Tou Nonofo ʼAʼala ʼi Te “Temi Fakaʼosi”
“Koutou haga lama, koutou nonofo ʼaʼala, heʼe mole koutou ʼiloʼi pe ʼe ko ʼafea ia te temi ʼaē kua faka katofa.” — Maleko 13:33.
1. ʼI te lolotoga hoko nei ʼo te ʼu meʼa fakaofoofo ʼi te “temi fakaʼosi” ʼaenī, ʼe tonu koa ke tou aga feafeaʼi?
ʼI TE kua lolotoga hoko ʼo te ʼu meʼa fakaofoofo “ ʼi te temi fakaʼosi” ʼaenī, ʼe feafeaʼi anai koa he aga ʼa te kau kilisitiano (Taniela 12:4)? ʼE mole tuku nātou ʼi te mahalohalo. Neʼe fai e Sesu te lea faka polofeta ʼo ʼuhiga mo te ʼu faʼahiga koga kehekehe ʼo te fakaʼiloga ʼaē ʼe lolotoga hoko nei ʼi te 20 sekulo. Neʼe talanoa ki te ʼu faʼahiga agaaga kehekehe ʼaē ʼe nātou fakamakeheʼi ia te temi ʼaē neʼe kamata mai ʼi te taʼu 1914. ʼI te ʼiloʼi ʼaē e Sesu te lea faka polofeta ʼa Taniela ʼo ʼuhiga mo te “temi fakaʼosi”, neʼe ina fakaʼosi tana lea faka polofeta lahi ʼaki he fakaloto mālohiʼi ʼo tana kau tisipulo “ke nonofo ʼaʼala”. — Luka 21:36.
2. He koʼe ʼe maʼuhiga ʼaupito ke tou nonofo ʼaʼala fakalaumālie?
2 He koʼe koa ʼe tonu ke tou nonofo ʼaʼala? Heʼe ko totatou temi ʼe faigataʼa ʼaupito age ia ʼi te ʼu temi fuli. Ko te kau kilisitiano ʼaē ʼe to ki te tulemoe fakalaumālie ʼi te temi nei, ʼe nātou tuʼutāmaki anai. Kapau ʼe tou leleiʼia pe ia tatou totonu pe ʼe tou tuku totatou loto ke mamafa ʼi te ʼu tuʼania ʼo te maʼuli, pea ʼe tou tuʼutāmaki anai. Ia Luka 21:34, 35, ʼe fakatokaga mai ia Sesu Kilisito kia tatou, ʼo fēnei: “Ke koutou tokaga kia koutou totonu, talia naʼa mamafa ʼo kotou loto ʼi te lahi fau ʼo te kai, ʼi te lahi fau ʼo te ʼinu pea mo te ʼu tuʼania ʼo te maʼuli, pea mo fokifā pe te ʼaho ʼaia kua ia koutou fakavilivili, ohage ko he hele. Heʼe haʼu anai kia nātou fuli ʼaē ʼe nonofo ʼi te kele.”
3, 4. a) Koteā te faka ʼuhiga ʼo te ʼui ʼaē ʼa Sesu ko te ʼaho ʼo te hāūhāū lahi ʼo te ʼAtua ʼe haʼu fakavilivili anai ki te hahaʼi ohage “ko he hele”? b) Kapau mole ko te ʼAtua ʼaē ʼe ina gaohi te hele, he koʼe koa ko te ʼaho ʼaia ʼe fakapuna’maʼuli anai ki te hahaʼi ʼo te kele?
3 Neʼe ʼui e Sesu, ‘fokifā pe te ʼaho ʼaia kua ia tatou fakavilivili, ohage ko he hele’. Ko he hele ʼe teuteuʼi ʼaki te noʼo, pea ʼe fakaʼaoga ia moʼo puke he ʼu manu lele pea mo he ʼu manu. Ko te hele ʼe haʼele mokā tuʼu tota vaʼe ki ai. ʼE māpunu ai leva te hele, pea puke ai te meʼa ʼaē neʼe haʼele ai. Ko te meʼa ʼaia ʼe hoko fakafokifā. Ohage pe ko te ʼui ʼaē ʼa Sesu, ko nātou ʼaē ʼe mole ʼaʼala fakalaumālie ʼe nātou puna’maʼuli anai ʼi te “ ʼaho ʼo te hāūhāū lahi” ʼo Sehova. — Tāʼaga Lea 11:4.
