ʼE Tonu Ke Feafeaʼi Tatatou Faikole Ki Te ʼAtua?
NEʼE fehuʼi age e te tisipulo peʼe feafeaʼi te faikole, pea neʼe mole fakafisi ia Sesu ki tana fakahā age. ʼO mulimuli kia Luka 11:2-4, neʼe ina tali fēnei age: “Ka koutou faikole, koutou ʼui fēnei: Tāmai, ke tāpuhā tou huafa. Ke hoko mai tou puleʼaga. Foaki mai kia mātou tamatou pane ki te ʼaho ʼaenī, ʼaē ʼe ʼaoga ki te ʼaho nei. Pea ke fakamolemole ʼamatou ʼu agahala, heʼe mātou toe fakamolemole foki mo mātou kia nātou ʼaē ʼe nātou maʼua mai kia mātou; pea ʼaua naʼa ke tuku mātou ki te fakahala.” (Tohi-Tapu Katolika ʼo Douay) ʼE fakahigoa te kole ʼaia ko te Tāmai ʼe ʼi selo. ʼE lahi te ʼu meʼa ʼe talanoa kiai.
ʼUluaki, ko te ʼuluaki kupu ʼe ina ʼui mai kia tatou ko ʼatatou ʼu faikole ʼe tonu ke fai—ki tatatou Tāmai. Koutou tokagaʼi neʼe mole ʼui e Sesu ke fai te ʼu faikole ki he tahi age, pe ki he fakatātā, pe ki he “sagato,” peʼe kia ia. Kae, neʼe ʼui fēnei e te ʼAtua: “ ʼE mole ʼau foaki anai toku kolōlia ki he tahi age, peʼe ko toku fakavikiviki ki he ʼu fakatātā neʼe togi.” (Isaia 42:8, Douay) ʼE mole fagono te Tāmai ʼaē ʼe ʼi selo ki te ʼu kole ʼaē ʼe fai ki he faʼahiga meʼa, pe ki he tahi kehe, ka mole fai kia te ia, tatau aipe peʼe ko ia ʼaē ʼe faikole ʼe ina fai fakamalotoloto. ʼI te Tohi-Tapu, ʼe ko Sehova tokotahi pe ʼaē ʼe fakahigoa ko “Ia ʼaē ʼe fagono ki te faikole.”—Pesalemo 65:2.
ʼE feala ke ʼui e ʼihi ko te kau “sagato” ʼe nātou fakahoko tatatou ʼu kole ki te ʼAtua. Kae neʼe akoʼi fēnei mai e Sesu: “Ko ʼau ko te ala, pea mo te moʼoni, pea mo te maʼuli. ʼE mole he tahi ʼe haʼu ki te Tāmai ʼi tuʼa ia te ʼau. Tahi ʼaē meʼa, ko meʼa fuli ʼe koutou kole anai ʼaki toku huafa, ʼe ʼau fai anai, ke feala ai te faka kolōliaʼi ʼo te Tāmai ʼuhi ko te ʼAlo.” (Soane 14:6, 13) Koia neʼe mole akonakiʼi e Sesu te manatu ʼaē ko he tahi ʼe higoa ko he sagato ʼe feala ke ina maʼu te tuʼulaga ʼaē ko te fakahoko ʼo tatatou ʼu kole ki te ʼAtua. Tahi ʼaē meʼa, tou fakatokagaʼi te meʼa ʼaē neʼe ʼui e te ʼapositolo ko Paulo ʼo ʼuhiga mo Kilisito: “Neʼe mole gata pe ʼi tana mate ʼaē maʼa tatou—kae neʼe fakatuʼuake ia mai te mate, pea ʼe tuʼu ia ʼi te toʼomataʼu ʼo te ʼAtua pea ʼe ina hūfaki tatou.” “ ʼE maʼuli ia ʼo talu ai moʼo hūfaki te hahaʼi fuli ʼaē ʼe ʼōmai ki te ʼAtua ia te ia.”—Loma 8:34; Hepeleo 7:25, Tohi-Tapu Katolika Jérusalem.
