ʼE Mole Feala Ia Ke ʼIloʼi Te Tauʼoluga ʼo Sehova

“ ʼE tauʼoluga ia Sehova pea ʼe tonu ke tou fakavikiviki ʼaupito kia te ia, pea ko tona tauʼoluga ʼe mole feala ia ke ʼiloʼi.”​—Pesalemo 145:3.

1, 2. Neʼe feafeaʼi te tagata ko Tavite, pea neʼe koteā tana manatu ʼo ʼuhiga mo ia totonu, ʼi tana ʼu felogoi mo te ʼAtua?

KO TE tagata ʼaē neʼe ina tohi te Pesalemo 145 ʼe kau ʼi te ʼu tagata ʼaē ʼe ʼiloʼi lelei ʼi te hisitolia. ʼI tana kei talavou, neʼe ina tauʼi te tagata solia lahi ʼaupito pea mo ina matehi ia ia. Pea ʼi tona tuʼulaga hau pea mo tagata tau, neʼe lahi te ʼu tau neʼe mālo ai te tagata fai pesalemo ʼaia ʼi tona ʼu fili. Ko tona higoa ko Tavite, pea neʼe ko te lua hau ʼo te Iselaele ʼāfea. Neʼe hoko atu pe te ʼiloa ʼo Tavite ʼi tana ʼosi mate, koia ia ʼaho nei ʼe tokolahi te hahaʼi ʼe nātou ʼiloʼi ia ia.

² Logola te ʼu meʼa ʼaē neʼe fakahoko e Tavite, kae neʼe ko he tagata neʼe fia mālalo. ʼO ʼuhiga mo Sehova, neʼe hiva fēnei: “Mokā ʼau sio ki tau ʼu lagi, te ʼu gāue ʼo tou ʼu nima, te māhina pea mo te ʼu fetuʼu ʼaē neʼe ke teuteuʼi, koteā te ʼuhiga ʼo te tagata ʼaē ka mate ke ke manatuʼi ia ia, pea mo te foha ʼo te tagata ʼaē neʼe toʼo mai te kele ke ke taupau ia ia?” (Pesalemo 8:​3, 4) Neʼe mole ʼui e Tavite ʼo ʼuhiga mo ia totonu, ʼe ko he tagata lahi, kae neʼe ina ʼui ʼe ko Sehova ʼaē neʼe ina hāofaki ia ia mai tona ʼu fili fuli pea neʼe ina ʼui fēnei ʼo ʼuhiga mo te ʼAtua: “ ʼE ke foaki mai anai tau meʼa tali tau ʼo te hāofaki, pea ko tau agavaivai ʼaē ʼe ina fakalahi ʼau.” (2 Samuele 22:​1, 2, 36) Neʼe agavaivai ia Sehova ʼi tana fakahā tona manavaʼofa ki te kau agahala, pea neʼe loto fakafetaʼi ia Tavite ki te lotoʼofa ʼaia ʼo te ʼAtua.

‘ ʼE ʼAu Vikiʼi Anai Te ʼAtua Te Hau’

3. (a) Neʼe koteā te manatu ʼa Tavite ʼo ʼuhiga mo te pule ʼaē ki Iselaele? (b) Neʼe feafeaʼi te fia fakavikiviki ʼa Tavite kia Sehova?

³ Logola ko Tavite neʼe ko te hau neʼe fakanofo e te ʼAtua, kae kia ia neʼe ko Sehova te Hau moʼoni ʼo Iselaele. Neʼe ʼui fēnei e Tavite: “ ʼA koe te puleʼaga, ê Sehova, ia Ia ʼaē ʼe ina toe hikihiki koe ko he pule kia meʼa fuli.” (1 Fakamatala 29:11) Pea neʼe fakaʼapaʼapa lahi ia Tavite ki te ʼAtua ʼi tona ʼuhiga Tagata Pule! Neʼe hiva fēnei: “ ʼE ʼau vikiʼi anai koe, Ê toku ʼAtua, te Hau, pea ʼe ʼau tapuakiʼi anai tou huafa ʼo aʼu ki he ʼu temi ʼe mole ʼiloʼi honatou gataʼaga, ʼio, ʼo talu ai. ʼE ʼau fakavikiviki anai kia te koe ʼi te ʼaho katoa pe, pea ʼe ʼau fakavikiviki anai ki tou huafa ʼo aʼu ki he ʼu temi ʼe mole ʼiloʼi honatou gataʼaga, ʼio, ʼo talu ai.” (Pesalemo 145:​1, 2) Neʼe loto ia Tavite ke ina fakavikivikiʼi ia Sehova ʼAtua ʼi te ʼaho katoa pea ʼo talu ai.