4 Ko Sehova ʼAtua koa ʼaē ʼe ina gaohi te hele ʼaia ki te hahaʼi? Kailoa ia, ʼe mole nofo ia ʼo lama te mole kei tokakaga ʼa te hahaʼi ke ina faka ʼauha ia nātou. Kae, ko te ʼaho ʼaia ʼe fakapuna’maʼuli anai ki te hahaʼi ʼo te kele, heʼe ko te Puleʼaga ʼo te ʼAtua ʼe mole ko he meʼa tāfito ʼi te ʼu meʼa ʼaē ʼe nātou tokakaga ki ai. ʼE nātou maʼuʼuli faʼitaliha, mole nātou tokagaʼi pe la te faka ʼuhiga ʼo te ʼu meʼa ʼaē ʼe hoko ʼi ʼonatou tafa. Kae, ko te meʼa ʼaia ʼe mole ina fetogi ia te fakatuʼutuʼu ʼa te ʼAtua. Kua ina faka katofa tona hola moʼo fakatokatoka ʼo te ʼu meʼa fuli ʼaia. Pea ʼi tona manavaʼofa, ʼe mole ina tuku te tagata ʼi te fakapōʼuli ʼo ʼuhiga mo tana fakamāu ʼaē ka haʼu. — Maleko 13:10.
5, 6. a) ʼO ʼuhiga mo te fakamāu ʼaē ka hoko mai, koteā te fakatuʼutuʼu ʼofa neʼe fai e te Tupuʼaga ʼo ʼuhiga mo te tagata, kae koteā tona fua? b) Koteā ʼaē ka tou fakasiosio ki ai moʼo tokoni mai ke tou nonofo ʼaʼala?
5 Ko te fakatokaga ʼaia ʼe ko he fakatuʼutuʼu ʼofa ia ʼo totatou ʼAtua Lahi, ʼaē ʼe tokaga ki te fīmālie ʼo tana ʼu meʼa fakatupu ʼaē ʼi te kele, ia te tagata, ʼi tona tuʼulaga vaʼe fakatātā (Isaia 66:1). ʼE ʼofa mamahi ki te hahaʼi ʼaē ʼe nonofo ʼi te koga meʼa ʼaē ʼe hili ki ai ʼona vaʼe, ohage ko tona ʼui ʼaē e te Tohi-Tapu. Koia, ʼaki tana kau fakafofoga pea mo tana kau faifekau fakakelekele ʼe ina fakatokagaʼi ia nātou ʼo ʼuhiga mo te ʼu meʼa makehe ka hoko anai kia nātou (2 Kolonito 5:20). Kae, Logope te ʼu fakatokaga fuli ʼaē neʼe kua fai, ko te ʼu meʼa ʼaia ʼe hoko mai anai ki te famili fakatagata ʼo fakafokifā, ohage pe neʼe to ki he hele. Koteā tona tupuʼaga? Heʼe tokolahi te hahaʼi ʼe nātou momoe ʼi te faʼahi fakalaumālie (1 Tesalonika 5:6). ʼE toko siʼi pe ia nātou ʼaē ʼe tokakaga ki te fakatokaga ʼaia pea ʼe nātou hu maʼuʼuli anai ki te mālama foʼou ʼa te ʼAtua. — Mateo 7:13, 14.
6 Koia, ʼe feafeaʼi koa hatatou nonofo ʼaʼala ʼi te temi fakaʼosi ʼaenī ke feala hatatou kau ia nātou ʼaē ka hāo anai? ʼE foaki mai e Sehova te tokoni ʼaē ʼe ʼaoga. Tou fakamaʼumaʼu ia meʼa e fitu ʼe feala ke tou fai.
