ʼE Maʼuli Te Folafola ʼa Sehova

Ko He ʼu Puani ʼAoga ʼo Te ʼUluaki Koga ʼo Te ʼu Pesalemo

KOTEĀ la he kupu tāfito lelei ki he tohi faka Tohi-Tapu ʼaē ʼe lahi tāfito ai he ʼu fakavikiviki ki te Tupuʼaga, ia Sehova ʼAtua? ʼE tāu mo feʼauga ke fakahigoaʼi ko te Pesalemo, peʼe ko te ʼu Fakavikiviki. ʼE maʼu ʼi te tohi loaloaga ʼaia ʼo te Tohi-Tapu, ia te ʼu hiva neʼe matamatalelei ʼaupito tona faʼu, ʼe fakamatala ai te ʼu kalitātē fakaofoofo pea mo te ʼu gāue mālohi ʼa te ʼAtua, pea mo fakamatala ai te ʼu tuʼuga lea faka polofeta. ʼE lahi te ʼu hiva ʼe fakahā ai te ʼu meʼa ʼaē neʼe logoʼi e te kau tagata faitohi ʼi te ʼu temi ʼaē neʼe nātou tau ai mo te ʼu fihifihia. Neʼe tohi te ʼu fakamatala ʼaia lolotoga taʼu e afe​—mai te temi ʼo Moisese ʼo aʼu ki te hili ʼo te temi ʼo te ʼaunofo. Ko te ʼu tagata faitohi neʼe ko Moisese, mo te Hau ko Tavite, pea mo ʼihi age. ʼE lau neʼe ko te pelepitelo ko Esitalasi ʼaē neʼe ina fakatoka fakamuli ia te vaevae ʼo te tohi ʼo Pesalemo.

Talu mai fualoa, neʼe vaevae te tohi ʼo te ʼu Pesalemo ʼe ko te ʼu tohi hiva e nima peʼe ko koga e nima: (1) Pesalemo 1 ki te 41, (2) Pesalemo 42 ki te 72, (3) Pesalemo 73 ki te 89, (4) Pesalemo 90 ki te 106, pea (5) Pesalemo 107 ki te 150. ʼE fakamatalatala anai ʼi te alatike ʼaenī ia te ʼuluaki koga. ʼI tuʼa atu ʼo te ʼu pesalemo ʼaenī e tolu ʼo te ʼuluaki koga, ia te Pesalemo 1, mo te 10 pea mo te 33, ko te ʼu pesalemo fuli ʼaē neʼe tohi e Tavite, te Hau ʼo te Iselaele ʼāfea. ʼE mole ʼiloʼi peʼe ko ai te ʼu tagata ʼaē neʼe nātou tohi ia te ʼu pesalemo ʼaia.

“KO TOKU ʼATUA ʼE KO TOKU MAKA”

(Pesalemo 1:1–24:10)

ʼI te ʼosi ʼui ʼa te ʼuluaki pesalemo ʼe fiafia ia te tagata ʼaē ʼe ina leleiʼia te lao ʼa Sehova, ʼe hoko atu ʼaki te lua pesalemo ʼaē ʼe talanoa tāfito ki te Puleʼaga.a ʼE lahi te ʼu kolekole ʼe fai ki te ʼAtua ʼi te koga ʼaenī ʼo te ʼu pesalemo. Ohage la, ko te ʼu Pesalemo 3 ki te 5, mo te 7, mo te 12, mo te 13, pea mo te 17 ʼe ko he ʼu kolekole ke hāofaki kita mai te ʼu nima ʼo te ʼu fili. ʼE faka maʼuhigaʼi ʼi te Pesalemo 8 ia te māʼoluga age ʼo Sehova pea mo te veliveli ʼaupito ʼo te tagata.

