Ko Sehova, Totatou ‘Tule Mālohi ʼi Te Temi Mamahi’
“Ko te hāofaki ʼo te kau faitotonu ʼe haʼu mai ia Sehova, ʼe ko ia tonatou tule mālohi ʼi te temi mamahi.”—Pesalemo 37:39.
1, 2. (a) Koteā te meʼa neʼe kole e Sesu maʼa tana kau tisipulo? (b) Koteā te finegalo ʼo te ʼAtua ʼo ʼuhiga mo tana hahaʼi ʼi te kele?
KO SEHOVA ʼe māfimāfi. ʼE ina maʼu te mālohi moʼo puipui tana kau atolasio agatonu ʼi te ʼu ʼaluʼaga kehekehe. ʼE feala pe hana fakamavae kehe tana hahaʼi mai te malamanei, pea mo ina tuku nātou ki he koga meʼa ʼe mole nātou tuʼutāmaki ai anai pea mo maʼuli tokalelei ai. Neʼe fakamoʼoni ia Sesu ʼe lava hoko te hāofaki faka milakulo ʼaia. ʼO ʼuhiga mo tana kau tisipulo, neʼe faikole fēnei ia Sesu ki tana Tāmai ʼaē ʼe ʼi selo: “ ʼE mole ʼau kole atu kia te koe ke ke toʼo kehe ia nātou ʼi te malamanei, kae ke ke leʼoleʼo kia nātou ʼuhi ko ia ʼaē ʼe agakovi.”—Soane 17:15, MN.
2 Neʼe mole fakatuʼutuʼu ia Sehova ke ina toʼo keheʼi tatou “mai te malama-nei.” Kailoa ia, heʼe ko tona finegalo ke tou maʼuʼuli ʼi te lotolotoiga ʼo te hahaʼi fuli ʼo te malamanei ke feala ai hatatou fakahā kia nātou ia te logo ʼo ʼuhiga mo te ʼamanaki pea mo foaki he fakafimālie ki te hahaʼi. (Loma 10:13-15) Kae ohage ko tona ʼui e Sesu ʼi tana faikole, ʼe tou felāveʼi mo “ia ʼaē ʼe agakovi” ʼi tatatou maʼuʼuli ʼi te mālama ʼaenī. Ko te hahaʼi talagataʼa pea mo te ʼu laumālie agakovi, ʼe nātou fai anai he ʼu meʼa ke tou mamahi pea mo loto hoha ai, koia ʼe mole heʼeki hāo te kau Kilisitiano mai te ʼu mamahi.—1 Petelo 5:9.
3. Māʼiape la mo te kau atolasio agatonu ʼa Sehova, koteā ʼaē ʼe hoko kia nātou, pea koteā te fakafimālie ʼe tou maʼu ʼi te Folafola ʼa te ʼAtua?
3 Ka hoko he ʼu ʼahiʼahiʼi feiā, pea ʼe fakatupu lotovaivai. (Tāʼaga Lea 24:10) ʼE lahi te ʼu fakamatala ʼi te Tohi-Tapu ʼo ʼuhiga mo te kau agatonu neʼe nātou tau mo te ʼu mamahi. ʼE ʼui e te tagata fai pesalemo: “ ʼE lahi te ʼu malaʼia ʼo te tagata agatonu, kae ʼe hāofaki e Sehova ia ia mai te ʼu malaʼia fuli ʼaia.” (Pesalemo 34:19) Ei, māʼiape la mo “te tagata agatonu” ʼe hoko ki ai te ʼu tuʼutāmaki. Ohage ko te tagata fai pesalemo ko Tavite, ʼi ʼihi temi ʼe tou “vaivai pea mo . . . taʼomia ʼaupito.” (Pesalemo 38:8) Kae ʼe tou loto fīmālie ʼi tatatou ʼiloʼi ʼaē ko “Sehova ʼe ōvi kia nātou ʼe lavea tonatou loto pea ʼe ina hāofaki ia nātou ʼe mamahi tonatou ʼatamai.”—Pesalemo 34:18; 94:19.