Tou faiga ke ʼaua naʼa fakaleluʼi ia tatou
7. Koteā te ʼu palalau ʼaē neʼe fakatokaga ʼaki mai e Sesu ke ʼaua naʼa tou tuku ke fakaleluʼi tatou?
7 ʼUluaki ʼe tonu ke tou faiga ke ʼaua naʼa fakaleluʼi ia tatou. Ia Mateo 24:42, 44, neʼe ʼui fēnei e Sesu: “Koutou nonofo tokaga, heʼe mole koutou ʼiloʼi pe ko te ʼaho fea ʼaē ʼe haʼu ai tokotou ʼAliki. Koia mo koutou foki ke koutou tokalelei, heʼe ko te hola ʼe mole koutou manatu anai ki ai ʼaē ka haʼu ai te Foha ʼo te tagata.” Ko te talanoa ʼaenī ʼa Sesu ʼe ʼiloga mai ai te faigataʼa ʼo te temi ʼaenī, pea mo te lahi ʼaupito ʼo te ʼu meʼa ʼe fakatupu lelu, pea ʼe feala foki ke taki e te fakalelu ki te ʼauha. ʼI te temi ʼo Noe, neʼe lahi ʼaupito te ʼu meʼa ʼe tokaga ki ai te hahaʼi. Koteā tona fua, ko te hahaʼi ʼaia neʼe nātou tuku ia nātou ke fakaleluʼi, “neʼe mole nātou tokagaʼi he meʼa”, neʼe mole nātou tokagaʼi te meʼa ʼaē ʼe hoko, pea ʼave fuli ia nātou e te tulivio. Ko te tupuʼaga ʼaia ʼo te fakatokaga fēnei e Sesu: “ ʼE toe feiā pe anai mo te ʼafio ʼo te Foha ʼo te tagata.” — Mateo 24:37-39.
8, 9. a) ʼE feafeaʼi hatatou tuku te ʼu meʼa māhani ʼo te maʼuli ke nātou fakaleluʼi tatou? b) Koteā te ʼu fakatokaga ʼaē neʼe tuku mai kia tatou e Paulo pea mo Sesu?
8 ʼAua naʼa galo ia tatou ko tana fakatokaga ʼaē ia Luka 21:34, 35, ʼe talanoa ai Sesu ʼo ʼuhiga mo te ʼu meʼa māhani ʼo te maʼuli, ohage ko te meʼa kai, te meʼa ʼinu, pea mo te ʼu tuʼania ʼaē ʼe kau ki te kumi ʼo te maʼuli. Ko te ʼu meʼa fuli ʼaia ʼe tau mo te tagata fuli, ohage pe la ko te kau tisipulo ʼa te ʼAliki ko Sesu (Vakaʼi Maleko 6:31). Ko te ʼu meʼa ʼaia ʼe mole kovi, kae kapau ʼe mole tou nonofo tokaga, ʼe feala pe ke nātou fakaleluʼi tatou ʼi totatou ala, ke tou maʼumaʼua pea mo fakatupu ʼaki ai ia tatou he tulemoe fakalaumālie ʼe fakatupu tuʼutāmaki .
9 Koia, ʼaua naʼa tou meʼa noaʼi te meʼa ʼaē ʼe maʼuhiga ʼaupito: ke leleiʼia tatou e te ʼAtua. ʼAua naʼa tou tokaga fau ki te ʼu meʼa māhani ʼo te maʼuli, kae ke tou fakaʼaoga fakafeauga pe te ʼu meʼa ʼaia ki totatou maʼuli (Filipe 3:8). ʼE mole tonu leva ke maʼuhiga age te ʼu meʼa ʼaia ʼi te ʼu meʼa tāfito ʼo te Puleʼaga. Ohage ko tona ʼui ʼaē ia Loma 14:17: “Ko te faka ʼuhiga ʼo te puleʼaga ʼo te ʼAtua ʼe mole ko te kai pea mo te ʼinu, kaʼe ko tona faka ʼuhiga ko te faitotonu, te tokalelei pea mo te fiafia ʼaki te laumālie maʼoniʼoni.” Tou manatuʼi te ʼu palalau ʼaenī ʼa Sesu: “Koutou haga kumi muʼa te puleʼaga pea mo Tona faitotonu, pea ʼe toe foaki atu anai mo te ʼu meʼa fuli ʼaia kia koutou.” (Mateo 6:33). Pea tahi foki, ia Luka 9:62, neʼe ʼui fēnei e Sesu: “Ko ʼaē kua fa tona nima ki te saliote pea toe sio ia ki te ʼu meʼa ʼaē kua ʼi muli ʼe mole ʼaoga ia ki te puleʼaga ʼo te ʼAtua.”
