Tonatou Maʼuli

Neʼe Au Loto Faʼa Kātaki Ohage Ko He Tagata Solia ʼa Kilisito

NEʼE FAKAMATALA E YURII KAPTOLA

“ ʼI te temi nei, kua au ʼiloʼi papau ʼe ke tui moʼoni!” Ko te ʼu palalau ʼaia neʼe fai e te tagata neʼe mole au ʼamanaki ʼe ina fai mai anai he ʼu palalau feiā. Neʼe ko te tagata ofisie ʼo te foʼi solia ʼo Lusia. ʼAki tana ʼu palalau ʼaia, neʼe au maʼu ai he lotomālohi lahi, pea neʼe tō tonu mo te temi fakamataku ʼaia. Neʼe fakatūʼā au ke au pilisoni lolotoga ni ʼu taʼu, pea neʼe au kole fakamalotoloto kiā Sehova ke tokoni mai. Neʼe hoko te ʼu faigataʼaʼia loaloaga ʼi toku maʼuli pea neʼe tonu ke au loto faʼa kātaki pea mo lotomālohi.

NEʼE au tupu ʼi te ʼaho 19 ʼo ʼOketopeli 1962, ʼi te potu uesite ʼo Ukraine. ʼI te taʼu pe ʼaia, ko taku tāmai, ʼaē neʼe toe higoa foki ko Yurii, neʼe felāveʼi mo te kau Fakamoʼoni ʼa Sehova. Mole fualoa pea neʼe liliu ko te ʼuluaki tagata atolasio ʼa Sehova ʼi tomatou kolo. Ko tana gāue neʼe tokagaʼi e te kau takitaki ʼaē neʼe fakafeagai ki te kau Fakamoʼoni ʼa Sehova.

Kae tokolahi te hahaʼi ʼo tomatou ʼu vāhaʼa fale, neʼe nātou fakaʼapaʼapa ki taku ʼu mātuʼa ʼuhi ko tonā ʼu kalitātē Faka Kilisitiano pea mo tanā agalelei ki te hahaʼi. Talu mai tamatou kei liliki, ko taku ʼu mātuʼa neʼe nā fakaʼaogaʼi te ʼu faigamālie fuli moʼo fakatuputupu iā au pea mo toku ʼu tokolua ia te ʼofa ʼaē ki te ʼAtua, pea neʼe tokoni te faʼahi ʼaia kiā au ʼi te ʼu temi ʼaē neʼe au tau ai mo te ʼu faigataʼaʼia ʼi te faleako. Neʼe hoko te tahi faigataʼaʼia ʼi te temi maveuveu ʼaē neʼe hoko ʼi ʼOketopeli 1917, he neʼe fakamaʼua ai ki te kau ako fuli ke nātou tau he kate ʼe fakaʼiloga ai ko nātou ko he kau tamaliki ʼo Lénine. ʼUhi ko taku mole kau ki te ʼu meʼa faka politike, neʼe mole au tau te kate ʼaia pea neʼe au ʼiloga kehe ʼi te kau ako fuli.​—Soane 6:15; 17:⁠16.

Ki muli age, ʼi taku hiki ki te kalasi ʼo te CM1, neʼe fakamaʼua ki te kau ako fuli ke nātou kau ki he kautahi ʼo te kau tūpulaga Kominisi ʼaē neʼe higoa ko te kau Tūpulaga Takitaki. ʼI te tahi ʼaho, ko tomatou kalasi neʼe fakaʼatu ʼi te malaʼe ʼo te faleako ke tohi ʼomatou higoa ke mātou hū ki te kautahi ʼaia. Neʼe au tuʼaniaʼi te faʼahi ʼaia, naʼa vāʼi au pea mo munaʼi au. Ko nātou fuli, gata pe kiā au, neʼe nātou ʼaumai mai tonatou ʼu ʼapi tanatou musuala foʼou kula ʼo te kau Tūpulaga Takitaki, pea ko te kau ako neʼe tutuʼu iā muʼa ʼo te tagata pule ʼo te faleako, mo te kau faiako, pea mo te kau ako ʼo te ʼu kalasi lalahi. ʼI te temi ʼaē neʼe ʼui ai ki te kau ako ʼo te ʼu kalasi lalahi ke nātou haʼi te ʼu musuala ʼi tomatou kia, neʼe au punou ʼo sio ki lalo, mo ʼamanaki ke mole ʼi ai he tahi ʼe ina tokagaʼi au.