ʼI tana fakamatalatala ia Sehova ʼe ko te Puipuiʼaga ʼo tana hahaʼi, neʼe hivaʼi fēnei e Tavite: “Ko toku ʼAtua ʼe ko toku maka. ʼE au hola anai kiā te ia.” (Pesalemo 18:2) ʼI te Pesalemo 19, ʼe vikiʼi ia Sehova ʼi tona ʼuhiga Tupuʼaga pea ko ia ʼaē ʼe ina foaki te lao; ʼe vikiʼi tona ʼuhiga Hāofakiʼaga ʼi te Pesalemo 20; pea ʼi te Pesalemo 21 ʼe vikiʼi ia ia ʼi tana Hāofaki tana Hau ʼaē neʼe ina fakanofo. ʼE fakamatalatala ʼi te Pesalemo 23 ʼe ko te Tauhi Ōvi Lahi, kae ʼe fakahāhā ʼi te Pesalemo 24 ʼe ko te Hau faka kolōlia.

Te ʼu Tali Ki Te ʼu Fehuʼi Faka Tohi-Tapu:

2:1, 2​—Koteā te “meʼa noa” ʼaē ʼe muhumuhu kiai te ʼu puleʼaga? Ko te “meʼa noa” ʼaia ʼe ko te tuʼania tuʼumaʼu ʼa te ʼu puleʼaga ke hoko atu tanatou pule. ʼE vaʼiganoa tanatou muhumuhu ʼaia koteʼuhi ʼe mole iku anai tanatou ʼu fakatuʼutuʼu. ʼE mole feafeala ke mālo te “fakafeagai” ʼa te ʼu puleʼaga “kiā Sehova pea mo ia ʼaē kua ina fakanofo.”

2:7​—Koteā “te fakatotonu ʼa Sehova”? Ko te fakatotonu ʼaia ʼe ko te fuakava ki he Puleʼaga, neʼe fai e Sehova mo tona ʼAlo ʼofaina, ko Sesu Kilisito.​—Luka 22:28, 29.

2:12​—E feafeaʼi ki te kau takitaki hanatou “ ʼuma ki te ʼalo”? ʼI temi ʼaē neʼe tohi ai te Pesalemo, ko te ʼuma ki he tahi neʼe ko he aga fakakaumeʼa pea mo he fakaʼiloga ʼo te agatonu. Neʼe ko he faʼahiga fakatalitali kāiga ki he kau fakaafe. ʼE fakatotonu ki te ʼu hau ʼo te kele ke nātou ʼuma ki te ʼAlo​—ko tona faka ʼuhiga ke nātou fakatalitali lelei ki te Hau Mesianike.

3:te ʼu palalau ʼe tohi ʼi ʼaluga​—He koʼe ʼe ʼi ai he ʼu palalau ʼe tohi ʼi ʼaluga ʼo ʼihi pesalemo? ʼE fakahā ʼi te ʼu palalau ʼaia te tagata ʼaē neʼe ina tohi te pesalemo peʼe ko he ʼu fakamatala ʼo ʼuhiga mo te ʼaluʼaga ʼaē neʼe tohi ai te pesalemo ohage la ko te Pesalemo 3. ʼE lagi toe fakamahino foki ʼi te ʼu palalau ʼaē ʼe tuʼu ʼi ʼaluga ia te fakatuʼutuʼu peʼe ko te fakaʼaogaʼi ʼo he faʼahiga hiva (Pesalemo 4 mo te 5) ʼo feiā mo te ʼu fakatotonu ʼo ʼuhiga mo te fakaʼaluʼalu ʼo te faʼahiga fasi ʼo te musika (Pesalemo 6).

3:2​—Koteā te “Sèla”? ʼE lau māhani ko te kupu ʼaia ʼe faka ʼuhiga ki he kiʼi tuʼu moʼo fai ʼo he metitāsio fakalogologo, ʼi he hiva peʼe ʼi he hiva ʼe fakaʼaogaʼi ai mo he ʼu meʼa mahōlō. Neʼe fakaʼaogaʼi te kiʼi tuʼu ʼaia moʼo faka maʼuhigaʼi he manatu peʼe ko he meʼa neʼe logoʼi ʼi te loto. ʼE mole tonu ke lau leʼo lahi te kupu ʼaia mokā lau te tohi ʼo te Pesalemo ʼi muʼa ʼo te kaugamālie.

