Ka Lahi Te Loto Fia Foaki
KAPAU ʼe koutou maʼu te fealagia ʼaē ke koutou foaki he meʼa ʼofa ki he hau, koteā ʼaē ka koutou foaki ki ai? E feafeaʼi mo kapau ʼe ko te hau tokotahi ʼaia ʼaē ʼe koloaʼia pea mo poto ʼi te malamanei katoa? ʼE koutou ʼiloʼi koa pe koteā ʼapē te meʼa ʼofa ʼaē ka ina leleiʼia? Kua hili kiai taʼu e tolu afe, neʼe fai e te fineʼaliki ʼo Sepa te ʼu fehuʼi ʼaia ʼi tana teuteu ʼaē ke ʼalu ʼo ʼaʼahi te hau feiā—ko Salomone, te Hau ʼo Iselaele.
ʼE ʼui mai e te Tohi-Tapu, ʼi te ʼu meʼa ʼofa ʼaē neʼe ina foaki, neʼe ʼi ai te ʼu taleta aulo e 120 “pea mo te tuʼuga moʼi lolo magoni pea mo te ʼu maka maʼugataʼa.” Ko te totogi ʼo te aulo ʼaia ia ʼaho nei, ʼe ko teitei tola e 40 000 000. Ko te moʼi lolo Palesame, ko te moʼi lolo magoni pea neʼe fakaʼaogaʼi ko he faitoʼo, neʼe tatau mo te aulo he neʼe ko he meʼa maʼugataʼa. Logope la ʼe mole talanoa te Tohi-Tapu ki te lahi ʼo te moʼi lolo ʼaē neʼe foaki e te fineʼaliki kia Salomone, kae ʼe ina fakahā mai neʼe mole he tatau ʼo tana meʼa ʼofa ʼaia.—1 Hau 10:10.
ʼE hā ai ko te fineʼaliki ʼo Sepa neʼe ko he fafine koloaʼia pea mo loto fia foaki. Pea tahi ʼaē meʼa, neʼe toe liufaki age kia ia tona loto fia foaki ʼaia. ʼE ʼui fēnei e te Tohi-Tapu: “Neʼe foaki e te Hau ko Salomone ki te fineʼaliki ʼo Sepa ia meʼa fuli pe ʼaē neʼe loto kiai, ʼaē neʼe ina kole age, ʼo hilifaki ki te lahi ʼo te ʼu meʼa ʼaē neʼe ina ʼaumai maʼa te hau.” (2 Fakamatala 9:12) ʼE moʼoni, neʼe lagi ko te agamāhani ʼo te ʼu hau te fefoakiʼaki ni ʼu meʼa ʼofa; kae ʼe talanoa lelei te Tohi-Tapu ki te “loto fia foaki lahi” ʼo Salomone. (1 Hau 10:13) Neʼe tohi fēnei e Salomone: “Ko te nefesi ʼaē ʼe manavaʼofa ʼe sino lelei anai ia, pea ko ʼaē ʼe lahi tana fakavai niʼihi, ʼe toe lahi anai mo tona fakavai.”—Tāʼaga Lea 11:25.
ʼE mahino papau ia, neʼe toe lahi te temi pea mo te ʼu faiga ʼaē neʼe fakaʼaogaʼi e te fineʼaliki ʼo Sepa moʼo ʼaʼahi ia Salomone. ʼE ʼui ko Sepa neʼe tuʼu ʼi te koga meʼa ʼaē kua higoa ʼi te temi nei ko te Yémen; neʼe folau ai te fineʼaliki ki Selusalemi pea mo tana ʼu kamelo ia kilometa e 1 600 tupu. Ohage ko tana ʼui e Sesu, “nee haù ia maia tuakoi o te kelekele.” He koʼe koa neʼe fai e te fineʼaliki ʼo Sepa te folau fakakinakina ʼaia? Neʼe haʼu tāfito moʼo “fagono ki te poto o Salomone.”—Luka 11:31.
