“Nee Ekenaki e Te Laumalie Maonioni”

“Nee mole he folafola pe e tahi nee tuku mai e he finegalo o te tagata, kae nee ekenaki e te Laumalie Maonioni ni tagata ke natou palalau mai te Atua.”—2 PET. 1:21.

TE ʼU PUANI ʼE TONU KE TOKAGAʼI

Neʼe foaki feafeaʼi e te laumālie māʼoniʼoni ia te folafola ʼa te ʼAtua ki he ʼu tagata ke natou tohi?

Koteā ʼaē ʼe fakamoʼoni ai ko te Tohi-Tapu ʼe haʼu mai te ʼAtua?

ʼE kotou fakahā feafeaʼi anai takotou loto fakafetaʼi heʼe kotou maʼu ia te Folafola ʼa te ʼAtua?

1. He koʼē ʼe ʼaoga kiā tātou ia te Folafola ʼa te ʼAtua?

ʼE TOU ʼomai mai fea? He koʼē ʼe tou māʼuʼuli? ʼE tou ʼolo ki fea? He koʼē ʼe fēia ia te mālamanei? Koteā ʼaē ʼe hoko kiā tātou mokā tou mamate? ʼE tautau lagaʼi e te tokolahi ia te ʼu fehuʼi ʼaia. ʼE mole feala ke tou maʼu ni tali ki te ʼu fehuʼi maʼuhiga ʼaia mo kapau ʼe mole tou maʼu ia te Folafola ʼa te ʼAtua, ia te Tohi-Tapu. Kapau ʼe mole tou fakaʼaogaʼi ia te Tohi-Tapu, pea ʼe tou fai pē anai he fakamahino ʼo mulimuli ki ʼatatou manatu. Kapau ʼe tou fai fēia pea ʼe mole feala anai ke tou manatu tahi mo te tagata fai pesalemo ʼo ʼuhiga mo te lao ʼa Sehova.—Lau ia Pesalemo 19:8.

2. Koteā ʼaē kā tokoni mai anai ke lahi age ia tatatou leleiʼia te Tohi-Tapu, ʼaē ko he meʼa ʼofa lelei tukupau mai te ʼAtua?

² ʼI meʼa fakaʼofaʼofa foki, heʼe tokolahi ia nātou ʼaē ʼe mole kei natou leleiʼia ia te ʼu akonaki ʼi te Tohi-Tapu. (Vakaʼi ia Apokalipisi 2:4.) ʼE mole kei natou fai ia te meʼa ʼaē ʼe leleiʼia e Sehova. (Esa. 30:21) Kae ʼe mole tonu ke tou toe fēia mo tātou. ʼE tonu ke tou faiga ke tou haga leleiʼia ia te Tohi-Tapu pea mo ʼana akonaki. Heʼe ko te Tohi-Tapu ʼe ko he meʼa ʼofa lelei tukupau mai totatou Tupuʼaga ʼofa. (Sakp. 1:17) Koteā ʼaē kā tokoni mai anai ke lahi age ia tatatou leleiʼia “te folafola a te Atua”? ʼE lelei hatatou fakakaukauʼi pe neʼe takitaki feafeaʼi ia te ʼu tagata ʼaē neʼe natou tohi ia te Tohi-Tapu pea mo vakavakaʼi ia te ʼu tupuʼaga ʼaē ʼo te fakamoʼoni ʼa ʼihi ko te Tohi-Tapu ʼe haʼu mai te ʼAtua. Pea ʼe ina ʼekenaki anai tātou ke tou lau ia te Folafola ʼa te ʼAtua ʼi te ʼaho fuli pea mo maʼuliʼi ʼana tokoni.—Hep. 4:12.

“NEE EKENAKI E TE LAUMALIE MAONIONI”—ʼO FEAFEAʼI?

