Ko Ai ʼAē Ka Ina Fakamavae Anai Tatou Mai Te ʼOfa ʼo Te ʼAtua?
“E tou ofa, koteuhi nee uluaki ofa ia kia tatou.”—1 Soane 4:19.
1, 2. (a) He koʼe ʼe maʼuhiga hatatou ʼiloʼi ʼe ʼofainaʼi tatou? (b) Ko te ʼofa ʼo ai ʼaē ʼe ʼaoga ʼaupito kia tatou?
ʼE MAʼUHIGA koa kia koutou hakotou ʼiloʼi ʼe ʼofainaʼi koutou? ʼO kamata mai tana kei veliveli ʼo aʼu ki tana kua lahi, ʼe tuputupu lelei ia ia ʼaē ʼe ʼofainaʼi. Kua koutou tokagaʼi koa he kiʼi tamasiʼi ʼe fua e tana faʼe ʼaē ʼe ʼofa ki ai? ʼI te agamāhani, tatau aipe peʼe koteā te ʼu meʼa ʼaē ʼe hoko, kae ko te sio ʼa te kiʼi toe ki te ʼu mata malimali ʼo tana faʼe, ʼe logo fīmālie ai pea mo tokalelei ʼi te ʼu nima ʼo tana faʼe ʼaē ʼe ʼofa kia ia. Kei koutou manatuʼi koa pe neʼe koutou feafeaʼi ʼi te ʼu ʼaluʼaga faigataʼa ʼo tokotou temi tūpulaga? (1 Tesalonika 2:7) ʼI ʼihi temi, neʼe mole lagi koutou ʼiloʼi te meʼa ʼaē neʼe koutou loto kiai, pe neʼe mole koutou mahino ki te ʼu meʼa ʼaē ʼi tokotou loto, kae neʼe maʼuhiga ʼaupito hakotou ʼiloʼi ʼe ʼofainaʼi koutou e takotou tāmai pea mo takotou faʼe! Neʼe mole tokoni atu koa la kia koutou takotou ʼiloʼi ʼaē, neʼe feala ke koutou fakaōvi kia nāua ʼi te ʼu temi ʼaē neʼe ʼi ai hokotou fihifihia peʼe ko hakotou fehuʼi? ʼE moʼoni, ʼi totatou maʼuli katoa, ko te meʼa maʼuhiga ʼaē ʼe ʼaoga kia tatou ʼe ko te ʼofainaʼi ʼo tatou. ʼE tou logoʼi ai ʼe tokagaʼi tatou.
2 Ko te ʼofa tuʼumaʼu ʼa te ʼu mātuʼa ʼe maʼuhiga ʼaupito ke tuputupu lelei pea mo maʼuli fakapotopoto ai te fānau. Kae ko tatatou falala ʼaē ko tatatou Tāmai ʼi selo, ko Sehova, ʼe ʼofa kia tatou, ʼe maʼuhiga ʼaupito age ia heʼe fua lelei kia tatou ʼi te faʼahi fakalaumālie pea mo totatou loto. Ko ʼihi kau lautohi ʼo te nusipepa ʼaenī neʼe mole lagi tokaga lelei tanatou ʼu mātuʼa kia nātou. Kapau neʼe hoko te faʼahi ʼaia kia koutou, pea koutou lotomālohi. Tatau aipe pe neʼe mole ʼofainaʼi kita e takita ʼu mātuʼa pe neʼe mole fai fakalelei te faʼahi ʼaia, kae ʼe feala ke kita maʼu te ʼofa ʼo te ʼAtua ʼaē ʼe agatonu.
3. Neʼe fakahā lelei feafeaʼi e Sehova ʼe ʼofa ki tana hahaʼi?
3 ʼAki tana polofeta ko Isaia, neʼe fakahā lelei e Sehova ʼe feala ki he faʼe ke ina “galoʼi” tana kiʼi toe, kae kia ia ʼe mole ina galoʼi tana hahaʼi. (Isaia 49:15) ʼO toe feiā pe, neʼe ʼui e Tavite ʼaki he loto falala: “Kapau ʼe līaki ʼau e taku tāmai pea mo taku faʼe, pea ʼe tali anai ʼau e Sehova.” (Pesalemo 27:10) ʼI meʼa fakaloto fīmālie! Tatau aipe peʼe koteā tokotou ʼaluʼaga, kae kapau ʼe loloto takotou ʼu felogoi mo Sehova ʼAtua, pea ʼe tonu ke koutou manatuʼi tuʼumaʼu ko tona ʼofa kia koutou ʼe lahi age ʼi te ʼofa ʼo he tagata!