Neʼe ʼAve Au Ki Te ʼu Fale Pilisoni Mamaʼo

ʼI toku taʼu 18, neʼe fakatūʼā au ke au pilisoni lolotoga taʼu e tolu ʼuhi ko taku mole fia kau ki te tau. (Isaia 2:4) ʼI te ʼuluaki taʼu neʼe au gāue ʼi te kolo ʼo Trudovoye, ʼi te Tisitilike ʼo Vinnitskaya ʼi Ukraine. ʼI te kolo ʼaia, neʼe au felāveʼi ai mo te tahi kau Fakamoʼoni ʼa Sehova ʼe lagi toko 30. Neʼe fekauʼi mātou ke mātou gāue taki toko lua, ke mātou fai he ʼu gāue kehekehe, he neʼe mole loto e te ʼu takitaki ke mātou fakatahi mo niʼihi kehe.

ʼI ʼAukusitō ʼo te taʼu 1982, neʼe ʼave au mo te tahi Fakamoʼoni ko Eduard mo te tahi kūtuga pilisoni ʼi te saliote afi ki te ʼu Moʼuga ʼo Oural ʼi te potu noleto. Lolotoga ʼaho e valu neʼe mātou kātakiʼi te vevela ʼaupito pea mo tomatou efifihia, ʼo aʼu ki tamatou kaku ki te Fale Pilisoni ʼo Solikamsk, ʼi te Tisitilike ʼo Pemskaya. Ko Eduard pea mo au neʼe hinoʼi māua ki te tahi koga fale. Hili vāhaʼa e lua, neʼe ʼave au ki te potu taupotu ʼo te potu noleto ʼi Vels, ʼi te kolo ʼo Krasnovishersky.

Ko tamatou motokā neʼe tau ki te kolo ʼi te vaeluaʼaga mālie ʼo te pōʼuli, pea neʼe fakapōʼuli gaogao. Logola te fakapōʼuli, kae neʼe fakatotonu e te ofisie ki tomatou kūtuga ke mātou fakalaka ʼi te vaitafe ʼaki te vaka. Neʼe mole mātou lava sisio peʼe ʼifea te vaitafe pea mo te vaka! Koia neʼe mātou kumi fakataufā te vaka pea mātou maʼu, pea logola tamatou mātataku, kae neʼe mātou faiga ke mātou fakalaka ʼi te vaitafe. ʼI tamatou tau ki te tahi kauvai, neʼe mātou lava sio ki te mālama neʼe tuʼu ʼi te kiʼi moʼuga neʼe ōvi mai, pea neʼe mātou maʼu ai te ʼu falelā neʼe fakatuʼu ai. Neʼe ko tomatou nofoʼaga foʼou ʼaia. Ko au mo te toko 30 hahaʼi pilisoni neʼe mātou nonofo ʼi te foʼi falelā lahi. ʼI te temi nive, neʼe kovi ʼaupito te momoko pea neʼe mole māfana te falelā. Ko te gāue tāfito ʼa te kau pilisoni neʼe ko te tuʼusi ʼo te ʼu fuʼu ʼakau, kae neʼe au gāue au ʼi te laga ʼo te ʼu falelā maʼa te hahaʼi pilisoni.

