Ko Sehova ʼe Ko Totatou “Fiafiaʼaga Lahi”

1-2. (1) Kotea te aluʼaga ʼe tau mo te tokolahi ia ʼaho nei? (2) Kotea ka tou vakaʼi ʼi te alatike ʼaeni?

ʼE FAIGA malohi te malama ʼaeni ke natou maʼu te fiafia, kae ʼe mole natou fiafia moʼoni. Tokolahi ʼe natou lotomamahi ʼaupito, pea mo logoʼi ʼe mole fetogi he meʼa kia natou. ʼE mole hao ia te hahaʼi ʼa Sehova mai te ʼu manatu ʼaia. Kotea tona tupuʼaga? Koteʼuhi ʼe tou maʼuʼuli nei ʼi “te ʼu ʼaho fakamuli,” koia ʼe tou tau anai mo he ʼu faigataʼaʼia, ʼe tupu ai hatatou lotohoha mo lotomamahi ʼaupito. Pea ʼe “faigataʼa” anai hatatou tauʼi.​—2 Tim. 3:1.

² ʼI te alatike ʼaeni, ʼe tou vakaʼi anai pe kotea te ʼu aluʼaga ʼe tupu ai tatatou mole kei fiafia, pea ʼe feafeaʼi hatatou toe maʼu totatou fiafia. Kae ʼe tou vakaʼi muʼa pe ko ai te Matapuna moʼoni ʼo te fiafia.

TE MATAPUNA ʼO TE FIAFIA MOʼONI

3. Kotea ʼe tou ako ʼo ʼuhiga mo Sehova mai tana fakatupu? (Vakaʼi mo te ʼu pāki.)

³ ʼE fiafia tuʼumaʼu pe ia Sehova, pea ʼe ina loto ke tou toe fiafia mo tatou. Koia, ʼe mole tou punamaʼuli ai ki te ha ʼo tona fiafia ʼi tana fakatupu. Ohage la, ko te taulekaleka ʼo totatou kele, mo te ʼu lanu kehekehe ʼe tou sisio ki ai, pea mo tatatou sisio ki te gaoʼi ʼa te ʼu manu ʼo tou kokolo ai, pea mo te mahu ʼo te ʼu faʼahiga meʼa kai kano lelei. ʼE ʼofa moʼoni te ʼAtua ia tatou, pea ʼe ina loto ke tou fakaʼaogaʼi ia meʼa fuli ke tou fiafia ai.

Te kiʼi alefani: Image © Romi Gamit/Shutterstock; te ʼu kiʼi motu tutuʼu: Vladimir Seliverstov/500px via Getty Images; te ʼu kiʼi tao: Rita Kochmarjova/stock.adobe.com; te ʼu tutuʼu ʼe lua: georgeclerk/E+ via Getty Images

4. (1) He koʼe ʼe fiafia tuʼumaʼu pe ia Sehova logo la te ʼu mamahi ʼae ʼe sio ki ai ʼi te malamanei? (2) Kotea ʼae ʼe foaki mai e Sehova? (Pesalemo 16:11)

⁴ Logo la ko Sehova ʼe ko “te ʼAtua fiafia,” kae ʼe mahino lelei ki te ʼu mamahi ʼe tau mo te hahaʼi ʼi te malama ʼaeni. (1 Tim. 1:​11) Kae neʼe mole ina tuku te aluʼaga ʼaia ke puli ai tona fiafia. ʼE ina iloʼi ʼe fakatemi pe te ʼu mamahi fuli ʼaia, ko tona fakaʼuhiga, kua ina iloʼi te ʼaho ʼae ka ina fakagata ai. Pea ʼe faʼa kataki ʼo kaku ki te ʼaho ʼae ka ina pulihi ai ʼo talu ai ia mamahi fuli pe. Pea tahi, ʼe mahino ia Sehova moka tou mamahi, pea ʼe fia tokoni mai. ʼO feafeaʼi? ʼAki tana foaki mai te fiafia. (Lau ia Pesalemo 16:11.) Tou vakaʼi pe neʼe ina foaki feafeaʼi ia te fiafia ki siʼona ʼAlo ko Sesu.

5-6. He koʼe ʼe fiafia ia Sesu?

⁵ ʼI te ʼu fakatupu fuli ʼa Sehova, ʼe ko Sesu ʼae ʼe lahi ʼaupito tona fiafia. Kotea tona tupuʼaga? Tou vakaʼi tupuʼaga ʼe lua. (1) “ ʼE ko ia te pāki ʼo te ʼAtua fakapulipuli,” pea ʼe ina fakaʼata lelei ia te ʼuluagaaga ʼo tana Tamai ia aluʼaga fuli pe. (Kol. 1:​15; 1 Tim. 6:15) (2) Neʼe lahi te temi neʼe fakatahi ai ia Sesu mo siʼana Tamai, ʼae ko te Matapuna ʼo te fiafia.