4. Koteā te ʼu loi ʼaē neʼe lau pea ʼe fakahā e te Pesalemo 145?

⁴ Ko te Pesalemo 145 ʼe ko he tali mālohi ki te lau ʼa Satana ko te ʼAtua ʼe ko he pule ʼe manatu pe kia ia, pea ʼe ina puleʼi fakafefeka tana hahaʼi. (Senesi 3:​1-5) ʼE toe fakahā e te pesalemo ʼaia te loi ʼa Satana, ʼi tana ʼui ʼaē ʼe fakalogo te hahaʼi ki te ʼAtua ʼuhi pe heʼe nātou fia maʼu he ʼu lelei, kae mole ʼuhi heʼe nātou ʼoʼofa ki te ʼAtua. (Sopo 1:​9-11; 2:​4, 5) Ohage ko Tavite, ko te kau Kilisitiano moʼoni ʼi te temi nei ʼe nātou fai he ʼu tali ki te ʼu tukugakovi loi ʼa te Tevolo. ʼE maʼuhiga kia nātou tanatou ʼamanaki ki te maʼuli heʼegata ʼi te takitaki ʼa te Puleʼaga, heʼe nātou fia fakavikiviki ia Sehova ʼo talu ai. Kua kamata fai e te ʼu lauʼi miliona hahaʼi ia te faʼahi ʼaia, ʼi tanatou tui ki te sakilifisio faitotogi ʼa Sesu pea ʼaki he fia fakalogo, ʼe nātou tauhi kia Sehova ʼaki te ʼofa, ʼo nātou liliu ko tana kau atolasio kua foaki tonatou maʼuli kia te ia pea mo papitema.​—Loma 5:8; 1 Soane 5:3.

5, 6. Koteā te ʼu faigamālie ʼaē ʼe tou maʼu moʼo fakavikiviki kia Sehova?

⁵ ʼI totatou ʼuhiga kaugana ʼa Sehova, tou fakakaukauʼi age muʼa te ʼu fealagia kehekehe ʼaē ʼe tou maʼu moʼo fakafetaʼi pea mo fakavikiviki kia te ia. ʼE feala ke tou fai te faʼahi ʼaia ʼi te faikole, mokā malave loloto kia tatou he meʼa neʼe tou lau ʼi tana Folafola, te Tohi-Tapu. ʼE feala ke tou fakavikiviki ʼaki he loto fakafetaʼi kia te ia mokā malave kia tatou te aga ʼa te ʼAtua ki tana hahaʼi, peʼe mokā tou fiafia ʼuhi ko te meʼa ʼaē neʼe ina fakatupu. ʼE tou toe fakafetaʼi kia Sehova ʼAtua mokā tou palalau ki tana ʼu fakatuʼutuʼu mo te ʼu tēhina mo tuagaʼane ʼi te ʼu fono peʼe ʼi tatatou ʼu fai palalau ʼi tuʼa atu. ʼI tona ʼuhiga moʼoni, ko te ʼu “gaue lelei” fuli ʼaē ʼe fai moʼo lagolago ki te gāue ʼo te Puleʼaga ʼa te ʼAtua ʼe ko he fakavikiviki ʼaia kia Sehova.​—Mateo 5:16.

