ʼaupito te agaaga ʼo te ʼAtua. Koia neʼe ʼaofi e Sehova ia Moisese ʼaki tona “nima,” ʼo aʼu ki Tana fakalaka, pea ʼe mahino ia neʼe ina fakaʼaogaʼi hana ʼāselo moʼo fai ia te faʼahi ʼaia. Neʼe toe tuku e Sehova ia Moisese ke sio ki te tapa gigila ʼo tona kolōlia māfimāfi. Pea tahi ʼaē meʼa, neʼe palalau ia Sehova kiā Moisese ʼaki tana ʼāselo. ʼE fakahā ʼi te Tohi-Tapu ia te meʼa ʼaē neʼe hoko ki muli age: “Pea ʼi te ʼosi hifo mai ʼa Moisese mai te Moʼuga ʼo Sinai . . . neʼe gigila ia te kili ʼo tona fofoga he neʼe palalau mo [Sehova].”—Ekesote 33:18–34:7, 29.
2. Koteā ʼaē neʼe tohi e te ʼapositolo ko Paulo ʼo ʼuhiga mo te ʼata ʼo te kolōlia ʼaē ʼe hā ʼi te kau Kilisitiano?
2 Koutou fakakaukau age mo kanapaula neʼe ko koutou ʼaē neʼe nonofo mo Moisese ʼi te moʼuga ʼaia. ʼI meʼa fakaofoofo anai hakotou sio ki te kolōlia ʼo te Māfimāfi pea mo logo ki tana ʼu palalau! ʼE ko he pilivilesio anai hakotou hihifo mai te Moʼuga ʼo Sinai pea mo Moisese, te tagata faka felogoi ʼo te fuakava ʼo te Lao! Kae ʼe koutou ʼiloʼi koa, ʼi tona tahi ʼaluʼaga, ko te kau Kilisitiano moʼoni ʼe nātou fakahā lahi age ia te ʼata ʼo te kolōlia ʼo te ʼAtua ia Moisese? ʼE tou maʼu ia te manatu maʼuhiga ʼaia ʼi te tohi ʼa te ʼapositolo ko Paulo. Neʼe ina ʼui ko te kau Kilisitiano fakanofo ʼe “hā . . . ohage he ʼu sioʼata [iā nātou], te ʼata ʼo te kolōlia ʼo Sehova.” (2 Kolonito 3:7, 8, 18, MN ) ʼE toe feala hatatou ʼui, ko te kau Kilisitiano ʼaē ʼe ʼamanaki māʼuʼuli ʼi te kele, ʼe hā iā nātou ia te ʼata ʼo te kolōlia ʼo te ʼAtua.
ʼE Hā Feafeaʼi ʼi Te Kau Kilisitiano Ia Te ʼAta ʼo Te Kolōlia ʼo Te ʼAtua
3. ʼO mole hage ko Moisese, ko te ʼu faʼahi fea ʼaē ʼe tou ʼiloʼi ai ia Sehova?
3 ʼE tou lava fakahā feafeaʼi ia te ʼata ʼo te kolōlia ʼo te ʼAtua? Neʼe mole tou sio pea mo logo kiā Sehova ohage ko Moisese. Kae ʼe tou maʼu ia te ʼatamai mālama ʼaē neʼe mole maʼu e Moisese ʼo ʼuhiga mo Sehova. Hili taʼu e 1 500 ki te mate ʼa Moisese, pea haʼu ia Sesu te Mesia. Koia, neʼe mole ʼiloʼi e Moisese ko te Lao ʼe fakahoko anai e Sesu, ʼaē neʼe puluhia moʼo totogi ia te malamanei mai te agahala pea mo te mate. (Loma 5:20, 21; Kalate 3:19) Tahi ʼaē, neʼe sio ia Moisese ki te koga veliveli pe ʼo te kolōlia ʼo te fakatuʼutuʼu ʼa Sehova ʼo ʼuhiga mo te Puleʼaga Faka Mesianike, pea mo te Palatiso ʼaē ka ina fakatuʼu anai. ʼE moʼoni, ʼe mole tou sio mata ki te kolōlia ʼo Sehova, kae ʼe tou sio kiai ʼaki tatatou tui ʼaē ʼe fakatafito ki te ʼu akonaki faka Tohi-Tapu. Pea ʼe mole tou logo ki te leʼo ʼo Sehova ʼaki he ʼāselo, kae ʼaki ia te Tohi-Tapu, tāfito ʼi te ʼu Evaselio ʼaē ʼe fakamatalatala lelei ai ia te ʼu akonaki pea mo te minisitelio ʼaē ʼa Sesu.