Te Huafa ʼAē ʼe Tonu Ke Tāpuhā
Koʼeni te ʼu palalau ki muli age ʼo te faikole ʼa Sesu: “Ke tāpuhā tou huafa.” ʼE lava feafeaʼi ki he tahi ke ina tāpuhā te huafa ʼo te ʼAtua, peʼe ina fakakeheʼi, mo kapau ʼe mole ina ʼiloʼi te huafa ʼaia pea mole ina fakaʼaogaʼi? ʼE tuʼa 6 000 tupu te fakahigoaʼi ʼi te “Tauhi ʼĀfea” ia te ʼAtua ʼaki te huafa ʼaē ko Sehova.
ʼI te Tohi-Tapu ʼo Douay, ʼe ʼui fēnei e te kiʼi nota ʼi te lalo pasina ʼo ʼuhiga mo te huafa ʼo te ʼAtua ia Ekesote 6:3: “Ko ʼihi fakaliliu ʼo te temi nei ʼe nātou fakaʼaogaʼi te huafa ʼo Sehova . . . , koteʼuhi ʼe mole kei ʼiloʼi papau te puʼaki totonu ʼo te huafa [ʼo te ʼAtua], ʼaē ʼe tuʼu ʼi te tohi faka Hepeleo.” Kae ʼe fakaʼaogaʼi e te Tohi-Tapu Katolika ʼo te New Jerusalem Bible te huafa Yahweh. Logope la ko ʼihi kau fai Tohi-Tapu ʼe nātou leleiʼia te huafa Yahweh, kae ko “Sehova” ʼaē ʼe totonu pea ko te faʼahiga puʼaki ʼaia ʼo te huafa ʼo te ʼAtua ʼi te lea fakaʼuvea talu mai fualoa. ʼI te tahi ʼu lea ʼe ʼi ai tanatou faʼahiga puʼaki ʼo te huafa ʼo te ʼAtua. Ko te meʼa ʼaē ʼe maʼuhiga tāfito, ko tatatou fakaʼaogaʼi te huafa ʼaia pea mo faka tāpuhā. Neʼe akoʼi atu koa e tokotou ʼēkelesia ke koutou fakaʼaogaʼi te huafa ʼo Sehova ʼi te faikole?
Ko Te ʼu Meʼa ʼAē ʼe Tonu Ke Tou Kole Mokā Tou Faikole
Ki muli age neʼe akoʼi e Sesu ki tana kau tisipulo ke nātou faikole fēnei: “Ke hoko mai tou Puleʼaga.” Ko te Evaselio ʼo Mateo ʼe ina toe ʼui te ʼu palalau ʼaenī: “Ke fai tou finegalo ʼi te kele, ohage ko selo.” (Mateo 6:10, Douay) Ko te Puleʼaga ʼo te ʼAtua ʼe ko te puleʼaga ʼaē ʼe takitaki e Sesu Kilisito. (Isaia 9:6, 7) ʼO mulimuli ki te lea faka polofeta ʼo te Tohi-Tapu, kua ʼamanaki haga te Puleʼaga ʼaia ʼo pulihi te ʼu puleʼaga fakatagata fuli, pea mo ina ʼaumai te tokalelei ki te kele katoa. (Pesalemo 72:1-7; Taniela 2:44; Fakahā 21:3-5) Koia ko te kau Kilisitiano moʼoni ʼe nātou kole tuʼumaʼu ʼi tanatou ʼu faikole te hoko mai ʼo te Puleʼaga. ʼE akoʼi atu koa e takotou lotu ke koutou fai te faʼahi ʼaia?