⁶ ʼI te ʼu gāue lelei ʼaē neʼe fai mole heʼeki faʼa fualoa, ʼe kau ai te laga e te hahaʼi ʼa Sehova te ʼu fale tauhi ki te ʼAtua ʼi te ʼu fenua māsisiva. Neʼe lahi te ʼu faʼahi neʼe lavaʼi ʼuhi ko te tokoni faka paʼaga ʼa te ʼu tēhina mo tuagaʼane ʼo te tahi ʼu fenua. Ko ʼihi kau Kilisitiano neʼe nātou ʼolo ki te ʼu fenua ʼaia moʼo tokoni ki te laga ʼo te ʼu Fale ʼo te Puleʼaga. Pea ko te gāue ʼaē ʼe maʼuhiga ʼaupito ʼi te ʼu gāue lelei fuli ʼe ko te fakavikiviki kia Sehova ʼo tou faka mafola te logo lelei ʼo tona Puleʼaga. (Mateo 24:14) Ohage ko tona fakahā e te ʼu vaega ki muli age ʼo te Pesalemo 145, neʼe loto fakafetaʼi ia Tavite ki te pule ʼa te ʼAtua pea mo ina vikiʼi Tona ʼuhiga hau. (Pesalemo 145:​11, 12) ʼE koutou loto fakafetaʼi koa mo koutou ki te faʼahiga pule ʼaē ʼe fai e te ʼAtua? Pea ʼe koutou palalau tuʼumaʼu koa ki te hahaʼi ʼo ʼuhiga mo tona Puleʼaga?

Te ʼu Faʼifaʼitaki ʼo Te Tauʼoluga ʼo Te ʼAtua

7. Koutou fakahā mai te tupuʼaga tāfito ʼaē ke tou fakavikiviki ai kia Sehova.

⁷ ʼE foaki mai ia Pesalemo 145:3 te tupuʼaga tāfito ke tou fakavikiviki ai kia Sehova. ʼE hiva fēnei ia Tavite: “ ʼE tauʼoluga ia Sehova pea ʼe tonu ke tou fakavikiviki ʼaupito kia te ia, pea ko tona tauʼoluga ʼe mole feala ia ke ʼiloʼi.” ʼE mole he tuʼakoi ʼo te tauʼoluga ʼo Sehova. ʼE mole feala ke mahino katoa te tagata ki tona lahi. Kae ʼe fua lelei moʼoni anai kia tatou ʼi te temi nei mokā tou vakaʼi te ʼu faʼifaʼitaki ʼo te tauʼoluga ʼo Sehova.

8. Koteā ʼaē ʼe fakahā e te ʼatulaulau ʼo ʼuhiga mo te tauʼoluga pea mo te mālohi ʼo Sehova?

⁸ ʼE lagi koutou manatuʼi he ʼaho neʼe koutou mavae mamaʼo ai mai te kolo ʼaē ʼe mālamagia ʼi te ʼu hila pea neʼe koutou sioʼi te ʼu tuʼuga fetuʼu ʼaē ʼe nātou faka mālamagia te lagi ʼi te fakapōʼuli. Neʼe mole koutou ōfo ai koa, ʼo fia fakavikiviki kia Sehova ʼuhi ko tona tauʼoluga, ʼi tana fakatupu te ʼu meʼa fuli ʼaia ʼi te lagi? Kae ko te meʼa ʼaē neʼe koutou sisio kiai ʼe ko he kiʼi koga veliveli pe ʼo te ʼu tuʼuga fetuʼu ʼi te ʼu fakapupuʼaga fetuʼu ʼaē ʼe kau kiai te kele. Tahi ʼaē meʼa, ʼe fakafuafua ko te ʼu fakapupuʼaga fetuʼu e teau miliona tupu, pea ko te ʼu fakapupuʼaga fetuʼu pe e tolu ʼe feala ke tou sisio kiai mokā ʼe mole fakaʼaogaʼi he ʼu meʼa fakaʼaʼata. Koia ko te ʼu tuʼuga fetuʼu pea mo fakapupuʼaga fetuʼu ʼaē ʼe nātou faʼufaʼu te toe ʼatulaulau lahi, ʼe ko he fakamoʼoni ʼaia ki te mālohi ʼo Sehova moʼo fakatupu pea mo tona tauʼoluga ʼaē ʼe mole feala ke tou mahino katoa kiai.​—Isaia 40:26.

9, 10. (a) ʼO ʼuhiga mo Sesu Kilisito neʼe hā feafeaʼi te tauʼoluga ʼo Sehova? (b) ʼE tonu ke malave feafeaʼi ki tatatou tui ia te fakatuʼuake ʼo Sesu?

