KAPITE 22
ʼE Feafeaʼi Hau Fakaha Ki ʼIhi Te Logo Lelei?
ʼE mahino ia, ka ke iloʼi te ʼu moʼoni Fakatohi-tapu, pea ke manatu fenei leva: ‘ʼE tonu ke iloʼi e te hahaʼi te faʼahi ʼaeni.’ ʼE moʼoni, ʼe tonu ke natou iloʼi te ʼu moʼoni ʼaia. Kae ʼe lagi ke tuʼania ʼi te fakaha ki ʼihi te ʼu faʼahi ʼe ke ako. Tou vakaʼi pe ʼe feafeaʼi hau tauʼi te mataku pea mo maʼu te fiafia ʼi te tala ʼo te logo lelei.
1. ʼE feafeaʼi hau faifakamafola kia natou ʼe ke iloʼi?
Neʼe ui fenei e te ʼu tisipulo ʼa Sesu: “ʼE mole feala ke ma tuku tamā palalau ki te ʼu meʼa ʼae neʼe ma sisio mo logo ki ai.” (Gaue 4:20) Neʼe natou leleiʼia te ʼu moʼoni ʼae neʼe natou ako, koia neʼe natou loto ai ke iloʼi e te hahaʼi fuli. ʼE ke toe logoʼi koa mo koe te faʼahi ʼaia? Kapau koia, kumi ni faigamalie ke ke palalau ai ki tou famili mo ʼou kaumeʼa ki te ʼu faʼahi ʼe ke ako. Pea ke ke fai te faʼahi ʼaia ʼaki te fakaʼapaʼapa.—Lau ia Kolose 4:6.
He ʼu manatu ke kamata he faipalalau
Ka ke palalau mo he tahi ʼo tou famili, ʼe feala hau ui age: “Neʼe ʼi ai te manatu maʼuhiga neʼe au ako ʼi te vahaʼa ʼaeni.”
Lau he vaega fakalotomalohi ki hou kaumeʼa ʼe mahaki peʼe tuʼania.
Ka fehuʼi atu e hou kaugā gaue pe kotea neʼe ke fai ʼi te fakaʼosi vahaʼa, fakaha age he manatu neʼe ke leleiʼia ʼi te temi ʼae neʼe fai ai tau ako peʼe ʼi te fono.
Fakaha ki ʼou kaumeʼa te tuʼasila jw.org ʼi te neti.
Fakaafe ʼihi ke kau ki te fai ʼo tau ako peʼe ke fakaha age te faʼahiga fakaui ʼo hana ako ʼi te jw.org.
2. He koʼe ʼe lelei ke ke faifakamafola mo te kokelekasio?
Neʼe mole fakaha pe e te ʼu tisipulo ʼa Sesu te logo lelei ki te hahaʼi ʼae neʼe natou iloʼi. Neʼe fekauʼi natou e Sesu “ke olo taki toko lua, ʼo muʼamuʼa ia te ia ki te ʼu kolo fuli” ʼo faifakamafola. (Luka 10:1) Neʼe fakatuʼutuʼu lelei te gaue faifakamafola ʼaia pea neʼe feala ai ki te tokolahi ke logo ki te logo lelei. Pea neʼe toe fiafia lahi te kau tisipulo he neʼe natou faifakamafola fakatahi. (Luka 10:17) ʼE feala koa hau fakatuʼutuʼu ke ke faifakamafola mo te kokelekasio?
TA FAKALOLOTO
Ta vakaʼi te faʼahiga tauʼi ʼo tau mataku pea mo te fiafia ʼe ke logoʼi ʼi te tala ʼo te logo lelei.
3. ʼE nofo anai ia Sehova mo koe
ʼE ʼi ai ʼihi ʼe fia faifakamafola kae ʼe natou tuʼania te tagata.
ʼE ke mataku koa ʼi te palalau ki te ʼu faʼahi ʼae ʼe ke ako? Kotea tona tupuʼaga?
Vakaʼi te ʼATA VITEO, pea fai te fehuʼi ʼae ʼe hoa mai.
Neʼe lava tauʼi feafeaʼi e te ʼu tupulaga ʼaeni tonatou matataku?
Lau ia Esaia 41:10, pea fai te fehuʼi ʼaeni:
Kapau ʼe ke mataku ʼi te faifakamafola, he koʼe ʼe tonu ke ke faikole?
Kua ke iloʼi koa?