3. Neʼe ʼekenaki feafeaʼi e te laumālie māʼoniʼoni ia te kau polofetā pea mo te kau tagata faitohi ʼo te Tohi-Tapu?

³ Lolotoga taʼu e 1610, neʼe tohi ai e te toko 40 kau tagata kehekehe ia te Tohi-Tapu, ʼo kamata mai te taʼu 1513 I.M.T.S. ʼo aʼu ki te taʼu 98. “Nee ekenaki e te Laumalie Maonioni” ʼihi kau polofetā. (Lau ia 2 Petelo 1:20, 21.) Ko te kupusiga palalau Fakakeleka ʼaē neʼe fakaliliu ʼaki te kupu “ekenaki” ʼe fakaʼuhiga ki he meʼa “neʼe ʼave peʼe neʼe hiki,” peʼe ki he meʼa “neʼe ʼeke, neʼe uga, neʼe taki.”a Iā Gaue 27:15, neʼe fakaʼaogaʼi ai te kupu ʼaia ʼo ʼuhiga mo he vaka neʼe feʼaveʼaki e te matagi. Neʼe “ekenaki e te Laumalie Maonioni” ia te kau polofetā pea mo te kau tagata faitohi ʼo te Tohi-Tapu, ko tona fakaʼuhiga neʼe felōgoi te ʼAtua mo nātou, neʼe ina ʼekenaki mo taki nātou ʼaki tona mālohi gāue ke natou tohi tana manatu. ʼI ʼihi temi, neʼe mole pē lā mahino ia te kau polofetā pea mo te kau tagata faitohi ʼaē neʼe taki e te laumālie māʼoniʼoni ki te ʼu lea fakapolofetā ʼaē neʼe natou tohi. (Tan. 12:8, 9) ʼEī, “e hau te Tohi tapu katoa mai te tukumanava a te Atua” pea ʼe mole maʼu ai he ʼu manatu fakatagata.—2 Tim. 3:16.

4-6. Neʼe foaki feafeaʼi e Sehova ia tana folafola ki te kau tagata faitohi ʼo te Tohi-Tapu? Kotou tuku mai he faʼifaʼitaki.

⁴ Neʼe fakaʼaogaʼi feafeaʼi e te ʼAtua ia tona laumālie māʼoniʼoni moʼo foaki ia tana folafola ki te kau tagata faitohi ʼo te Tohi-Tapu? Neʼe foaki age koa he ʼu kupusiga palalau peʼe ko he ʼu manatu pē ia ke feala hanatou tohi ʼaki ʼanatou faʼahiga palalau? Tou toʼo te faʼifaʼitaki ʼa he pātolō ʼe ina fai hana tohi. Kapau ʼe maʼuhiga kiā ia ia te ʼu palalau ʼaē ʼe tonu ke fakaʼaogaʼi pea ʼe ina fai e ia totonu ia te tohi peʼe ina laulau age ki tana fafine gāue tā masini. ʼE tā e te fafine gāue pea ʼe sinie e te pātolō. ʼI ʼihi temi, ʼe feala pē ke ina foaki age ia te ʼu manatu tāfito, pea ʼe fai e tana fafine gāue ia te tohi. ʼE toe lau e te pātolō ia te tohi ʼo ina vakaʼi peʼe ʼaoga ke fai he ʼu fetogi. Kapau kua tokalelei, pea ʼe ina sinie ohagē pē neʼe ko ia totonu ʼaē neʼe ina fai ia te tohi ʼaia.

⁵ ʼO toe fēia aipē, ko ʼihi koga ʼo te Tohi-Tapu neʼe foaki “e te nima o te Atua.” (Eke. 31:18) Neʼe toe maʼuhiga kiā Sehova ia tana foaki totonu ia te ʼu palalau ʼaē neʼe tonu ke tohi. Ohagē lā, ko tana ʼui fēnei age kiā Moisese iā Ekesote 34:27: “Tohi te u folafola aeni; koteuhi kua au fai te hai mo koe mo Iselaele, o mulimuli ki te u folafola aeni.” Neʼe toe ʼui fēnei e Sehova ki te polofetā ko Selemia: “Tohi ki he tohi te u folafola fuli ae kua au fakaha atu kia koe.”—Sel. 30:2.