⁹ Ko te tahi ʼu faʼahi ʼe hā ai te tauʼoluga ʼo Sehova​—ʼe pipiki kiai ia Sesu Kilisito. Neʼe hā te tauʼoluga ʼo te ʼAtua ʼi tana fakatupu tona ʼAlo pea mo ina fakaʼaogaʼi lolotoga te temi loaloaga ohage ko Tana tagata “tufuga faiva.” (Tāʼaga Lea 8:​22-31) Ko te ʼofa lahi ʼo Sehova neʼe hā ʼi tana foaki tona ʼAlo ʼulu tokotahi ko he sakilifisio faitotogi maʼa te malamanei. (Mateo 20:28; Soane 3:16; 1 Soane 2:​1, 2) Pea ko te faʼahi ʼaē ʼe mahino gataʼa kiai te tagata, ʼe ko te sino fakalaumālie tuputupua pea mo faka kolōlia ʼaē neʼe foaki e Sehova kia Sesu ʼi tana ʼosi fakatuʼuake mai te mate.​—1 Petelo 3:18.

¹⁰ ʼE lahi te ʼu faʼahi fakaofoofo ʼo te tauʼoluga ʼo Sehova, ʼe pipiki ki te fakatuʼuake ʼo Sesu. ʼE mahino papau ia neʼe fai e te ʼAtua ke toe manatuʼi e Sesu te ʼu gāue fuli ʼaē neʼe nā fai ʼi te fakatupu ʼo te ʼu meʼa ʼaē ʼi te lagi pea mo te ʼu meʼa ʼaē ʼi te kele. (Kolose 1:​15, 16) ʼI te ʼu fakatupu ʼaia, ʼe ʼi ai te kau ʼaselo, mo te ʼatulaulau, mo te kele, pea mo te ʼu maʼuli kehekehe ʼi te kele. ʼO hilifaki ki tana toe faka fealagia ki tona ʼAlo ke ina manatuʼi te fakatupu katoa ʼo te lagi pea mo te kele ʼaē neʼe sio mata kiai lolotoga tana maʼuli ʼi te lagi, neʼe toe faka fealagia e Sehova ke manatuʼi e Sesu tona maʼuli haohaoa ʼi te kele. Ei, ʼe hā lelei te tauʼoluga ʼo Sehova ʼi tana fakatuʼuake ia Sesu. Tahi ʼaē meʼa, ko te gāue lahi ʼaia ʼe ko he fakamoʼoni ʼe feala ke toe fakatuʼuake te tahi ʼu hahaʼi. ʼE tonu ke ina fakaloto mālohiʼi tatatou tui ʼaē ko te ʼAtua ʼe feala ke ina toe fakamaʼuli te ʼu lauʼi miliona hahaʼi kua mamate ʼaē neʼe ina taupau ʼi tana manatu haohaoa.​—Soane 5:​28, 29; Gāue 17:31.

Te ʼu Gāue Fakaofoofo Pea Mo Mālohi

11. Koteā te gāue lahi neʼe kamata fai e Sehova ʼi te Penikosite ʼo te taʼu 33 ʼo totatou temi?

¹¹ Talu mai te fakatuʼuake ʼo Sesu, neʼe fai e Sehova te tahi ʼu tuʼuga gāue lalahi pea mo fakaofoofo. (Pesalemo 40:5) ʼI te Penikosite ʼo te taʼu 33 ʼo totatou temi, neʼe fakatuʼu e Sehova te puleʼaga foʼou, “te Iselaele a te Atua,” ʼaē ʼe kau kiai te ʼu tisipulo ʼa Sesu ʼaē neʼe fakanofo ʼaki te laumālie maʼoniʼoni. (Kalate 6:16) ʼAki he toe mālohi lahi, ko te puleʼaga fakalaumālie foʼou ʼaia neʼe mafola ʼi te malamanei ʼo te temi ʼaia. Logola te ʼapositasia ʼaē neʼe tupu ai te Keletiate ʼi te ʼosi mate ʼo te kau ʼapositolo ʼa Sesu, neʼe haga fai pe e Sehova te ʼu gāue fakaofoofo moʼo fakahoko tana fakatuʼutuʼu.