Tokolahi te kau Fakamoʼoni ʼa Sehova neʼe natou manatu ʼe mole feala anai ʼi he temi ke natou faifakamafola. Ko te aluʼaga ʼaia neʼe hoko kia Sergey. Neʼe ina logoʼi ʼe mole hona ia ʼaoga pea ʼe faigataʼa tana felogoi mo ʼihi. ʼE ina ui fenei: “Logo la neʼe au mataku, kae neʼe au kamata palalau ki te ʼu faʼahi neʼe au ako ki ʼihi. Neʼe au punamaʼuli, he neʼe au toe lotomalohi pea mo malohi ai taku tui.”
4. Ke ke fakaʼapaʼapa
Ka ke tala te logo lelei, fakakaukauʼi pe kotea te ʼu palalau ka ke fai pea mo tona faʼahiga ʼaveʼave. Lau ia 2 Timoteo 2:24 mo 1 Peteleo 3:15, pea fai te ʼu fehuʼi ʼaeni:
ʼE feafeaʼi hau maʼuliʼi te ʼu vaega ʼaeni moka ke palalau ki ʼihi ki te Tohi-Tapu?
ʼE lagi mole manatu tahi anai ʼihi ʼo tou famili peʼe ko ʼou kaumeʼa mo koe. Kotea ʼe feala ke ke fai? Kae kotea ʼe mole tonu ke ke fai?
He koʼe ʼe maʼuhiga ke ke fakafuafua lelei te ʼu fehuʼi ka ke fai?
5. ʼE ke fiafia moka ke faifakamafola
Neʼe ui e Sehova kia Sesu ke ina tala te logo lelei. Kotea te manatu ʼa Sesu ʼo ʼuhiga mo te gaue ʼaia? Lau ia Soane 4:34, pea fai te ʼu fehuʼi ʼaeni:
ʼE mahino ia, ʼe ʼaoga ke tou kakai ke tou maʼuʼuli pea ʼe tou fiafia moka tou kai ni meʼa lelei. He koʼe neʼe ui e Sesu ko te fai ʼo te finegalo ʼo te ʼAtua ʼe hage ko he meʼa kai?
He koʼe ʼe ke fiafia moka ke tala te logo lelei?
He ʼu tokoni
ʼI te fono ʼo te vahaʼa, tohi he ʼu manatu ʼe tokoni atu ke ke kamata he faipalalau.
Kole ki tau faiako pe ʼe feafeaʼi hau kau ia natou ʼae ʼe fai hanatou kiʼi faipalalau ʼi te fono ʼo te vahaʼa. ʼE feala ke tokoni atu ke ke lotomalohi moka ke palalau ki te moʼoni ki ʼihi.
Fakaʼaogaʼi te ʼu manatu ʼae ʼi te kupu tafito “ʼE Ui e ʼIhi” ke ke akoako ai tau faʼahiga tali ki ni fehuʼi ʼe fai atu.
ʼE UI E ʼIHI: “Kotea te gaue ʼe ke fai nei?”
ʼE feafeaʼi hau toʼo te faigamalie ʼaia ke ke fakaha age te ʼu faʼahi ʼae ʼe ke ako?
MANATU TAFITO
ʼE ke fiafia moka ke tala te logo lelei logo la neʼe ke manatu ʼe faigataʼa tona fakahoko.
Fehuʼi Fakamanatu
He koʼe ʼe tonu ke tala te logo lelei ki ʼihi?
ʼE feafeaʼi hau fai te faʼahi ʼaia ʼaki he fakaʼapaʼapa?
Kapau ʼe ke mataku ʼi te faifakamafola, kotea ʼe feala ke ke fai?
TE TAHI ʼU MANATU
He ʼu manatu faigafua ʼe fa moʼo tala te logo lelei ʼaki te kiʼi kate jw.org.
He ʼu kalitate ʼe fa ʼe tokoni atu ki tau tala te logo lelei.
“ʼE Ke Fia Liliu Koa Ko He Tautai Tagata?” (Ko Te Tule Leʼo ʼo Sepetepeli 2020)
He faʼifaʼitaki ʼi te Tohi-Tapu ʼe tokoni mai ke kita lototoʼa ʼi te tala ʼo te logo lelei, maʼia pe kita tupulaga.
ʼE feafeaʼi hau palalau ki te Tohi-Tapu ki tou famili ʼae ʼe heʼeki natou iloʼi ia Sehova?