ʼE ʼui ia 1 Hau 10:1, 2 ko te fineʼaliki ʼo Sepa “neʼe haʼu ko te ʼahiʼahiʼi [Salomone] ʼaki ni ʼu fehuʼi faigataʼa. . . . Neʼe ina kamata fakahā kia ia te ʼu meʼa fuli ʼaē neʼe ina logoʼi ʼi tona loto.” Neʼe feafeaʼi te tali ʼa Salomone kiai? “Pea neʼe fakahā age e Salomone, te ʼu meʼa fuli ʼaē neʼe ina fia ʼiloʼi. Neʼe mole he meʼa neʼe puli ki te hau he neʼe ina fakahā fuli age.”—1 Hau 10:3.
ʼI tana punamaʼuli ki te ʼu meʼa ʼaē neʼe logo pea mo sio kiai, neʼe tali age e te fineʼaliki ʼaki he agavaivai: “Manuʼia te kau tagata faifekau ʼaenī ʼaē ʼe tutuʼu tuʼumaʼu ʼi ʼou muʼa, ʼo fagono ki tou poto!” (1 Hau 10:4-8) Neʼe mole ina ʼui ʼe manuʼia te ʼu tagata kaugana ʼo Salomone heʼe nātou maʼuʼuli ʼi te koloā—logope la neʼe nātou toe fiafia foki ʼi te faʼahi ʼaia. Kae neʼe tapuakina te ʼu tagata kaugana ʼo Salomone, he neʼe feala ke nātou fakalogo tuʼumaʼu ki te poto ʼo Salomone ʼaē neʼe foaki age e te ʼAtua. ʼE ko he faʼifaʼitaki lelei ʼaē neʼe tuku e te fineʼaliki ʼo Sepa ki te hahaʼi ʼa Sehova ʼo te temi ʼaenī, ʼaē ʼe nātou maʼu te poto ʼo tatatou Tupuʼaga pea mo tona ʼAlo, ia Sesu Kilisito!
Pea ʼe feala ke tou toe fakatokagaʼi te meʼa ʼaenī neʼe ʼui e te fineʼaliki kia Salomone: “Ke fai he fakafetaʼi kia Sehova tou ʼAtua.” (1 Hau 10:9) ʼE mahino ia neʼe sio ki te nima ʼo Sehova, ʼi te poto ʼaē neʼe maʼu e Salomone pea mo tana koloaʼia. Neʼe ʼalutahi te faʼahi ʼaia mo te fakapapau ʼaē neʼe fai e Sehova ki Iselaele ʼi te temi muʼa. Neʼe ina ʼui fēnei: “ ʼE tonu anai ke koutou taupau pea mo koutou maʼuliʼi [taku ʼu pelesepeto], heʼe ko hakotou agapoto anai ʼaia pea mo ʼatamai ia mata ʼo te hahaʼi ʼaē ka logo anai ki te talanoa ʼo ʼuhiga mo te ʼu pelesepeto fuli ʼaia, pea ʼe mahino papau ʼe nātou ʼui anai: ‘ ʼE moʼoni, ko te fenua lahi ʼaenī ko he hahaʼi agapoto pea mo ʼatamai.’ ”—Teutalonome 4:5-7.
Koutou ’Ōmai Kia Ia ʼAē ʼe Ina Foaki Lahi Te Poto
ʼI totatou temi, ko te lauʼi miliona hahaʼi neʼe nātou ʼōmai ki te kautahi ʼa Sehova he neʼe nātou sio ko “te Iselaele ʼo te ʼAtua” ʼe “ko he hahaʼi agapoto pea mo ʼatamai,” neʼe mole nātou tupu ake ʼaki te ʼu kalitate ʼaia, kae koteʼuhi ʼe takitaki nātou e te ʼu lao pea mo te ʼu pelesepeto haohaoa ʼa te ʼAtua. (Kalate 6:16) ʼE fakahā e te ʼu papitema ʼi te ʼu taʼu ʼaenī, ko te lauʼi teau afe kau tisipulo foʼou ʼi te taʼu fuli ʼe nātou ʼui fēnei ki te Iselaele fakalaumālie: “ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.” (Sakalia 8:23) ʼE punamaʼuli ʼaupito te hahaʼi foʼou ʼaia ʼi tanatou sio ʼaē ki te kātoaga fakalaumālie ʼaē ʼe foaki e Sehova ki tana ʼu kaugana! Neʼe mole heʼeki nātou sio ki he meʼa feiā ʼi tanatou ʼu lotu ʼāfea.—Isaia 25:6.
