ʼE Hā ʼi Te Kau Kilisitiano Ia Te ʼAta ʼo Te Kolōlia ʼo Sehova
“Fiafia ʼokotou mata, heʼe nātou sisio, pea mo ʼokotou taliga, heʼe nātou logo.”—Mateo 13:16, MN.
1. Ko te fehuʼi fea ʼaē ʼe tou lagaʼi ʼo ʼuhiga mo te aga ʼa te kau Iselaele kiā Moisese ʼi te Moʼuga ʼo Sinai?
NEʼE ʼi ai te tupuʼaga tāfito ke fakaōvi ai kiā Sehova ia te kau Iselaele ʼaē neʼe fakatahi ʼi te Moʼuga ʼo Sinai. Heʼe ʼaki tona māfimāfi, neʼe ina hāofaki nātou mai te kau Esipito. Neʼe ina taupau nātou ʼi te toafa, ʼo ina foaki tonatou taupau maʼuli pea mo tanatou meʼa ʼinu. Ki muli age, neʼe tokoni kiā nātou ke nātou mālo ʼi te kautau Amalesite. (Ekesote 14:26-31; 16:2–17:13) ʼI te nonofo ʼa te kau Iselaele ʼi tonatou ʼu falelā ʼi te toafa, iā muʼa ʼo te Moʼuga ʼo Sinai, neʼe nātou tete ʼi te lahi fau ʼo tonatou mātataku ʼuhi ko te tō ʼo te fatuliki pea mo te tapa ʼo te ʼuhila. ʼOsi ʼaia, neʼe nātou sio kiā Moisese neʼe hifo mai te Moʼuga ʼo Sinai, pea neʼe hā ia te kolōlia ʼo Sehova ʼi tona fofoga. Kae neʼe mole nātou fakafiafia pea mo fakafetaʼi ki te kolōlia ʼo Sehova, he neʼe nātou mātataku. “Neʼe nātou mātataku ʼi te fakaōvi kiā [Moisese].” (Ekesote 19:10-19; 34:30) He koʼe neʼe nātou mātataku ʼi tanatou sio ki te kolōlia ʼo Sehova, ʼaē neʼe tokoni ʼaupito kiā nātou?
2. He koʼe neʼe mātataku te kau Iselaele ʼi tanatou sisio ki te hā ʼo te kolōlia ʼo te ʼAtua ʼi te fofoga ʼo Moisese?
2 Lagi neʼe lahi te mataku ʼa te kau Iselaele ʼi te temi ʼaia ʼuhi ko te meʼa ʼaē neʼe hoko ki muʼa atu. Neʼe fakatonutonuʼi nātou e Sehova, ʼi te temi ʼaē neʼe nātou talagataʼa ai kiā te ia ʼo faʼu te ʼuhiʼi pipi aulo. (Ekesote 32:4, 35) Neʼe nātou mahino koa ki tonatou fakatonutonuʼi ʼaia pea mo loto fakafetaʼi kiai? Kailoa neʼe mole fai te potu ʼaia e te tokolahi. ʼI te temi fakaʼosi ʼo te maʼuli ʼo Moisese, neʼe ina fakamanatuʼi age kiā nātou te talagataʼa ʼa te kau Iselaele ʼi tanatou faʼu ia te ʼuhiʼi pipi aulo pea mo ʼihi ʼaluʼaga neʼe nātou talagataʼa ai. Neʼe ina ʼui ki te hahaʼi: “Neʼe koutou agatuʼu ki te fakatotonu ʼo Sehova tokotou ʼAtua, neʼe mole koutou tui kiā te ia pea neʼe mole koutou fakalogo ki tona leʼo. ʼAki takotou aga neʼe koutou agatuʼu koutou kiā Sehova talu mai te ʼaho neʼe au ʼiloʼi ai koutou.”—Teutalonome 9:15-24.