⁶ ʼI te ʼu ʼaluʼaga fuli, neʼe mole foaki e te ʼAtua ki te kau tagata faitohi ʼo te Tohi-Tapu ia te ʼu kupu fuli ʼaē neʼe tonu ke natou fakaʼaogaʼi. Neʼe tuku e te ʼAtua ʼana manatu ki ʼonatou loto mo ʼanatou fakakaukau, pea mo ina fakagafua age ke natou tohi tana folafola ʼaki ʼanatou faʼahiga palalau. ʼE ʼui fēnei iā Ekelesiasi 12:12: “Nee kumi e te Ekelesiasi ke ina mau ni kupu lelei, pea e totonu te u mea ae kua tohi, ko ni palalau o te mooni.” Ko te tagata faitohi Evaselio ko Luka neʼe ina kumi lelei ia te ʼu meʼa fuli talu mai te kamataʼaga pea mo ina fakahoahoa lelei. (Luka 1:3) Neʼe fakaʼaogaʼi e te ʼAtua ia tona laumālie māʼoniʼoni ke ʼaua naʼa fetogi e te tagata agahala ia tana folafola.

7. Neʼe ʼiloga feafeaʼi ia te poto lahi ʼo te ʼAtua ʼi tana filifili he ʼu tagata ke natou tohi ia te Tohi-Tapu?

⁷ Neʼe ko he aga fakapotopoto ia ʼa te ʼAtua ʼi tana fakaʼaogaʼi ia te tagata moʼo tohi ia te Tohi-Tapu. Ko te ʼu kupusiga palalau ʼe tokoni mai ke tou mahino pea ke malave kiā tātou ia he ʼu manatu. ʼE feafeaʼi lā mo kapau neʼe fakaʼaogaʼi e Sehova ia he kau ʼāselo ke natou tohi ia te Tohi-Tapu? ʼE feala anai koa hanatou talanoa ki he ʼu ʼaluʼaga ʼe tau mo te tagata ohagē ko te tuʼania, te lotomamahi pea mo te lotovaivai? Neʼe fakagafua e te ʼAtua ki he ʼu tagata agahala ke natou filifili he ʼu palalau moʼo tohi ʼaki tana folafola ke malave ki totatou loto.

TE ʼU FAKAMOʼONI KO TE TOHI-TAPU ʼE HAʼU MAI TE ʼATUA

8. He koʼē ʼe feala ke tou ʼui ko te Tohi-Tapu ʼe makehe tokotahi ia mai ʼihi atu tohi fakalotu?

⁸ ʼE lahi ia te ʼu fakamoʼoni ʼe tou tui ai ko te Tohi-Tapu ʼe haʼu mai te ʼAtua. ʼE tokoni mai te Tohi-Tapu ke tou ʼiloʼi ia te ʼAtua moʼoni ʼo kehekehe ia mo te ʼu tohi lotu ʼaē. Ohagē lā, ʼe talanoa ia te ʼu tohi ʼa te lotu Hindouisme ki ʼanatou toʼotoʼoga fakalotu, mo ʼanatou akonaki, mo ʼanatou fāgana pea mo ʼanatou lēkula ʼo ʼuhiga mo te aga. ʼE fakamahino e te ʼu tohi ʼa te lotu Bouddhisme ia te ʼu lēkula ʼaē ʼe tonu ke mulimuli kiai ia te kau monike pea mo te kau tāupoʼou. ʼE natou toe fakamahino tanatou tui pea mo te ʼu akonaki ʼa Bouddha. Neʼe mole ʼui e Bouddha ko ia ko he ʼatua pea neʼe mole faʼa palalau ia ʼo ʼuhiga mo te ʼAtua. ʼE talanoa ia te ʼu tohi ʼa te lotu Confucianisme ki he ʼu meʼa neʼe hoko ʼi te temi muʼa, mo ʼanatou lēkula ʼo ʼuhiga mo te aga, mo te ʼu meʼa fakalauʼakau pea mo ʼanatou kātiko. ʼE toe ʼi ai foki mo te tohi ʼa te lotu Mahometa ʼaē ʼe akoʼi ai ʼe ʼi ai te ʼAtua pē e tahi, ʼe ina ʼiloʼi pea mo ina puleʼi ia te kā haʼu, kae ʼe mole ina fakahā ia te huafa ʼo te ʼAtua, ʼaē ko Sehova, ʼaē ʼe hā tuʼa lahi ʼi te Tohi-Tapu.

