Ko He Kautau ʼe Koutou Kau Kiai
1, 2. ʼE fakahoko feafeai e te ʼu kaugana ʼa te ʼAtua ia ʼaho nei, te meʼa fakakikite ʼaē neʼe hā ia Apokalipesi 9:13-19?
1 “Pea neʼe pupuhi fakatagi te ono ʼaselo.” ʼOsi ʼaia, pea neʼe logoʼi te logoaʼa ʼo “te ʼatu kautau heka hōsi neʼe ko te toko lua miliate ʼo te ʼu miliate.” ʼE mole ko he kautau ohage ko te ʼu kautau māhani. “Ko te ʼu ʼulu ʼo te ʼu hōsi ko he ʼu ʼuluʼi laione.” ʼE haʼu mai tonatou ʼu gutu, te afi, te kohu, mo te sulifa, pea ‘ ʼe hage tonatou ʼu hiku ko he ʼu gata.’ Ko te kautau fakatātā ʼaia ʼe nātou fakahoko te ʼu maumau. (Apk. 9:13-19, MN ) ʼE koutou ʼiloʼi peʼe koutou kau feafeaʼi ʼi te meʼa fakakikite ʼaia neʼe hā?
2 ʼAki he logo tahi, ko te toe ʼo te kau fakanofo pea mo tonatou ʼu kaumeʼa, ʼe nātou kalagaʼi te ʼu fakamāu ʼo te ʼAtua, ʼo ʼiloʼi ai e te hahaʼi te mate katoa ʼo te Keletiate ʼi te faʼahi fakalaumālie. Tou vakaʼi te ʼu faʼahi e lua ʼo te meʼa fakakikite ʼaē neʼe hā, ʼe nā fakahā lelei ai pe koʼe ʼe lelei ʼaupito te minisitelio ʼo te ʼu kaugana ʼa te ʼAtua.
3. Koteā te ako neʼe foaki atu ke feala hakotou palalau lelei ʼo ʼuhiga mo te logo ʼo te ʼAtua?
3 ʼE Akoʼi Nātou Pea Mo Foaki Age Kia Nātou Te ʼu Meʼa ʼAē ʼe ʼAoga Moʼo Tala Te Logo ʼa Te ʼAtua: ʼAki te Ako ʼo Te Minisitelio Faka Teokalatike pea mo te tahi ʼu fono ʼo te kokelekasio, neʼe akoʼi te ʼu minisi ʼo te ʼAtua ke nātou palalau ʼaki he lotomālohi ki te logo ʼo te ʼAtua. Ohage ko Sesu pea mo tana ʼu tisipulo, ʼe nātou ʼolo ʼo kumi te hahaʼi ʼaē ʼe tau mo nātou, pea mo faka mafola ʼi te ʼu potu fuape ʼaē ʼe nātou lava maʼu ai te hahaʼi. (Mat. 10:11; Mko. 1:16; Luka 4:15; Gaue 20:18-20) Pea ʼe fua lelei ʼaupito te faʼahiga fai ʼo fai faka mafola ʼaia, ʼaē ʼe fakatafito ki te Tohi-Tapu.
4. Ko te ʼu meʼa gāue fea ʼaē ʼe maʼu e te kau fai faka mafola tokolahi ke nātou fakahoko lelei tanatou gāue?
4 Ko te ʼu lauʼi miliale Tohi-Tapu, mo te ʼu tohi, mo te ʼu kaupepa, pea mo te ʼu nusipepa neʼe tufa e te ʼu minisi Kilisitiano, ʼi tanatou fakahoko te gāue fai faka mafola ʼaē neʼe fakatotonu age e te ʼAtua. Ko te ʼu tohi ʼaia ʼe tufa ia teitei lea e 400, pea ʼe lahi te ʼu puani kehekehe ʼe talanoa kiai, pea mo tona ʼu faʼahiga fai kehekehe ke fia logo te hahaʼi kehekehe. ʼE koutou fakaʼaogaʼi lelei koa te ʼu meʼa gāue ʼaia?
5, 6. Koteā ʼaē ʼe hā ʼaki ai ʼe lagolago e Sehova te gāue ʼo tana hahaʼi?
5 ʼE Maʼu Te Takitaki Pea Mo Te Lagolago Mai Te Lagi: Ko te meʼa fakakikite ʼaē neʼe hā, ʼe ina toe fakahā lelei ʼe lagolago te ʼAtua ki te gāue ʼaē ʼe fai e te kautau fakatātā. (Apk. 9:13-15) Ko te fai faka mafola ʼaē ʼe fai ʼi te malamanei katoa, ʼe mole fai ʼaki he poto peʼe ko he mālohi fakatagata, kae ʼe fai ʼaki te laumālie ʼo te ʼAtua. (Sakl. 4:6) ʼE fakaʼaogaʼi e Sehova te kau ʼaselo moʼo takitaki te gāue ʼaia. (Apk. 14:6) Koia, ʼaki te ʼu faiga ʼo tana kau Fakamoʼoni ʼi te kele, ʼe takitaki e Sehova te gāue moʼo taki mai kia te ia te kau agavaivai.—Soa. 6:45, 65.
6 ʼAki te ako pea mo te ʼu meʼa gāue ʼaē ʼe foaki age moʼo tala te logo ʼa te ʼAtua, pea ʼaki te takitaki ʼa te kau ʼaselo, ʼe liliu te hahaʼi ʼa Sehova ko he mālohi ʼe mole feala ke fakagata. Tou haga kau ki te fakahoko ʼo te meʼa fakakikite ʼaia neʼe hā.