11:3​—Ko te ʼu fakatafito fea ʼaē ʼe maumauʼi? ʼE ko te ʼu fakatafito ʼo te tuʼu fakatagata​—ia te lao, tana ʼu fakatuʼutuʼu pea mo te faitotonu. Ka hoko he maveuveu, ʼe hoko ai mo te tokakovi pea mo puli ai mo te faitotonu. ʼI te ʼu taʼi ʼaluʼaga ʼaia, ʼe tonu ki “te agatonu” ke falala kātoa ki te ʼAtua.​—Pesalemo 11:4-7.

21:3​—Koteā ʼaē ʼe maʼuhiga ʼi “te kolona ʼaulo neʼe fakamaʼa”? ʼE mole fakahā ai peʼe ko he kolona moʼoni peʼe ko he fakatā ʼo te kolōlia ʼaē neʼe hilifaki kiai, ʼuhi ko te ʼu tuʼuga mālo ʼa Tavite ʼi te tau. Kae ko te vaega ʼaia neʼe ko he fakakikite ʼo te tuʼulaga hau ʼaē neʼe foaki e Sehova kiā Sesu ʼi te taʼu 1914. ʼE ko he kolona ʼaulo, heʼe ko he fakatātā ʼaia ʼo te lelei ʼaupito ʼo tana nofo hau.

22:1, 2​—Koteā ʼaē neʼe lagi logoʼi e Tavite ʼi te lītuʼa ʼa Sehova kiā ia? Neʼe kinakina ʼaupito ia Tavite ʼi tona ʼu fili, ‘ohage ai tona loto neʼe malū ʼi tona ʼu toʼotoʼoga ohage ko he toega sela ʼe fakaʼosiʼosi tona ulo.’ (Pesalemo 22:14) Maʼa ia, neʼe lagi lītuʼa ia Sehova kiā ia. ʼI tona tautau ʼi te pou, neʼe manatu feiā ia Sesu. (Mateo 27:46) ʼE ʼiloga ʼi te ʼu palalau ʼa Tavite ia te aga ʼa te tagata mokā tau mo he ʼaluʼaga ʼe faigataʼa ʼaupito. Kae ʼi tana faikole ʼaē ʼe tuʼu iā Pesalemo 22:16-21, ʼe ʼiloga mai neʼe kei falala pe ia Tavite ki te ʼAtua.

Te ʼu Puani ʼe Tou Lava Tāʼofi:

1:1. ʼAua naʼa tou fakakaugā mo nātou ʼaē ʼe mole ʼoʼofa kiā Sehova.​—1 Kolonito 15:33.

1:2. Ke ʼaua naʼa fakalaka he ʼaho kae mole heʼeki tou vakaʼi he ʼu manatu fakalaumālie.​—Mateo 4:4.

4:4. Ka tou ʼiʼita, ʼe ko he aga fakapotopoto anai ia te fakatātāʼofi ʼo tatatou ʼu palalau, ke ʼaua naʼa tou fai he ʼu palalau ʼe tou fakahemala anai ki ʼamuli.​—Efeso 4:26.

4:5. ʼE hoki feala ke ʼui ko tatatou ʼu sākilifisio fakalaumālie ʼe “ko he ʼu sākilifisio ʼo te faitotonu,” mo kapau ʼe fai ʼaki he ʼu fakakaukau lelei, pea ʼe ʼalutahi tatatou aga mo te ʼu meʼa ʼaē ʼe fakamaʼua mai e Sehova.

6:5. Ko te tupuʼaga lelei ʼo tatatou fia māʼuʼuli, ʼe ko te fakavikiviki kiā Sehova.​—Pesalemo 115:7.