3. Ko te lakaga fea ʼaē neʼe pūlouʼi ai e Moisese tona fofoga ʼaki he kie?
3 Koutou fakatokagaʼi te meʼa ʼaē neʼe fai e Moisese ʼi te temi ʼaē neʼe mātataku ai te kau Iselaele. ʼE ʼui fēnei ʼi te Tohi-Tapu: “ ʼI te ʼosi palalau ʼa Moisese pea mo nātou, neʼe ina pūlouʼi tona fofoga ʼaki te kie. Kae ʼi te temi ʼaē neʼe hū ai ia Moisese [ki te tapenakulo] kiā muʼa ʼo Sehova ʼo palalau mo ia, neʼe ina tohoʼi te kie ʼo aʼu ki tana mavae mai iā te ia. Pea neʼe hū ki tuʼa ʼo tala ki te ʼu foha ʼo Iselaele te ʼu meʼa ʼaē neʼe fakatotonu age kiā ia. Pea neʼe sio te ʼu foha ʼo Iselaele ki te fofoga ʼo Moisese, neʼe nātou sio neʼe tapa gigila te kili ʼo te fofoga ʼo Moisese; pea neʼe toe pūlouʼi e Moisese tona fofoga ʼaki te kie ʼo aʼu ki tana hū ʼo palalau mo [Sehova].” (Ekesote 34:33-35) He koʼe ʼi ʼihi temi neʼe pūlouʼi e Moisese tona fofoga ʼaki he kie? Koteā te ako ʼe tou maʼu mai te faʼahi ʼaia? ʼAki te ʼu tali ki te ʼu fehuʼi ʼaia, ʼe tou lava fakafuafua ai anai tatatou ʼu felogoi takitokotahi ʼaē mo Sehova.
Ko He ʼu Faigamālie Neʼe Meʼa Noaʼi
4. Koteā ʼaē neʼe fakahā e te ʼapositolo ko Paulo ʼo ʼuhiga mo te pūlouʼi ʼo te fofoga ʼo Moisese?
4 Neʼe fakamahino e te ʼapositolo ko Paulo, ko te pūlouʼi e Moisese ia tona fofoga, neʼe ʼi ai tona pikipikiga mo te ʼatamai pea mo te loto ʼo te kau Iselaele. Neʼe tohi fēnei e Paulo: “Neʼe mole lava sioʼi e te ʼu foha ʼo Iselaele ia te fofoga ʼo Moisese ʼuhi ko te kolōlia ʼo tona fofoga . . . Neʼe mate noa tonatou ʼu fealagia fakakaukau.” (2 Kolonito 3:7, 14, MN ) Neʼe ko he ʼaluʼaga fakaʼofaʼofa, he neʼe ko Sehova ʼaē neʼe ina fili ia Iselaele ke liliu ko tana hahaʼi, pea neʼe ina loto ke nātou felogoi lelei mo ia. (Ekesote 19:4-6) Kae neʼe mole nātou fia tokagaʼi te kolōlia ʼo te ʼAtua. Neʼe mole nātou tauhi kiā Sehova ʼaki tonatou loto kātoa pea mo tonatou ʼatamai kātoa, kae neʼe nātou lītuʼa kiā te ia.
5, 6. (a) Koteā ʼaē neʼe tatau ai te kau Sutea ʼo te ʼuluaki sēkulō pea mo te kau Iselaele ʼo te temi ʼo Moisese? (b) Koteā ʼaē ʼe kehekehe ai ia nātou ʼaē neʼe fakalogo kiā Sesu pea mo nātou ʼaē neʼe mole fakalogo kiā te ia?