4. (a) ʼE fakahā feafeaʼi e te kau Kilisitiano fakanofo ia te ʼata ʼo te kolōlia ʼo te ʼAtua? (b) Ko te ʼu ʼaluʼaga fea ʼaē ʼe fakahā ai e nātou ʼe ʼamanaki ki te maʼuli ʼi te kele ia te ʼata ʼo te kolōlia ʼo te ʼAtua?
4 Logola ko te ʼu fofoga ʼo te kau Kilisitiano ʼe mole gigila moʼo fakahā ia te ʼata ʼo te kolōlia ʼo te ʼAtua, kae ʼe nātou fiafia ʼi te fakahā ki te hahaʼi ia te ʼulugaaga faka kolōlia ʼo Sehova pea mo tana ʼu fakatuʼutuʼu. Neʼe fakakikite e te polofeta ko Isaia, ʼi totatou temi ko te hahaʼi ʼa te ʼAtua ʼe nātou ‘fakahā moʼoni anai te kolōlia ʼo Sehova ʼi te lotolotoiga ʼo te ʼu puleʼaga.’ (Isaia 66:19) Pea iā 2 Kolonito 4:1, 2 (MN ), ʼe tou lau fēnei: “ ʼUhi ko tatatou maʼu ia te minisitelio ʼaenī . . . Kua tou lītuʼa ki te ʼu meʼa ʼaē ʼe ū pea mo tou ufiufi ai, ʼo mole tou haʼele fakakākā, ʼo mole tou fulihi hala ia te folafola ʼa te ʼAtua, kae ʼe tou fakahā te moʼoni, ʼo tou tuku te faʼahi ʼaia ki te leʼo ʼo loto ʼo te tagata fuape iā muʼa ʼo te ʼAtua.” Neʼe talanoa ia Paulo ʼo ʼuhiga mo te kau Kilisitiano fakanofo, ʼaē ko “te ʼu minisi ʼo he fuakava foʼou.” (2 Kolonito 3:6, MN ) Pea neʼe malave tanatou minisitelio ki te tokolahi, ʼo feala ai ke nātou maʼu ia te maʼuli heʼegata ʼi te kele. ʼI te minisitelio ʼo te ʼu kūtuga ʼaia e lua ʼe nātou fakahā ia te ʼata ʼo te kolōlia ʼo Sehova ʼaki te ʼu meʼa ʼaē ʼe nātou ako ki te hahaʼi pea mo tanatou ʼu aga. Ko totatou maʼua pea mo pilivilesio ke tou fakahā ia te ʼata ʼo te kolōlia ʼo te ʼAtua Māʼoluga!
5. Ko tatatou nofo ʼi te mahu fakalaumālie ʼe ko he fakamoʼoni ʼaia ʼo teā?
5 Ohage ko tona fakakikite e Sesu, ia ʼaho nei kua faka mafola ʼi te kele kātoa ia te logo lelei faka kolōlia ʼo te Puleʼaga ʼo te ʼAtua. (Mateo 24:14) Ko te ʼu hahaʼi mai te ʼu puleʼaga kehekehe, mo te ʼu telepi, pea mo te ʼu lea, kua nātou tali fakafiafia ia te logo lelei pea mo fetogi ia tonatou maʼuli moʼo fai ia te finegalo ʼo te ʼAtua. (Loma 12:2; Apokalipesi 7:9) Pea ohage ko te ʼu ʼuluaki Kilisitiano, ʼe mole feala hanatou tuku ia tanatou palalau ʼo ʼuhiga mo te ʼu meʼa ʼaē kua nātou sisio pea mo logo kiai. (Gaue 4:20) Ia ʼaho nei, ko te hahaʼi e toko ono miliona tupu ʼe nātou fakahā ia te ʼata ʼo te kolōlia ʼo te ʼAtua, pea ʼe mole hona fakatatau. ʼE koutou kau koa iā nātou ʼaia? Ko te mahu fakalaumālie ʼo te hahaʼi ʼa te ʼAtua, ʼe ko he fakamoʼoni ʼaia ʼo te tapuakina ʼa Sehova pea mo tana puipui ia nātou. Kua ʼiloga lelei te nofo moʼoni ʼa te laumālie ʼa Sehova iā tatou, heʼe fakafeagai te ʼu laumālie mālohi kiā tatou. Tou vakaʼi age muʼa pe koʼe ʼe tou maʼu moʼoni ia te laumālie ʼo Sehova.