10. Koteā te tuʼutāmaki ʼe feala ke hoko, mo kapau ʼe mole tou sisio maʼu ki muʼa ki te ikuʼaga?
10 Kapau kua kita kamata gāueʼi te kele, ko he talanoa fakatātā ia, ʼe tonu ke tou muliʼi he laini totonu. Kaʼe kapau ʼe sio ki muli te tagata gāue ʼo te kele, pea ʼe mole totonu anai tana laini. ʼE tokaga kehe ia, pea ʼe faigafua pe tana ōfe kehe pe ʼe tūkia ʼi he meʼa. ʼAua naʼa tou hage ko te ʼohoana ʼo Lote, ʼaē neʼe sio ki muli pea neʼe tuʼutāmaki ai. ʼE tonu ke tou sisio maʼu ki muʼa ki te ikuʼaga. Ke lava te meʼa ʼaia, ʼe tonu ke tou faiga ke ʼaua naʼa fakaleluʼi tatou. — Senesi 19:17, 26; Luka 17:32.
Tou faikole fakamalotoloto
11. ʼI te ʼosi fakatokaga mai ʼaē e Sesu ia tatou ʼo ʼuhiga mo te tuʼutāmaki ʼaē ʼo te fakalelu, koteā te tahi meʼa neʼe ina fakatokagaʼi fakamālohi mai?
11 ʼE ʼi ai foki te tahi age meʼa maʼuhiga ʼe tonu ke tou fai. Ko te tahi tokoni maʼuhiga kia tatou ko te faikole fakamalotoloto. ʼI tana ʼosi fakatokaga mai kia tatou ke ʼaua naʼa tuku ke fakaleluʼi tatou e te ʼu meʼa māhani ʼo te maʼuli, neʼe tuku mai e Sesu te tokoni ʼaenī: “Koutou nonofo ʼaʼala pea mo kole mamahi ʼi te temi fuli pe, ke feala ai ha kotou hāo mai te ʼu meʼa fuli ʼaē ʼe tonu ke hoko mai, pea mo koutou tutuʼu ia muʼa ʼo te Foha ʼo te tagata.” — Luka 21:36.
12. Ko te faʼahi faikole fea ʼaē ʼe ʼaoga, pea koteā tona fua?
12 ʼIo, ʼe tonu ke tou faikole tuʼumaʼu ʼo ʼuhiga mo te tuʼutāmaki ʼo totatou ʼaluʼaga pea mo te nofo tokaga ʼaē ʼe ʼaoga kia tatou. Koia ʼe tonu ke tou haga ki te ʼAtua ʼi te kole fakamalotoloto. ʼE ʼui e Paulo ia Loma 12:12: “Koutou kātaki ʼi te faikole.” Pea ia Efesi 6:18, ʼe tou lau fēnei: “ ʼAki he ʼu faʼahiga faikole pea mo he ʼu kole fakamalotoloto (...) koutou faikole ʼi te temi fuli pe, ʼi te laumālie. Pea ki te meʼa ʼaia, koutou nonofo ʼaʼala ʼaki he faʼa kātaki katoa.” ʼE mole ko he faikole ohage ko he meʼa ʼe mole maʼuhiga, ʼo mole ʼi ai anai hona fua. Ko totatou maʼuli ʼe nofo ʼi te tuʼutāmaki. ʼE ʼaoga ke tou kole fakamalotoloto te tokoni ʼa te ʼAtua (Vakaʼi Hepeleo 5:7). ʼAki te meʼa ʼaia, ʼe tou nonofo aipe pea mo Sehova. ʼE mole ʼi ai he tahi age tokoni ʼe lelei kia tatou ʼi he ‘kole fakamalotoloto ʼi te temi fuli pe’. ʼE tuku mai anai kia tatou e Sehova ke tou maʼu he loto tokaga. Koia ʼe maʼuhiga ai ke tou faʼa kātaki ʼi te faikole!