4, 5. (a) Ohage ko tona ʼui ia Tāʼaga Lea 18:10, koteā te meʼa ʼe tonu ke tou fai ke tou mau ai te puipui ʼa te ʼAtua? (b) Koteā te ʼu fakatuʼutuʼu ʼe feala ke tou maʼu ai te tokoni ʼa te ʼAtua?
4 ʼE ʼui e te faikole ʼa Sesu, ko Sehova ʼe tokaga kia tatou. ʼE ko ia ko totatou “tule mālohi ʼi te temi mamahi.” (Pesalemo 37:39) ʼE fakaʼaogaʼi e te ʼu Tāʼaga Lea te kupuʼi palalau feiā ʼo ina ʼui fēnei: “Ko te huafa ʼo Sehova ʼe ko he tule mālohi. ʼE lele kiai te tagata agatonu pea ʼe hāofaki.” (Tāʼaga Lea 18:10) ʼE fakahā e te vaega ʼaia te tokaga moʼoni ʼa Sehova ki tana ʼu meʼa ʼaē neʼe ina fakatupu. ʼE puipui tāfito e te ʼAtua te hahaʼi agatonu ʼaē ʼe nātou kumi moʼoni ia ia, ohage pe ʼe nātou feleleʼi ki he tule mālohi ke nātou fenonoʼi ai.
5 Ka tou tau mo ni ʼu fihifihia faigataʼa, ʼe tou lava feleleʼi feafeaʼi kia Sehova ke ina puipui tatou? Tou vakaʼi te ʼu fakatuʼutuʼu e tolu ʼe tou lava maʼu ai te tokoni ʼa Sehova. ʼUluaki, ʼe tonu ke tou faikole ki tatatou Tāmai ʼaē ʼe ʼi selo. Lua, ʼe tonu ke tou mulimuli ki te takitaki ʼo tona laumālie maʼoniʼoni. Pea tolu, ke tou fakalogo ki te fakatuʼutuʼu ʼaē neʼe fai e Sehova ke tou fakatahi mo totatou ʼu tēhina Kilisitiano heʼe ko he faʼahi ʼe feala ai ke tokoni mai kia tatou ke tou ʼutakiʼi totatou ʼu mamahi.
Te Mālohi ʼo Te Faikole
6. Koteā te manatu ʼa te kau Kilisitiano moʼoni ʼo ʼuhiga mo te faikole?
6 ʼE ʼui e ʼihi tōketā, ʼe lelei te faikole ʼi te ʼu temi ʼaē ʼe tou lotomamahi ai pea mo lotohoha. ʼE tou logo fīmālie mokā tou faikole ʼi he temi ʼe mole logoaʼa, ʼo feiā mokā kita logo ki te agiagi māmālie ʼa te matagi pea mo te tagi ʼa te ʼu manulele, pea mokā lomilomi tokita tuʼa. ʼE mole faka ʼuhigaʼi pe e te kau Kilisitiano moʼoni te faikole ohage ko he faitoʼo ke kita maʼu ai he fīmālie, kae maʼa nātou ʼe ko he meʼa ʼe maʼuhiga ʼaupito ki tonatou maʼuli. ʼE tou faka ʼuhiga ia te faikole ʼe ko he felogoi fakaʼapaʼapa mo te Tupuʼaga. ʼE pipiki te faikole ki tatatou tauhi pea mo tatatou falala ki te ʼAtua. Ei, ʼe kau te faikole ki tatatou tauhi.
7. Koteā te faka ʼuhiga ʼo te faikole ʼaki he loto falala, pea ʼe tokoni feafeaʼi mai te ʼu taʼi faikole ʼaia mokā tou tau mo he ʼu mamahi?
7 Ka tou faikole ʼe tonu ke tou falala kia Sehova. Neʼe ʼui fēnei e te ʼapositolo ko Soane: “Ko te falala aeni e tou mau ia te ia: kapau e tou kole he mea o fai ki tona finegalo, e ina fakalogo tatou.” (1 Soane 5:14) Ko Sehova, te Māʼoluga, te ʼAtua moʼoni e tahi pea mo māfimāfi, ʼe fakalogo tāfito ki te ʼu faikole fakamalotoloto ʼaē ʼe fai age e tana kau atolasio. ʼE ko he milakulo! ʼE ʼui e te tikisionalio ko te “milakulo” ʼe ko “he gāue fakatalakitupua ʼe fakahoko e te ʼAtua maʼa te tagata.” ʼE fai e Sehova ʼAtua te taʼi milakulo ʼaia ʼi te ʼu temi fuli ʼaē ʼe fagono ai ki tatatou ʼu faikole. ʼE tou loto fīmālie ʼi tatatou ʼiloʼi ʼe fakalogo mai totatou ʼAtua ʼofa mokā ʼe tou fakahā age tatatou tuʼania pea mo totatou ʼu fihifihia.—Filipe 4:6.