Neʼe Aʼu Mai Te Meʼa Kai Fakalaumālie Ki Tomatou Nofoʼaga ʼAē Neʼe Tuʼu Mamaʼo

Neʼe ko au tokotahi pe ʼaē neʼe ko te Fakamoʼoni ʼa Sehova ʼi te nofoʼaga, kae neʼe mole līaki au e Sehova. ʼI te tahi ʼaho, ko taku faʼē ʼaē neʼe kei maʼuli ʼi te potu ʼuesite ʼo Ukraine, neʼe ina momoli mai taku kiʼi kalato. ʼI te avahi ʼa te tagata leʼo te kalato ʼaia, ko te ʼuluaki meʼa ʼaē neʼe sio kiai neʼe ko te kiʼi Tohi-Tapu veliveli. Neʼe ina toʼo pea mo kamata fuli te ʼu pāsina. Neʼe au faiga ke au ʼui age he meʼa ke ʼaua naʼa ina toʼo te meʼa kai fakalaumālie ʼaia. Fakafokifā pe pea fehuʼi fēnei mai e te tagata leʼo: “Koteā te meʼa ʼaenī?” ʼI muʼa ʼo haku fakakaukau ki haku tali kiai, ko te tagata polisi neʼe tuʼu ōvi kiā au neʼe ina tali fēnei: “ ʼE ko he tikisionalio ia.” Neʼe mole au gū. (Tagata Tānaki 3:7) Neʼe huke e te tagata polisi te tahi ʼu meʼa ʼi te kalato, ʼosi ʼaia pea neʼe ina toe ʼaumai taku kalato pea mo te Tohi-Tapu maʼuhiga ʼaia. ʼI te lahi ʼaupito ʼo toku fiafia, neʼe au foaki age kiā ia te ʼu pinati neʼe momoli mai ʼi te kalato. ʼI taku maʼu te kalato ʼaia, neʼe au ʼiloʼi ai neʼe mole galoʼi au e Sehova. Neʼe tokoni lahi mai kiā au pea mo foaki mai te ʼu meʼa fakalaumālie ʼaē neʼe ʼaoga kiā au.​—Hepeleo 13:⁠5.

Neʼe Au Haga Fai Taku Fai Faka Mafola

Hili ni ʼu māhina, neʼe au punamaʼuli ʼi taku maʼu te tohi mai te tēhina neʼe nofo ʼi te fale pilisoni, neʼe vāhaʼa mamaʼo mo tomatou nofoʼaga, iā kilometa e 400. Neʼe ina kole mai ke au kumi te tagata neʼe ina fia ʼiloʼi te moʼoni pea neʼe lagi nofo ʼi te temi ʼaia ʼi tomatou nofoʼaga. Neʼe mole fakapotopoto te fai ʼo he tohi feiā, he neʼe sivisivi tamatou ʼu tohi. Neʼe mole au punamaʼuli ai ʼi toku pāui e te tagata takitaki ki tona pilo, pea mo ina tapuʼi mālohi mai ke ʼaua naʼa au fai faka mafola. Neʼe ina fakatotonu mai ke au sinie te pepa neʼe tohi ai ʼe mole au toe palalau anai ki te hahaʼi ʼo ʼuhiga mo taku tui. Neʼe au tali age ʼe mole au mahino pe koʼe ʼe tonu ke au sinie te pepa ʼaia, heʼe kua ʼiloʼi e te hahaʼi fuli ko au ko te Fakamoʼoni ʼa Sehova. Neʼe au ʼui age ko ʼihi kau pilisoni neʼe nātou fia ʼiloʼi te tupuʼaga ʼo taku pilisoni. Koteā anai taku tali kiā nātou? (Gaue 4:20) Neʼe mahino ai ki te tagata takitaki ʼe mole feala ke ina fakagata taku gāue, koia neʼe ina fakatotonu ai ke au mavae ʼi te nofoʼaga ʼaia. Pea neʼe ʼave au ki te tahi nofoʼaga.