12. Ko te maʼu ʼo te Tohi-Tapu ʼi te ʼu lea tāfito, ʼe ko he fakamoʼoni ʼaia kiteā?

¹² Ohage la, ko te Tohi-Tapu neʼe taupau pea mo fakaliliu ki muli age ʼi te ʼu lea tāfito fuli ʼaē ʼe maʼu ia ʼaho nei. ʼI ʼihi temi, ko te fakaliliu ʼo te Tohi-Tapu neʼe fakahoko ʼi he ʼu ʼaluʼaga faigataʼa, pea ko te hahaʼi gāue ʼa Satana neʼe nātou faiga ke nātou matehi te kau fakaliliu. ʼE mahino ia, ko te fakaliliu ʼo te Tohi-Tapu ia lea e 2 000 neʼe mole feala hona fakahoko mo kapau neʼe mole ko te finegalo ʼaia ʼo te ʼAtua lahi, ko Sehova.

13. Talu mai te taʼu 1914, neʼe hā feafeaʼi te tauʼoluga ʼo Sehova ʼo ʼuhiga mo tana ʼu fakatuʼutuʼu ʼaki te Puleʼaga?

¹³ ʼE hā te tauʼoluga ʼo Sehova ʼi te ʼu fakatuʼutuʼu ʼaē neʼe ina fakahoko ʼaki te Puleʼaga. Ohage la, ʼi te taʼu 1914, neʼe ina fakanofo tona ʼAlo, ia Sesu Kilisito ko te Hau ʼi selo. Mole fualoa kiai, neʼe tauʼi e Sesu ia Satana pea mo tana kau temonio. Neʼe kapu ifo ia nātou mai te lagi pea mo nātou feʼoloʼaki ai ʼi te kele, ʼo nātou fakalogo ai ki tonatou līaki ki te vanu. (Apokalipesi 12:​9-12; 20:​1-3) Talu mai ai, neʼe fakatagaʼi ʼaupito ia te ʼu tēhina fakanofo ʼo Sesu. Kae neʼe tokoni Sehova kia nātou lolotoga te ʼafio fakapulipuli ʼa Kilisito.​—Mateo 24:​3; Apokalipesi 12:17.

14. Koteā te gāue fakaofoofo neʼe fakahoko e Sehova ʼi te 1919, pea koteā ʼaē neʼe hoko ʼaki te gāue ʼaia?

¹⁴ ʼI te taʼu 1919, neʼe fakahoko e Sehova te tahi gāue fakaofoofo neʼe hā ai tona tauʼoluga. Ko te ʼu tēhina fakanofo ʼo Sesu, ʼaē neʼe kua tuku tanatou gāue ʼi te faʼahi fakalaumālie, neʼe toe maʼuʼuli ake. (Apokalipesi 11:​3-11) Talu mai te taʼu ʼaia, neʼe faʼafai te kau fakanofo ʼi te faka mafola ʼo te logo lelei ʼo ʼuhiga mo te fakatuʼu ʼo te Puleʼaga ʼi selo. Neʼe toe tānaki mai te tahi kau fakanofo moʼo fakakatoa te toko 144 000. (Apokalipesi 14:​1-3) Pea ʼaki te ʼu tisipulo fakanofo ʼa Kilisito, neʼe fakatuʼu e Sehova te tafitoʼaga ʼo “te kele foʼou,” ʼaē ʼe ina fakatātā te hahaʼi faitotonu. (Apokalipesi 21:​1, MN ) Kae koteā ka hoko anai ki te “kele foʼou” ʼi te kua ʼosi ʼolo fuli ʼa te kau fakanofo agatonu ki selo?