⁶ Neʼe fiafia tuʼumaʼu pe ia Sesu ʼi te fai ia meʼa fuli neʼe kole age e tana Tamai. (Taag. 8:​30, 31; Soa. 8:​29) Neʼe nofo agatonu, koia neʼe ina maʼu ai te tapuakina mo te ʼofa ʼo Sehova.​—Mat. 3:​17.

7. ʼE feafeaʼi hatatou maʼu ia te fiafia moʼoni?

⁷ ʼE feala mo tatou ke tou toe maʼu te fiafia moʼoni, ʼo tou fakaovi kia Sehova, ia te Matapuna ʼo te fiafia. Ka lahi te temi ʼae ʼe tou ako ke tou iloʼi ai ia Sehova, pea mo faʼifaʼitakiʼi ia ia, pea ʼe toe lahi anai totatou fiafia. ʼE tou toe fiafia anai ʼi te fai ʼo te finegalo ʼo te ʼAtua, pea mo tatatou iloʼi ʼae ʼe ʼofa ia tatou.a (Pes. 33:12) Kae kotea ʼe feala ke hoko mo kapau ʼe tou logoʼi ʼe mole kei tou fiafia ʼi ʼihi temi, peʼe kua puli ʼosi totatou fiafia? Ko tona fakaʼuhiga koa ʼe mole kei ʼofa te ʼAtua ia tatou? Kailoa. ʼE tou agahala fuli, pea ʼi ʼihi temi ʼe tou mamahi pea mo tau mo he ʼu manatu fakalotomamahi. Pea ʼe lotomahino Sehova ki ai. (Pes. 103:14) Tou vakaʼi pe kotea ʼe tupu ai tatatou mole kei fiafia, pea ʼe feafeaʼi hatatou toe maʼu totatou fiafia.

ʼAUA NAʼA KE TUKU KE KAIHAʼA TOU FIAFIA

8. ʼE malave feafeaʼi kia tatou te ʼu fihifihia ʼo te maʼuli?

⁸ 1: Te ʼu fihifihia ʼo te maʼuli. ʼE fakatagaʼi koa koe? Peʼe ke tau koa mo he tuʼutamaki fakanatula, peʼe ko te masiva, peʼe ko te mahaki, peʼe ko te vaivai matuʼa? ʼE feala ke puli vave totatou fiafia ʼuhi ko te taʼi ʼu fihifihia ʼaia, tafito la moka mole tou maʼu he puleʼaki ki ai. ʼE fakamoʼoni ʼi te Tohi-Tapu “ ʼe puli te lotomalohi ʼi te mamahi.” (Taag. 15:13) Ko Babis, ʼe ko te tagata ʼafeā, pea neʼe mole vaha pe la te ʼu taʼu ʼae neʼe mate ai tona tehina mo ʼana matuʼā. ʼE ina ui fenei: “Neʼe au logoʼi haku nofo tokotahi. ʼI ʼihi temi, neʼe au fakahemala mo lotohoha ʼaupito. ʼE au iloʼi neʼe lahi pe te ʼu meʼa ʼae neʼe au tokaga ki ai, kae neʼe mole lahi siʼoku temi ʼae neʼe au fakatahi ai mo ʼaku matuʼā mo toku tehina ʼi muʼa ʼo tanatou mamate.” Koia, ʼe feala ki te ʼu fihifihia ʼo te maʼuli ke tou gaʼegaʼe ai ʼi te faʼahi fakasino mo te faʼahi ʼo te loto.