5 Neʼe hoko te ʼaluʼaga ʼaia ʼi te ʼuluaki sēkulō ʼo totatou temi. ʼI te temi ʼaē neʼe tafoki ai Paulo ki te Lotu Faka Kilisitiano, neʼe kua fetogi te fuakava ʼo te Lao ʼaki te fuakava foʼou ʼaē neʼe fakafofoga e Sesu Kilisito, ia te Moisese Lahi. ʼAki tana ʼu palalau pea mo tana ʼu aga, neʼe hā kātoa iā Sesu ia te ʼata ʼo te kolōlia ʼo Sehova. Neʼe tohi e Paulo ʼo ʼuhiga mo te fakatuʼuake ʼo Sesu: “Ko ia ko te ʼata ʼo te kolōlia [ʼo te ʼAtua] pea ko te faʼifaʼitaki totonu ʼo tona ʼuhiga moʼoni.” (Hepeleo 1:3, MN ) ʼI faigamālie taulekaleka leva neʼe maʼu e te kau Sutea! ʼAki te ʼAlo ʼo te ʼAtua, neʼe nātou lava fagono ki te ʼu folafola ʼo ʼuhiga mo te maʼuli heʼegata! Kae meʼa fakaʼofaʼofa, heʼe tokolahi ia nātou neʼe mole nātou fia fakalogo ki te fai faka mafola ʼa Sesu. Neʼe fai e Sesu kiā nātou ia te ʼu palalau fakakikite ʼaē neʼe tala e Sehova ʼaki ia Isaia: “Ko te loto ʼo te hahaʼi nei kua liliu ʼo feku, pea ʼaki ʼonatou taliga neʼe nātou logo kae neʼe mole nātou tokagaʼi, pea neʼe nātou moeʼi ʼonatou mata; ke ʼaua naʼa nātou sisio ʼaki ʼonatou mata, pea mo logo ʼaki ʼonatou taliga, pea mo mahino ki tona ʼuhiga ʼaki tonatou loto, pea mo nātou toe liliu mai ai, ke ʼaua naʼa au fakamaʼuli ai ia nātou.”—Mateo 13:15, MN; Isaia 6:9, 10.
6 Neʼe kehekehe te kau Sutea pea mo te ʼu tisipulo ʼa Sesu, ʼaē neʼe ʼui fēnei e Sesu ʼo ʼuhiga mo nātou: “Fiafia ʼokotou mata, heʼe nātou sisio, pea mo ʼokotou taliga, heʼe nātou logo.” (Mateo 13:16, MN ) Ko te kau Kilisitiano moʼoni ʼe nātou fia ʼiloʼi ia Sehova pea mo tauhi kiā te ia. ʼE nātou fiafia ʼi te fai ʼo tona finegalo, ohage ko tona fakahā mai ʼi te Tohi-Tapu. Koia ʼe feala ki te kau Kilisitiano fakanofo ke hā ia nātou te ʼata ʼo te kolōlia ʼo Sehova ʼi tanatou minisitelio ʼo ʼuhiga mo te fuakava foʼou, pea ʼe toe feiā pe ki te tahi ʼu ōvi.—2 Kolonito 3:6, 18.
He Koʼe ʼe ū Ia Te Logo Lelei?
7. He koʼe ʼe mole tou punamaʼuli ki te fakafisi ʼa te tokolahi ki te logo lelei?
7 Ohage ko te meʼa ʼaē neʼe tou vakaʼi, ʼi te temi ʼo Sesu pea mo te temi ʼo Moisese, neʼe tokolahi te kau Iselaele neʼe nātou fakafisi ki te faigamālie ʼaē neʼe tuku age kiā nātou. ʼE toe feiā mo totatou temi. Tokolahi te hahaʼi ʼe nātou fakafisi ki te logo lelei ʼaē ʼe tou faka mafola, kae ʼe mole tou punamaʼuli ki te faʼahi ʼaia, he neʼe ʼui fēnei e Paulo: “Kapau ko te logo lelei ʼaē ʼe mātou fagonogono ʼe ū moʼoni, pea ʼe ū ia nātou ʼaē ʼe mamate, ia nātou ʼaē ʼe fakakiviʼi e te ʼatua ʼo te tuʼu ʼo te ʼu faʼahiga meʼa ʼaenī, ia te ʼatamai ʼo nātou ʼaē ʼe mole tui.” (2 Kolonito 4:3, 4, MN ) ʼO hilifaki ki te ʼu faiga ʼa Satana ke ina tāʼofi ia te logo lelei, tokolahi te hahaʼi ʼe mole nātou fia logo ki te logo lelei.