Koutou Foaki Kia Ia ʼAē ʼe Foaki Lahi
ʼI te lahi ʼaupito ʼo te ʼu meʼa ʼaē neʼe foaki age e te ʼAtua kia nātou, koia ʼe feʼekeʼaki ai e te ʼu hahaʼi loto fakafetaʼi ʼaia pe koteā ʼaē ʼe feala ke nātou toe liufaki age ki te Hau ko Sehova ʼAtua ʼaē ʼe lahi tokotahi pea toe lahi tokotahi mo tana fia foaki. ʼE fakahā mai e te Tohi-Tapu ko te meʼa ʼofa lelei ʼaupito ʼaē ʼe feala ke tou foaki kia Sehova, ʼe ko “he sakilifisio o te fakavikiviki.” (Hepeleo 13:15) Koteā tona tupuʼaga? Koteʼuhi ʼe pipiki te sakilifisio ʼaia ki te hāofaki ʼo tokita maʼuli, te meʼa tāfito ʼaia ʼaē ʼe tokaga kiai Sehova ʼi te temi fakaʼosi ʼaenī. (Esekiele 18:23) Pea tahi ʼaē meʼa, ka foaki e he tahi tona mālohi pea mo tona temi moʼo tokoni kia nātou ʼaē ʼe mahamahaki, mo lotohoha pea mo ʼihi atu, pea ʼe ko he sakilifisio ʼe tali lelei.—1 Tesalonika 5:14; Hepeleo 13:16; Sakopo 1:27.
Ko te foaki ʼo he falā ʼe ko he faʼahi maʼuhiga. ʼE feala ai ke tā he ʼu Tohi-Tapu, mo he ʼu tohi faka Tohi-Tapu, pea ke lue he ʼu fale ke fai ai te ʼu fakatahi faka Kilisitiano. (Hepeleo 10:24, 25) ʼAki te ʼu meʼa ʼofa ʼaia, ʼe feala ke foaki he falā moʼo tokoni kia nātou ʼaē ʼe nonofo ʼi te ʼu fenua ʼaē ʼe hoko ai te tau pea mo te ʼu tuʼutāmaki fakakelekele.
Moʼo tokoni mai kia tatou ʼo ʼuhiga mo te ʼu meʼa ʼaē ʼe tou fia foaki, ʼe tuku mai e te Folafola ʼa te ʼAtua he ʼu pelesepeto lelei. Ohage la, ʼe ina akoʼi mai ʼe mole foaki e te kau Kilisitiano he paʼaga kua hinoʼi age kia nātou, kae ʼe nātou foaki te meʼa ʼaē ʼe nātou lavaʼi, ʼaki he lotolelei pea mo he loto fiafia. (2 Kolonito 9:7) Ko ʼihi, ʼe lagi lahi anai te ʼu meʼa ʼaē ka nātou foaki; ko ʼihi, ohage ko te fafine vitua masiva ʼi te temi ʼo Sesu, ʼe lagi veliveli anai te meʼa ʼaē ka nātou foaki. (Luka 21:2-4) ʼE mole ko he meʼa lelei koa la ke maʼuhiga kia Sehova—te Pule ʼo te ʼatulaulau katoa—te ʼu faʼahiga meʼa ʼofa fuli ʼaē ʼe tou foaki ʼaki he loto lelei, pea mo te ʼu sakilifisio ʼaē ʼe tou fai maʼa tona huafa?—Hepeleo 6:10.