9. Kotea ʼe tokoni mai ke tou toe maʼu totatou fiafia? (Selemia 29:​4-7, 10)

⁹ Kotea ʼae ʼe tokoni mai ke tou toe maʼu totatou fiafia? ʼE feala ke tou toe maʼu totatou fiafia moka ʼe mole tou tuʼania ki te ʼu aluʼaga ʼae ʼe mole feala ke tou fetogi, pea mo fakafetaʼi ki te ʼu meʼa ʼae ʼe tou maʼu. ʼE uga e te malama ʼaeni ke tou manatu ʼe tonu ke tou maʼuli lelei mo fimalie ke tou fiafia ai. Kae ʼe mole moʼoni ia. Ohage la, neʼe fakatotonu e Sehova ki te kau Sutea ʼae neʼe ʼave popula ki Papiloni ke natou tali te aluʼaga foʼou ʼaia, pea mo taupau maʼu pe tonatou fiafia logo la te ʼu aluʼaga faigataʼa ʼaia. (Lau ia Selemia 29:​4-7, 10.) Kotea te ako maʼa tatou? Faiga ke ke tali tou aluʼaga pea mo lotofakafetaʼi ki te ʼu lelei ʼe ke maʼu mai ai. ʼAua naʼa galo kia koe ʼe tokoni tuʼumaʼu atu pe ia Sehova. (Pes. 63:7; 146:5) Ohage la, ko te tuagaʼane ko Effie ʼe lotofakafetaʼi ki te tokoni age ʼa Sehova. Neʼe fakaʼi pea neʼe palalisia ai. Kae neʼe ina ui fenei: “Neʼe tokoni mo fakalotomalohiʼi au e Sehova, mo siʼoku famili pea mo ʼoku tehina mo tuagaʼane. Koia, neʼe au feuiʼaki tuʼumaʼu kapau ʼe mole au tali toku aluʼaga, pea ʼe hage pe neʼe mole au lotofakafetaʼi kia natou. Neʼe tokoni lahi mai ia Sehova mo te ʼu tehina mo tuagaʼane kia au. Pea ʼe au fia fakaha taku lotofakafetaʼi kia natou.”

10. He koʼe ʼe feala ke tou fiafia maʼia pe ʼe tou tau mo ni faigataʼaʼia?

¹⁰ Tatau aipe pe ʼe mole lelei totatou maʼuli, peʼe hoko kia tatou peʼe ko totatou famili he aluʼaga fakamataku, kae ʼe feala pe ke tou fiafia.b (Pes. 126:5) Kotea tona tupuʼaga? Koteʼuhi ʼe mole fakalogo totatou fiafia ki totatou aluʼaga. ʼE ui fenei e Maria, ʼae ʼe pionie: “Kapau ʼe ke loto ke ke fiafia tuʼumaʼu, ʼe mole fakaʼuhiga leva ke ʼaua naʼa ke tagi mo fakaha te ʼu meʼa ʼae ʼe ke logoʼi moka ke tau mo ni fihifihia. Kae ko tona fakaʼuhiga, ke ʼaua naʼa ke galoʼi te ʼu fakapapau ʼa Sehova. ʼE tokoni mai anai tatatou Tamai ki te puipui ʼo totatou fiafia.” Koia, ʼaua naʼa galo kia koe, kotea pe te lahi ʼo te ʼu faigataʼaʼia ʼe ke tau mo ia, kae ʼe fakatemi pe ia. ʼE hage pe ko te iloga ʼo te ʼu vaʼe ʼo he tahi moka haʼele ʼi te ʼone, ʼe puli vave pe ia. ʼEi, ʼe kua vave pulihi pe ʼotatou faigataʼaʼia ʼo talu ai.

11. ʼE fakalotomalohiʼi feafeaʼi koe e te faʼifaʼitaki ʼo Paulo?

¹¹ Kae ʼe feafeaʼi mo kapau ʼe tou manatu ʼe tou tau la mo te ʼu fihifihia he ʼe mole kei ʼofa Sehova ia tatou? Tou vakaʼi te faʼifaʼitaki ʼa he ʼu kaugana ʼa Sehova neʼe tau mo ni aluʼaga faigataʼa, kae neʼe natou nofo agatonu pe. Ohage la, neʼe filifili tonu e Sesu te apositolo ko Paulo ke ina fakaha te moʼoni “ki te ʼu puleʼaga, mo te ʼu hau pea mo te ʼu foha ʼo Iselaele.” (Gaue 9:​15) Neʼe ko he toe pilivilesio ia ki ai. Kae, neʼe mole hao ia Paulo mai te ʼu fihifihia. (2 Ko. 11:​23-​27) Neʼe ha koa ʼi te ʼu tuʼuga fihifihia ʼae neʼe tau tuʼumaʼu mo ia neʼe mole kei ʼofa Sehova kia ia? Kailoa ia. Kae neʼe ha ʼi tana faʼa kataki neʼe tapuakiʼi ia ia e Sehova. (Loma 5:​3-5) Koia, ke ke fakakaukauʼi tou aluʼaga. ʼE ke faʼa kataki mo agatonu logo la ʼou ʼahiʼahi fuli. Koia, ke ke falala ʼe ʼofa Sehova ia koe.