Koutou Nonofo ʼi Te ʼOfa ʼo Te ʼAtua
4. Neʼe hā lelei feafeaʼi te ʼofa ʼo te ʼAtua ki te kau Kilisitiano ʼo te ʼuluaki sēkulō?
4 Ko te temi fea ʼaē neʼe koutou ʼuluaki logo ai ki te ʼofa ʼo Sehova? ʼE mahino ia neʼe koutou hage ko te kau Kilisitiano ʼo te ʼuluaki sēkulō. ʼI te kapite 5 ʼo te tohi ʼa Paulo ki te kau Loma, ʼe matalelei te fakamatala ʼaē ʼe fai ai, pe neʼe feafeaʼi te loto ʼo te hahaʼi agahala ʼi tanatou logo ki te ʼofa ʼo Sehova, kae ki muʼa atu neʼe nātou mamaʼo mai ia te ia. ʼI te vaega 5 ʼe tou lau fēnei: “Kua folahi mai te ofa o te Atua ki otatou loto aki te Laumalie-Maonioni ae nee foaki mai kia tatou.” ʼI te vaega 8, ʼe toe ʼui fēnei e Paulo: “E fakamooni mai e te Atua tona ofa kia tatou i te temi aeni: nee puluhia Kilisito o uhiga mo tatou, i te temi nee kei tou agahala ai.”
5. Koteā ʼaē neʼe tokoni atu ke koutou mahino pea mo loto fakafetaʼi ai ki te ʼofa lahi ʼo te ʼAtua?
5 ʼO toe feiā pe, ʼi te temi ʼaē neʼe fakahā atu te moʼoni ʼo te Folafola ʼa te ʼAtua pea mo koutou kamata tui kiai, neʼe kamata gāue ai te laumālie maʼoniʼoni ʼo Sehova ʼi tokotou loto. Neʼe koutou kamata mahino ai pea mo loto fakafetaʼi ai ki te meʼa lahi ʼaē neʼe fai e Sehova ʼi tana fekauʼi mai tona ʼAlo ʼofaina ke mate maʼa koutou. Neʼe tokoni atu ia Sehova ke koutou ʼiloʼi lelei tona ʼofa lahi ki te malamanei katoa. Neʼe mole malave koa la ki tokotou loto te temi ʼaē neʼe koutou mahino ai, logola neʼe koutou tutupu ake ʼi te agahala pea mo mamaʼo ia te ia, kae neʼe foaki e Sehova ki te hahaʼi te fealagia ʼaē ke nātou liliu ʼo faitotonu ʼaki te ʼamanaki ki te maʼuli heʼegata? Neʼe mole koutou ʼofa ai koa la kia Sehova?—Loma 5:10.
6. He koʼe ʼe feala ʼi ʼihi temi ke hage ʼe tou mamaʼo mai ia Sehova?
6 Neʼe koutou foaki tokotou maʼuli ki te ʼAtua, ʼuhi ko te ʼofa ʼo takotou Tāmai ʼi selo, pea neʼe koutou fetogi tokotou maʼuli ke feala hakotou felogoi lelei mo ia. ʼI te temi nei, ʼe koutou tokalelei mo te ʼAtua. Kae ʼi ʼihi temi ʼe hage koa ʼe koutou mamaʼo mai ia Sehova? ʼE feala pe ke hoko te faʼahi ʼaia kia tatou. Kae koutou manatuʼi tuʼumaʼu ʼe mole fetogi te ʼAtua. ʼE ʼofa tuʼumaʼu aipe kia tatou, ohage ko te laʼā, ʼaē ʼe ina fakamāfanaʼi tuʼumaʼu pe te kele. (Malakia 3:6; Sakopo 1:17) Kae ʼe ko tatou ʼaē ʼe feala ke tou fetogi—tatau aipe peʼe ko he kiʼi temi nounou. ʼI te takaminomino ʼo te kele, ʼe ʼi ai te tahi ʼu fenua ʼe nofo ʼi te fakapōʼuli. ʼO toe feiā pe, kapau ʼe tou mavae mai te ʼAtua, tatau aipe peʼe mole faʼa lahi, kae ʼe hage kua mokosia totatou ʼu vāhaʼa mo ia. Koteā ʼaē ʼe tou lava fai moʼo fakatonutonuʼi ʼo te ʼaluʼaga ʼaia?