9:12. ʼE kumikumi e Sehova ia te toto ʼaē neʼe liligi, moʼo tauteaʼi ia nātou ʼaē neʼe nātou fakahoko te ligitoto, kae ʼe ina manatuʼi “te tagi ʼo nātou ʼaē ʼe fakaʼofaʼofa.”

15:2, 3; 24:3-5. Ko te kau ʼatolasio moʼoni ʼe tonu ke nātou palalau ʼi te moʼoni, kae ke ʼaua naʼa nātou fai he ʼu fakapapau loi peʼe ko he ʼu fasituʼu.

15:4.ʼE tonu ke tou faigaʼi mālohi ke tou fakahoko tatatou ʼu fakapapau, tatau aipe peʼe faigataʼa ʼaupito tona fakahoko, gata pe mo kapau ʼe tou mahino neʼe tou fai he fakapapau ʼe mole ʼalutahi mo te Tohi-Tapu.

15:5. ʼI tatatou ʼatolasio kiā Sehova, ʼe tonu ke tou tōkakaga naʼa tou aga fakakākā ʼi te fakaʼaogaʼi ʼo te paʼaga.

17:14, 15. Ko “te ʼu tagata ʼo te tuʼu ʼo te faʼahiga meʼa ʼaenī” ʼe nātou faiga fakamalotoloto ke lelei tonatou maʼuli, mo nātou faʼu honatou famili, pea mo tuku kiā nātou he tōfiga. Ko te potu ʼaē neʼe hoha tāfito kiai ia Tavite ʼi tona maʼuli, ko tana maʼu ʼo he higoa matalelei ʼi tana tauhi ʼaē ki te ʼAtua, ke feala hana ‘mamata ki tona fofoga,’ ko tona faka ʼuhiga ke leleiʼia ia ia e Sehova. ʼI tana “ ʼala ake” ki te ʼu fakapapau pea mo te ʼu fakamoʼoni ʼa Sehova, neʼe ‘fiafia’ ia Tavite ʼi tana sio ki Tona agaaga,’ ko tona faka ʼuhiga neʼe fiafia ʼi tana nofo mo Sehova. Ohage ko Tavite, ʼe tonu ke tou fakafonu totatou loto ʼaki te ʼu koloā fakalaumālie.

19:1-6. Kapau ko te ʼu faʼu ʼa Sehova ʼaē ʼe mole lava palalau peʼe fakakaukau ʼe nātou fakakolōliaʼi ia ia, pea ʼe feafeaʼi age la kiā tatou ʼaenī ʼaē ʼe tou lava fakakaukau mo palalau pea mo ʼatolasio?​—Apokalipesi 4:11.

19:7-11. ʼE lelei ʼaupito ia te ʼu meʼa ʼaē ʼe fakamaʼua mai e Sehova kiā tatou!

19:12, 13. Ko te ʼu lākahala pea mo te ʼu aga fiatuʼu, ʼe ko he ʼu agahala ʼe tonu ke tou tōkakaga ʼo fakamamaʼo mai ai.

19:14. ʼE tou tōkakaga anai ki tatatou ʼu gāue, pea mo toe tōkakaga anai ki tatatou ʼu palalau mo tatatou ʼu fakakaukau.

“ ʼUHI KO TAKU AGATONU NEʼE KE LAGOLAGO KIĀ TE AU”

(Pesalemo 25:1–41:13)