15. Koteā te gāue ʼaē neʼe takitaki e te kau Kilisitiano fakanofo, pea neʼe koteā tona ʼu fua?

¹⁵ ʼI te taʼu 1935, ʼi te ʼu Tule Leʼo ʼo te ʼaho 1 pea mo te ʼaho 15 ʼo Novepeli, neʼe tuʼu ai te ʼu alatike maʼuhiga neʼe talanoa ʼo ʼuhiga mo “te toe hahaʼi tokolahi” ʼaē ʼe tuʼu ia Apokalipesi kapite 7. ʼAki he loto faʼafai, neʼe kamata kumi e te kau Kilisitiano fakanofo pea mo tānaki mai te kau atolasio ʼaia mai te ʼu puleʼaga fuli pe, mo te ʼu telepi, mo te ʼu hahaʼi, pea mo te ʼu lea. Ko “te toe hahaʼi tokolahi” ʼaia ka nātou hāo anai ʼi “te mamahi lahi” ʼaē kua vave hoko mai, ʼaki te ʼamanaki ʼaē ke nātou maʼuʼuli ʼo heʼegata ʼi te Palatiso, ko te hahaʼi ʼaia ka nonofo anai ʼo talu ai ʼi “te kele foʼou.” (Apokalipesi 7:​9-14, MN ) ʼUhi ʼaē ko te gāue fai faka mafola ʼo te Puleʼaga pea mo te fai ʼo he ʼu tisipulo ʼe takitaki e te kau Kilisitiano fakanofo, koia ko te hahaʼi e ono miliona tupu ʼe nātou maʼu ʼi te temi nei te ʼamanaki ke nātou maʼuʼuli ʼo heʼegata ʼi te kele ʼaē ka liliu ko he palatiso. Ko ai koa ʼaē ʼe tonu ke tou vikiʼi ki te tuputupu ʼaia logola te fakafeagai ʼa Satana pea mo tona mālama agakovi? (1 Soane 5:19) ʼE ko Sehova tokotahi pe ʼaē neʼe feala ke ina fai te ʼu meʼa fuli ʼaia, ʼaki tona laumālie maʼoniʼoni.​—Isaia 60:22; Sakalia 4:6.

Te Taulekaleka Faka Kolōlia ʼo Sehova Pea Mo Tona ʼAlikisia

16. He koʼe ʼe mole feala ke sio mata te tagata ki ‘te taulekaleka faka kolōlia ʼo te ʼalikisia ʼo Sehova’?

¹⁶ ʼE mole galoʼi anai ʼi he temi te ʼu faʼahiga “gāue fakaofoofo” kehekehe pea mo “mālohi” ʼa Sehova. Neʼe tohi fēnei e Tavite: “Ko te taʼiake ki he tahi taʼiake ʼe ina vikiʼi anai tau ʼu gāue; ʼe nātou fakamatala anai tau ʼu gāue mālohi. ʼE ʼau fia ʼiloʼi te taulekaleka faka kolōlia ʼo tou ʼalikisia pea mo te ʼu meʼa ʼo tau ʼu gāue fakaofoofo. Pea ʼe nātou tala anai te mālohi ʼo tau ʼu meʼa fakaofoofo; pea ʼe ʼau fia tala tou tauʼoluga.” (Pesalemo 145:​4-6) Kae neʼe lava ʼiloʼi feafeaʼi e Tavite ia te taulekaleka faka kolōlia ʼo Sehova, heʼe ko “te Atua e laumalie” pea ʼe fakapulipuli?​—Soane 1:18; 4:24.

17, 18. Koteā ʼaē neʼe toe tuputupu ai te fakafetaʼi ʼa Tavite ki ‘te taulekaleka faka kolōlia ʼo te ʼalikisia ʼo Sehova’?

¹⁷ Logola neʼe mole feala ke sio ki te ʼAtua, kae neʼe ʼi ai te ʼu ʼaluʼaga neʼe feala ai kia Tavite ke ina fakatuputupu tana fakafetaʼi ki te ʼalikisia ʼo Sehova. Ohage la, neʼe feala ke ina lau te ʼu fakamatala ʼi te Tohi-Tapu ʼo ʼuhiga mo te ʼu gāue mālohi ʼa te ʼAtua, ohage ko te fakaʼauha ʼo te mālama agakovi ʼi te tulivio ʼaē neʼe hoko ʼi te malamanei katoa. Neʼe ʼiloʼi ai e Tavite te fakalainoaʼi ʼo te ʼu ʼatua hala ʼo Esipito, pea mo te faka ʼāteainaʼi e te ʼAtua te kau Iselaele mai tanatou nofo popūla ʼi Esipito. ʼE fakamoʼoni e te ʼu meʼa ʼaia te ʼalikisia pea mo te tauʼoluga ʼo Sehova.