Neʼe ʼave au ki te kiʼi kolo ko Vaya, neʼe vaha mo tomatou nofoʼaga iā kilometa e 200. Neʼe fakaʼapaʼapa te ʼu pule ki toku ʼuhiga Kilisitiano, pea neʼe nātou tuku mai te ʼu gāue ʼe mole honatou pikipikiga mo te solia​—ʼuluaki neʼe au tufuga ʼakau, pea ki muli age neʼe au gāue hila. Kae neʼe toe ʼi ai foki mo te ʼu faigataʼaʼia ʼi te ʼu gāue ʼaia. ʼI te tahi ʼaho, neʼe ʼui mai ke au toʼo taku ʼu meʼa gāue pea ke au ʼalu ki te fale meʼe ʼo te kolo. ʼI taku tau atu kiai, neʼe fiafia te kau solia ʼo te fale meʼe ʼi tanatou sisio mai. Neʼe faigataʼa hanatou faka haʼele te ʼu hila ʼaē neʼe ʼai moʼo fakamataleleiʼi ia te ʼu fakaʼiloga ʼo te solia. Neʼe nātou loto ke au tokoni age kiā nātou moʼo teuteuʼi te ʼAho Lahi ʼo Te Foʼi Solia Kula ʼaē ʼe fai ʼi te taʼu fuli. ʼI taku ʼosi fakakaukauʼi pea mo faikole ʼo ʼuhiga mo te meʼa ʼaē ka au fai, neʼe au ʼui age kiā nātou ʼe mole feala haku fai ia te gāue ʼaia. Neʼe au tuku age kiā nātou taku ʼu meʼa gāue pea neʼe au ʼalu. Neʼe tala taku fakafisi ʼaia ki te tagata ʼaē ʼe ina fakafofoga te pule, pea neʼe au punamaʼuli he neʼe ina tali fēnei ki te ʼu tukugakovi ʼaē neʼe fai ʼo ʼuhiga mo au: “ ʼE au fakaʼapaʼapa ki te tonu ʼaē ʼe fai e te tagata ʼaenī, heʼe ko he tagata ʼe mulimuli ki tana ʼu pelesepeto.”

Neʼe Mole Au ʼAmanaki ʼe Ina Fakaloto Mālohiʼi Anai Au

ʼI te ʼaho 8 ʼo Sūnio ʼo te taʼu 1984, hili taʼu e tolu ʼo toku pilisoniʼi, neʼe faka ʼāteainaʼi au. ʼI taku toe liliu ki Ukraine, neʼe tonu ke au ʼalu ki te fale solia ʼo tohi ai te ʼu taʼu ʼaē neʼe au nofo pilisoni ai. Neʼe ʼui mai e te ʼu pule solia ʼe lelei age ke au mavae ʼi te fenua, heʼe hili māhina e ono, pea ʼe toe ʼave anai au ki te telepinale. Koia neʼe au mavae ʼi Ukraine pea neʼe au maʼu taku gāue ʼi Lettonie. Lolotoga he kiʼi temi neʼe au fai faka mafola pea mo fono fakatahi mo te kiʼi kūtuga ʼo te kau Fakamoʼoni neʼe māʼuʼuli ʼi te taulaga ko Riga pea mo ʼona tafaʼaki. Kae hili pe te taʼu kātoa pea neʼe toe pāui au ke au hū solia. ʼI te pilo ʼaē ʼe tohi ai te ʼu higoa ʼo nātou ʼaē ʼe solia, neʼe au fakahā age ki te pule solia neʼe kua au fakafisi ki muʼa atu ki te hū solia. Neʼe ina tali fēnei mai: “ ʼE ke ʼiloʼi peʼe koteā ʼaē ka hoko kiā koe? ʼE tou vakaʼi anai peʼe koteā tau tali ki te kolonele!”

Neʼe ina ʼave au ki te pilo ʼi te lua fata, pea neʼe mā maʼu atu te kolonele ʼe heka ʼi te laupapa. Neʼe fakalogo lelei ki taku fakamahino age taku lotu pea neʼe ina ʼui mai ʼe kei maʼu toku temi ke au fakakaukauʼi te tonu ʼaē kua au fai, ʼi muʼa ʼo taku ʼalu kiā muʼa ʼo te komite ʼaē ʼe nātou tohi te ʼu higoa ʼo nātou ʼaē ʼe hū solia. ʼI tamā mavae ʼi te pilo ʼo te kolonele, ko te pule solia ʼaē neʼe ina munaʼi au ʼi te kamata, neʼe ina ʼui fēnei: “ ʼI te temi nei, kua au ʼiloʼi papau ʼe ke tui moʼoni!” ʼI te temi ʼaē neʼe pāui ai au ke au ʼalu ki te komite solia, neʼe au toe fakamahino age taku fakafisi ki te solia, pea neʼe nātou tuku age au ke au mavae.