ʼE Mole Nātou Lava Tāʼofi Anai Ia Te Hahaʼi ʼa Te ʼAtua
6. He koʼe ʼe tonu ke koutou maʼu te tui pea mo te lototoʼa moʼo lagolago kiā Sehova?
6 Kapau la ʼe pāui koutou ki he telepinale moʼo tukugakoviʼi he tagata agakovi, kae ʼe koutou ʼiloʼi ʼe ʼi ai tana kautahi mālohi pea ʼe ina fai anai he ʼu fakatuʼutuʼu ke ʼaua naʼa koutou fakahā ia te moʼoni ʼo ʼuhiga mo ia. ʼE tonu anai ke koutou lototoʼa moʼo fakahā ia te moʼoni, pea mo koutou falala ʼe hāofaki anai koutou e te kau polisi. Pea ʼe toe feiā pe mo tatou. ʼI tatatou fai faka mafola ʼo ʼuhiga mo Sehova pea mo tana ʼu fakatuʼutuʼu, ʼe tou fakahā ia te moʼoni ʼo ʼuhiga mo Satana te Tevolo, ʼo tou tala ko ia ko te tagata fai fakapō pea mo gutuloi pea ʼe ina fakahalaʼi te kele kātoa. (Soane 8:44; Apokalipesi 12:9) ʼE tonu ke koutou maʼu ia te tui pea mo te lototoʼa moʼo lagolago kiā Sehova kae koutou fakafeagai ki te Tevolo.
7. E feafeaʼi te mālohi ʼo Satana, pea koteā ʼaē ʼe ina faigaʼi?
7 Ko Sehova ʼe Māʼoluga Tokotahi. ʼE mālohi ʼaupito age ia ia Satana. ʼE tou falala ko Sehova ʼe ina lava puipui anai tatou pea ʼe ina fia puipui tatou mo kapau ʼe tou tauhi agatonu kiā te ia. (2 Fakamatala 16:9) Kae ko Satana ʼe pule ki te kau temonio pea mo te hahaʼi ʼo te malamanei ʼaē ʼe mamaʼo ʼi te ʼAtua. (Mateo 12:24, 26; Soane 14:30) ʼI tana nofo ʼi te ʼu tafaʼaki ʼo te kele mo tona “ ʼita lahi,” ʼe fakafeagai mālohi ia Satana ki te ʼu kaugana ʼa Sehova, pea ʼaki te malamanei ʼaē ʼe ina puleʼi, ʼe ina faigaʼi ke ina tāʼofi ia te hahaʼi fuli ʼaē ʼe nātou faka mafola ia te logo lelei. (Apokalipesi 12:7-9, 12, 17, MN ) ʼE ina fakahoko feafeaʼi ia te faʼahi ʼaia? ʼE ko puleʼaki e tolu ʼaē ʼe ina fakaʼaogaʼi moʼo fakahoko ia te faʼahi ʼaia.
8, 9. Koteā ʼaē ʼe loto e Satana ke tou manako kiai, pea he koʼe ʼe tonu ke tou filifili fakalelei tatatou ʼu fakakaugā?
8 Ko te ʼuluaki puleʼaki ʼaē ʼe fakaʼaogaʼi e Satana moʼo fakahēʼi ʼo tatou, ʼe ko te ʼu meʼa ʼaē ʼe tou hoha kiai ʼi totatou maʼuli. ʼI te ʼu ʼaho fakamuli ʼaenī, ko te hahaʼi ʼe nātou kaumeʼa mo te paʼaga, kaumeʼa mo nātou totonu pe, pea mo kaumeʼa mo te ʼu fakafiafia, kae ʼe mole nātou kaumeʼa mo te ʼAtua. (2 Timoteo 3:1-4) Tokolahi te hahaʼi ʼi tanatou hoha ki te ʼu meʼa ʼo te maʼuli, ʼe mole nātou fia logo ki te logo lelei ʼaē ʼe tou faka mafola. ʼE mole nātou fia ako ia te ʼu moʼoni ʼo te Tohi-Tapu. (Mateo 24:37-39) ʼE feala ke tou pikisia ʼi tanatou aga ʼaia, ʼo tou fakaʼauʼauganoa ʼi te faʼahi fakalaumālie. Kapau ʼe tou tuku ke tuputupu iā tatou ia te manako ki te ʼu koloā faka mālama pea mo te ʼu fakafiafia ʼo te maʼuli, ʼe vaivai anai totatou ʼofa ʼaē ki te ʼAtua.—Mateo 24:12.