8. Ko te ʼaluʼaga fea ʼaē ʼe kivi ai te tokolahi, pea koteā ʼaē ʼe tonu ke tou fai ke mole tou kivi?
8 Tokolahi ʼe nātou kivi ʼi te faʼahi fakalaumālie heʼe mole nātou ʼiloʼi te logo lelei. ʼE ʼui ʼi te Tohi-Tapu ko te ʼu puleʼaga ʼe nātou nonofo “ ʼi te fakapōʼuli ʼi te faʼahi ʼo te fakakaukau, pea mo mamaʼo mai te maʼuli ʼaē ʼe haʼu mai te ʼAtua, ʼuhi ko tanatou nonofo ʼi te fakapōʼuli.” (Efeso 4:18, MN ) ʼI muʼa ʼo tana liliu ko he Kilisitiano, ko Paulo ʼaē neʼe ko te tagata neʼe poto ʼi te Lao, neʼe ina fakatagaʼi te kokelekasio ʼa te ʼAtua, he neʼe kivi ʼaupito ʼi te faʼahi fakalaumālie, ʼuhi ko tana kei nofo ʼi te fakapōʼuli. (1 Kolonito 15:9) Kae neʼe fakahā age e Sehova ia te moʼoni kiā te ia. ʼE fakamahino fēnei e Paulo: “Nee au tali te manavaofa, koteuhi ke uluaki fakaha e Sesu Kilisito ia te au te katoa o tana kataki, pea mo ina too au ko he faifaitakiʼaga kia natou e tui anai kia te ia o uhiga mo te mauli heegata.” (1 Timoteo 1:16) Ohage ko Paulo, ko te tokolahi ʼaē neʼe fakafeagai ʼi te tahi temi ki te moʼoni ʼo te ʼAtua, ʼi te temi nei kua nātou tauhi kiā te Ia. ʼE ko he fakaloto mālohi ʼaia kiā tatou ke tou haga faka mafola kiā nātou ʼaē ʼe fakafeagai mai kiā tatou. ʼI te temi nei, ko te ako tuʼumaʼu ʼo te Folafola ʼa te ʼAtua pea mo tatatou mahino kiai, ʼe ina puipui tatou ke ʼaua naʼa tou fai he meʼa ʼe fakafeagai kiā Sehova.
9, 10. (a) Neʼe fakahā feafeaʼi e te kau Sutea ʼo te ʼuluaki sēkulō neʼe mole nātou fia mahino pea neʼe mole nātou fia fetogi tanatou ʼu fakakaukau? (b) ʼE ʼi ai koa hona fakatatau mo te Keletiate ia ʼaho nei? Koutou fakamahino.
9 Maʼa te tokolahi, ʼe ʼepu tanatou sio fakalaumālie heʼe mole nātou fia mahino pea ʼe mole nātou fia fetogi tanatou ʼu fakakaukau. Tokolahi te kau Sutea neʼe nātou fakafisi kiā Sesu pea mo tana ʼu akonaki he neʼe nātou fia pipiki maʼu ki te Lao ʼa Moisese. Kae neʼe ʼi ai ʼihi neʼe nātou fetogi tanatou ʼu fakakaukau, ohage la ʼi te ʼosi fakatuʼuake ʼo Sesu, ko “te toe hahaʼi tokolahi ʼo te kau pelepitelo neʼe nātou fakalogo ki te tui.” (Gaue 6:7, MN ) Kae ʼo ʼuhiga mo te tokolahi ʼo te kau Sutea, neʼe tohi fēnei e Paulo: “ ʼO aʼu mai ki te ʼaho nei, ʼi te temi fuli ʼaē ʼe tou lau ai ia Moisese, ʼe ʼi ai te kie ʼe ina pūlouʼi tonatou loto.” (2 Kolonito 3:15, MN ) Lagi neʼe ʼiloʼi e Paulo te ʼu palalau ʼaē neʼe fai e Sesu ki te kau takitaki lotu Sutea: “ ʼE koutou vakaʼi lelei te ʼu Tohi, heʼe koutou manatu ʼaki te ʼu tohi ʼaia, ʼe koutou maʼu ai anai te maʼuli heʼegata; pea ʼe ko te ʼu tohi la ʼaia ʼaē ʼe nātou fakamoʼoni kiā te au.” (Soane 5:39, MN ) Neʼe feala ki te kau Sutea ke nātou ʼiloʼi ko Sesu ko te Mesia he neʼe nātou vakavakaʼi lelei ia te Tohi-Tapu. Kae ko te kau Sutea neʼe mole nātou fia mahino, pea neʼe mole fia tui ki te moʼoni logola te ʼu milakulo ʼaē neʼe fai e te ʼAlo ʼo te ʼAtua.