Lolotoga te temi ʼaia, neʼe au nofo ʼi te otele. ʼI te tahi po, neʼe au logo ki te fisifisi māmālie ʼo te matapā. Neʼe au avahi pea neʼe ko te tagata neʼe teu lelei neʼe ina taki tana kato. Neʼe ina ʼui fēnei: “ ʼE au kau ʼi te kau Polisi ʼo Te Puleʼaga. ʼE au ʼiloʼi ʼe lahi tou ʼu fihifihia pea ʼe ʼave anai koe ki te telepinale.” Neʼe au tali fēnei: “Ei.” Pea neʼe toe hoko atu fēnei e te tagata: “ ʼE feala hamatou tokoni atu mo kapau ʼe ke fia gāue maʼa mātou.” Neʼe au tali fēnei age: “Kailoa, ʼe mole feala ia te faʼahi ʼaia. ʼE au fia tapiki maʼu ki taku tui.” Neʼe mole faiga ia ke ina fakalotoʼi au pea neʼe ʼalu ia.

ʼE Toe Pilisoni Au Pea ʼe Au Toe Fai Faka Mafola

ʼI te ʼaho 26 ʼo ʼAukusitō ʼo te taʼu 1986, ko te Telepinale ʼo Te Fenua ʼo Riga neʼe ina fakatūʼā au kiā taʼu e fā ʼi te ʼu lotoʼā gāue, pea neʼe ʼave au ki te Fale Pilisoni Lahi ʼo Riga. Neʼe nātou pilisoniʼi au ʼi te foʼi kogafale lahi mo te toko 40 kau pilisoni, pea neʼe au faiga ke au fai faka mafola kiā nātou fuli. Neʼe ʼui e ʼihi ʼe nātou tui ki te ʼAtua, pea ko ʼihi neʼe nātou vāʼi au. Neʼe au tokagaʼi neʼe fakapupu faka kūtuga te kau tagata, pea hili vāhaʼa e lua, ko te kau takitaki ʼo te ʼu kūtuga ʼaia neʼe nātou ʼui mai neʼe mole kei fakagafua ke au fai faka mafola, he neʼe mole au mulimuli ki tanatou ʼu lao. Neʼe au fakamahino age neʼe pilisoniʼi au ʼuhi ko te faʼahi ʼaia, he neʼe kehe te ʼu lao ʼaē neʼe au mulimuli kiai.

Neʼe au hoko atu taku fai faka mafola, ʼo fai fakafufū, pea neʼe au maʼu ai ʼihi neʼe nātou fia palalau ki te ʼu manatu fakalaumālie, ʼo au kamata ai te ʼu ako Tohi-Tapu mo te toko fā. ʼI tamatou ʼu fai palalau, neʼe nātou tohi te ʼu akonaki tāfito ʼo te Tohi-Tapu ʼi tanatou ʼu kaupepa faitohi. Hili te ʼu kiʼi māhina, neʼe ʼave au ki te fale pilisoni ʼi Valmiera, neʼe lahi age ai te leʼoleʼo ʼa te hahaʼi pilisoni, pea neʼe au gāue fai hila. ʼI te fale pilisoni ʼaia neʼe au fai te ako Tohi-Tapu ʼa te tahi tagata fai hila, pea neʼe liliu ko he Fakamoʼoni ʼa Sehova hili kiai taʼu e fā.

ʼI te ʼaho 24 ʼo Malesio ʼo te taʼu 1988, neʼe au mavae ʼi te fale pilisoni ʼaia ki te tahi nofoʼaga neʼe ōvi mai kiai. Neʼe ko he toe tapuakina lahi ʼaia, he neʼe lahi age toku ʼāteaina. Neʼe au gāue ʼi te ʼu laga fale kehekehe, pea neʼe au kumi tuʼumaʼu he ʼu faigamālie ke au fai faka mafola. Tuʼumaʼu pe, neʼe au ʼalu ʼo gāue ʼi tuʼa, ʼo fai faka mafola ʼo aʼu ki te pōʼuli, kae neʼe mole ʼi ai hoku ʼu fihifihia ʼi taku toe liliu mai ʼaē ki te nofoʼaga.