9 Koia ʼaē ʼe filifili lelei ai e te kau Kilisitiano tonatou ʼu fakakaugā. Neʼe tohi fēnei e te Hau ko Salomone: “Ko ʼaē ʼe haʼele mo te kau poto ʼe liliu anai ia ʼo poto, kae ko ʼaē ʼe fakatahi mo te kau vale, ʼe fua kovi anai kiā ia.” (Tāʼaga Lea 13:20) ʼOfa pe ke tou “haʼele” mo nātou ʼaē ʼe hā iā nātou ia te ʼata ʼo te kolōlia ʼo te ʼAtua, pea ʼe ko he meʼa fakafiafia ʼaia! Ka tou fakatahi ʼi tatatou ʼu fono pea mo ʼihi atu lakaga mo totatou ʼu tēhina pea mo tuagaʼane, pea ʼe tou lotomālohi ʼi tonatou ʼofa, ʼi tanatou tui, ʼi tanatou fiafia, pea mo tanatou agapoto. ʼAki te taʼi fakatahi ʼaia, ʼe tou lotomālohi ai moʼo kātaki ʼi tatatou minisitelio.
10. Ko te ʼu faʼahi fea ʼaē neʼe fakalainoa ai e Satana ia nātou ʼaē ʼe hā iā nātou ia te ʼata ʼo te kolōlia ʼo te ʼAtua?
10 Ko te lua puleʼaki ʼaē ʼe fakaʼaogaʼi e Satana moʼo tāʼofi te kau Kilisitiano fuli ke mole nātou fakahā ia te ʼata ʼo te kolōlia ʼo te ʼAtua, ʼe ko te fakalainoa. ʼE mole tonu ke tou punamaʼuli ki te taʼi puleʼaki ʼaia. ʼI te lolotoga ʼo tona minisitelio ʼi te kele, neʼe fakalainoaʼi ia Sesu Kilisito—neʼe vāʼi, neʼe manukiʼi, neʼe gaohi koviʼi, pea neʼe ʼanuʼanuhi. (Maleko 5:40; Luka 16:14; 18:32) Neʼe manukiʼi ia te ʼu ʼuluaki Kilisitiano. (Gaue 2:13; 17:32) ʼE toe gaohi feiāʼi te ʼu kaugana ʼa Sehova ʼo te temi nei. Neʼe ʼui e te ʼapositolo ko Petelo, ʼe lau anai ko te kau Kilisitiano ʼe “ko te kau polofeta loi.” Neʼe fakakikite fēnei e Petelo: “ ʼI te ʼu ʼaho fakaʼosi ʼe ʼōmai anai te kau vāvā pea mo tanatou manuki, ʼo nātou haʼele ʼo mulimuli pe ki tanatou ʼu holi pea mo ʼui maʼa nātou: ‘ ʼE ʼifea koa tana ʼi henī ʼaē neʼe fakapapau mai? Heʼe . . . ko meʼa fuli pe ʼe hoko atu ohage ko te kamataʼaga ʼo te fakatupu.’ ” (2 Petelo 3:3, 4, MN ) ʼE vāʼi te logo ʼaē ʼe faka mafola e te ʼu kaugana ʼa te ʼAtua. ʼE ʼui e te hahaʼi ʼe mole kei ʼaoga te ʼu pelesepeto ʼa te Tohi-Tapu ki totatou temi. Maʼa te tokolahi, ko te logo ʼaē ʼe tou faka mafola ʼe ko he logo fakavale. (1 Kolonito 1:18, 19) ʼI totatou ʼuhiga Kilisitiano, ʼe lagi fakalainoaʼi tatou ʼi te ʼu faleako, ʼi te ʼu fale gāue, pea ʼi ʼihi temi e totatou ʼu kāiga. ʼE mole tonu ke tou lotovaivai, kae ke haga hā iā tatou ia te ʼata ʼo te kolōlia ʼo te ʼAtua ʼi tatatou fai faka mafola, pea ohage ko Sesu tou fakahā ʼe moʼoni ia te Folafola ʼa te ʼAtua.—Soane 17:17.