8. He koʼe ʼe mole tonu ki te kau Kilisitiano ke nātou umiuminoa, peʼe nātou manatu ʼe mole tāu mo nātou mokā nātou fakaōvi kia Sehova?
8 ʼE mole tonu ki te kau Kilisitiano agatonu ke nātou umiuminoa, peʼe nātou manatu ʼe mole tāu mo nātou, peʼe nātou heʼe falala mokā nātou fakaōvi kia Sehova ʼi te faikole. ʼE mahino ia, ʼe lagi mole tou fia fakaōvi kia Sehova ʼi te faikole mokā ʼe tou lotomamahi peʼe tou taʼomia ʼi ni ʼu fihifihia. ʼI te ʼu taʼi lakaga ʼaia ʼe tonu ke tou manatuʼi ko Sehova “ ʼe manavaʼofa kia nātou ʼe mafasia” pea “ ʼe ina fakafimālie te hahaʼi lotovaivai.” (Isaia 49:13; 2 Kolonito 7:6, MN ) ʼE tonu ke tou falala tāfito ko tatatou Tāmai ʼe ʼi selo ʼe ko totatou tule mālohi ʼi te ʼu temi ʼaē ʼe tou tuʼania ai pea mo mamahi ai.
9. Koteā te gāue ʼa te tui mokā tou fakaōvi ki te ʼAtua ʼi te faikole?
9 ʼE tonu ke tou maʼu te tui moʼoni mo kapau ʼe tou fia maʼu katoa te pilivilesio ʼo te faikole. ʼE ʼui e te Tohi-Tapu ko “ae e laka ki te Atua, e maua ke tui, e mauli pea e ina fakapale natou e natou kumi iaʼia.” (Hepeleo 11:6) Ko te tui ʼe mole gata ʼaki pe takita fakamoʼoni ko te ʼAtua ʼe maʼuli. Ko te tui moʼoni ʼe pipiki ki he tui mālohi ki te fealagia ʼa te ʼAtua ke ina fakapale tatatou fakalogo ʼaē kia te ia. “ ʼE sio te ʼu mata ʼo Sehova ki te hahaʼi agatonu, pea ʼe fagono tona ʼu taliga ki tanatou ʼu kolekole.” (1 Petelo 3:12, MN ) Kapau ʼe tou manatuʼi tuʼumaʼu te tokaga ʼofa ʼa Sehova kia tatou, pea ʼe maʼuhiga anai kia tatou tatatou ʼu faikole.
10. Kapau ʼe tou fia maʼu te tokoni fakalaumālie mai ia Sehova, pea ʼe tonu ke feafeaʼi tatatou ʼu faikole?
10 Kapau ʼe tou faikole mo totatou loto katoa pea ʼe fakalogo Sehova ki tatatou ʼu faikole. ʼE ʼui fēnei e te tagata fai pesalemo: “Neʼe ʼau pāui mo toku loto katoa. Tali mai, Ê Sehova.” (Pesalemo 119:145) ʼE mole lau fakaʼatamai tatatou ʼu faikole peʼe malualoi ohage ko te ʼu faikole ʼa te ʼu lotu e tokolahi. Ka tou faikole kia Sehova mo totatou “loto katoa” ʼe maʼuhiga te ʼu palalau ʼaē ʼe tou fai pea ʼe ʼaoga. Ka tou fai te ʼu faikole ʼaia, ʼe tou maʼu ai anai te fīmālie heʼe tou tuku tatatou “kavega kia Sehova totonu.” Ohage ko tona fakapapauʼi mai e te Tohi-Tapu “ ʼe tokoni mai anai” kia tatou.—Pesalemo 55:22; 1 Petelo 5:6, 7.