Ke feala hanatou foaki ʼaki he loto fiafia, ʼe fakahā tuʼumaʼu ki te hahaʼi ʼa Sehova te ʼu meʼa ʼaē ʼe ʼaoga, pea mo te ʼu faʼahiga fai moʼo foaki ia te ʼu meʼa ʼaia. Pea ko te laumālie maʼoniʼoni ʼa Sehova ʼe ina uga nātou ʼaē ʼe lotolelei ke nātou foaki. ʼI te Iselaele ʼāfea, neʼe mulimuli te kau Sutea ki te faʼahiga fai ʼaia moʼo laga te tapenakulo pea, ki muli age, mo te fale lotu. (Ekesote 25:2; 35:5, 21, 29; 36:5-7; 39:32; 1 Fakamatala 29:1-19) ʼI te ʼuluaki sēkulō, neʼe nātou fai feiā, pea ʼaki te falā ʼaē neʼe nātou tānaki, neʼe feala ai ki te kau Kilisitiano ke nātou faka mafola te logo lelei ʼo te Puleʼaga ki te tahi ʼu fenua pea mo tokoni ki te ʼu tēhina ʼo Iselaele lolotoga te hoge.—1 Kolonito 16:2-4; 2 Kolonito 8:4, 15; Kolose 1:23.
ʼO toe feiā ia ʼaho nei, neʼe tapuakina e Sehova tana hahaʼi, pea ʼe hoko atu anai tana tapuakinaʼi nātou, ʼaki te ʼu meʼa ʼaē ʼe ʼaoga kia nātou moʼo fakaʼosi te gāue lahi tokotahi ʼi te malamanei katoa, ʼaē ko te fai faka mafola pea mo faiako.—Mateo 24:14; 28:19, 20.
Koteā Te ʼu Meʼa ʼAē ʼe ʼAoga ʼi Te Temi Nei?
ʼI te ʼu taʼu ʼaenī, kua maʼu te kau Fakamoʼoni ʼa Sehova ʼi te ʼu fenua ʼaē neʼe faka tuʼakoi ai tanatou gāue ʼi muʼa atu. Koia neʼe hoko ʼi te ʼu fenua ʼaia he tuputupu lahi ʼo te kau kaugā fai faka mafola. Neʼe lahi te ʼu Tohi-Tapu pea mo te ʼu tohi faka Tohi-Tapu neʼe fakaʼui ʼi te ʼu fenua ʼaia.
ʼE toe feiā mo te ʼu Fale ʼo te Puleʼaga. ʼI te temi nei ʼe ʼaoga ni ʼu Fale ʼo te Puleʼaga ʼe teitei 9 000 ʼi te malamanei. Kapau ʼe laga he Fale ʼo te Puleʼaga ʼi te ʼaho fuli, pea ʼe ʼaoga anai ia taʼu e 24 moʼo laga te ʼu fale fuli ʼaia! Pea ko teitei kokelekasio foʼou e fitu ʼe faʼufaʼu ʼi te ʼaho fuli, tāfito ʼi te ʼu potu fenua masiva. ʼI te tahi faʼahi, ʼi te ʼu koga meʼa ʼaia ʼe mole ʼaoga ai ke laga he ʼu fale totogi kovi. ʼI ʼihi koga meʼa, ʼe feala ʼaki pe ia tola e 6 000, ke laga he Fale ʼo te Puleʼaga ʼe feʼauga pea mo matalelei.
ʼI te ʼuluaki sēkulō, neʼe lelei age te maʼuli ʼo ʼihi kau Kilisitiano, koia neʼe tohi fēnei ai e te ʼapositolo ko Paulo: “Ko te mea ae e koutou mahu ai i te temi-nei, ke fakaaoga kia natou e mole hanatou mea, pea ka mahu anai ia natou i he mea, e fakaaoga anai kia koutou i toutou hala mo mea, pea e mau ai te fakatatau.” (2 Kolonito 8:14) Ia ʼaho nei, ʼe foaki “fakatatau” te paʼaga ʼaē ʼe fakaʼaogaʼi moʼo faʼu ʼaki he ʼu Tohi-Tapu, mo ni ʼu tohi faka Tohi-Tapu, mo he ʼu Fale ʼo te Puleʼaga, moʼo tokoni ki te ʼu tēhina mo tuagaʼane ʼi te ʼu fenua ʼaē neʼe hoko ai he tuʼutāmaki, pea mo te tahi atu ʼu meʼa ʼi te tahi ʼu potu ʼo te malamanei. ʼE ko he toe tapuakina lahi te foaki—kia ia ʼaē ʼe ina foaki pea mo ia ʼe ina tali!—Gaue 20:35.