11. ʼE fakaʼaogaʼi feafeaʼi e Satana ia te ʼu fakataga moʼo tāʼofi ia te fai faka mafola ʼa te kau Kilisitiano?
11 Ko te tolu puleʼaki ʼaē ʼe fakaʼaogaʼi e te Tevolo moʼo tāʼofi ia tatatou fai faka mafola, ʼe ko te ʼu fakafeagai peʼe ko te ʼu fakataga. Neʼe ʼui fēnei e Sesu ki tana ʼu tisipulo: “ ʼE ʼave anai koutou ki te mamahi pea ʼe matehi anai koutou, pea ʼe koutou liliu anai ko he ʼu meʼa ʼe fehiʼaʼinaʼi e te ʼu puleʼaga kātoa ʼuhi ko toku huafa.” (Mateo 24:9, MN ) ʼI totatou ʼuhiga Fakamoʼoni ʼa Sehova, ʼi te ʼu potu fuli ʼo te kele ʼe tou tau mo te ʼu fakataga fakamataku. ʼE tou ʼiloʼi, neʼe kua fakakikite talu mai fualoa e Sehova, ʼe mole felogoi anai te hahaʼi ʼaē ʼe kaugana ki te ʼAtua pea mo te hahaʼi ʼaē ʼe kaugana kiā Satana te Tevolo. (Senesi 3:15) ʼE tou toe ʼiloʼi foki kapau ʼe tou nonofo agatonu ʼi te ʼu ʼahiʼahi, pea ʼe tou lagolago ki te moʼoni ʼo te pule faʼitaliha ʼa Sehova. ʼI tatatou mahino ki te faʼahi ʼaia, ʼe tou lava kātakiʼi he ʼu ʼaluʼaga faigataʼa ʼaupito. Kapau ʼe tou haga faʼa kātaki ke hā iā tatou ia te ʼata ʼo te kolōlia ʼo te ʼAtua, pea ʼe mole ʼi ai anai he ʼu fakataga ʼe nātou lava tāʼofi ia tatatou fai faka mafola.
12. He koʼe ʼe tonu ke tou fiafia mokā tou nofo agatonu ʼi te ʼu fakataga ʼa Satana?
12 ʼE koutou fakafeagai koa ki te ʼu fakahala ʼa te malamanei pea mo nofo agatonu logola te ʼu fakalainoa pea mo te ʼu fakataga ʼaē ʼe fai atu kiā koutou? Pea ʼe tonu ke koutou fiafia. Neʼe fakapapauʼi e Sesu kiā nātou ʼaē neʼe muli ia te ia: “Fiafia ia koutou mokā leakoviʼi koutou, pea mo fakatagaʼi koutou, pea mo lau he ʼu loi kiā koutou ʼo ʼuhiga mo te ʼu meʼa kovi fuape ʼuhi ko au. Koutou fiafia pea ke koutou hihiki fakafiafia, heʼe lahi tokotou fakapale ʼi selo; he neʼe feiā pe tanatou fakatagaʼi ia te kau polofeta ʼaē neʼe [muʼamuʼa] ia koutou.” (Mateo 5:11, 12, MN ) ʼE koutou fakahā ʼaki takotou faʼa kātaki, ʼe nofo ia te mālohi ʼo te laumālie maʼoniʼoni ʼa Sehova iā koutou, pea mo ina fakamālohiʼi koutou ke hā iā koutou ia te ʼata ʼo tona kolōlia.—2 Kolonito 12:9.