10 ʼE toe feiā mo te tokolahi ʼi te Keletiate ia ʼaho nei. Ohage ko te kau Sutea ʼo te ʼuluaki sēkulō, “ ʼe nātou tauhi fakamalotoloto ki te ʼAtua, kae mole nātou fai ʼaki te ʼatamai mālama totonu.” (Loma 10:2, MN ) Logola ko ʼihi ʼe nātou ako te Tohi-Tapu, kae ʼe mole nātou fia tui ki te ʼu meʼa ʼaē ʼe tohi ai. ʼE mole nātou tali ko Sehova ʼe ina akoʼi tana hahaʼi ʼaki tana tagata kaugana agatonu mo poto, ʼaē ko te kau Kilisitiano fakanofo. (Mateo 24:45) Kae ʼe tou mahino lelei, ko Sehova ʼe ina ako tana hahaʼi pea ko te mahino ki te ʼu moʼoni fakaʼatua neʼe fakahā māmālie tuʼumaʼu. (Tāʼaga Lea 4:18) Kapau ʼe tou tuku ia Sehova ke ina akoʼi tatou, ʼe ina tapuakina anai tatou ʼaki tatatou mahino ki tona finegalo pea mo tana ʼu fakatuʼutuʼu.
11. Koteā ʼaē ʼe tupu ai te tui ʼa te hahaʼi ki te ʼu meʼa ʼaē ʼe nātou fia tui kiai?
11 Ko ʼihi ʼe nātou kivi heʼe nātou tui pe nātou ki te ʼu meʼa ʼaē ʼe nātou fia tui kiai. Neʼe fakakikite ʼi te Tohi-Tapu ko ʼihi ʼe nātou fakalainoaʼi anai te hahaʼi ʼa te ʼAtua pea mo te logo ʼaē ʼe nātou tala ʼo ʼuhiga mo te ʼi henī ʼa Sesu. Neʼe tohi fēnei e te ʼapositolo ko Petelo: “ ʼO mulimuli ki tonatou holi, ʼe galo kiā nātou ia te meʼa ʼaenī,” neʼe fakatō e te ʼAtua ia te tulivio ki te hahaʼi ʼo te temi ʼo Noe. (2 Petelo 3:3-6, MN ) ʼO toe feiā pe mo te temi nei, tokolahi ʼaē ʼe nātou ʼui ʼe nātou Kilisitiano ʼe nātou ʼiloʼi ko Sehova ʼe manavaʼofa, mo agaʼofa, pea mo loto fakamolemole; kae ʼe nātou fakaʼauʼauganoa peʼe nātou fakafisi ki te ʼui ʼaē ko te ʼAtua ʼe ina fakahoko anai he tautea. (Ekesote 34:6, 7) Ko te kau Kilisitiano moʼoni ʼe nātou faiga fakamalotoloto ke nātou mahino lelei ki te ʼu meʼa ʼaē ʼe akoʼi mai ʼi te Tohi-Tapu.
12. Neʼe fakakiviʼi feafeaʼi ia te hahaʼi e te ʼu talatisio?
12 Tokolahi te hahaʼi lotu neʼe fakakiviʼi nātou e tanatou ʼu talatisio. ʼO ʼuhiga mo te kau takitaki lotu ʼo te temi nei, neʼe ʼui fēnei e Sesu: “Kua koutou fakanoaʼi te folafola ʼa te ʼAtua ʼuhi ko takotou talatisio.” (Mateo 15:6, MN ) ʼI te toe faka ʼāteaina mai ʼo te kau Sutea mai tanatou ʼaunofo ʼi Papiloni, neʼe nātou toe fakatuʼu te tauhi maʼa ʼaki he loto faʼafai, kae ko te kau pelepitelo neʼe nātou fiatuʼu pea mo fia matatonu. Ko te ʼu ʼaho lalahi faka lotu neʼe mole kei faka maʼuhigaʼi, pea neʼe mole kei fai ʼaki he fakaʼapaʼapa moʼoni ki te ʼAtua. (Malakia 1:6-8) ʼI te temi ʼo Sesu, ko te kau sekelipa pea mo te kau Faliseo neʼe nātou hilifaki ia te ʼu tuʼuga talatisio ki te Lao ʼa Moisese. Neʼe tala fakahagatonu e Sesu, ko te ʼu tagata ʼaia ʼe nātou malualoi heʼe kua nātou pulihi te ʼu pelesepeto faitotonu ʼaē neʼe fakatafito kiai ia te Lao. (Mateo 23:23, 24) Kae ʼe tonu ki te kau Kilisitiano moʼoni ke nātou tōkakaga naʼa nātou situʼa mai te tauhi maʼa ʼuhi ko he ʼu talatisio faka lotu neʼe faʼu e te tagata.
