Te ʼu Tali Ki Te ʼu Fehuʼi Fakatohi-tapu

Kotea ia te ʼAho ʼo Te Fakamau?

ʼI te temi muʼa, neʼe fakaʼaogaʼi e te ʼAtua ia te ʼu tui fakamau moʼo haofaki tana hahaʼi mai te heʼe faitotonu. (Tui Fakamaau 2:18) ʼE fakaha ʼi te Tohi-Tapu ʼe hage te ʼAho ʼo Te Fakamau ko he temi fakafiafia, ʼe haofaki anai e Sehova, te Tui Fakamau ʼo te kele katoa, ia te malamanei mai te heʼe faitotonu.—Lau ia Pesalemo 96:12, 13; Esaia 26:9.

Neʼe fakanofo e te ʼAtua ia Sesu ke ina foaki ia te faitotonu kia natou ʼae ʼe kei maʼuʼuli pea mo natou ʼae kua mamate. (Gaue 10:42; 17:31) Tokolahi neʼe natou mamate kaʼe neʼe mole heʼeki natou iloʼi ia te ʼAtua. Lolotoga ia te ʼAho ʼo Te Fakamau, ʼe fakatuʼuake anai e Sesu ia te hahaʼi ʼaia ke feala hanatou iloʼi pea mo ʼoʼofa ki te ʼAtua moʼoni.—Lau ia Gaue 24:15.

He koʼe ʼe tonu ke hoko ia te ʼAho ʼo Te Fakamau lolotoga taʼu ʼe afe?

ʼE fakatuʼuake anai te hahaʼi mamate lolotoga taʼu ʼe afe. (Apokalipisi 20:4, 12) ʼE ʼaoga anai kia natou ia he temi ke natou ako ia te ʼu ala ʼo te ʼAtua pea mo fakalogo kia te ia. ʼE fakaha ʼi te Tohi-Tapu ʼe fakamauʼi anai te hahaʼi ʼo mulimuli ki te ʼu meʼa ka natou fai anai hili tonatou fakatuʼuake, ʼo kehe ia mo te manatu ʼa te hahaʼi.—Lau ia Loma 6:7.

ʼE toe talanoa ʼi te Tohi-Tapu ki he ʼaho ʼo te fakamau ʼe hoko fakapunamaʼuli anai ʼi muʼa ʼo te kamata ʼo te ʼu taʼu ʼe afe. ʼE toe fakahigoaʼi ia te ʼaho ʼaia ko te fakaʼosi, ohage pe ko tatatou vakaʼi ʼi te ʼu alatike ʼo te nusipepa ʼaeni. ʼI te ʼaho ʼaia, ʼe pulihi anai e te ʼAtua ia natou fuli ʼae ʼe mole tauhi age kia te ia, ia te hahaʼi agakovi. (2 Petelo 3:7) Koia ʼae ʼe tonu ai ke tou fakaha totatou ʼofa ʼae ki te ʼAtua.—Lau ia 2 Petelo 3:9, 13.