ʼE Tokoni Mai Te Laumālie ʼo Te ʼAtua
11. ʼE tali feafeaʼi mai e Sehova mokā tou “haga kole” age tana tokoni?
11 ʼE mole fakalogo pe Sehova ki te ʼu faikole kae ʼe ina toe fakahoko te ʼu kole ʼaē ʼe tou fai age. (Pesalemo 65:2) ʼE ʼui fēnei e Tavite: “ ʼE ʼau pāui atu anai ʼi te ʼu ʼaho ʼo toku mamahi, heʼe ke tali mai anai.” (Pesalemo 86:7) Koia, neʼe fakaloto mālohiʼi e Sesu tana kau tisipulo ke nātou “haga kole” ke tokoni age ia Sehova koteʼuhi ko “te Tāmai ʼaē ʼi selo” ʼe ina foaki anai “te laumālie maʼoniʼoni kia nātou ʼaē ʼe nātou kole kia te ia.” (Luka 11:9-13, MN ) Ei, ko te mālohi gāue ʼo te ʼAtua ʼe tokoni pea mo ina fakafimālie tana hahaʼi.—Soane 14:16.
12. ʼE tokoni feafeaʼi mai te laumālie ʼo te ʼAtua mokā hage ʼe mata faigataʼa fau ni ʼu fihifihia?
12 Tatau aipe mo kapau ʼe tou tau mo ni ʼu fihifihia, ko te laumālie ʼo te ʼAtua ʼe ina lava foaki mai “te mālohi ʼaē ʼe fakalaka ʼi te mālohi māhani.” (2 Kolonito 4:7, MN ) Ko te ʼapositolo ko Paulo, ʼaē neʼe ina kātakiʼi te ʼu ʼaluʼaga fakatupu lotovaivai, neʼe ina ʼui fēnei ʼaki he loto falala: “E au fealagia te meafuape ia Ia ae e ina fakamalohi au.” (Filipo 4:13) ʼO feiā mo te temi nei, tokolahi te kau Kilisitiano ʼe nātou logoʼi he mālohi foʼou ʼi te faʼahi fakalaumālie pea mo te faʼahi ʼo tonatou loto mokā tali age tanatou ʼu faikole. ʼI te agamāhani, mokā kua tou maʼu te tokoni ʼa te laumālie ʼo te ʼAtua pea ʼe mole kei faigataʼa kia tatou te fakatokatoka ʼo te ʼu fihifihia ʼaē neʼe hage ʼe mata faigataʼa fau. Koteʼuhi ʼaki te mālohi ʼo te ʼAtua, ʼe feala ke tou ʼui ohage ko te ʼapositolo: “I tomatou fetaotaomi maia faahi fuli, e mole laliki matou; i omatou faigataa e mole matou lotovaivai; i tomatou fakatagai, e mole galoi matou; i tomatou laku ki lalo, e mole matou mamate.”—2 Kolonito 4:8, 9.
13, 14. (a) ʼAki tana Folafola, neʼe liliu feafeaʼi ia Sehova ko totatou tule mālohi? (b) Neʼe tokoni feafeaʼi ki tokotou maʼuli takitokotahi ia te ʼu pelesepeto faka Tohi-Tapu?
13 Ko te laumālie maʼoniʼoni neʼe ina toe takitaki pea mo puipui te ʼu folafola ʼa te ʼAtua ke tokoni mai kia tatou. ʼAki tana Folafola neʼe liliu feafeaʼi ia Sehova ko totatou tule mālohi ʼi te ʼu temi mamahi? ʼE ina foaki mai te poto pea mo te fealagia fakakaukau. (Tāʼaga Lea 3:19-24) Ko te Tohi-Tapu ʼe ina akoʼi totatou ʼu fealagia fakakaukau pea ʼe ina hikihiki totatou mālohi fakaʼatamai. (Loma 12:1) ʼAki te lau tuʼumaʼu pea mo te ako ʼo te Folafola ʼa te ʼAtua, pea mo tou maʼuliʼi, ʼe feala ai ki totatou “ ʼu fealagia fakakaukau ke akoʼi ke nātou ʼiloʼi te meʼa ʼaē ʼe lelei pea mo te meʼa ʼaē ʼe kovi.” (Hepeleo 5:14, MN ) ʼE lagi kua koutou sio ki te ʼaoga ʼo te ʼu pelesepeto faka Tohi-Tapu ʼi te ʼu tonu fakapotopoto ʼaē neʼe koutou fai ʼi te ʼu temi neʼe koutou tau ai mo te ʼu faigataʼaʼia. ʼE foaki mai e te Tohi-Tapu te poto moʼo fakatokatoka te ʼu fihifihia faigataʼa.—Tāʼaga Lea 1:4.