Ohage ko tona fakahā ʼi te ʼu tohi ʼaē ʼe fai ki te Sosiete e te hahaʼi ʼaē ʼe loto fia foaki, ʼe tokolahi ia nātou ʼaē ʼe nātou lau Te Tule Leʼo ʼe nātou fia tokoni kae mole nātou faʼa ʼiloʼi lelei peʼe nātou foaki feafeaʼi tanatou ʼu meʼa ʼofa. ʼE mahino ia ko te fakamatala ʼaē ʼe hoa ki te alatike ʼaenī ʼe tali anai ki tanatou ʼu fehuʼi.
Lolotoga te temi hau faka kolōlia ʼo Salomone, “ko te ʼu hau fuli ʼo te kele” ʼaē neʼe nātou logo ki te ʼu talanoa ʼaē neʼe fai ʼo ʼuhiga mo ia, neʼe nātou ʼōmai ʼo ʼaʼahi ia ia. Kae ʼe talanoa te Tohi-Tapu ki te tokotahi ia nātou—ko te fineʼaliki ʼo Sepa. (2 Fakamatala 9:23) ʼI sakilifisio lahi leva ʼaē neʼe ina fai! Kae neʼe lahi te fakapale ʼaē neʼe ina maʼu—ʼi te fakaʼosi ʼo tana ʼaʼahi, neʼe “mānava kinakina pea neʼe punamaʼuli.”—2 Fakamatala 9:4, Today’s English Version.
ʼI te ka haʼu, ko Sehova, te Hau lahi tokotahi pea mo loto fia foaki, ʼe lahi age anai te ʼu meʼa ʼaē ka ina fai ʼi te ʼu meʼa ʼaē neʼe fai e Salomone, kia nātou ʼaē ʼe nātou fai he ʼu sakilifisio maʼa Ia. Moʼo tali kiai, ko nātou ʼaia ʼe nātou ‘ōfo pea mo . . . punamaʼuli’ anai, koteʼuhi ʼe puipui anai nātou e Sehova ʼi tana ʼaho fakamataku ʼo te fakamāu, pea ki muli age, ʼe ina ‘avahi anai tona nima pea mo ina fakahoko anai te holi ʼo te meʼa maʼuli fuli pe.’—Pesalemo 145:16.
[Talanoa ʼo te pasina 22]
Te ʼu Faʼahiga Fai Moʼo Foaki
HE ʼU MEʼA ʼOFA KI TE GĀUE FAKA MALAMANEI
KO TE tokolahi ʼe nātou tānaki kehe hanatou foʼi falā, ke nātou ʼai ki te ʼu kesi ʼaiʼaga meʼa ʼofa ʼaē ʼe tohi ai “Te ʼu meʼa ʼofa ki te gāue faka malamanei ʼa te Sosiete—Mateo 24:14.” ʼI te māhina fuli, ʼe momoli e te ʼu kokelekasio te falā ʼaia ki te ʼu nofoʼaga faka malamanei ʼaē ʼi Brooklyn, ʼi New York, peʼe ki te filiale ʼo tonatou telituale.
ʼE toe feala foki ke tou momoli fakahagatonu te ʼu meʼa ʼofa ki te filiale ʼo totatou fenua. ʼE feala ke tou foaki he ʼu faʼahiga koloā kehekehe peʼe ko he tahi ʼu meʼa maʼuhiga. ʼE tonu ke tou momoli fakatahi mo te ʼu meʼa ʼaia he tohi fakanounou ʼe fakahā ai ʼe ko te ʼu meʼa ʼofa fuli ʼaia.
