Te Tali Ki ʼAkotou Fehuʼi

◼ ʼI muʼa ʼo te papitema ʼo he kauga fagona, ko temi ʼe fia ʼe tonu anai ke kau ai ki te ʼu fono ʼo te kokelekasio pea mo te faifakamafola?

Ko te papitema, ʼe ko he tonu maʼuhiga ʼaupito ka fai anai e he tahi ʼi tona maʼuli. Koia, ʼe tonu ke mahino ki te ʼu meʼa ʼae ʼe fakamaʼua age ki ai e te ʼAtua ʼi muʼa ʼo tona papitema. Pea tahi, kua tonu ke ina fakaha ʼe ina fia maʼuliʼi te ʼu meʼa ʼae ʼe fakamaʼua age e te ʼAtua.

Neʼe fakamaʼua ki te kau Kilisitiano ke ʼaua naʼa natou liakī ʼanatou fakatahi, koia kua tonu ke iloga ʼe kau tuʼumaʼu e he kauga fagona ki te ʼu fono ʼo te kokelekasio. (Hep. 10:24, 25) ʼI te agamahani kua fai ni ʼana tali ʼi te ʼu fono. Pea ʼe lelei ke kau ki te Ako Fakateokalatike, logo la ʼe mole ko he fakamaʼua.

Pea tahi, mai tona aluʼaga ʼae neʼe fakatotonu ki te kau Kilisitiano ke natou fakamafola te logo lelei pea mo fai ni tisipulo, koia ʼe tonu ai ke faifakamafola tuʼumaʼu ia he kauga fagona ʼi muʼa ʼo tana papitema. (Mat. 24:14; 28:19, 20) Ko mahina ʼe fia ʼe tonu ke faifakamafola ai ʼi muʼa ʼo tana papitema? ʼE mahino ia, ʼe tonu anai ke ina fai ni hola ʼe ha ai tona loto malohi ʼae ke kau tuʼumaʼu pea mo faʼafai ʼi te minisitelio ʼi te mahina fuli. (Pes. 78:37) Kaʼe, ʼe mole fakamaʼua ki ai ni mahina, talu mai tana kamata faifakamafola ʼo aʼu ki te temi ʼae kua feala ai ke papitema. ʼE lagi ko ni kiʼi mahina pe. Ko hola ʼe fia ʼe tonu anai ke ina fai? ʼE mole he lao ki te faʼahi ʼaia. ʼE tonu ke vakavakaʼi fakalelei e te kau tagata ʼafeā ia te ʼu aluʼaga ʼo te ʼu kauga fagona takitahi.—Luka 21:1-4.

Ko te ʼu tagata ʼafeā (peʼe ko te ʼu tehina faifekau fakaminisitelio ʼi te ʼu kokelekasio ʼae ʼe mole hahaʼi ai te kau tagata ʼafeā) ʼae ʼe natou felogoʼi mo he kauga fagona ʼe fia papitema, ʼe tonu anai ke natou manatuʼi ʼe tou kehekehe fuli, koia ʼe tonu ke natou maʼu ia he fakasiosio poto pe ʼe kua feala ke papitema peʼe kailoa. ʼE natou vakavakaʼi anai pe ʼe loto moʼoni ke liliu ko he Fakamoʼoni ʼa Sehova pea mo ina fakamaʼuhigaʼi tana fakatahi ki te kautahi ʼa Sehova ʼo toe feia mo te faifakamafola. ʼE tonu ke iloʼi e te ʼu tagata ʼafeā, ʼe mole heʼeki fotufotuʼa ʼi te faʼahi fakalaumalie pea heʼeki faiva ohage ko natou ʼae kua papitema. Kapau ʼe tokagaʼi e te kau tagata ʼafeā heʼeki feala ke papitema, ʼe natou fakamahino age anai ki ai, ʼaki he aga fakaʼeteʼete, ia te ʼu tupuʼaga Fakatohi-tapu ʼo tanatou toʼo ia te tonu ʼaia pea mo foaki age ki ai he tokoni fakalaumalie.