Pipiki maʼu ki te kautahi ʼo te ʼAtua pea mo te gāue ʼaē ʼe ina fai
13. Koteā ʼaē ʼe tonu ke tou kau ki ai moʼo nonofo ʼaʼala?
13 ʼE tou fia hāo ʼi te ʼu meʼa fuli ʼaē ka hoko mai ki te malamanei. ʼE tou fia tutuʼu anai ia muʼa ʼo te Foha ʼo te tagata pea mo maʼu tona ʼofa. Ki te faʼahi ʼaia, ʼe ʼi ai te tahi meʼa ke tou fai ko te: Pipiki maʼu ki te kautahi faka teokalatike ʼa Sehova. ʼE tonu ke tou kau mo te loto katoa ki te kautahi ʼaia pea mo kau ki tana ʼu gāue. ʼE tou fakahā fakalelei aipe ko tatou ko te kau kilisitiano ʼe nonofo ʼaʼala.
14, 15. a) Koteā te gāue ʼaē ka tokoni anai kia tatou ke tou nonofo ʼaʼala? b) Ko ai koa ʼaē ʼe ina fakatotonu te temi tuʼakoi ʼo te gāue faka mafola, pea ʼe tonu ke tou sisio feafeaʼi ki te gāue ʼaia? c) ʼI te ʼosi anai ʼo te mamahi lahi, koteā anai te meʼa ka tou tokagaʼi mokā ʼe tou manatu anai ki te gāue faka mafola ʼo te Puleʼaga ʼaē anai kua fakahoko?
14 Ko te fā leva ʼo te tahi meʼa ʼe felōgoʼi mo te tokoni ʼaenī kua hili atu pea ʼe feala ke tokoni kia tatou ke tou nonofo ʼaʼala. ʼE tonu ke tou kau ia nātou ʼaē ʼe nātou fakatokaga ki te hahaʼi te kua vave fakaʼosi ʼo te ʼu faʼahiga meʼa ʼo te tuʼu ʼaenī. Ko te fakaʼosi lelei ʼo te ʼu faʼahiga meʼa ʼo te tuʼu ʼāfea ʼaenī ʼe mole hoko anai mokā “ko te logo lelei ʼaenī ʼo te puleʼaga” ʼe mole heʼeki faka mafola ohage ko tona fakatotonu e te ʼAtua Māfimāfi (Mateo 24:14). ʼE mole ʼa te kau Fakamoʼoni ʼa Sehova te fakatotonu ʼo te temi tuʼakoi ʼo te faka mafola. ʼA Sehova totonu pe te vakaʼi ʼo te faʼahi ʼaia (Maleko 13:32, 33). Kae, ko tatou kua tou fakatotonu ke tou gāue ʼaupito ki tona fealagia pea mo tona fualoa, ʼo faka mafola te puleʼaga lelei ʼaē neʼe mole heʼeki maʼu e te malamanei, ia te Puleʼaga ʼo te ʼAtua. ʼI te temi ʼaē ka hoko ai anai te “mamahi lahi”, ʼe tou maʼumaʼua tuʼumaʼu anai ʼi te gāue ʼaia (Mateo 24:21). Pea ki muli age, ko nātou ʼaē ka hāo anai, ʼe nātou manatuʼi te temi ʼaenī pea mo nātou fakamoʼoni aipe ko Sesu Kilisito neʼe mole ko he polofeta loʼi (Fakahā 19:11). Ko te gāue faka mafola neʼe fakahoko fakatalakitupua anai ia ʼo lahi age ʼi te meʼa ʼaē neʼe manatu ki ai ia nātou ʼaē neʼe kau ki tona fai.