ʼE ʼiloga te lotomālohi pea mo te faiga mālohi ʼa Tavite ke ina taupau tana agatonu, ʼi te ʼu palalau ʼaē ʼe ina fai ʼi te koga ʼaē ʼe kau ai te ʼu ʼuluaki pesalemo e lua! ʼE ina hivaʼi fēnei: “Kiā au, ʼe au haʼele anai ʼi taku agatonu.” (Pesalemo 26:11) ʼI tana kole ʼaē ke fakamolemole age ʼana agahala, neʼe ina fakamoʼoni fēnei: “ ʼI taku nofo fakalogologo, ko ʼoku hui neʼe kaina ʼuhi ko taku ʼu tagi ʼi te ʼaho kātoa.” (Pesalemo 32:3) Neʼe fakaloto mālohiʼi fēnei Tavite ki te hahaʼi ʼaē ʼe nonofo agatonu kiā Sehova: “Ko te ʼu mata ʼo Sehova ʼe tuku ki te kau agatonu, pea ko ʼona taliga ʼe logo ki tanatou pāui ʼaē ke hāofaki ia nātou.”​—Pesalemo 34:15.

Neʼe maʼuhiga ʼaupito ia te tokoni ʼaē neʼe fai ki te kau Iselaele iā Pesalemo 37 pea ʼe toe maʼuhiga pe kiā tatou ʼaenī ʼe tou māʼuʼuli ʼi “te u aho fakamuli” ʼo te tuʼu ʼo te ʼu faʼahiga meʼa ʼaenī! (2 Timoteo 3:1-5) ʼI te ʼu palalau fakakikite ʼaē neʼe fai ʼo ʼuhiga mo Sesu Kilisito, ʼe ʼui fēnei iā Pesalemo 40:7, 8: “Koʼeni kua au haʼu, neʼe tohi ʼo ʼuhiga mo au ʼi te takaiga tohi. Neʼe au fiafia, Ê toku ʼAtua, ʼi te fai ʼo tou finegalo, pea ko tau lao ʼe nofo ʼi toku loto.” Ko te pesalemo fakaʼosi ʼo te koga ʼaenī, ʼe ko te kole ʼa Tavite ke tokoni age ia Sehova ʼi te ʼu taʼu ʼaē neʼe tokakovi ai ʼi tana ʼosi agahala mo Pati-Sepa. Neʼe ina hivaʼi fēnei: “Kiā te au, ʼuhi ko taku agatonu neʼe ke lagolago kiā te au.”​—Pesalemo 41:12.

Te ʼu Tali Ki Te ʼu Fehuʼi Faka Tohi-Tapu:

26:6​—ʼI hona ʼaluʼaga fakatātā, ʼe feafeaʼi hatatou foliʼi ia te ʼaletale ʼa Sehova, ohage ko Tavite? Neʼe fakatātā e te ʼaletale ia te finegalo ʼo Sehova, ʼi tana tali ia te sākilifisio faitotogi ʼaē neʼe foaki e Sesu Kilisito moʼo totogi ʼaki te malamanei. (Hepeleo 8:5; 10:5-10) ʼE tou foliʼi ia te ʼaletale ʼa Sehova ʼi tatatou tui ki te sākilifisio ʼaia.

29:3-9​—Koteā ʼaē ʼe fakatā e te leʼo ʼo Sehova ʼaē ʼe fakatatau ki te ʼuʼulu ʼa te mana ʼaē ʼe fakatupu manavahe tana tō ifo ki te kele? ʼE ina fakatā pe te meʼa ʼaenī: te mālohi fakaofoofo ʼa Sehova!

31:23​—Koteā te totogi fakalaka ʼaē ʼe foaki ki he tagata fialahi? Ko te totogi ʼaē ʼe talanoa kiai ia te vaega ʼe ko he tūʼā. Ko te tagata agatonu ʼe ina maʼu te totogi ʼo tana ʼu lākahala, mokā akonakiʼi ia ia e Sehova. ʼI te mole maliu kehe ʼa te tagata fialahi mai tana aga ʼaē ʼe kovi, ʼe fai age tana tūʼā mamafa, ʼaē ʼe fakatātā e tona totogi fakalaka.​—Tāʼaga Lea 11:31; 1 Petelo 4:18.