14 ʼE toe foaki mai e te Folafola ʼa te ʼAtua te tahi tokoni fakaloto mālohi—te ʼamanaki ki te maʼuli. (Loma 15:4) ʼE ʼui mai e te Tohi-Tapu ko te ʼu meʼa kovi ʼe faka temi pe ia. ʼE faka temi te ʼu mamahi ʼaē ʼe tau mo tatou. (2 Kolonito 4:16-18) ʼE tou maʼu te “falala ki te mauli heegata nee fakapapau ki ai te Atua iaʼia e mole lohi i mua o te u temi heegata.” (Tito 1:2) Kapau ʼe tou fakafiafia ʼi te falala ʼaia, pea ʼe feala ke tou kātakiʼi te ʼu fakataga heʼe tou manatuʼi tuʼumaʼu te ka haʼu taulekaleka ʼaē ʼe fakapapauʼi mai e Sehova.—Loma 12:12; 1 Tesalonika 1:3.
Te Kokelekasio Ko Te ʼOfa ʼAia ʼo Te ʼAtua
15. ʼE lava fetokoniʼaki feafeaʼi te kau Kilisitiano?
15 Ko te tahi fakatuʼutuʼu mai ia Sehova ʼe lava tokoni mai ʼi te ʼu temi mamahi, ʼe ko te fakatahi mo totatou ʼu tēhina ʼi te ʼu kokelekasio faka Kilisitiano. ʼE ʼui fēnei e te Tohi-Tapu: “Ko he kaumeʼa moʼoni ʼe ʼofa ʼi te temi fuli, pea ʼe ko he tēhina neʼe tupu mokā hoko he ʼu temi mamahi.” (Tāʼaga Lea 17:17) Ko te Folafola ʼa te ʼAtua ʼe ina fakaloto mālohiʼi ia nātou fuli ʼi te ʼu kokelekasio ke nātou fefakaʼapaʼapaʼaki pea mo feʼofaʼofani. (Loma 12:10) Neʼe ʼui fēnei e te ʼapositolo ko Paulo: “Aua naa i ai he tahi e faiga ki tona lelei, kae ki te lelei o tona kaiga.” (1 Kolonito 10:24) Ka tou maʼu te manatu ʼaia, pea ʼe tokoni mai kia tatou ke tou fakamuʼamuʼa tuʼumaʼu te ʼu meʼa ʼaē ʼe ʼaoga ki ʼihi. Ka tou tokoni ki niʼihi, ʼe tou toe fiafia ai pea ʼe mata maʼamaʼa leva kia tatou tatatou ʼu kavega.—Gaue 20:35.
16. ʼE lava liliu feafeaʼi he Kilisitiano ko he tahi ʼe ina fakaloto mālohiʼi niʼihi?
16 Ko nātou ʼaē kua fotufotuʼa ʼi te faʼahi fakalaumālie, ʼe feala ke nātou lagolago tāfito ki te fakaloto mālohiʼi ʼo te hahaʼi. Moʼo fakahoko te faʼahi ʼaia, ʼe nātou faka faigamālie ia nātou pea mo fakaʼaogaʼi tonatou temi maʼa ʼihi. (2 Kolonito 6:11-13) ʼE tapuakina moʼoni te kokelekasio mo kapau ko nātou fuli ʼo te kokelekasio ʼe nātou vikiʼi te kau tūpulaga, ʼe nātou lagolago ki te ʼu tēhina mo tuagaʼane foʼou, pea mo fakaloto mālohiʼi ia nātou ʼe lotovaivai. (Loma 15:7) Ko te ʼofa fale tautēhina ʼe toe tokoni kia tatou ke mole tou feloto mahalohaloʼaki. ʼAua naʼa tou foimo manatu aipe, ko totatou ʼu fihifihia takitokotahi ʼe ko he fakaʼiloga ʼaia ʼo tatatou vaivai fakalaumālie. ʼE fakaloto mālohiʼi e Paulo te kau Kilisitiano ke nātou “fai he ʼu palalau fakafimālie ki te kau nefesi lotovaivai.” (1 Tesalonika 5:14, MN ) ʼE fakahā e te Tohi-Tapu māʼiape la mo te kau Kilisitiano agatonu ʼe nātou tau mo te ʼu mamahi.—Gaue 14:15.