15 Koia, ʼi te temi maʼuhiga ʼaē neʼe fakahoko ai te gāue ʼaia, ʼo fiafia lahi ai te ʼAtua, ʼe mahino ia ʼe hahaʼi age anai he kau ki ai ʼo mole tatau mo te tahi ʼu temi. ʼE tou fakafiafia anai ʼi tatatou kau ki te gāue lahi ʼaia! ʼE fakapapau mai e te ʼapositolo ko Petelo, ko Sehova “ ʼe mole loto ke matehi he tahi kae ʼe loto ke tou aʼu fuli ki te fakahemala.” (2 Petelo 3:9). Koia, ko te mālohi gāue ʼo te ʼAtua Māfimāfi ʼe gāue ia ʼaho nei ʼo mālohi makehe age, pea ko te kau Fakamoʼoni ʼa Sehova ʼe nātou fia hoko atu te gāue ʼaia ʼaki te laumālie maʼoniʼoni. Tou pipiki maʼu ki te kautahi ʼa Sehova, pea mo tou gāue lelei ʼi te minisitelio faka mafola ʼaē ʼe ina fai. ʼE tokoni anai kia tatou ke tou nonofo ʼaʼala aipe.
Ke tou fai he sivi ʼo te leʼo ʼo loto
16. He koʼe koa ʼe tonu ke tou fai he sivi ʼo te leʼo ʼo loto ʼo ʼuhiga mo totatou maʼuli fakalaumālie ʼi te temi nei?
16 Nima: Ko tatou takitokotahi, ʼe tonu anai ke tou fai he sivi ʼo te leʼo ʼo loto ʼo ʼuhiga mo totatou maʼuli ʼi te temi nei. ʼE maʼuhiga ʼaupito ʼi te temi nei. ʼE ʼaoga ke tou fakahā lelei pe ʼe tou tutuʼu ʼi te faʼahi fea. Ia Kalate 6:4, ʼe ʼui fēnei e Paulo: “Ke tahi vakaʼi pe tana gāue takitokotahi.” Tou fai he sivi ʼo te leʼo ʼo loto ohage ko te ʼu talanoa ʼa Paulo ia 1 Tesalonika 5:6-8: “ ʼAua naʼa tou momoe ohage ko ʼihi, kae ke tou nonofo ʼaʼala pea mo tou aga fakapotopoto. Heʼe ko nātou ʼaē ʼe momoe, ʼe momoe māhani nātou ʼi te pōʼuli, pea ko nātou ʼaē ʼe konahihia, ʼe konahihia māhani ʼi te pōʼuli. Kae kia tatou ia, ʼaē ʼe tou kau ki te ʼaho, tou aga fakapotopoto, ʼi tatatou kofuʼi te kofu tau ʼo te tui pea mo te ʼofa pea mo toʼo te puloga ʼo te falala ki te maʼuli.”
17. Lolotoga ʼo tatatou sivi ia tatou, koteā te ʼu fehuʼi ʼe tonu ke tou fai?
17 ʼE feafeaʼi ia tatou? ʼI tatatou sivisivi ʼaki te Tohi-Tapu, ʼe tou tokagaʼi ai koa ʼe tou nonofo ʼaʼala, pea ʼe tou pulogaʼi koa te falala ki te maʼuli? Ko tatou koa ko te ʼu hahaʼi kua tou mavae fakalelei mai te ʼu faʼahiga meʼa ʼo te tuʼu ʼāfea ʼaenī pea ʼe mole kei tou manatu fakatahi mo ia? ʼE ia tatou koa te manatu moʼoni ʼo te mālama foʼou ʼo te ʼAtua? ʼE tou mahino lelei koa ʼo ʼuhiga mo te meʼa ka hoko ki te tuʼu ʼaenī? Kapau koia ʼaia, pea ko te ʼaho ʼo Sehova ʼe mole ina popō fakapuna’maʼuli anai ia tatou ohage ko he ʼu tagata kaihaʼa. — 1 Tesalonika 5:4.
18. Koteā te tahi ʼu fehuʼi ʼe lagi lelei ke tou fai kia tatou, pea ʼe tonu ke tou feafeaʼi ia tatou?
18 Kae ʼe feafeaʼi mo kapau ko tatatou sivi ʼo te leʼo ʼo loto, ʼe ʼiloga mai ʼe tou kumi he maʼuli lelei, fīmālie, tokalelei? Pea ʼe feafeaʼi mo kapau ʼe tou fakatokagaʼi ko ʼotatou ʼu mata fakalaumālie kua mamafa ʼi te tulemoe mo te fia moe? ʼE tou maʼuli koa ʼi he misi, ʼo tou holi ki he ʼu meʼa ʼe mata feʼauga pe mo te mālama ʼaenī? Kapau koia ʼaia, pea ʼe tonu ke tou ʼaʼala! — 1 Kolonito 15:34.