33:6; nota ʼi te lalo pasina​—Koteā “te laumālie” peʼe ko te “mānava,” ʼo te gutu ʼo Sehova? Ko te laumālie ʼaia ʼe ko te mālohi gāue ʼa te ʼAtua, peʼe ko te laumālie maʼoniʼoni, ʼaē neʼe ina fakaʼaogaʼi moʼo fakatupu ʼaki te lagi. (Senesi 1:1, 2) ʼE fakahigoaʼi ko te laumālie ʼo tona gutu koteʼuhi ohage ko he mānava lahi, ʼe fekauʼi te laumālie ʼaia ke ʼalu ʼo fakahoko he ʼu gāue ʼi te potu mamaʼo.

35:19​—Koteā te faka ʼuhiga ʼo te kole ʼa Tavite ke mole kemoʼi te ʼu mata ʼo te hahaʼi ʼaē ʼe fēhihiʼa kiā ia? Ko te kemoʼi ʼo te mata ʼa te ʼu fili ʼa Tavite, neʼe faka ʼuhiga ki tanatou fiafia ʼi te iku lelei ʼo tanatou ʼu fakatuʼutuʼu kovi ʼaē neʼe nātou fai moʼo fakafeagai kiā ia. Neʼe kole e Tavite ke mole tuku age honatou ʼu faigamālie ki te faʼahi ʼaia.

Te ʼu Puani ʼe Tou Lava Tāʼofi:

26:4. ʼE tou aga fakapotopoto anai mo kapau ʼe mole tou fakatahi ʼi te ʼu fai palalau ʼaē ʼe fai ʼi te Internet mo te ʼu hahaʼi ʼaē ʼe mole tou feʼiloʼiʼaki mo nātou, mo kapau ʼe mole tou fakakaugā mo te ʼu kaugā ako peʼe ko te ʼu kaugā gāue ʼaē ʼe nātou lau ko ʼotatou kaumeʼa kae tālā ʼe ʼi ai tanatou ʼu fakatuʼutuʼu fakakākā, pea mo ʼaua naʼa tou fakakaugā mo te kau ʼaposita ʼaē ʼe nātou aga malualoi, pea mo nātou ʼaē ʼe maʼuli lua.

26:7, 12; 35:18; 40:9. ʼE tonu ke tou fakavikiviki kiā Sehova ʼi muʼa ʼo te kaugamālie ʼi te ʼu fakatahi faka Kilisitiano.

26:8; 27:4. ʼE tou fiafia koa ʼi tatatou kau ki te ʼu fono faka Kilisitiano?

26:11. ʼI te fakahā e Tavite tona lotomālohi ke nofo agatonu, neʼe ina toe kole foki ke fakamolemole age te ʼAtua kiā ia. Logola totatou ʼuhiga heʼe haohaoa, kae ʼe tou lava taupau maʼu tatatou agatonu.

29:10; nota ʼi te lalo pasina. Ko te heka ʼa Sehova ʼi te “tulivio,” peʼe ko te “moana ʼo te lagi,” ʼe hā ʼaki mai ʼe ina puleʼi kātoa tona mālohi.

30:5. Ko te kalitātē tāfito ʼa Sehova ʼe ko te ʼofa​—kae mole ko te ʼita.

32:9. ʼE mole loto e Sehova ke tou hage ko he ʼāsino ʼe fakalogo ʼuhi ko te fakagutu peʼe ʼuhi ko tona taki ʼaki te kauʼi fue. Kae ʼe ina loto ke tou filifili ke tou fakalogo kiā te ia ʼuhi ko tatatou mahino ki tona finegalo.

33:17-19. ʼE mole ʼi ai he faʼu fakatagata, logola hona mālohi ke feafeaʼi, ʼe feala ke ina ʼaumai te hāofaki. ʼE tonu ke tuku tatatou falala kiā Sehova pea mo tona Puleʼaga.

34:10. ʼE ko he ʼu palalau fakaloto mālohi kiā nātou ʼaē ʼe nātou fakamuʼamuʼa ia te ʼu gāue ʼo te Puleʼaga ʼi tonatou maʼuli!