“ ʼE Sio Kiā Ia ʼAē ʼe Fakapulipuli”
13. Ko te ʼu faʼahiga ʼaluʼaga fea e lua ʼaē neʼe sio ai ia Moisese ki he koga ʼo te kolōlia ʼo te ʼAtua?
13 ʼI te moʼuga neʼe kole e Moisese ke sio ki te kolōlia ʼo te ʼAtua, pea neʼe sio ki te gigila ʼo te kolōlia ʼo Sehova. Pea ʼi tana ʼalu ki te tapenakulo, neʼe mole ina pūlouʼi tona fofoga ʼaki he kie. Ko Moisese neʼe ko te tagata tui mālohi pea neʼe ina fia fai ia te finegalo ʼo te ʼAtua. Logola neʼe tapuakinaʼi ia ia he neʼe sio ki he koga ʼo te kolōlia ʼo Sehova, kae ʼi hona faʼahiga ʼaluʼaga neʼe kua sio ia ki te ʼAtua ʼaki te ʼu mata ʼo te tui. ʼE ʼui ʼi te Tohi-Tapu ko Moisese “neʼe nofo mālohi ia ohage ia ʼe sio kiā Ia ʼaē ʼe fakapulipuli.” (Hepeleo 11:27, MN; Ekesote 34:5-7) Pea neʼe hā iā ia te ʼata ʼo te kolōlia ʼo te ʼAtua, ʼo mole gata pe ʼi te temi ʼaē neʼe tapa gigila ai tona fofoga, kae neʼe toe hoko atu foki ʼi tana ʼu faiga ʼaē ke tokoni ki te kau Iselaele ke nātou ʼiloʼi ia Sehova pea mo tauhi kiā te ia.
14. Neʼe sio feafeaʼi ia Sesu ki te kolōlia ʼo te ʼAtua, pea koteā ʼaē neʼe ina leleiʼia?
14 ʼI te lagi, talu mai fualoa pea ʼi muʼa ʼo te fakatupu ʼo te ʼatulaulau, neʼe sio totonu ia Sesu ki te kolōlia ʼo te ʼAtua. (Tāʼaga Lea 8:22, 30) Lolotoga te temi ʼaia, neʼe tuputupu tanā feʼofaniʼaki. Neʼe fakahā e Sehova ʼAtua tona ʼofa lahi ki tona ʼuluaki fakatupu ʼaia. ʼO toe feiā mo Sesu, neʼe ina fakahā tona ʼofa lahi ki te ʼAtua, te Matapuna ʼo tona maʼuli. (Soane 14:31; 17:24) Ko tanā feʼofani neʼe ko he feʼofani lelei ʼaupito ʼa te Tāmai pea mo tona ʼAlo. Ohage ko Moisese, neʼe fiafia Sesu ʼi te hā ʼo te ʼata ʼo te kolōlia ʼo Sehova ʼi te ʼu meʼa ʼaē neʼe ina akoʼi ki te hahaʼi.
15. ʼE sio feafeaʼi te kau Kilisitiano ki te kolōlia ʼo te ʼAtua?
15 Ohage ko Moisese pea mo Sesu, ko te kau Fakamoʼoni ʼa te ʼAtua ʼo te temi nei ʼe nātou fiafia ʼi te sio ki te kolōlia ʼo Sehova. Neʼe mole nātou fakafisi ki te logo lelei faka kolōlia. Neʼe tohi fēnei e te ʼapositolo ko Paulo: “Ka tou haga kiā Sehova [moʼo fai tona finegalo], ʼe toʼo kehe ia te kie.” (2 Kolonito 3:16, MN ) ʼE tou ako te Tohi-Tapu heʼe tou fia fai ia te finegalo ʼo te ʼAtua. ʼE tou leleiʼia te hā ʼo te kolōlia ʼi te fofoga ʼo te ʼAlo ʼo Sehova, ia Sesu Kilisito te Hau ʼaē neʼe fakanofo, pea ʼe tou mulimuli ki tana faʼifaʼitaki. Ohage ko Moisese pea mo Sesu, ʼe tuku mai kiā tatou ia te minisitelio, ko te ako ki te hahaʼi ke nātou ʼiloʼi te ʼAtua faka kolōlia ʼaē ʼe tou atolasio ki ai.