Neʼe tapuakina e Sehova taku ʼu faiga. Neʼe mole hahaʼi te kau Fakamoʼoni ʼaē neʼe nonofo ōvi ʼi te koga meʼa ʼaia, kae neʼe ko te Fakamoʼoni pe e tahi neʼe maʼuli ʼi te kolo, ko Vilma Krūmin̗a, te tuagaʼane kua finematuʼa. Ko te tuagaʼane ko Krūmin̗a pea mo au neʼe mā kamata te ʼu tuʼuga ako Tohi-Tapu mo te kau tūpulaga. ʼI ʼihi temi, ko te ʼu tēhina mo te ʼu tuagaʼane neʼe nātou folau mai Riga ʼo kau mo māua ki te minisitelio, pea ko ʼihi pionie kātoa neʼe nātou ʼōmai mai Leningrad (ʼi te temi nei ko Saint-Pétersbourg). ʼAki te tokoni ʼa Sehova, neʼe mātou kamata te ʼu tuʼuga ako Tohi-Tapu, pea ki muli age neʼe au pionie, ʼo au fai hola e 90 ʼi te māhina ʼi te gāue fai faka mafola.

ʼI te ʼaho 7 ʼo ʼApelili ʼo te taʼu 1990, neʼe fakatuʼutuʼu ke toe vakaʼi toku tosie e te Telepinale ʼa te Hahaʼi ʼi Valmiera. ʼI te kamata ʼo te fai fakamāu, neʼe au tokagaʼi ʼe au feʼiloʼiʼaki mo te avoka ʼaē ʼe fakafeagai mai kiā au. Neʼe ko te tūpulaga neʼe au fai palalau mo ia ki te Tohi-Tapu ʼi muʼa atu! Neʼe ina ʼiloʼi au pea neʼe malimali kae neʼe mole gū. ʼE kei au manatuʼi te ʼu palalau ʼaē neʼe fai mai e te tuʼi fakamāu ʼi te ʼaho ʼaia. Neʼe ina ʼui fēnei: “Yurii, ko te fakatūʼā ʼaē neʼe fai ke ke pilisoni ia taʼu e fā ki muʼa atu, neʼe mole totonu ia. Neʼe mole tonu ia ke nātou pilisoniʼi koe.” ʼI te temi ʼaia, neʼe au ʼāteina!

Ko Te Tagata Solia ʼa Kilisito

ʼI Sūnio ʼo te taʼu 1990, neʼe tonu ke au toe ʼalu ki te pilo ʼaē ʼe tohi ai te ʼu higoa ʼo nātou ʼaē ʼe hū solia, ke au maʼu taku pepa ʼaē ʼe ina fakagafua au ke au nofo ʼi Riga. Neʼe ko te pilo mo tona laupapa loa ʼaē neʼe au fai palalau ai mo te kolonele kua hili kiai taʼu e fā, pea neʼe au ʼui age ʼe mole au hū solia anai. ʼI taku hū ki te pilo, neʼe tuʼuake te kolonele, ʼo ʼalofa mai, pea ina ʼui fēnei: “Ko he meʼa fakaufiufi kiā mātou te ʼu meʼa fuli ʼaē neʼe hoko kiā koe. ʼE au lotomamahi ʼo ʼuhiga mo te ʼu meʼa ʼaē neʼe hoko kiā koe.”

Neʼe au tali fēnei: “Ko au ko te tagata solia ʼa Kilisito, pea ʼe tonu ke au fakahoko taku gāue. ʼAki te tokoni ʼa te Tohi-Tapu, ʼe feala mo koe ke ke maʼu te ʼu tapuakina ʼaē neʼe fakapapau e Kilisito ki tana kau tisipulo​—ko he maʼuli fiafia pea mo he ka haʼu ʼe heʼegata.” (2 Timoteo 2:​3, 4) Neʼe tali fēnei e te kolonele: “Mole heʼeki faʼa fualoa, neʼe au toʼo te Tohi-Tapu, pea ʼe au lolotoga lau nei.” Neʼe au nofo mo te tohi E Feala Keke Mauli Heegata ite Palatiso ite Kele.a Neʼe au avahi ʼi te kapite ʼaē ʼe palalau ai ki te fakaʼiloga ʼo te ʼu ʼaho fakaʼosi, pea mo fakahā age kiā ia te pikipikiga ʼo te lea faka polofeta ʼaia pea mo totatou temi. Neʼe fiafia ʼaupito te kolonele pea mo fakaʼamu ke fua lelei taku gāue.

