TE MAʼULI FAKAKILISITIANO
Lagolago Ki Te ʼu Lao ʼa Sehova
Neʼe fakatuʼu e Sehova ʼAtua he ʼu lao maʼa te tagata. Ohage la, neʼe fai e Sehova te fakatuʼutuʼu ʼae ke liliu te ʼohoana ko he noʼo ʼo he tagata pea mo he fafine ʼe mole toe veteki. (Mat 19:4-6, 9) ʼE ina tauteaʼi te ʼu faʼahiga aga heʼe ʼaoga kehekehe. (1Ko 6:9, 10) Pea ʼe toe foaki mai e Sehova he ʼu pelesepeto ʼo ʼuhiga mo te ʼu teu mo te faʼahiga gaohi ʼo te lauʼulu. Koteʼuhi ke tou kehekehe ai mo te hahaʼi.—Te 22:5; 1Ti 2:9, 10.
ʼI te malama ʼaeni, tokolahi ʼe mole natou fakalogo ki te ʼu lao ʼa Sehova. (Lom 1:18-32) ʼE natou mulimuli ki te manatu ʼa te tokolahi ʼo ʼuhiga mo ʼonatou faʼahiga teu, mo faʼahiga faʼu ʼo te lauʼulu pea mo tanatou aga. Pea tokolahi ʼe natou laukoviʼi ia natou ʼae ʼe mole kei kau ki tonatou faʼahiga maʼuli ʼae ʼe mole lelei.—1Pe 4:3, 4.
ʼI totatou ʼuhiga Fakamoʼoni ʼa Sehova, ʼe tonu ke tou lagolago malohi ki te ʼu lao ʼa te ʼAtua. (Lom 12:9) ʼO feafeaʼi? ʼAki hatatou fakaha ʼi ʼatatou aga te meʼa ʼae ʼe leleiʼia e Sehova ke mole tukia ai niʼihi. Pea ʼe tonu ke toe ha ʼi totatou maʼuli. Ohage la, ka tou filifili he faʼahiga teu peʼe faʼahiga faʼu ʼo te lauʼulu, tou fai kia tatou totonu te ʼu fehuʼi ʼaeni: ‘ ʼE ha koa ʼi te ʼu tonu ʼae ʼe au fai ʼe au lagolago ki te ʼu lao ʼa Sehova peʼe ko te malama? ʼE ha koa ʼi taku faʼahiga teuteu mo te faʼahiga faʼu ʼo toku lauʼulu ʼe au manavasiʼi ki te ʼAtua?’ Peʼe moka au filifili he ʼata ke au sioʼi, tou fai kia tatou te ʼu fehuʼi ʼaeni: ‘ ʼE leleiʼia anai koa e Sehova te ʼata ʼaeni ʼe au sioʼi? Kotea te aga ʼae ʼe ina ʼekenaki ai au ke au fai moka au sioʼi te ʼata ʼaia? Moka au filifili he fakafiafia, ʼe ina fakavaivaiʼi ai koa taku tui? (Pes 101:3) ʼE feala koa ke tukia ai ia natou ʼo te famili peʼe ko ʼihi atu?’—1Ko 10:31-33.
He koʼe ʼe maʼuhiga ke tou lagolago ki te ʼu lao ʼa Sehova? Koteʼuhi kua vave pulihi e Sesu Kilisito te ʼu puleʼaga pea mo te agakovi fuli. (Esk 9:4-7) ʼE haofaki pe anai ia natou ʼae ʼe natou fai te finegalo ʼo te ʼAtua. (1So 2:15-17) Koia, tou lagolago malohi ki te ʼu lao ʼa Sehova ke feala ʼaki tatou aga ke tou fakakololia ai ia te ʼAtua.—1Pe 2:11, 12.
Kotea ʼe ha ʼi taku faʼahiga teuteu mo te faʼahiga faʼu ʼo toku lauʼulu?
VAKAʼI TE ʼATA VITEO KE KE KAUMEʼA MO SEHOVA: KO HE TAGATA MO HE FAFINE PEA TALI KI TE ʼU FEHUʼI KA HOA MAI:
He koʼe ʼe ko he aga fakapotopoto ke tou fakalogo ki te ʼu lao ʼa Sehova?
He koʼe ʼe tonu ke kamata akoʼi e te ʼu matuʼā te ʼu lao ʼa Sehova ki ʼanatou fanau ʼi tanatou kei liliki?
ʼE lava tokoni feafeaʼi te kau tupulaga mo te kau matutuʼa ki te hahaʼi ke natou maʼu te manavaʼofa ʼo te ʼAtua?