39:1, 2. Ka kumi logo te kau agakovi moʼo fakamamahiʼi ʼotatou tēhina mo tuagaʼane, ʼe ko he fakapotopoto anai hatatou ‘fakamaʼumaʼu totatou gutu’ pea mo tou nonofo fakalogologo.

40:1, 2. Ko te falala ʼaē kiā Sehova ʼe lava tokoni mai ke tou tauʼi te lotovaivai pea mo tou “hake mai he vanu fakamatakutaku, mai te pela ʼo te takele.”

40:5, 12. ʼE mole ʼi ai anai he mamahi, peʼe ko he ʼu tōtō takitokotahi, ʼo mole lauʼia tona lahi, ʼe ina fakaloto vaivaiʼi anai ia tatou mo kapau ʼe tou manatuʼi tuʼumaʼu, ko tatatou ʼu tapuakina ‘ ʼe tapuke age ʼi te ʼu meʼa ʼaē ʼe tou lava fakamatala.’

“Ke Fai He Fakavikiviki Kiā Sehova”

Ko te ʼu pesalemo e 41 ʼo te ʼuluaki koga, ʼe fakaloto fīmālie pea mo fakaloto mālohi ʼaupito! Peʼe tou felāveʼi mo ni ʼu mamahi, peʼe vevele totatou leʼo ʼo loto, kae ʼe tou lava maʼu he mālohi pea mo he fakaloto mālohi mai te koga ʼaia ʼo te Folafola mālohi ʼa te ʼAtua. (Hepeleo 4:12) ʼE maʼu ʼi te pesalemo ʼaia ia te logo ʼe ina ʼaumai ai he takitaki lelei ʼi totatou maʼuli. Logope he faigataʼaʼia ʼe tou felāveʼi mo ia, kae tuʼumaʼu aipe, ʼe fakaloto mālohiʼi tatou ko Sehova ʼe mole lītuʼa anai kiā tatou.

ʼE fakaʼosi te ʼuluaki koga ʼo te ʼu pesalemo ʼaki te ʼu palalau ʼaenī: “Ke fai he fakavikiviki kiā Sehova, te ʼAtua ʼo Iselaele, talu mai he ʼu temi ʼe mole ʼiloʼi hona gataʼaga pea ʼo aʼu ki he ʼu temi ʼe mole ʼiloʼi hona gataʼaga. Ameni pea ʼAmeni.” (Pesalemo 41:13) ʼI tatatou ʼosi vakaʼi ia te ʼu pesalemo ʼaenī, ʼe uga ai tatou ke tou tapuakiʼi peʼe ke tou fakavikiviki kiā Sehova!

[Kiʼi nota]

[Fakamatala ʼo te pasina 15]

Kapau ko te ʼu faʼu ʼa Sehova ʼaē ʼe mole lava palalau ʼe nātou fakakolōliaʼi ia Sehova, pea e feafeaʼi age la kiā tatou!

[Paki ʼo te pasina 13]

ʼE lahi te ʼu pesalemo ʼi te ʼu ʼuluaki pesalemo e 41, neʼe ko Tavite ʼaē neʼe ina tohi

[Haʼuʼaga ʼo te paki]

Stars: Courtesy United States Naval Observatory

[Paki ʼo te pasina 14]

ʼE koutou ʼiloʼi peʼe ko te pesalemo fea ʼaē ʼe ʼui ai ko Sehova ko te Tauhi Ōvi Lahi?

[Paki ʼo te pasina 16]

ʼAua naʼa tou tuku ke fakalaka he ʼaho kae mole heʼeki tou vakaʼi he ʼu manatu fakalaumālie

[Haʼuʼaga ʼo te paki]

Stars: Courtesy United States Naval Observatory

[Haʼuʼaga ʼo te paki pasina 15]

Stars, pages 18 and 19: Courtesy United States Naval Observatory