9, 10. Koteā ʼaē ʼe feala ke tou ako ʼo ʼuhiga mo te ʼAtua mai te Tohi-Tapu?

⁹ ʼE lahi te ʼu tohi fakalotu ʼe mole natou faʼa talanoa ʼo ʼuhiga mo te ʼAtua. Kae ʼe tokoni mai ia te Tohi-Tapu ke tou ʼiloʼi ia Sehova ʼAtua mo ʼana gāue, pea mo tou mahino ki tona ʼuluagaaga. ʼE fakahā ʼi te Tohi-Tapu ko te ʼAtua ʼe faitotonu, mo poto, mo mafimafi pea ʼe ʼofa kiā tātou. (Lau ia Soane 3:16; 1 Soane 4:19.) Pea ʼe ʼui fēnei mai ʼi te Tohi-Tapu: “E mole fai e te Atua he fakakehekehe ki he tahi, kae i te puleaga fuli, ko ae e ofa kia ia mo haele i te maonioni, e lelei ia ki ona mata.” (Gaue 10:34, 35) Neʼe fakaliliu ia te Tohi-Tapu ki te ʼu lea kehekehe. ʼE fakahā mai ai ia te mole fakapalatahi ʼa te ʼAtua. ʼE ʼui e te kau popoto ʼi te ʼu lea ʼe maʼu iā ʼaho nei ni lea e 6 700 ʼi te mālamanei kātoa, pea ʼi te ʼu lea ʼaia ko lea e 100 ʼe lahi tona fakaʼaogaʼi. Neʼe fakaliliu ia te Tohi-Tapu kātoa peʼe fakakoga iā lea e 2 400 tupu. Koia kua feala ki te hahaʼi fuli hanatou lau ia he koga ʼo te Tohi-Tapu ʼi tanatou lea.

¹⁰ Neʼe ʼui fēnei e Sesu: “O kaku mai ki te aho nei e gaue taku Tamai; mo au foki, e au gaue.” (Soa. 5:17) ʼE ʼAtua ia Sehova “mai te heegata ki te heegata.” Koia kotou fakakaukauʼi age muʼa ia te ʼu gāue fuli ʼaē neʼe ina fakahoko. (Pes. 90:2) ʼE gata pē ki te Tohi-Tapu ʼe talanoa ki te ʼu gāue neʼe fakahoko e te ʼAtua ʼi te temi muʼa, mo te temi nei pea mo ʼaē kā ina fakahoko anai ʼi te kā haʼu. ʼE toe akoʼi mai ʼi te Tohi-Tapu ia te ʼu meʼa ʼaē ʼe ina leleiʼia mo ʼaē ʼe fehiʼa kiai, pea mo ina fakahā mai peʼe feafeaʼi hatatou fakaovi age kiā te ia. (Sakp. 4:8) ʼAua naʼa tou tuku ʼatatou fakatuʼutuʼu peʼe ko ʼatatou tuʼania ke ina fakamamaʼo tātou mai iā te ia.