TE ʼU MEʼA ʼOFA ʼE FAKA TUʼAKOI
ʼE feala ke tou foaki he paʼaga ki te Sosiete Watch Tower, ʼaki te faka tuʼakoi makehe ʼaenī, kapau ʼe toe ʼaoga te paʼaga ʼaia kia tatou, pea ʼe toe liufaki mai anai. Kapau ʼe koutou fia maʼu he tahi ʼu fakamahino, pea koutou faitohi ki te filiale.
KO HE MEʼA ʼOFA KUA FAKATUʼUTUʼU
ʼO hilifaki atu ki te ʼu meʼa ʼofa faka paʼaga ʼaia ʼaē ʼe mole honatou ʼu faka tuʼakoi pea mo te ʼu meʼa ʼofa ʼaē ʼe faka tuʼakoi, ʼe toe ʼi ai te tahi ʼu faʼahiga fai meʼa ʼofa moʼo lagolago ki te haʼele lelei ʼo te gāue faka malamanei ʼo te ʼu Puleʼaga. ʼE kau kiai te ʼu meʼa ʼaenī:
Polices dʼassurance: ʼE feala ke foaki ki te Sosiete Watch Tower he police dʼassurance peʼe ko he letelete/he posio.
Te Falā ʼi Te Fale Paʼaga: ʼO mulimuli ki te ʼu meʼa ʼaē ʼe fakamaʼua e te ʼu fale paʼaga ʼo tokotou fenua, ʼe feala ke koutou tuku te Sosiete Watch Tower ke tokaga ki takotou falā ʼi te fale paʼaga, peʼe ko he compte dépôt, peʼe ko he compte de retrait personnel, peʼe feala ke fakatoʼo te ʼu meʼa ʼaia ki te Sosiete ʼi takotou mate.
Te ʼu Vahe ʼo He Matani Gāue: ʼE feala ke foaki ki te Sosiete Watch Tower te ʼu meʼa ʼaia ohage ko he meʼa ʼofa katoa, peʼe ko he fakatuʼutuʼu ʼe faka fealagia ai kia ia ʼaē ʼe ina foaki ke hoholo atu tana maʼu te paʼaga.
Te ʼu Kele Pea Mo Te ʼu Nofoʼaga: ʼE feala ke tou foaki ki te Sosiete Watch Tower te ʼu koloā ʼaia ʼaē ʼe feala hanatou fakatau, peʼe tou faka tuʼakoi ke feala hatatou fakaʼaogaʼi ʼi totatou temi maʼuli. ʼE tonu ke tou fakahā te faʼahi ʼaia ki te Sosiete ʼi muʼa ʼo tatatou foaki kiai te ʼu koloā ʼaia.
Te ʼu Pepa ʼAē ʼe Tohi Ai Te Loto Fakamuli ʼo He Tahi Pea Mo Te ʼu Kotala Fidéicommis: ʼE feala ke tou foaki he kele peʼe ko he paʼaga ki te Sosiete Watch Tower ʼo tou tohi ʼi he pepa totatou loto fakamuli, ʼo mulimuli pe ki te lao, peʼe toe feala ke tou fai te kotala fidéicommis ʼaē ʼe ʼui ai ʼe maʼu anai e te Sosiete tatatou ʼu koloā ʼi tatatou ʼosi mate. ʼE lagi feala ke fakasiʼisiʼi te tukuhau ʼaē ʼe tonu ke totogi e ia ʼaē ʼe ina fai te kotala ʼaia, kapau ʼe fai mo te kautahi faka lotu.
Ko nātou ʼaē ʼe nātou fia ʼiloʼi he faʼahiga meʼa ʼo ʼuhiga mo te ʼu fakatuʼutuʼu ʼo te foaki ʼo he ʼu meʼa ʼofa, ʼe tonu ke nātou faitohi ki te filiale ʼo tonatou fenua.
[Paki ʼo te pasina 23]
Ko te ʼu meʼa ʼofa ʼe tokoni ki te ʼu gāue ʼaē ʼe fai e te kau Fakamoʼoni ʼa Sehova