16. He koʼe ʼe ko he tapuakina tatatou ʼiloʼi ia te moʼoni?
16 Neʼe faikole fēnei ia Sesu: “Tāmai, e au vikiviki kiā te koe iā muʼa ʼo te hahaʼi . . . koteʼuhi neʼe ke fufū te ʼu meʼa ʼaenī ki te kau popoto pea mo te hahaʼi ʼaē ʼe gāue fakaʼatamai, ka kua ke fakahā koe kiā nātou liliki.” (Mateo 11:25, MN ) ʼE foaki e Sehova kiā nātou ʼaē ʼe tauhi fakamalotoloto pea mo agavaivai, ke nātou mahino ki tana ʼu fakatuʼutuʼu pea mo tona ʼulugaaga. (1 Kolonito 1:26-28) ʼE tokaga kiā tatou, pea ʼe ina akoʼi tatou—ke fua lelei totatou maʼuli. ʼOfa pe ke tou fakaʼaogaʼi te ʼu faigamālie fuli moʼo felogoi lelei mo Sehova, ʼo tou fakafetaʼi ki te ʼu fakatuʼutuʼu ʼaē neʼe ina fai ke feala ai hatatou ʼiloʼi lelei ia ia.
17. E feafeaʼi hatatou ʼiloʼi lahi age ia te ʼu kalitātē ʼo Sehova?
17 Neʼe tohi fēnei e Paulo ki te kau Kilisitiano fakanofo: “ ʼE mole ū ʼotatou fofoga, ʼe hā iā tatou ohage he ʼu sioʼata, te ʼata ʼo te kolōlia ʼo Sehova, neʼe tou liliu ko te ʼata e tahi, ko te kolōlia ki te kolōlia.” (2 Kolonito 3:18, MN ) Peʼe tou ʼamanaki ki te maʼuli ʼi selo peʼe ʼi te kele, ʼe fakalogo anai ki tatatou faʼifaʼitakiʼi lelei ia Sehova pea mo tatatou ʼiloʼi lelei ia Ia—ʼe tou talanoa ʼi henī ʼo ʼuhiga mo tona ʼu kalitātē pea mo tona ʼulugaaga ʼaē ʼe fakamahino lelei mai ʼi te Tohi-Tapu. Kapau ʼe tou loto fakafetaʼi ki te maʼuli, mo te minisitelio, pea mo te ʼu akonaki ʼa Sesu Kilisito, ʼe hā lahi anai iā tatou ia te ʼu kalitātē ʼo Sehova. ʼI meʼa fakafiafia leva tatatou ʼiloʼi ʼaē ʼe tou fakavikiviki ki totatou ʼAtua, ia Ia ʼaē ʼe tou loto ke hā iā tatou tona kolōlia!
ʼE Kei Koutou Manatuʼi Koa?
• He koʼe neʼe mātataku te kau Iselaele ʼi te sioʼi ia te kolōlia ʼo te ʼAtua ʼaē neʼe fakatapa e Moisese?
• Ko te ʼu ʼaluʼaga fea ʼaē neʼe “ū” ai te logo lelei ʼi te ʼuluaki sēkulō, pea mo totatou temi?
• ʼE hā feafeaʼi iā tatou ia te ʼata ʼo te kolōlia ʼo te ʼAtua?
[Paki ʼo te pasina 19]
Neʼe mole lava sisio te kau Iselaele ki te fofoga ʼo Moisese
[Paki ʼo te pasina 21]
Ohage ko Paulo, tokolahi ʼi te temi nei kua nātou tauhi kiā Sehova, kae ki muʼa atu neʼe nātou fakafeagai ki te moʼoni ʼaē ʼe haʼu mai te ʼAtua
[Paki ʼo te pasina 23]
ʼE fiafia te ʼu kaugana ʼa Sehova ʼi te hā ʼaē iā nātou ia te ʼata ʼo te kolōlia ʼo te ʼAtua