11. Ko te poto lahi fea ʼaē ʼe tou maʼu ʼi te Tohi-Tapu?

¹¹ ʼE maʼu ʼi te Tohi-Tapu ia he poto lahi pea ʼe ko he tahi fakamoʼoni ʼaia ʼe haʼu mai te ʼAtua. Neʼe tohi fēnei e te ʼapositolo ko Paulo: “Ko ai nee ina iloi te manatu a te Aliki? Ko ai nee ina tuku ni tokoni kia ia?” (1 Ko. 2:16) Neʼe fakatafito ia te vaega ʼaenī ki te ʼu fehuʼi ʼaē neʼe fai e te polofeta ko Esaia ki te hahaʼi ʼo tona temi: “Ko ai nee ina ahiahii te Laumalie o [Sehova]? Pea ko ai nee ina fakamalamai te Eteleno aki ana tokoni?” (Esa. 40:13) Kailoa ia, ʼe mole he tahi ʼe poto age ia iā Sehova. Koia ʼaē ʼe tou maʼu ai he ʼu fua lelei ʼi tatatou maʼuliʼi ia te ʼu tokoni Fakatohi-tapu ʼo ʼuhiga mo te nofo ʼohoana, mo te maʼu fānau, mo te ʼu fakafiafia, mo te fakakaugā, mo te faʼa gāue, mo te aga fakahagatonu, pea mo te aga ʼaē ʼe tonu ke fai. ʼE mole feala anai ke tou maʼu ia he tokoni ʼe kovi mai te Tohi-Tapu. Pea tahi, ʼe mole maʼu e te tagata ia he poto feʼauga ke ina foaki he ʼu tokoni ʼe fua lelei tuʼumaʼu. (Sel. 10:23) ʼE fetofetogi pea mo fakafoʼou tuʼumaʼu ʼana tokoni. ʼE ʼui fēnei ʼi te Tohi-Tapu: “E iloi e [Sehova] te u manatu a te tagata, e ina iloi e natou vaiga.”—Pes. 94:11.

12. Neʼe faigaʼi feafeaʼi e te hahaʼi ke natou pulihi ia te Tohi-Tapu?

¹² ʼE toe foaki mai e te hisitolia ia he fakamoʼoni neʼe haʼu te Tohi-Tapu mai te ʼAtua. ʼI muʼa atu tokolahi neʼe natou faigaʼi ke natou pulihi ia te folafola ʼa te ʼAtua. ʼI te taʼu 168 I.M.T.S., neʼe faigaʼi e te Hau Silia ko Atioko 4 ke ina tutu ia te ʼu tohi ʼo te Lao. ʼI te taʼu 303 H.T.S., neʼe fakatotonu e te Hau Loma ko Dioclétien ke maumauʼi ia te ʼu fale fono ʼa te kau Kilisitiano pea mo tutu ʼanatou Tohi-Tapu. Neʼe hoko ia te maumau ʼaia lolotoga taʼu e hogofulu. ʼI te ʼu taʼu 1 100 neʼe faigaʼi e te ʼu tui tapu ke tāʼofi ia te fakaliliu ʼo te Tohi-Tapu ki he tahi age ʼu lea koteʼuhi neʼe mole natou loto ke ako e te hahaʼi ia te Tohi-Tapu. Logolā ia te ʼu faiga ʼaia ʼa Satana mo tana hahaʼi, kae neʼe mole hoko ia te faʼahi ʼaia koteʼuhi ʼe tou maʼu ia te Tohi-Tapu iā ʼaho nei. Neʼe mole fakafealagia e Sehova ki he tahi ke ina pulihi ia tona meʼa ʼofa ki te mālamanei.

TE ʼU FAKAMOʼONI ʼE TUI KIAI TE TOKOLAHI

13. Koteā ʼaē ʼe tou fakamoʼoni ai ko te Tohi-Tapu ʼe haʼu mai te ʼAtua?

¹³ ʼE lahi ia te tahi ʼu fakamoʼoni ʼe haʼu ia te Tohi-Tapu mai te ʼAtua. ʼE ʼalutahi ʼana manatu, ʼe totonu ia ʼi te faʼahi faka scientifique, ʼe hoko ʼana lea fakapolofetā pea ʼe mole mālualoi ʼana tagata faitohi. ʼE toe maʼu ʼi te Tohi-Tapu ia te mālohi moʼo uga ia te hahaʼi ke natou fetogi, ʼe toe totonu ʼi te faʼahi ʼo te hisitolia pea ʼe ina foaki mai he ʼu tali ki te ʼu fehuʼi ʼaē neʼe lagaʼi ʼi te ʼuluaki palakalafe. Tou vakaʼi peʼe koteā ʼaē neʼe tokoni ki ʼihi ke natou fakamoʼoni ko te Tohi-Tapu ʼe hau mai te ʼAtua.