ʼE Foaki Mai e Sehova Ia Te Faʼa Kātaki
13. He koʼe ʼe tou faʼa kātaki ʼi tatatou minisitelio faka Kilisitiano?
13 ʼE tou faʼa kātaki ʼi te minisitelio heʼe tou ʼofa kiā Sehova pea ʼe tou fiafia ʼi te fakahā ʼo te ʼata ʼo tona kolōlia. ʼI te agamāhani ko te hahaʼi ʼe nātou fia faʼifaʼitakiʼi ia te hahaʼi ʼaē ʼe nātou ʼoʼofa pea mo fakaʼapaʼapa ki ai, pea ko Sehova ʼAtua totonu ʼaē ʼe tonu ke tou faʼifaʼitakiʼi. ʼUhi ko tona ʼofa lahi, neʼe ina fekauʼi mai tona ʼAlo ki te kele moʼo fakahā ia te moʼoni pea mo totogi te hahaʼi ʼaē ka fakalogo. (Soane 3:16; 18:37) Ohage ko te ʼAtua, ʼe tou loto ke fakahemala pea mo maʼuli ia te hahaʼi fuape, ko te tupuʼaga la ʼaia ʼo tatatou faka mafola kiā nātou ia te logo lelei. (2 Petelo 3:9) Ko te fakaʼamu ʼaia, pea mo tatatou fia faʼifaʼitakiʼi ia te ʼAtua, ʼe ina uga tatou ke tou faʼa kātaki ke hā iā tatou ia te ʼata ʼo tona kolōlia ʼi tatatou minisitelio.
14. ʼE fakamālohiʼi feafeaʼi tatou e Sehova ke tou faʼa kātaki ʼi tatatou minisitelio?
14 ʼE tou lava faʼa kātaki ʼi te minisitelio faka Kilisitiano heʼe ko Sehova ʼaē ʼe ina foaki mai ia te mālohi ke tou lava fai ia te faʼahi ʼaia. ʼE tokoni mai kiā tatou pea mo ina fakamālohiʼi tatou ʼaki tona laumālie, tana kautahi, pea mo tana Folafola ia te Tohi-Tapu. ʼE foaki e Sehova ia te “faʼa kātaki” kiā nātou ʼaē ʼe nātou lotolelei ke hā iā nātou ia te ʼata ʼo tona kolōlia. ʼE ina tali tatatou ʼu faikole pea mo foaki mai te poto moʼo fakatokatoka ia totatou ʼu fihifihia. (Loma 15:5, MN; Sakopo 1:5) Koia ʼe hā lelei mai, ko Sehova ʼe mole ina fakagafua anai ke hoko he ʼahiʼahi kiā tatou ʼe mole tou lava ʼamo. Kapau ʼe tou falala kiā Sehova, ʼe ina teuteuʼi anai he ikuʼaga ke feala ke haga hā iā tatou ia te ʼata ʼo tona kolōlia.—1 Kolonito 10:13.
15. Koteā ʼaē ʼe tokoni mai kiā tatou ke tou faʼa kātaki?
15 Ko tatatou faʼa kātaki ʼi tatatou minisitelio ʼe ko te fakamoʼoni ʼaia ʼe tokoni mai te laumālie ʼo te ʼAtua kiā tatou. Tou toʼo he faʼifaʼitaki: Kapau la ʼe kole atu e he tahi ke koutou tufa noa he faʼahiga pane ʼi te ʼu ʼapi. ʼE ina toe ʼui atu anai ke koutou fakaʼaogaʼi takotou falā pea mo tokotou mālohi ki te gāue ʼaia. Tahi ʼaē meʼa, ʼe ko te tokosiʼi ʼaē ʼe nātou fia kai ki takotou pane; pea ko ʼihi ʼe nātou fakafeagai anai ki takotou gāue ʼaia. ʼI takotou manatu ʼe koutou hoko atu anai koa ia te gāue ʼaia ʼi te māhina fuli, ʼi te taʼu fuli? ʼE mahino ia ʼe mole koutou fai feiā anai. Kae lagi ʼe koutou fakaʼaogaʼi anai tokotou temi moʼo tala ia te logo lelei ʼi ni ʼu taʼu, peʼe laka atu. Koteā tona tupuʼaga? Koteʼuhi ʼe koutou ʼofa kiā Sehova pea ʼaki tona laumālie ʼe ina tapuakina takotou faʼa kātaki.