Tahi ʼaē meʼa ʼe lelei ke tou tokagaʼi, neʼe fakahā mai e Sesu ʼe feala ke tou kole ʼi tatatou ʼu faikole te ʼu meʼa ʼaē ʼe ʼaoga kia tatou. Neʼe ina ʼui fēnei: “Foaki mai tamatou pane ki te ʼaho ʼaenī, ʼaē ʼe ʼaoga ki te ʼaho nei. Pea ke fakamolemole ʼamatou ʼu agahala, heʼe mātou toe fakamolemole foki mo mātou kia nātou ʼaē ʼe nātou maʼua mai kia mātou; pea ʼaua naʼa ke tuku mātou ki te fakahala.” (Luka 11:3, 4, Douay) Ko te ʼu palalau ʼa Sesu ʼe ina fakahā mai, ʼe feala ke tou kumi te finegalo ʼo te ʼAtua ʼi te ʼu meʼa ʼaē ʼe tou fai ʼi te ʼaho fuli, pea ʼe feala hatatou fakaōvi kia Sehova mokā tou tuʼania ki he meʼa, pea mokā ʼe hoha tatatou fakakaukau. Ko te faikole tuʼumaʼu ki te ʼAtua ʼi te faʼahi ʼaia, ʼe tokoni anai kia tatou ke tou mahino ʼe fakalogo totatou maʼuli kia te ia. Koia ʼe ʼāsili ai tatatou mahino ki tona mālohi ʼi totatou maʼuli. ʼE toe lelei foki ke tou kole ʼi te ʼaho fuli ki te ʼAtua ke ina fakamolemole tatatou ʼu agahala. ʼE toe lahi ai tatatou mahino ki totatou ʼu vaivaiʼaga—pea ʼe tuputupu ai tatatou faʼa kātaki ʼo fakamolemole ki te ʼu hala ʼa ʼihi. Ko te tahi meʼa ʼaē ʼe lelei ke tou faikole kiai, ʼe ko te puipui ʼo tatou mai te fakahala, tāfito ʼo ʼuhiga mo te mole kei fakaʼapaʼapa ʼa te mālama ki te ʼu aga ʼaē ʼe tonu ke fai. ʼO ʼalutahi mo te faikole ʼaia, ʼe tou tokakaga ke tou tekeʼi te ʼu ʼaluʼaga ʼaē ʼe feala ke nātou uga tatou ke tou fai he aga ʼe kovi.
ʼE mahino ia, ko te faikole ʼo te Tāmai ʼe lahi te ʼu meʼa ʼe ina akoʼi mai kia tatou ʼo ʼuhiga mo te ʼu faikole ʼaē ʼe leleiʼia e te ʼAtua. Kae neʼe ʼui koa e Sesu ke tou lau liuliuga te faikole ʼaia ʼo tou lau fakaʼatamai tuʼumaʼu?
Te Tahi ʼu Tokoni ʼo ʼUhiga Mo Te Faikole
Neʼe fakahā mai e Sesu te tahi ʼu tokoni ʼo ʼuhiga mo te faikole. Ia Mateo 6:5, 6, ʼe tou lau fēnei ai: “Ka koutou faikole, ʼaua naʼa koutou hage ko te kau malualoi; heʼe nātou manako ke nātou faikole tuʼu ʼi te ʼu sinakoka pea mo te ʼu tuliki ʼo te ʼu ala lalahi, ke mamata te hahaʼi kia nātou. . . . Kaʼe kia koe, ka ke faikole, hū ki tou koga fale, pea, ʼi tau ʼosi fakamaʼu te matapā, faikole ki tau Tāmai ʼaē ʼe ʼi te lilo; pea ko tau Tāmai ʼaē ʼe sio ʼi te lilo, ʼe ina totogi atu anai kia te koe.” Ko te ʼu palalau ʼaia ʼe ina akoʼi mai kia tatou ko te faikole ʼe mole tonu ke tou fai ke hā ki te hahaʼi peʼe tou fai ke nātou mataleleiʼia. ʼE koutou avahi koa tokotou loto kia Sehova, ohage ko tona ʼui mai e te Tohi-Tapu?—Pesalemo 62:8.
Neʼe foaki mai e Sesu te fakatokaga ʼaenī: “Ka koutou faikole, ʼaua naʼa koutou lau ʼo liuliuga ʼakoutou ʼu palalau ohage ko te hahaʼi ʼo te ʼu puleʼaga, heʼe nātou mahalo ʼe fakalogo anai nātou ʼi he lahi ʼo hanatou ʼu palalau.” (Mateo 6:7, Jérusalem) ʼE hā lelei mai, ʼe mole leleiʼia e Sesu te faikole ʼaē kua ʼosi fakamaʼu loto—ʼo feiā aipe ki te ʼu faikole ʼaē ʼe lau ʼi he tohi. Tahi ʼaē meʼa neʼe mole ina ʼui mai ke tou fakaʼaogaʼi te lōsalio.
