Te Fakatahi Faka Tisitilike 2007 ʼa Te Kau Fakamoʼoni ʼa Sehova “Kotou Mulimuli Iā Kilisito!”
1, 2. (a) Neʼe fakaloto mālohiʼi feafeaʼi e Moisese ia te kau Iselaele ke natou maʼu ia te ʼu lelei ʼo tanatou fakatahitahi? (b) Ko te ʼu faʼahi fea ʼaē ʼe tonu ke tou kamata teuteuʼi ʼi te temi nei?
1 Neʼe fakatotonu e Moisese ki te kau Iselaele pea mo te kau matāpule fuli ke natou fakatahitahi tuʼumaʼu ʼi te hili ʼo taʼu e fitu, ke lau age kiā nātou ia te Lao. Koteā tona tupuʼaga? “Ke natou fakalogo pea ke natou ako.” (Teu. 31:10-12) Kua ovi mai pē ia te toe fakatahitahi ʼa te hahaʼi ʼa Sehova kiā ʼaho e tolu ki te Fakatahi Faka Tisitilike “Kotou Mulimuli Iā Kilisito!” ʼI Vanuatu, ʼe fai anai te Fakatahi Faka Tisitilike ʼi Luganville ʼi te ʼaho 24 ki te ʼaho 26 ʼo ʼAukusitō peʼe ʼi te ʼaho 31 ʼo ʼAukusitō ki te ʼaho 2 ʼo Sepetepeli. ʼI Niumea, ʼe fai anai te ʼu fakatahi e 3, ʼi te ʼaho 7 ki te ʼaho 9 ʼo Sepetepeli, mo te ʼaho 14 ki te ʼaho 16, pea mo te ʼaho 21 ki te ʼaho 23. ʼI ʼUvea, ʼe fai anai te fakatahi ʼaho lua peʼe ko te ʼaho 6 ki te ʼaho 7 ʼo ʼOketopeli peʼe ko te ʼaho 13 ki te ʼaho 14 ʼo ʼOketopeli.
2 ʼE tonu koa ke kotou kole hokotou ʼaho mālōlō ki tokotou pātolō? ʼE kotou lava tokoni koa ki takotou kau ako Tohi-Tapu peʼe ko tokotou fāmili ʼaē ʼe mole ʼi te moʼoni ke natou kau mo koutou ki te fakatahi? Ko te ʼu manatu ʼaē kā hoa mai ʼe tokoni atu anai ke kotou teuteuʼi te ʼu faʼahi ʼaia.
3. (a) ʼE hoko feafeaʼi iā ʼaho nei ia Isaia 25:6? (b) Koteā ʼaē neʼe fakatokagaʼi ʼi te fakatahi ʼo ʼuhiga mo te Feliaono, pea koteā ʼaē ʼe tonu ke tou fai e tātou takitokotahi?
3 Kotou Kau Ki Te ʼu ʼAho ʼAia e Tolu: ʼE foaki e Sehova ia he tuʼuga meʼa kai fakalaumālie ki tana hahaʼi. (Isa. 25:6) ʼE kau kiai tatatou ʼu fakatahi ʼi te taʼu fuli. Neʼe fakatokagaʼi, ko te hahaʼi ʼaē ʼe kau ki te fakatahi ʼi te Feliaono ʼe siʼisiʼi age tona kaugamālie ʼi te ʼu ʼaho ʼaē. Kotou fakatuʼutuʼu ke kotou kau ki te ʼu ʼaho fakafiafia ʼaia e tolu! Kapau ʼe tonu ke kotou kole hokotou ʼaho mālōlō ki tokotou pātolō, kotou faikole kiā Sehova ʼo ʼuhiga mo te faʼahi ʼaia. Pea kotou ‘lototoʼa’ ʼo palalau ki tokotou pātolō ʼi te ʼosi tala ifo pē ʼo te ʼu ʼaho fakatahi. (1 Tes. 2:2; Neh. 2:4, 5) ʼE lagi ʼaoga anai ke kotou fakamahinohino age ki ai ko takotou fakatahi ʼi te taʼu fuli ʼe kau ki takotou tauhi. Kapau ʼe kotou fai fakatomuʼa ia te faʼahi ʼaia, pea ʼe lagi faigafua anai ki tokotou pātolō ke ina fai he ʼu fetogi ke tali ai takotou kole.
4. ʼE tou lava teuteuʼi feafeaʼi tatatou kau ako Tohi-Tapu pea mo totatou fāmili ʼaē ʼe mole ʼi te moʼoni ki te fakatahi?
4 Kotou Teuteuʼi Takotou Kau Ako Pea Mo Tokotou Fāmili: ʼE ko he meʼa fakafiafia mokā kau tatatou kau ako Tohi-Tapu mo tātou ʼi te fakatahi, ʼo natou tokagaʼi ai te ʼofa ʼaē ʼe maʼu e totatou fale tautēhina faka Kilisitiano “ ʼi te fakatahitahi lahi”! (Pes. 22:25) Kotou fakahā fakatomuʼa age kiā nātou ke feala hanatou fakatuʼutuʼu honatou temi ke natou kau ki te fakatahi. Kotou vaevae mo nātou te ʼu tupuʼaga ʼo takotou fiafia ʼi takotou kau ki te ʼu fakatahi. ʼE kotou lava teuteuʼi te kau ako ʼo ʼuhiga mo te meʼa ʼaē kā natou sisio anai kiai, ʼo kotou sioʼi tatatou ʼu foʼi ʼata viteo ʼaē ʼe fakahā ai te ʼu fakatahi ki muʼa atu, tāfito te foʼi ʼata viteo Unis grâce à lʼenseignement divin. Kotou toe fakahā ki tokotou fāmili ʼaē mole ʼi te moʼoni takotou ʼu fakatuʼutuʼu. ʼE lagi feala anai ke natou fakatuʼutuʼu ke natou ʼomai ʼo sisio ki te kiʼi gaoʼi peʼe natou kau mo koutou ki he ʼaho e tahi ʼo te fakatahi.
5. (a) He koʼē ʼe maʼuhiga ʼaupitō ia te ʼu fakatahitahi ʼa te hahaʼi ʼa Sehova iā ʼaho nei? (b) Koteā ʼaē ʼe feala ke tou fai takitokotahi ʼi te temi nei?
5 ʼI tatatou “mamata ki te fakaovi mai o te Aho,” ʼe maʼuhiga ʼaupitō kiā tātou ia te ʼu fakatahitahi ʼa te hahaʼi ʼa te ʼAtua. (Hep. 10:25) Kotou kamata fai he ʼu fakatuʼutuʼu ʼi te temi nei ke kotou kau ki te ʼu ʼaho e tolu ʼo te Fakatahi Faka Tisitilike “Kotou Mulimuli Iā Kilisito!”