Ko Te Gāue ʼe Tonu Ke Fakamanatuʼi
16. Ko tatatou faʼa kātaki ʼi te minisitelio, ʼe iku feafeaʼi anai kiā tatou pea mo nātou ʼaē ʼe fakalogo kiā tatou?
16 Ko te minisitelio ʼo te fuakava foʼou ʼe ko he meʼa ʼofa makehe. (2 Kolonito 4:7) Pea ʼe ko he koloā ia te minisitelio ʼaē ʼe fakahoko e te tahi ʼu ʼōvi ʼi te malamanei kātoa. Kapau ʼe koutou faʼa kātaki ʼi takotou minisitelio, ʼe feala anai ke hoko te ʼu palalau ʼaē neʼe fai e Paulo kiā Timoteo, ʼe koutou “haofaki anai ia [koutou] pea mo natou e fakalogo kia [koutou].” (1 Timoteo 4:16) Koutou fakakaukauʼi age muʼa, ko te logo lelei ʼaē ʼe koutou faka mafola ʼe ina faka fealagia ki te hahaʼi ke nātou maʼu ia te maʼuli heʼegata. ʼE feala hakotou liliu ko he ʼu kaumeʼa lelei ʼo nātou ʼaē ʼe koutou tokoni fakalaumālie ki ai. ʼI meʼa fakafiafia hakotou māʼuʼuli fakatahi anai ʼo heʼegata ʼi te Palatiso mo nātou ʼaē neʼe koutou tokoni ke nātou ʼiloʼi ia te ʼAtua! ʼE mahino ia ʼe mole galo anai ia nātou takotou ʼu tokoni ʼaia kiā nātou. Kofea he tahi age gāue ʼe fakatupu fiafia!
17. He koʼe ʼe tou māʼuʼuli nei ʼi te temi makehe ʼo te hisitolia ʼo te tagata?
17 ʼE koutou māʼuʼuli ʼi te temi makehe ʼo te hisitolia ʼo te tagata. ʼE mole toe hoko anai ʼi he tahi temi, te faka mafola ʼo te logo lelei ʼi he malamanei ʼe lītuʼa ki te ʼAtua. Neʼe maʼuli ia Noe ʼi te mālama feiā, pea neʼe sio ki tona fakaʼauha. Neʼe lagi fiafia ʼi tana ʼiloʼi ʼaē neʼe agatonu ʼo fai te finegalo ʼo te ʼAtua, ʼi tana faʼu ia te aleka, ʼaē neʼe hāofaki ai ia ia pea mo tona famili! (Hepeleo 11:7) ʼE feala ke koutou toe fiafia feiā. Koutou fakakaukauʼi age muʼa te fiafia ʼaē ka koutou maʼu ʼi te mālama foʼou, mokā koutou toe manatuʼi anai te ʼu gāue ʼaē neʼe koutou fai ʼi te ʼu ʼaho fakamuli, heʼe koutou ʼiloʼi te ʼu gāue ʼaē neʼe koutou fai moʼo lagolago ki te ʼu gāue ʼo ʼuhiga mo te Puleʼaga.
18. Koteā te fakapapau pea mo te fakaloto mālohi ʼaē ʼe foaki e Sehova ki tana ʼu kaugana?
18 Koia tou faiga ke haga hā iā tatou ia te ʼata ʼo te kolōlia ʼo te ʼAtua. Kapau ʼe tou fai feiā pea ʼe tou manatuʼi tuʼumaʼu anai. ʼE toe manatuʼi foki e Sehova tatatou ʼu gāue. ʼI te Tohi-Tapu ʼe tou maʼu te fakaloto mālohi ʼaenī: “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa, ʼi takotou tauhi te kau maʼoniʼoni pea ʼe kei hoko atu pe takotou tauhi kiā nātou. Kae ʼe mātou loto ke koutou tahi fakahā he loto faʼafai feiā, ke feala hakotou tui papau ki te ʼamanaki ʼo aʼu ki te fakaʼosi. Ke ʼaua naʼa koutou pipiko, kae ke koutou liliu ko he kau faʼifaʼitaki ʼo nātou ʼaē ʼe nātou maʼu te ʼu fakapapau, ʼuhi ko te tui pea mo te faʼa kātaki.”—Hepeleo 6:10-12, MN.
ʼE Feala Koa Hakotou Fakamahino?
• ʼE hā feafeaʼi ʼi te kau Kilisitiano ia te ʼata ʼo te kolōlia ʼo te ʼAtua?
• Koteā te ʼu puleʼaki ʼaē ʼe fakaʼaogaʼi e Satana moʼo tāʼofi ia te gāue ʼa te hahaʼi ʼa te ʼAtua?
• Koteā te fakamoʼoni ʼe tou nofo moʼoni mo te laumālie ʼo te ʼAtua?
[Paki ʼo te pasina 15]
Neʼe hā te ʼata ʼo te kōlolia ʼi te fofoga ʼo Moisese
[Paki ʼo te pasina 16]
ʼE hā iā tatou ia te ʼata ʼo te kolōlia ʼo te ʼAtua ʼi tatatou minisitelio