Ko te tohi misa Katolika ʼe ina fakahā mai te fakatotonu ʼaenī: “Ko ʼatatou ʼu faikole ʼaē ʼe lelei ʼe ko te ʼu faikole ʼaē ʼe haʼu mai totatou loto, mokā tou fakafetaʼi kia te ia, ʼi te ʼu temi ʼaē ʼe tou tau ai mo he ʼu faigataʼaʼia, ʼi te ʼu temi ʼaē ʼe tou lotomamahi ai, peʼe ʼi tatatou tauhi ʼaē ʼe tou fai ʼi te ʼaho fuli kia te ia.” Ko te ʼu faikole ʼaē neʼe fai e Sesu neʼe ko he ʼu meʼa ia neʼe haʼu mai tona loto, ka mole ko he ʼu meʼa ia neʼe ina fakamaʼu loto. Ohage la, koutou lau te faikole ʼa Sesu ʼaē ʼe tuʼu ia Soane kapite 17. ʼE pipiki ki te faikole faʼifaʼitaki, ʼaē ʼe faka maʼuhigaʼi ai te loto ʼaē ʼa Sesu ke tāpuhā te huafa ʼo Sehova. Ko te faikole ʼa Sesu neʼe ko he meʼa neʼe haʼu mai tona loto, pea neʼe ina kole fakamalotoloto.
Te ʼu Faikole ʼAē ʼe Fagono Kiai Te ʼAtua
Kapau neʼe akoʼi atu ke koutou fai he ʼu faikole ʼe koutou fakamaʼu loto, ke koutou faikole ki te kau “sagato” peʼe ki te ʼu fakatātā, peʼe ko te fakaʼaogaʼi ʼo te ʼu meʼa faka lotu, ohage la ko te lōsalio, pea e lagi feala ke mata faikehe kia koutou te ʼui ʼaē ke tou mulimuli ki te faʼahiga faikole ʼa Sesu. Kae, kapau ʼe tou fia faikole ohage ko tona akoʼi mai e Sesu, pea ʼe tonu ke tou ʼiloʼi pe ko ai te ʼAtua, tona huafa, tana ʼu fakatuʼutuʼu, pea mo tona ʼulugaaga. ʼE feala ke koutou fakahoko te faʼahi ʼaia ʼaki te ako ʼo te Tohi-Tapu. (Soane 17:3) ʼE lotolelei te kau Fakamoʼoni ʼa Sehova ke nātou tokoni kia koutou ʼi te faʼahi ʼaia. Neʼe nātou tokoni ki te lauʼi miliona hahaʼi ʼi te malamanei ke nātou “ ʼahiʼahi pea ke [nātou] sisio ko Sehova ʼe lelei”! (Pesalemo 34:8) Ka lahi takotou ʼiloʼi te ʼAtua, pea ʼe toe lahi mo takotou fia fakavikiviki kia te ia ʼi te faikole. Pea ka lahi takotou fakaōvi kia Sehova ʼi te faikole, pea ʼe toe mālohi ai foki mo takotou ʼu felogoi mo ia.
Koia ko te kau atolasio moʼoni fuli ʼa te ʼAtua, ʼe uga fakamālohi nātou ke nātou “faikole tuʼumaʼu.” (1 Tesalonika 5:17) Koutou vakaʼi peʼe ʼalutahi moʼoni takotou ʼu faikole mo te Tohi-Tapu, pea mo te ʼu tokoni ʼa Sesu Kilisito. Kapau ʼe koutou fai feiā, pea ʼe mahino ia ʼe tali anai takotou ʼu faikole e te ʼAtua.
[Paki ʼo te pasina 7]
Ka lahi tatatou ako ʼo ʼuhiga mo Sehova, pea ʼe toe lahi anai mo tatatou fia faikole kia te ia ʼaki totatou loto