ʼI te temi ʼaia neʼe kua lahi te taʼukai fakalaumālie ʼi Lettonie. (Soane 4:35) ʼI te taʼu 1991, neʼe au tagata ʼāfea ʼi te kokelekasio. Neʼe ko tagata ʼāfea pe e lua ʼi te fenua kātoa! Hili te taʼu, ko te kokelekasio pe e tahi ʼi Lettonie neʼe vaheʼi lua​—ko te tahi e lea faka Lettonie pea ko te tahi age ʼe lea faka Lusia. Neʼe au maʼu te pilivilesio ʼaē ke au gāue ʼi te kokelekasio lea faka Lusia. Neʼe tuputupu vave ʼaupito, koia ʼi te taʼu ʼaē neʼe hoa mai kiai neʼe toe vaheʼi tolu tamatou kokelekasio! ʼI taku fakakaukauʼi te ʼu meʼa ʼaia, ʼe hā lelei ai ko Sehova totonu ʼaē neʼe ina takitaki te ʼu ōvi ki tana kautahi.

ʼI te taʼu 1998, neʼe hinoʼi au ke au pionie makehe ʼi Jelgava, ko he kolo ʼe tuʼu iā kilometa e 40 ʼi te potu saute uesite ʼo Riga. ʼI te taʼu pe ʼaia, neʼe au liliu ko te ʼuluaki tēhina mai Lettonie, ʼaē neʼe fakaafe ki te Ako ʼo Te Minisitelio, neʼe fai ʼi te lea faka Lusia ʼi Solnechnoye, ko te kolo ʼe tuʼu ōvi ki Saint-Pétersbourg, ʼi Lusia. ʼI taku kau ki te ako, neʼe au mahino ai kapau ʼe tou loto ke fua lelei tatatou minisitelio, pea ʼe tonu ke tou ʼoʼofa ki te hahaʼi. Ko te meʼa ʼaē neʼe au leleiʼia tāfito, ʼo laka age ʼi te ʼu meʼa ʼaē neʼe akoʼi mai ʼi te ako, neʼe ko te ʼofa pea mo te tokaga ʼaē neʼe fai mai kiā mātou e te famili ʼo te Petele pea mo te kau faiako.

Neʼe au fakahoko te tahi fakatuʼutuʼu ʼi toku maʼuli ʼi te taʼu 2001, neʼe au ʼohoana mo te tuagaʼane agalelei, ko Karina. Neʼe mā gāue fakatahi mo Karina ʼi te selevisi pionie makehe, pea ʼi te ʼaho fuli neʼe au lotomālohi ʼi taku sio ki te fiafia ʼo toku ʼohoana mokā liliu mai, mai tana fai faka mafola. Koia ʼe ko he meʼa fakafiafia ʼaupito te tauhi ʼaē kiā Sehova. ʼAki te ʼu faigataʼaʼia lahi ʼaē neʼe hoko lolotoga te temi pule ʼo te Kominisi, neʼe au ako ai te falala kātoa kiā te ia. Ko ia ʼaē ʼe fia kaumeʼa mo Sehova pea mo lagolago ki tona ʼuhiga pule, ʼe ina tali anai te ʼu sākilifisio fuli ʼaia. Kua au maʼu te fakatuʼutuʼu ʼi toku maʼuli, ʼi taku tokoni ʼaē ki te hahaʼi ke nātou ʼiloʼi ia Sehova. ʼE ko he toe pilivilesio kiā au taku tauhi kiā Sehova “o hage he tagata solia lelei a Kilisito.”​—2 Timoteo 2:⁠3.

[Kiʼi nota]

[Paki ʼo te pasina 11]

Neʼe fakatūʼā au ke au gāue lolotoga taʼu e fā, pea neʼe pilisoniʼi au ʼi te Fale Pilisoni ʼo Riga

[Paki ʼo te pasina 12]

Ko au mo Karina ʼi te minisitelio