17. Koteā te ʼu faigamālie ʼe tou maʼu moʼo fakaloto mālohiʼi te ʼu noʼo ʼo te fale tautēhina?
17 Ko te ʼu fono faka Kilisitiano ʼe ko he faigamālie lelei ʼaia kia tatou ke tou fefakaloto fīmālieʼaki pea mo fefakaloto mālohiʼaki. (Hepeleo 10:24, 25) ʼAua naʼa faka tuʼakoi pe te fakahā ʼo totatou ʼofa ʼaia ʼi te ʼu fono ʼo te kokelekasio. Kae ko te hahaʼi ʼa te ʼAtua ʼe nātou toe faiga foki ke nātou maʼu ni ʼu faigamālie moʼo fakatahi mo tonatou ʼu tēhina mo tuagaʼane. Ka hoko he ʼu ʼaluʼaga faigataʼa, pea ʼe tou foimo fetokoniʼaki anai he neʼe kua tou kamata faʼufaʼu fakatahi te ʼu noʼo mālohi faka kaumeʼa. Neʼe ʼui e te ʼapositolo ko Paulo: “Ke ʼaua naʼa i ai he mavetevete ʼi te sino, kae . . . ʼe tonu ki te ʼu kogaʼi sino ke . . . fetokagaʼaki. Kapau ʼe ʼi ai he kogaʼi sino ʼe mamahi, mo te tahi ʼu kogaʼi sino ʼe mamahi mo ia; peʼe faka kolōlia he koga, ko te ʼu koga fuli ʼaē ʼe nātou fakafiafia mo ia.”—1 Kolonito 12:25, 26, MN.
18. Koteā te meʼa ʼe tonu anai ke tou tekeʼi mokā ʼe mamahi totatou loto?
18 ʼI ʼihi temi, ʼe mole tou fia fakatahi anai mo ʼotatou ʼu tēhina Kilisitiano heʼe tou logoʼi ʼe tou mamahi fau. ʼE tonu ke tou tauʼi te ʼu taʼi manatu ʼaia naʼa mole tou maʼu anai te fakaloto fīmālie pea mo te tokoni ʼaē ʼe feala ke tou maʼu mai ʼotatou ʼu tēhina mo tuagaʼane. ʼE fakatokaga fēnei e te Tohi-Tapu: “Ko ia ʼaē ʼe nofo tokotahi ʼe ina kumi pe anai tona lelei ʼo ia totonu, pea ʼe fakafeagai anai ki te ʼu tonu fakapotopoto.” (Tāʼaga Lea 18:1) ʼE fakahā mai e te ʼAtua tona ʼofa kia tatou ʼaki totatou ʼu tēhina mo tuagaʼane. Kapau ʼe tou fakamoʼoni ki te fakatuʼutuʼu ʼofa ʼaia, pea ʼe tou loto fīmālie anai ʼi te ʼu temi mamahi.
Tou Taupau He Manatu ʼe Lelei
19, 20. ʼE tokoni feafeaʼi mai te Tohi-Tapu ke tou tekeʼi te ʼu manatu ʼaē ʼe mole lelei?