¹⁸ ʼE mahino papau ia neʼe ʼāsili maʼuhiga kia Tavite te ʼalikisia ʼo te ʼAtua ʼo mole gata pe ʼi tana lau te Tohi-Tapu kae ʼi tana toe metitasio kiai. Ohage la, neʼe lagi metitasio ki te meʼa ʼaē neʼe hoko ʼi te temi ʼaē neʼe foaki ai e Sehova te Lao ki Iselaele. Neʼe ʼi ai te mana, mo te ʼu hila, mo te ʼu ʼao mātolu, pea mo te tagi ʼo te ʼu meʼa pupuhi fakatagi. Neʼe gugulu pea mo kohu te moʼuga ʼo Sinai. Ko te kau Iselaele neʼe nātou fakatahitahi ʼi te vaʼe moʼuga pea neʼe nātou logo ki te fakahā age e Sehova ʼaki tana ʼaselo, “te ʼu Folafola e Hogofulu” mai te lotolotoiga ʼo te afi pea mo te ʼao. (Teutalonome 4:​32-36; 5:​22-24; 10:4; Ekesote 19:​16-20; Gaue 7:​38, 53) Neʼe ko te fakahā lahi ʼaia ʼo te tauʼoluga ʼo Sehova! Ko nātou ʼaē ʼe manako ki te Folafola ʼa te ʼAtua pea mo metitasio ki te ʼu fakamatala ʼaia, ʼe fakaloto mālohi ai nātou e ‘te taulekaleka faka kolōlia ʼo te ʼalikisia ʼo Sehova.’ Ia ʼaho nei, ʼe tou maʼu te Tohi-Tapu katoa, ʼaē ʼe tohi ai te ʼu meʼa neʼe hā, pea ʼe tou ōfo ai ʼuhi ko te tauʼoluga ʼo Sehova.​—Esekiele 1:​26-28; Taniela 7:​9, 10; Apokalipesi, kapite 4.

19. Koteā ʼaē ka tuputupu ai tatatou leleiʼia ia te ʼalikisia ʼo Sehova?

¹⁹ Ko te tahi faʼahi neʼe feala ai ke maʼuhiga kia Tavite te ʼalikisia ʼo te ʼAtua neʼe ko tana ako te ʼu lao ʼaē neʼe foaki e te ʼAtua ki te kau Iselaele. (Teutalonome 17:​18-20; Pesalemo 19:​7-11) ʼI te fakalogo ʼa te kau Iselaele ki te ʼu lao ʼa Sehova, neʼe hikihiki ai te puleʼaga ʼo Iselaele pea mo nātou kehe ai mai te ʼu hahaʼi fuli pe. (Teutalonome 4:​6-8) Ohage pe ko Tavite, ʼe tuputupu anai tatatou fakafetaʼi ki te ʼalikisia ʼo Sehova, mo kapau ʼe tou lau tuʼumaʼu ia te Tohi-Tapu, mo metitasio loloto kiai pea mo tou ako fakamalotoloto.

ʼE Tauʼoluga Te ʼu Kalitate ʼo Te ʼAtua

20, 21. (a) Ia Pesalemo 145:​7-9, ko te ʼu kalitate fea ʼaē ʼe tupu ai te fakavikiviki ki te tauʼoluga ʼo Sehova? (b) ʼE malave feafeaʼi te ʼu kalitate ʼaē ʼe tou talanoa kiai ʼi henī kia nātou fuli ʼaē ʼe ʼoʼofa kia te ia?

²⁰ Neʼe tou tokagaʼi ko te ʼu ʼuluaki vaega e ono ʼo te Pesalemo 145 ʼe nātou foaki mai he ʼu tupuʼaga ke tou vikiʼi ai ia Sehova ʼo ʼuhiga mo te ʼu meʼa ʼaē ʼe pipiki ki tona tauʼoluga. Ko te ʼu vaega 7 ki te 9, ʼe nātou vikiʼi te tauʼoluga ʼo te ʼAtua ʼo nātou talanoa ki tona ʼu kalitate. ʼE hiva fēnei e Tavite: “ ʼE lahi anai tanatou talanoa ki te mahu ʼo tau agalelei, pea ʼe nātou kalaga fakafiafia anai ʼuhi ko tau faitotonu. Ko Sehova ʼe agaʼofa pea mo manavaʼofa, tuai ʼi te ʼita pea mo lahi ʼi te lotoʼofa. Ko Sehova ʼe agalelei ki te hahaʼi fuli, pea ko tona ʼu manavaʼofa ʼe ʼi tana ʼu gāue fuli pe.”