12. Kotea ʼae ʼe feala ke puli ai totatou fiafia?

¹² 2: He ʼu aluʼaga ʼe tou fakaʼamu ki ai kae mole hoko. (Taag. 13:12) ʼE tou fai he ʼu fakatuʼutuʼu ʼi tatatou tauhi kia Sehova, he ʼe tou ʼoʼofa mo lotofakafetaʼi kia te ia. Kae, kapau ʼe tou faiga ke tou fai he ʼu gaue pea ʼe mole tou lavaʼi ʼuhi ko totatou aluʼaga, ʼe feala pe ke tou lotovaivai. (Taag. 17:22) ʼE ui fenei e te tuagaʼane ko Holly, ʼae ʼe pionie: “Neʼe au fia kau ki te Ako ʼo Te Kau Faifakamafola ʼo Te Puleʼaga, mo faifakamafola ʼi te tahi ʼu fenua, peʼe gaue ʼi te laga fale ʼae ʼi Ramapo. Kae neʼe fetogi leva toku aluʼaga, ʼo mole au lava fakahoko ai te ʼu fakatuʼutuʼu ʼaia. Neʼe au lotovaivai ʼosi. Ka tou fakaʼamu ke tou fai he ʼu tuʼuga gaue kae ʼe mole tou lavaʼi, ʼe fakalotovaivai ʼosi ia.” Tokolahi ʼe natou toe manatu feia ohage ko Holly.

13. Kapau ʼe mole ke lava fai he gaue ʼuhi ko tou aluʼaga, kotea te ʼu fakatuʼutuʼu ʼe ke lava fakahoko?

¹³ Kotea ʼae ʼe tokoni mai ke tou toe maʼu totatou fiafia? Ke ke manatuʼi ʼe mole kole mai e Sehova ke tou fai he meʼa ʼe mole tou lavaʼi. ʼE mole fakalogo totatou maʼuhiga ki te lahi ʼo te ʼu gaue ʼe tou fai ki tatatou tauhi kia te ia. ʼE ina loto ke tou fiamalalo mo agatonu. (Mik. 6:8; 1 Ko. 4:2) Ko te faʼahi ʼae ʼe maʼuhiga ʼaupito kia te ia ʼe ko te meʼa ʼae ʼi ʼotatou loto, kae mole ko te ʼu gaue ʼae ʼe tou fai. ʼE fakapotopoto koa hatatou faiga ke tou fai he ʼu gaue ʼe mole tou lavaʼi, kae mole kole mai e Sehova?c Kailoa ia. Koia, kapau ʼe mole ke lava fai he gaue ʼi te tauhi kia Sehova ʼuhi ko tou aluʼaga, faiga ke ke fai he ʼu fakatuʼutuʼu ʼe ke lavaʼi anai. ʼE feala koa hau tokoni ki te kau tupulaga ʼo tau kokelekasio, peʼe ko te ʼu tehina mo tuagaʼane kua vaivavai? ʼE feala koa hau fakatuʼutuʼu ke ke alu ʼo fakalotomalohiʼi he tahi, peʼe ke pauʼi mo faitohi ki ai? Ka ke faiga ke ke fakahoko te ʼu fakatuʼutuʼu maʼuhiga ʼaia, ʼe tapuakiʼi anai koe e Sehova ʼo ina foaki atu te fiafia. ʼAua naʼa galo kia koe ʼe lahi anai te ʼu faigamalie ʼi te malama foʼou ke tou tauhi ai kia Sehova, kae neʼe mole tou ʼamanaki ki ai. ʼE ui fenei e Holly, ʼae neʼe tou palalau ki ai ʼi ʼoluga: “Neʼe au nofo ifo muʼa ki lalo ʼo fakakaukau mo feuiʼaki: ‘ ʼE lelei ʼe au maʼuli anai ʼo heʼe gata. Pea ʼe tokoni mai anai ia Sehova ke au lava fakahoko ʼihi ʼo ʼaku fakatuʼutuʼu ʼi te malama foʼou.’”

14. Kotea ʼae ʼe feala ke puli ai totatou fiafia?

¹⁴ 3: Te kumi ʼo te ʼu lelei. ʼE fakaʼaogaʼi e ʼihi te ʼu fakatahiʼaga ʼo te neti moʼo fakamafola he ʼu manatu ʼe tonu ke tou kumi he ʼu lelei ke tou maʼu ai te fiafia moʼoni. Ohage la, kua maʼuhiga age ia ki te hahaʼi tanatou fai he meʼa ʼe natou leleiʼia, mo olo ʼo faifakatau peʼe folau ki he tahi ʼu fenua. ʼE mole kovi hatatou fai te ʼu koga ʼaia. Neʼe fakatupu tatou e Sehova ke tou leleiʼia te ʼu aluʼaga ʼaia ʼo te maʼuli. Kae, tokolahi neʼe natou tokagaʼi neʼe mole natou maʼu te fiafia moʼoni ʼi te ʼu lelei ʼaia neʼe natou fai. ʼE ui fenei e Eva, ʼae ʼe pionie: “Ka ke faiga ke ke ʼuluaki kumi te ʼu meʼa ʼae ke ke fiafia ai, ʼe mole ke feʼaugaʼia anai.” Koia, ka tou kumi he ʼu lelei, ʼe feala ke tou lotomamahi mo logoʼi ʼe mole tou fiafia moʼoni.

