’E Li Tu’a Koa Te Kau Fakamo’oni ’a Sehova Kia Natou ’Ae ’e Mole Kei Kau ’i Tanatou Lotu?

’E mole matou li tu’a ki he Fakamo’oni ’a Sehova kua papitema ka’e ’e mole kei faifakamafola, pe’e lagi mole kei kau ki te ’u fono. Ka’e ’e matou olo ’o ’a’ahi natou pea mo tokoni age ke natou toe fa’afai ’i te tauhi.

’E mole matou fakamavae atu aipe he tahi ne’e agahala mamafa. Ka’e, kapau ’e ko he agamahani ’a he Fakamo’oni ’a Sehova tana maumau’i te ’u lao ’o te Tohi-Tapu, ohage la ko te kaiha’a pe’e ko te faka’aliki’i ’o he ki’i tamasi’i, pea ’e mole fakahemala, ’e tonu leva ia ke fakamavae. ’E ui lelei fenei mai ’i te Tohi-Tapu: “Kotou too kehe maia koutou te tagata agahala.”—1 Kolinito 5:13.

Kotea ’ae ka hoko anai ki te fafine ’ohoana pea mo te fanau ’ae ’e kei Fakamo’oni kia Sehova, mo kapau ko te tagata ’ohoana pe ’ae ne’e fakamavae? ’E mo’oni, ’e mole toe tatau anai tanatou tauhi fakafamili, ka’e ’e hoko atu pe anai tonatou ma’uli fakafamili.

’E feala pe ke kau ki ’amatou fono ia natou ’ae kua fakamavae. Kapau ’e natou loto ki ai, ’e feala ke tokoni age te kau tagata ’afeā ’o te kokelekasio ke natou toe liliu ko he ’u Fakamo’oni ’a Sehova. Kapau ’e liakī e natou ’ae ne’e fakamavae tanatou aga ’ae ’e kovi pea mo fakaha tanatou fia mulimuli mo’oni ki te ’u lekula ’o te Tohi-Tapu, pea ’e toe fakafealagia anai kia natou ke natou toe kau ki te kokelekasio.