19 Ka hoko mai te lotovaivai pea mo te lotomamahi, ʼe faigafua takita maʼu te ʼu manatu ʼe mole lelei. Ohage la, ʼe feala ki ʼihi mokā nātou tau mo ni ʼu fakataga ke nātou lotolotolua ʼo ʼuhiga mo tonatou maʼuli fakalaumālie, ʼo nātou manatu ko tonatou ʼu faigataʼaʼia ʼe ko he fakaʼiloga ʼaia ʼe mole kei ʼofa te ʼAtua kia nātou. Kae koutou manatuʼi, ko Sehova ʼe mole ina ʼahiʼahiʼi he tahi ʼaki te “kovi.” (Sakopo 1:13) ʼE ʼui e te Tohi-Tapu: “[Ko te ʼAtua] ʼe mole fiafia tona loto ʼi te mamahi peʼe ina fakamamahiʼi te ʼu foha ʼo te tagata.” (Tagilāulau 3:33) Kailoa, ʼe lotomamahi ʼaupito ia Sehova mokā ʼe mamahi tana ʼu kaugana.—Isaia 63:8, 9; Sakalia 2:8.
20 Ko Sehova ʼe ko “te Tāmai ʼo te manavaʼofa pea ko te ʼAtua ʼo te ʼu fakaloto fīmālie fuli.” (2 Kolonito 1:3, MN ) ʼE tokaga kia tatou, pea ʼe ina hikihiki tatou ʼi tona temi totonu. (1 Petelo 5:6, 7) Kapau ʼe tou manatuʼi tuʼumaʼu te ʼofa ʼo te ʼAtua kia tatou, pea ʼe feala anai ke tou taupau he manatu ʼe lelei, pea ke tou fiafia. Neʼe ʼui e Sakopo: “Koutou lau ki te fiafia fuape, oku tehina, moka koutou to kia faahiga ahiahi kehekehe.” (Sakopo 1:2) Koteā tona tupuʼaga? ʼE ina tali fēnei: “Manuia te tagata e ina katakiʼi te ahiahi! Koteuhi, i te hili o tona ahiahiʼi, e ina tali anai te kolona o te mauli nee fakapapau e te Aliki kia natou e oʼofa ia te ia.”—Sakopo 1:12.
21. ʼO ʼuhiga mo te ʼu fihifihia ʼaē ʼe tau mo tatou, koteā te fakapapau ʼe foaki e te ʼAtua kia nātou fuli ʼe nātou nofo agatonu kia te ia?
21 Neʼe fakatokagaʼi tatou e Sesu, ʼi te malamanei ʼe fakatagaʼi anai tatou. (Soane 16:33) Kae ʼe fakapapau mai ia te Tohi-Tapu ʼe mole “he mamahi, peʼe ko he tuʼania, pe ko he fakataga, peʼe ko he hoge, peʼe ko he masiva, peʼe ko he tuʼutāmaki” ʼe ina fakamavae anai tatou mai te ʼofa ʼo Sehova pea mo te ʼofa ʼo tona ʼAlo. (Loma 8:35, 39, MN ) ʼE tou loto fīmālie ʼi tatatou ʼiloʼi ʼaē ʼe faka temi te ʼu mamahi ʼaē ʼe tau mo tatou ʼi te temi nei. Kae ʼi muʼa ʼo te hoko mai ʼo te fakaʼosi ʼo te mamahi ʼo te tagata, ʼe tokaga tatatou Tāmai ʼofa ko Sehova kia tatou. Kapau ʼe tou lele ʼo kumi puipui ki ai, ʼe ina foaki mai anai “he nonoʼaga māʼoluga ki ʼaē ʼe taʼomia, he nonoʼaga māʼoluga ʼi te ʼu temi mamahi.”—Pesalemo 9:9.
Koteā ʼAē Neʼe Tou Ako?
• Koteā te ʼamanaki ʼaē ʼe tonu ke taupau e te kau Kilisitiano logola ʼe nātou maʼuli ʼi te mālama agakovi ʼaenī?
• ʼE tokoni feafeaʼi mai tatatou ʼu faikole ke tou lotomālohi mokā tou tau mo ni ʼu fakataga?
• ʼE tokoni feafeaʼi mai te laumālie ʼo te ʼAtua?
• ʼE tou lava fetokoniʼaki feafeaʼi?
[Paki ʼo te pasina 18]
ʼE tou kumi ia Sehova ohage ko hatatou lele ki he tule mālohi
[Paki ʼo te pasina 20]
Ko te hahaʼi ʼaē kua fakapotopoto ʼe nātou fakaʼaogaʼi te ʼu faigamālie fuli moʼo vikiʼi pea mo fakaloto mālohi ʼihi