15. Kotea ʼe tou ako mai te faʼifaʼitaki ʼo te Hau ko Salomone?

¹⁵ ʼE lahi te ʼu ako ʼe tou taʼofi mai te faʼifaʼitaki ʼo te Hau ko Salomone. Neʼe tau mo he ʼu nunuʼa kovi ʼuhi ko tana kumi te ʼu lelei. Neʼe faiga ke fiafia ʼi te ʼu meʼa fuli ʼae neʼe holi ki ai. Ohage la, neʼe fiafia ʼi tana kai lelei, mo fakalogo musika, pea mo totogi te ʼu meʼa lelei fuli neʼe feala ke toʼo ʼi tona temi. Kotea ʼona fua? Neʼe mole ina maʼu te fiafia moʼoni. Neʼe ina ui fenei: “ ʼE mole fiu te mata ʼi te sio mo te taliga ʼi te logo.” (Ekl. 1:8; 2:​1-​11) Koia, ʼe hage te ʼu manatu ʼo te malama ʼaeni ʼo ʼuhiga mo te fiafia moʼoni ko he falā loi. ʼE manatu ʼihi kapau ʼe lahi tanatou foʼi falā mo fai te meʼa ʼae ʼe natou loto ki ai, ʼe natou fiafia anai. Kae ʼe tou iloʼi ko te loi.

16. Kotea ʼe feala ke tou fai ke tou toe maʼu totatou fiafia? (Vakaʼi te ʼu pāki.)

¹⁶ Kotea ʼae ʼe tokoni mai ke tou toe maʼu totatou fiafia? Neʼe akoʼi mai e Sesu “ ʼe lahi age te fiafia moka kita foaki, ʼi takita tali.” (Gaue 20:35) ʼE ui fenei e Alekos: “ ʼE au faiga ke au kumi he ʼu faigamalie ke au tokoni ai ki ʼihi. Ka lahi taku tokoni ki ʼihi, ʼe mole au manatu fau kia au, pea ʼe lahi age toku fiafia.” Kotea ʼe feala ke ke fai maʼa ʼihi? Kapau ʼe ke sio ki he tahi ʼe lotomamahi, ke ke haga ʼo fakalotomalohiʼi. ʼE mahino ia, ʼe mole ke pulihi anai ʼona fihifihia, kae ʼe feala hau fakalotofimalieʼi ia ia. ʼO feafeaʼi? ʼAki hau fagono ki ai mo he lotomahino, mo lotomanavaʼofa ki ai, pea mo fakamanatuʼi age ke li tana kavega kia Sehova. (Pes. 55:22; 68:19) ʼE feala ke ke toe tokoni ki ai ke mahino ʼe mole liʼaki ia ia e Sehova. (Pes. 37:28; Esa. 59:1) ʼE feala hau teuteuʼi hana meʼa kai, peʼe ke alu ʼo haʼele mo ia. Pea kapau ʼe ke fakatuʼutuʼu ke kolua faifakamafola, ʼe toe lotomalohi anai. Koia, tuku ia Sehova ke ina fakaʼaogaʼi koe ke ke tokoni ki ai. Ka tou fakamuʼamuʼa ʼihi ia tatou totonu, pea ʼe tou maʼu ai ia te fiafia moʼoni.​—Taag. 11:25.

17. Kotea ʼae ʼe tonu ke tou fai ke tou fiafia moʼoni ai? (Pesalemo 43:4)

¹⁷ Kapau ʼe tou haga fakaovi ki tatatou Tamai ʼae ʼi selo, ʼe tou fiafia moʼoni anai. Pea ʼe fakamoʼoni mai ki ai te Tohi-Tapu, he ʼe ko Sehova ʼe ko totatou “fiafiaʼaga lahi.” (Lau ia Pesalemo 43:4.) Koia, ʼe mole ʼaoga anai ke tou hoha, mo matataku, maʼia pe ʼe tou tau mo he ʼu faigataʼaʼia. ʼE mole tou lotovaivai anai ʼi he temi mo kapau ʼe tou haga sioʼi fakamamaʼu ia Sehova, te Matapuna ʼo totatou fiafia!​—Pes. 144:15.