Metitasioʼi te ʼu lea faka polofeta kua hoko
19. Koteā te ʼu lea faka polofeta ʼaē neʼe tou sisio kua hoko?
19 Kua tou aʼu mai leva ki te ono tokoni: Metitasioʼi te ʼu faga lea faka polofeta kua hoko ʼi te temi fakaʼosi ʼaenī. Kua hili nei taʼu e 77 ki te kua ʼosi ʼo te temi kua faka katofa ʼo te atu puleʼaga ʼi te taʼu 1914. Kapau ʼe tou vakaʼi te ʼu kuata ʼaia e tolu ʼo te sekulo, ʼe tou tokagaʼi ko te ʼu lea faka polofeta neʼe fakaholo takitokotahi pe ʼo hoko: ko te toe fakatuʼu ʼo te tauhi moʼoni; te hāofaki ʼo te toe ʼo te kau kilisitiano fakanofo, pea mo tonatou ʼu kaumeʼa, pea mo tanatou hu ki te palatiso fakalaumālie; te faka mafola ʼo te logo lelei ʼo te Puleʼaga ʼi te kele katoa; te hā ʼo te hahaʼi tokolahi (Isaia 2:2, 3; kapite 35; Sakalia 8:23; Mateo 24:14; Fakahā 7:9). Neʼe faka tapuha te huafa lahi ʼo Sehova pea mo tona ʼuhiga pule faʼitaliha ʼi te ʼatulaulau; feiā aipe mo te liliu ʼo te meʼa ʼaē ʼe veliveli ʼo lauʼi afe, pea ko te meʼa ʼaē neʼe veliveli ʼaupito kua liliu ko te fenua mālohi, heʼe ko Sehova ʼaē ʼe ina fakahaʼele vave te meʼa ʼaia ʼi tona temi tonu (Isaia 60:22; Esekiele 38:23). Pea ko te ʼu misi ʼaē ʼa te ʼapositolo ko Soane ʼi te tohi ʼo te Fakahā kua nātou ōvi ki tonatou fakahoko.
20. Ko te tui feafeaʼi ʼaē ʼe faka mafola e te kau Fakamoʼoni ʼa Sehova, pea ko ai ia nātou?
20 Koia, kua ʼiloʼi fakapapau e te kau Fakamoʼoni ʼa Sehova kua nātou mahino lelei ʼosi ʼi te temi nei ki te faka ʼuhiga ʼo te ʼu meʼa ʼaenī ʼe hoko ʼi te malamanei talu mai te taʼu 1914. ʼI tanatou maʼu te tui ʼaia, ʼe nātou fakahā lelei ko nātou ko he ʼu meʼa gāue ʼi te ʼu nima ʼo te ʼAtua Maʼoluga. Ko nātou ʼaia neʼē fili moʼo fakahā te logo fakaʼatua ʼi te temi maʼuhiga ʼaenī (Loma 10:15, 18). ʼIo, ko te ʼu folafola ʼa Sehova ʼo ʼuhiga mo te temi fakaʼosi kua moʼoni ia (Isaia 55:11). Ko te meʼa ʼaia, ʼe tonu ke ina uga tatou ke tou haga kātaki ʼo kau ki te temi ka fakahoko katoa ai e Sesu Kilisito te ʼu fakapapau fuli ʼa te ʼAtua.
