Te Tali Ki ʼAkotou Fehuʼi
◼ Ko te ʼu tokoni Fakatohi-tapu fea ʼe tou mulimuli ki ai moka tou fakaʼaogaʼi te telefoni toʼotoʼo lolotoga te ʼu fono mo te faifakamafola?
“E i Ai He Temi Ki Te u Mea Fuli.” (Ekl. 3:1): ʼAki te telefoni toʼotoʼo, ʼe feala ai ki te hahaʼi hanatou faitohi peʼe palalau mo he tahi ʼi he temi pe. Kaʼe ʼe ʼi ai te ʼu lakaga ʼe mole loto anai e te kau Kilisitiano ke fakaleluʼi natou e tanatou telefoni. Ohage la moka tou fono, ʼe tou tauhi ai kia Sehova, mo akoʼi ai tatou ʼi te faʼahi fakalaumalie, pea mo tou fefakalotomalohiʼaki. (Tet. 31:12; Pes. 22:23; Loma 1:11, 12) ʼE feala koa ke tou matehi tatatou telefoni moka tou tau mai ki te fono, pea hoki tou vakaʼi leva moka kua tou ʼosi mavae mai ai? Kaʼe kapau leva ʼe maʼua ke tou tuku mu tatatou telefoni, pea ʼe tonu ke mole fakalelu ki te nofoʼaki moka tatagi anai.
Tou “Fai Te u Mea Fuli . . . Uhi Ko Te Evaselio.” (1 Ko. 9:23): ʼE feala ʼi ʼihi temi ke ʼaoga te telefoni toʼotoʼo ʼi te faifakamafola. Ohage la, ko te tehina ʼae ʼe ina fai te fono faifakamafola, ka ina fia iloʼi te aluʼaga ʼo natou ʼae ʼe faifakamafoka ʼi te tahi faʼahi ʼo te telituale, pea ʼe telefoni anai kia natou. ʼI ʼihi temi, ko te kau faifakamafola ʼe natou pauʼi he tahi ʼi muʼa ʼo tanatou ʼaʼahi ia ia peʼe ʼi muʼa ʼo te fai ʼo tana ako Tohi-Tapu, tafitō la moka ʼe nofo mamaʼo. Kapau ʼe tou taka tuʼumaʼu mo tatatou telefoni toʼotoʼo, pea ʼe tou tokakaga anai ke mole fakalelu moka tou lolotoga faipalalau mo he tahi ʼi he ʼapi. (2 Ko. 6:3) Ka tou fakatalitali ki te tahi kau faifakamafola, ʼe mole lelei age koa la ke tou haga tokakaga pe ki tatatou minisitelio pea mo natou ʼae ʼe tou kauga gaue fakatahi, ʼi hatatou faitelefoni peʼe faitohi ki hotatou kaumeʼa?
Tou Fakaʼapaʼapa. (1 Ko. 10:24; Filp. 2:4): ʼE maʼuhiga kia tatou tatatou tautonu ʼae ki te ʼu fono faifakamafola. ʼE mole tou manatu fenei anai: “ ʼE feala pe haku telefoni peʼe faitohi ki he tahi ke ina fakaha mai te faʼahi ʼae ʼe natou faifakamafola ai.” Ka tou tauhala mai, pea ʼi te agamahani ʼe tonu ke fetogi e te kiʼi kutuga te ʼu fakatuʼutuʼu neʼe kua fai. ʼE moʼoni, ʼe feala ʼi ʼihi temi ke tou tauhala ʼuhi he neʼe hoko he meʼa neʼe mole tou ʼamanaki ki ai. Kaʼe kapau ko hatatou agamahani te ʼomai tautonu, pea ʼe tou fakaʼapaʼapa ai ki te fakatuʼutuʼu ʼa Sehova, mo te tehina ʼae ʼe ina fai te fono faifakamafola, pea mo te ʼu kauga faifakamafola.