He Ko ʼe ʼe Mole Fakaʼaogaʼi e Te Kau Fakamoʼoni ʼa Sehova Ia Te Koluse ʼi Tanatou Tauhi?

Tokolahi ʼe natou fakaʼuhiga ia te koluse ko te fakaʼiloga fakamalamanei ʼaia ʼo te Lotu Fakakilisitiano. Logo la ko te kau Fakamoʼoni ʼa Sehova ʼe ko he kau Kilisitiano kaʼe ʼe mole natou fakaʼaogaʼi ia te koluse. Kotea tona tupuʼaga?

Koteʼuhi ʼe fakaha ʼi te Tohi-Tapu, neʼe mole mate ia Sesu ʼi he koluse kaʼe neʼe mate pe ia ʼi te pou. Pea tahi, ʼe fai ʼi te Tohi-Tapu ia te fakatokaga malohi ki te kau Kilisitiano ke natou “hola mai te tauhi ki te u taulaatua,” ko tona fakaʼuhiga ʼe mole tonu ke natou fakaʼaogaʼi ia te koluse ʼi tanatou tauhi.—1 Kolinito 10:14; 1 Soane 5:21.

Koia neʼe ui fenei e Sesu: “I te mea aia e iloi anai e te tagata fuli, ko koutou ko aku tisipulo, mo kapau e koutou mau te feofaaki ia koutou.” (Soane 13:34, 35) Neʼe ui e Sesu ʼe iloʼi lelei anai ʼana tisipulo ʼuhi ko te ʼofa kaʼe mole ʼuhi ko te koluse peʼe ko ʼihi atu pakī.