14-16. (1) Koteā ʼaē neʼe tupu ai ia te fakamoʼoni ʼa he tahi neʼe kau ki te lotu Mahometa, mo te lotu Hindouisme pea mo he tahi neʼe mole kei tui ki te ʼAtua ko te Tohi-Tapu ʼe haʼu mai te ʼAtua? (2) Ko te manatu fea ʼaē kā kotou fia fakaʼaogaʼi anai ʼi takotou minisitelio moʼo fakamoʼoni ʼaki ko te Tohi-Tapu ʼe haʼu mai te ʼAtua?

¹⁴ Neʼe tupu ia Anwarb ʼi te fenua ʼe mālohi ai te lotu Mahometa. ʼI te temi ʼaē neʼe maʼuli ai ʼi Amelika, neʼe ʼolo age ki ai te kau Fakamoʼoni ʼa Sehova. ʼE ʼui fēnei e Anwar: “ ʼI te temi ʼaia, neʼe mole au maʼu he faʼahiga manatu ʼe lelei ʼo ʼuhiga mo te ʼu lotu Fakakilisitiano. Neʼe au manatu fēia ʼuhi ko te ʼu mātea ʼaē neʼe au logo kiai neʼe fakahoko e nātou ʼaē ʼe natou ʼui ko nātou ko te kau Kilisitiano. Kae ʼuhi ko taku fia ʼiloʼi meʼa fuli neʼe au lotolelei ai ke fai haku ako Tohi-Tapu.” Mole tuai, pea neʼe liliu leva ia Anwar ki tona fenua ʼo mole toe felāveʼi ai mo te kau Fakamoʼoni ʼa Sehova. Hili kiai ni taʼu, neʼe folau leva ʼo maʼuli ʼi Eulopa ʼo toe toʼo ai tana ako Tohi-Tapu. Ki muli age neʼe ina ʼui fēnei: “Neʼe au tui papau leva ko te Tohi-Tapu ʼe haʼu mai te ʼAtua ʼuhi ko te hoko moʼoni ʼo ʼana lea fakapolofetā, mo tana talanoa ki he kupu tāfito pē e tahi, mo te mole fefakafeagaiʼaki ʼo ʼana manatu, pea mo te feʼofaʼofaniʼaki ʼa te kau ʼatolasio ʼa Sehova.” Neʼe papitema leva ia Anwar ʼi te taʼu 1998.

¹⁵ Ko Asha ʼaē ʼe taʼu hogofulu-mā-ono, ʼe haʼu mai te fāmili ʼe kau ki te lotu Hindouisme. ʼE ina ʼui fēnei: “Ko au, ʼe hoki au manatuʼi pē te ʼAtua mokā ʼe au ʼalu ʼo faikole peʼe mokā ʼe au tau mo ni fihifihia.” ʼE ina toe ʼui fēnei: “Kua fetogi ʼosi ia toku maʼuli ʼi te temi pē ʼaē neʼe kamata ʼaʼahi ai au e te kau Fakamoʼoni ʼa Sehova.” Neʼe ako e Asha ia te Tohi-Tapu pea mo ina ʼiloʼi lelei ai ia te ʼAtua. Koteā ʼaē neʼe tupu ai tana tui papau ʼe haʼu te Tohi-Tapu mai te ʼAtua? ʼE ina fakamahino fēnei: “Neʼe au maʼu ia te ʼu tali ʼi te Tohi-Tapu ki te ʼu fehuʼi fuli ʼaē neʼe au fai. Neʼe tokoni mai ke au tauhi ki te ʼAtua tatau aipē peʼe fakapulipuli, pea ke ʼaua naʼa au toe ʼalu ki he fale faikole ʼo tulolo ki he fakatātā.”