Ko te hāofaki kua ōvi ʼosi mai nei ʼi ʼaē ʼo te temi neʼe tou tui ai
21. Koteā te fitu tokoni ʼaē ʼe ʼaoga kia tatou ke tou nonofo ʼaʼala fakalaumālie ai?
21 Pea koʼeni leva te fitu tokoni: ʼAua naʼa galo ko totatou hāofaki kua ōvi ʼosi mai nei ʼi ʼaē ʼo te temi neʼe tou tui ai. Ko te tahi meʼa ʼe maʼuhiga age ia, ko te fakalaka tonu ʼo te ʼuhiga pule faʼitaliha ʼo Sehova ʼi te ʼatulaulau pea mo te faka tapuha ʼo tona huafa kua ōvi ʼaupito mai ia. Koia, kua maʼuhiga ʼaupito ai ʼi te temi nei ke tou nonofo ʼaʼala. Neʼe tohi fēnei e te ʼapositolo ko Paulo: “ ʼE koutou ʼiloʼi te temi, pea ʼe kua hoko te hola ʼaē ke koutou ʼaʼala ai mai te moe, heʼe ko te temi nei ʼaē kua ōvi ʼosi mai tokotou hāofaki ʼi ʼaē ʼo te temi neʼe tou liliu ko te kau tui. Ko te pōʼuli kua tautuku ia; ko te ʼaho kua ōvi mai ia.” — Loma 13:11, 12.
22. ʼE feafeaʼi he lave kia tatou te kua ōvi mai ʼototatou hāofaki?
22 Kapau kua ōvi mai totatou hāofaki, pea ʼe tonu foki ke tou nonofo ʼaʼala! ʼAua naʼa tou tuku ki te ʼu maʼumaʼua takitokotahi pe ʼe ʼi te malamanei ke ina taʼomia totatou loto fakafetaʼi ʼo ʼuhiga mo te meʼa ʼaē neʼe fai e Sehova maʼa tana hahaʼi ʼi te temi fakaʼosi ʼaenī (Taniela 12:3). ʼE maʼuhiga ʼaupito ʼosi ke tou faʼa kātaki ke mole tou mafuli kehe ʼi te ala ʼaē ʼe fakahā lelei mai e te Folafola ʼa te ʼAtua (Mateo 13:22). Kua ʼiloga lelei mai pe ia ko te mālama ʼaenī kua aʼu ki tona ʼu ʼaho fakaʼosi. Kua vave nei pe tona pulihi ʼo talu ʼosi ai, kae tuʼu leva he mālama foʼou faitotonu. — 2 Petelo 3:13.
23. ʼE tokoni feafeaʼi anai ia Sehova kia tatou, pea koteā anai te tapuakina ka hoko ai?
23 Koia, ʼaki te ʼu meʼa fuli ʼaia, tou nonofo ʼaʼala. Ke mahino lelei kia tatou te temi nei ʼaenī ʼe tou maʼuli ai, pea mo tou ʼiloʼi pe ʼe tou ʼifea ʼi te temi. ʼAua naʼa galo kia tatou ʼe mole moe ia Sehova ʼo ʼuhiga mo te faʼahi ʼaia. Kailoa ia, ʼe tokoni tuʼumaʼu anai kia tatou ke tou nonofo ʼaʼala ʼi te temi fakaʼosi ʼaenī. Ko te pōʼuli kua tautuku. Ko te ʼaho kua ōvi mai. Tou nonofo ʼaʼala! ʼE tou ʼamanaki nei ke tou maʼuli ʼi te ʼaho taulekaleka ʼo te ʼu ʼaho fuli, te ʼaho ʼaē ka fakahoko anai e te Puleʼaga faka mesianike te fakatuʼutuʼu ʼa Sehova ʼo ʼuhiga mo te kele! — Fakahā 21:4, 5.
ʼE feafeaʼi anai ha kotou tali?
◻ Koteā te faka ʼuhiga ʼo te ʼui ʼaē e Sesu ko te ʼaho ʼo te hāūhāū lahi ʼo te ʼAtua ʼe haʼu fakafokifā anai ki te hahaʼi “ohage ko he hele”?
◻ He koʼe ʼe tonu ke tou faiga ke ʼaua naʼa fakaleluʼi ia tatou, pea ʼe feafeaʼi hona fealagia ke tou fai?
◻ Ko te faʼahiga faikole feafeaʼi ʼaē ʼe ʼaoga ke tou nonofo ʼaʼala ai?
◻ Koteā ʼaē ʼe maʼuhiga ʼaupito ke tou kau ki ai?
◻ He koʼe ʼe tonu ke tou fai he sivi ʼo te leʼo ʼo loto ʼo ʼuhiga mo totatou maʼuli tuʼulaga fakalaumālie?
◻ Koteā ʼaē ʼe tokoni ai kia tatou te ʼu lea faka polofeta ke tou nonofo ʼaʼala ai?