Tou Ako Mai Te Folafola ʼa Te ʼAtua

Koteā ʼAē Kā Hoko Anai ʼi Te ʼAho ʼo Te Fakamāu?

ʼI te ʼalatike ʼaenī, ʼe lagaʼi ai te ʼu fehuʼi ʼe feala ke kotou fai pea ʼe fakahā ai ia te ʼu vaega Tohi-Tapu ʼo kotou maʼu ai ʼona tali. ʼE fiafia anai ia te kau Fakamoʼoni ʼa Sehova ʼi te fai palalau mo koutou ʼo tali ki te ʼu fehuʼi ʼaenī.

1. Koteā te ʼAho ʼo Te Fakamāu?

Ohagē ko tona fakahā ʼi te pāki ʼaē ʼe tuʼu ʼi te faʼahi mataʼu, ki te manatu ʼa te tokolahi ʼe fakahoahoa anai ia te toko miliale hahaʼi iā muʼa ʼo te hekaʼaga hau ʼo te ʼAtua ke fakamāuʼi nātou ʼo mulimuli ki te ʼu gāue ʼaē neʼe natou fai ki muʼa atu. ʼE fakapale anai ʼihi ke natou māʼuʼuli ʼi selō, kae ko ʼihi ʼe fakamamahiʼi anai nātou ʼi he ʼifeli kakaha. Kae ʼe fakahā mai ʼi te Tohi-Tapu, ko te fakatuʼutuʼu ʼo te ʼAho ʼo Te Fakamāu ʼe ko te haofaki ʼo te hahaʼi mai te heʼe faitotonu. (Pesalemo 96:13) Neʼe hinoʼi e te ʼAtua ia Sesu ko te Tuʼi Fakamāu ʼaē kā ina toe fakatuʼu anai ia te faitotonu ki te mālamanei.—Lau ia Esaia 11:1-5; Gaue 17:31.

2. ʼE toe fakatuʼu feafeaʼi anai te faitotonu ʼi te ʼAho ʼo Te Fakamāu?

ʼAki tana filifili ke talagataʼa ki te ʼAtua, ko Atama te ʼuluaki tagata, neʼe ina tuku ki tona hōloga te agahala, mo te mamahi pea mo te mate. (Loma 5:12) Moʼo fakatokatoka ia te heʼe faitotonu ʼaia, ʼe fakatuʼuake anai e Sesu ia te toko lauʼi miliale hahaʼi ki te maʼuli. ʼE fakahā ʼi te tohi ʼo Apokalipisi ʼe hoko anai te fakatuʼuake ʼaia ʼi te lolotoga ʼo te ʼafio ʼa Kilisito Sesu iā taʼu e afe.—Lau ia Apokalipisi 20:4, 11, 12.

ʼE mole fakamāuʼi anai ia te kau fakatuʼuake ʼaia, ʼo mulimuli ki te ʼu gāue ʼaē neʼe natou fakahoko ʼi muʼa ʼo tanatou mamate, kae ki te ʼu gāue kā natou fakahoko ʼi te ʼosi ʼavahi ʼo te ʼu “tohi” ʼaē ʼe talanoa kiai ia Apokalipisi kāpite 20. (Loma 6:7) Neʼe ʼui e te ʼapositolo ko Paulo ko nātou ʼaē kā fakatuʼuake anai ki te maʼuli pea mo natou maʼu te faigamālie ʼaē ke natou ʼiloʼi te ʼAtua ʼe ko “te kau agatonu mo te kau agahala.”—Lau ia Gaue 24:15.

3. Koteā ʼaē kā fakahoko anai ʼi te ʼAho ʼo Te Fakamāu?

Ko nātou ʼaē neʼe kua mamate kae heʼeki natou ʼiloʼi ia Sehova ʼAtua pea mo tauhi kiā te ia, ʼe natou maʼu anai ia te faigamālie ʼaē ke natou fetogi pea mo fai te meʼa ʼaē ʼe totonu. Kapau ʼe natou fai fēia, pea ko tonatou fakatuʼuake ʼe ko he “toe tuuake anai ki te mauli.” Kae, ko ʼihi kau fakatuʼuake, ʼe mole natou fia ako anai te ʼu ala ʼo Sehova. Pea ko tonatou fakatuʼuake ʼe ko he “toe tuuake anai ki te fakamaau.”—Lau ia Soane 5:28, 29; Esaia 26:10; 65:20.

ʼI te hili ʼo te ʼAho ʼo Te Fakamāu ʼi te lolotoga taʼu e afe, ʼe toe foaki anai e Sehova ia te maʼuli haohaoa ki tana hahaʼi fakalogo ohagē ko te kamataʼaga. (1 Kolinito 15:24-28) ʼE ko he ʼamanaki taulekaleka anai maʼa nātou fuli ʼaē ʼe fakalogo! ʼI te ʼahiʼahi fakaʼosi, ʼe veteki age anai e Sehova ia Satana te Tēvolo mai tona pilisoniʼi ia taʼu e afe. ʼE toe faiga anai e Satana ke ina fakamaliu ia te hahaʼi mai ia Sehova, kae ko nātou ʼaē ʼe natou fakafeagai anai kiā Satana, ʼe natou maʼuli fiafia anai ʼi te kele ʼo heʼegata.—Lau ia Esaia 25:8; Apokalipisi 20:7-9.

4. Ko te tahi ʼaho ʼo te fakamāu fea ʼaē kā maʼu tapuakina ai anai te mālamanei?

ʼE toe fakaʼaogaʼi ʼi te Tohi-Tapu te kupusiga palalau “te aho o te fakamaau” ʼo ʼuhiga mo te ʼaluʼaga ʼaē kā hoko anai ʼi te fakaʼosi ʼo te tuʼu ʼaenī. ʼE hoko fakapunamaʼuli anai te ʼaho ʼo te fakamāu ʼaia ohagē ko te Lōmaki ʼi te temi ʼo Noe, ʼo tauteaʼi he taʼiake kātoa agakovi. Meʼa lelei foki, ko te fakaʼauha kā hoko ki “te kau agakovi” ʼe ina fakafealagia anai ke māʼuʼuli he hahaʼi foʼou ʼi he kele ʼe maʼu ai te faitotonu.—Lau ia 2 Petelo 3:6, 7, 13.

Kapau ʼe kotou fia maʼu he tahi ʼu fakamahino, vakaʼi ʼi te ʼu pāsina 213-215 ʼo te tohi ʼaenī Koteā ʼAē ʼe Akoʼi Moʼoni Mai ʼi Te Tohi-Tapu?, neʼe tā e te kau Fakamoʼoni ʼa Sehova.

[Paki ʼo te pāsina 16]

“Te Fakamāu Fakamuli,” ʼa Gustave Doré, 1832-1883

[Haʼuʼaga ʼo Te Paki]

Engravings by Doré