¹⁶ Neʼe lahilahi ake ia Paula ʼi he fāmili Katolika, kae ʼaki te ʼalu ʼo te temi neʼe mole kei tui leva ki te ʼAtua. Pea neʼe hoko ai leva ia te ʼaluʼaga. ʼE ina ʼui fēnei: “Neʼe au toe felāveʼi mo toku kaumeʼa neʼe kua lau māhina ʼosi tama heʼeki toe fesioʼaki. Pea ʼi te temi ʼaia neʼe ko te lamote ʼo te hahaʼi ko te fakatuʼu lauʼulu pea mo te fakaʼaogaʼi fakavalevale ʼo te toloke. Neʼe au tokagaʼi ai tana kua fetogi, neʼe kua mata maʼa pea mo mata fiafia. Koia neʼe au fehuʼi age leva ki ai pe koteā ia te tupuʼaga ʼo tana fetogi. Neʼe ina ʼui fēnei mai kua ina ako ia te Tohi-Tapu pea mo te kau Fakamoʼoni ʼa Sehova pea ʼe ina fia vavae mo au ia te ʼu manatu ʼaē neʼe ina ako.” ʼI tana sio ʼaē ki te toe fetogi ʼaē neʼe hoko ki tona kaumeʼa ʼuhi ko te ʼu akonaki ʼo te Tohi-Tapu neʼe fakatui atu aipē ko te Tohi-Tapu ʼe haʼu mai te ʼAtua.

“KO TAU FOLAFOLA KO HE MALAMA TAKI I OKU VAE”

17. Koteā ʼaē ʼe feala ke hoko kiā koutou mo kapau ʼe kotou lau pea mo metitāsioʼi ia te Folafola ʼa te ʼAtua ʼi te ʼaho fuli?

¹⁷ Ko te Tohi-Tapu ʼe ko he meʼa ʼofa lelei tukupau neʼe foaki mai e Sehova ʼaki tona laumālie māʼoniʼoni. Kotou fiafia ʼi tona lau ʼi te ʼaho fuli, pea ʼe tuputupu anai tokotou ʼofa ʼaē ki te ʼAtua pea mo leleiʼia tona lau. (Pes. 1:1, 2) Kotou kamata ʼakotou ako ʼaki te faikole, ʼo kotou kole te laumālie ʼo te ʼAtua ke ina takitaki ʼakotou manatu. (Luka 11:13) ʼE maʼu ʼi te Tohi-Tapu ia te ʼu manatu ʼa te ʼAtua, koia kapau ʼe kotou metitāsioʼi tana Folafola pea ʼe feala anai ke kotou manatu tahi mo te ʼAtua.

18. Koteā ia te tupuʼaga ʼo te fia hoko atu ʼo takotou ako Tohi-Tapu?

¹⁸ ʼI takotou haga ako ia te moʼoni ʼo te Tohi-Tapu, kotou maʼuliʼi ia te ʼu meʼa ʼaē ʼe kotou ako. (Lau ia Pesalemo 119:105.) Ko te lau ʼo te Tohi-Tapu ʼe hagē pē ko hakita fai sioʼata. Kapau ʼe tou sio ki he meʼa ʼe tonu ke fetogi, tou foimo fakahoko. (Sakp. 1:23-25) Kotou fakaʼaogaʼi ia te Folafola ʼa te ʼAtua ohagē he heletā moʼo tali ki he tahi ʼe ina fia ʼiloʼi ia te ʼuhiga ʼo takotou tui pea mo taʼaki ia te ʼu akonaki loi mai te loto ʼo te hahaʼi agamalū. (Efe. 6:17) Kā kotou lau ia te Tohi-Tapu, pea kotou loto fakafetaʼi neʼe “ekenaki e te laumalie maonioni” ia he ʼu polofetā pea mo he ʼu tagata ke natou tohi ia te Folafola ʼa te ʼAtua.

[ʼU nota]

[Talanoa ʼo te pāsina 32]

Kotou lau ia te Tohi-Tapu ʼi te ʼaho fuli, pea ʼe tuputupu anai tokotou ʼofa ʼaē ki te ʼAtua

[Paki ʼo te pāsina 29]

Ko he tohi mai iā ia ʼaē neʼe ina sinie