Te Tali Ki ʼAkotou ʼu Fehuʼi

◼ Koteā ʼaē ʼe tonu ke tou manatuʼi mokā tou fakaʼaogaʼi te ʼu telefoni ʼaē ʼe tou feʼāveʼaki?

ʼAki te ʼu faʼahiga telefoni ʼaia ʼe feala ke tou palalau mo he tahi ʼi te ʼu koga meʼa fuli pe ʼaē ʼe tou feʼoloʼaki ai. Logola ʼe feala ke ʼaoga te faʼahi ʼaia, kae ʼe tonu ke tou tokakaga ke mole tou fakaʼaogaʼi te ʼu meʼa ʼaia ʼi he ʼu temi ʼe mole lelei, naʼa fakaleluʼi ai tatatou minisitelio peʼe ko tatatou ʼu fono. ʼE lava hoko feafeaʼi te faʼahi ʼaia?

Koutou fakakaukauʼi age muʼa te meʼa ʼe feala ke hoko mo kapau ʼe tagi takotou telefoni kae koutou lolotoga fai palalau ʼi takotou fai faka mafola. Koteā anai te manatu ʼo ia ʼe koutou fai palalau mo ia? Koteā anai tana manatu ʼo ʼuhiga mo tatou mo kapau ʼe tou fakagata anai te fai palalau kae tou tali ki te telefoni? ʼE mahino ia ʼe mole tou fia fai anai he meʼa ke mole fia fakalogo te hahaʼi ki te logo ʼo te Puleʼaga. (2 Ko. 6:3) Koia kapau ʼe tou ʼave mo tatou te taʼi telefoni ʼaia, ʼe tonu ke tou tokaga ke mole ina fakaleluʼi tatou peʼe ko ʼihi ʼi tatatou lolotoga fai faka mafola.

E feafeaʼi mo kapau ʼe tou atalitali kae lolotoga fai faka mafola ʼihi? Kapau ʼe tou fakaʼaogaʼi hotatou temi ki te fai faka mafola, pea ʼe mole tonu koa la ke tou tokakaga ʼāteaina pe ki te gāue ʼaia? Moʼo fakaʼapaʼapa ki tatatou tauhi taputapu, koutou tuku ki he tahi temi te ʼu faʼahi ʼaē ʼe mole faʼa maʼuhiga ʼo takotou ʼu gāue pea mo te ʼu faʼahi faka famili. (Loma 12:7) Kae ʼe mole tapuʼi atu te fakaʼaogaʼi ʼo te telefoni moʼo fai faka mafola, peʼe ke koutou fai he fakatuʼutuʼu ki he ʼaʼahi.

ʼE tonu ke tou tokakaga tāfito ki te fakaʼaogaʼi ʼo te ʼu telefoni ʼaia mokā tou taki motokā, heʼe fakatokagaʼi ʼe lahi te ʼu fakaʼī ʼe hoko ʼuhi ko te faʼahi ʼaia. ʼE tonu ke tou mulimuli ki te ʼu lao fuli ʼaē ʼe nātou tapuʼi te fakaʼaogaʼi ʼo te ʼu telefoni ʼaia mokā tou taki motokā.

ʼE tou ʼolo ki te ʼu fono pea mo te ʼu fakatahi moʼo tauhi kia Sehova pea ke ina akoʼi tatou. Ko tatatou loto fakafetaʼi ki te ʼuhiga taputapu ʼo te ʼu fakatahi ʼaia, ʼe tonu ke ina uga tatou ke tou tokaga ki te telefoni ʼaia naʼa ina fakaleluʼi tatou peʼe ko te hahaʼi ʼi tatatou ʼu fakatahi ʼaia. Kapau ʼe ko he faʼahi maʼuhiga, pea ʼe tonu ke tou ʼolo ʼo tali ʼi tuʼa ʼo totatou fale fono. Koia tou tokaga ʼo fai tatatou ʼu gāue fakamālama, ʼi te ʼu temi ʼaē ʼe mole tou fai ai tatatou tauhi.—1 Ko. 10:24.

ʼOfa pe ke tou fakahā tuʼumaʼu ʼi tatatou fakaʼaogaʼi te ʼu telefoni feiā peʼe ko te tahi age ʼu masini foʼou, ʼe tou tokagaʼi te hahaʼi pea ʼe tou leleiʼia ­ʼaupito ia te ʼu meʼa fakalaumālie.