²¹ ʼE ʼuluaki faka maʼuhigaʼi ʼi henī e Tavite te agalelei pea mo te faitotonu ʼa Sehova​—ko te ʼu kalitate neʼe fakafihiʼi e Satana te Tevolo. ʼE malave feafeaʼi te ʼu kalitate ʼaia kia nātou fuli ʼaē ʼe ʼoʼofa ki te ʼAtua pea mo fakalogo ki tana pule? Ko te agalelei ʼa Sehova pea mo tana takitaki faitotonu, ʼe fakatupu fiafia ai ki tana kau atolasio ʼo tupu ai tanatou fia fakavikiviki tuʼumaʼu aipe kia te ia. Tahi ʼaē meʼa, ʼe agalelei ia Sehova “ki te hahaʼi fuli.” Meʼa lelei foki, ʼe tokoni anai te faʼahi ʼaia ki te tokolahi ke nātou foimo fakahemala naʼa tauhala, pea mo nātou liliu ko he kau atolasio ʼa te ʼAtua moʼoni.​—Gaue 14:​15-17.

22. ʼE aga feafeaʼi ia Sehova ki tana kau kaugana?

²² Neʼe toe maʼuhiga kia Tavite te ʼu kalitate ʼaē neʼe fakahā totonu e te ʼAtua ʼi tana “fakalaka . . . ʼi ʼona muʼa [ʼo Moisese] pea mo kalaga: ‘Sehova, Sehova, ʼAtua manavaʼofa, pea mo agaʼofa, tuai ʼi te ʼita pea mo mohu ʼi te lotoʼofa pea mo te moʼoni.’ ” (Ekesote 34:6) Koia neʼe feala ai kia Tavite ke ina ʼui fēnei: “Ko Sehova ʼe agaʼofa pea mo manavaʼofa, tuai ʼi te ʼita pea mo lahi ʼi te lotoʼofa.” Logola ʼe tauʼoluga ʼaupito ia Sehova, kae ʼe ina faka maʼuhigaʼi tana ʼu kaugana, ʼo agaʼofa kia nātou. ʼE fonu ʼi te manavaʼofa, heʼe loto fakamolemole ki te kau agahala ʼaē ʼe fakahemala, ʼaki te sakilifisio faitotogi ʼa Sesu. ʼE toe tuai Sehova ʼi te ʼita, heʼe ina foaki ki tana kau kaugana te fealagia ke nātou tauʼi tonatou ʼu vaivaiʼaga ʼaē ʼe feala ke ina tāʼofi nātou ke mole nātou hū ki te mālama foʼou faitotonu.​—2 Petelo 3:​9, 13, 14.

23. Koteā te kalitate maʼuhiga ʼaē ka tou vakaʼi anai ʼi te alatike ʼaē ka hoa mai?

²³ ʼE vikiʼi e Tavite te lotoʼofa ʼo te ʼAtua, peʼe ko tona ʼofa agatonu. ʼI tona fakahagatonu, ʼe fakahā e te ʼu vaega fakaʼosi ʼo te Pesalemo 145 te kalitate ʼaia pea mo te tali ʼa tana ʼu kaugana faitotonu ki tona lotoʼofa. ʼE tou talanoa anai kiai ʼi te alatike ʼaē ka hoa mai.

ʼE Koutou Tali Feafeaʼi Anai?

• Koteā te ʼu faigamālie ʼe tou maʼu ke tou vikiʼi ai ia Sehova “ ʼi te ʼaho katoa”?

• Koteā te ʼu faʼifaʼitaki ʼe nātou fakahā ai ko te tauʼoluga ʼo Sehova ʼe lahi ʼaupito?

• ʼE lava tuputupu feafeaʼi tatatou leleiʼia te ʼalikisia faka kolōlia ʼo Sehova?

[Paki ʼo te pasina 10]

Ko te ʼu fakapupuʼaga fetuʼu ʼi te ʼatulaulau ʼe nātou fakamoʼoni ki te tauʼoluga ʼo Sehova

[Haʼuʼaga ʼo te paki]

Courtesy of Anglo-Australian Observatory, photograph by David Malin

[Paki ʼo te pasina 12]

Neʼe hā feafeaʼi te tauʼoluga ʼo Sehova ʼo ʼuhiga mo Sesu Kilisito?

[Paki ʼo te pasina 13]

ʼI te temi ʼaē neʼe foaki ai te Lao ki te kau Iselaele ʼi te Moʼuga ʼo Sinai, neʼe nātou maʼu te fakamoʼoni ʼo te ʼalikisia faka kolōlia ʼo Sehova