7. ʼE tokoni feafeaʼi he sivi ʼo tatou totonu ke tou nofo ʼi te ʼofa ʼo te ʼAtua?
7 Kapau ʼe hage kia tatou ʼe tou mavae mai te ʼofa ʼo te ʼAtua, pea ʼe tonu ke tou feʼekeʼaki fēnei: ‘ ʼE ko he meʼa noa koa kia ʼau te ʼofa ʼo te ʼAtua? Neʼe ʼau fakamamaʼo māmālie koa mai te ʼAtua maʼuli pea mo ʼofa, pea ʼe hā koa kua vaivai taku tui ʼi te ʼu meʼa ʼaē ʼe ʼau fai? Neʼe ʼau tokagaʼi koa te ʼu “mea o te kakano” kae mole ʼau tokagaʼi te ʼu “mea o te Laumalie”?’ (Loma 8:5-8; Hepeleo 3:12) Kapau neʼe tou mavae mai ia Sehova, pea ʼe feala ke tou fakatonutonuʼi te ʼaluʼaga ʼaia, ke tou toe maʼu he vāhaʼa lelei mo ia. ʼE uga fēnei tatou e Sakopo: “Koutou fakaovi ki te Atua pea e fakaovi atu anai kia koutou.” (Sakopo 4:8) Koutou manatuʼi te ʼui fēnei ʼa Suta: “Kia koutou, ʼu ʼofaina, ʼi takotou laga ʼo koutou ki takotou tui maʼoniʼoni ʼaupito, pea ʼi takotou faikole ʼaki te laumālie maʼoniʼoni, koutou nofo ʼi te ʼofa ʼo te ʼAtua.”—Suta 20, 21, MN.
Ko Te ʼu Fetogi ʼe Mole Lave Ki Te ʼOfa ʼo Te ʼAtua
8. Koteā te ʼu fetogi ʼaē ʼe feala ke hoko fakapunamaʼuli ʼi totatou maʼuli?
8 ʼE lahi te ʼu fetogi ʼe feala ke hoko kia tatou ʼi tatatou maʼuʼuli ʼi te tuʼu ʼaenī. Neʼe fakatokagaʼi e te Hau ko Salomone ko “te ʼu temi pea mo te ʼu meʼa fakafokifā ʼe hoko kia tatou fuli.” (Tagata Tānaki 9:11) ʼE feala ke fetogi katoa pea mo fakapunamaʼuli tokita maʼuli. ʼI te tahi ʼaho ʼe tou lelei, pea ʼi te tahi ʼaho ʼe tou mahaki kovi. ʼI te tahi ʼaho ʼe hage ʼe lelei tatatou gāue, pea ʼi te tahi ʼaho ʼe mole kei ai hatatou gāue. ʼE feala ke mate fakapunamaʼuli he tahi neʼe tou ʼofa ai. Ko he ʼu Kilisitiano ʼi he fenua ʼe feala ke nātou maʼuʼuli ʼi te tokalelei, pea hoko fakapunamaʼuli leva he fakataga fakamataku. ʼE lagi tukugakoviʼi hala tatou, pea mo gaohi koviʼi tatou. ʼE moʼoni, ʼe hoko tuʼumaʼu te ʼu fetogi ʼi totatou maʼuli.—Sakopo 4:13-15.
9. He koʼe ʼe lelei ke tou tokagaʼi te koga tohi ʼo Loma kapite 8?
9 Ka hoko kia tatou he ʼu mamahi, pea ʼe feala ke tou manatu kua līʼakina tatou, peʼe mole kei ʼofa lahi te ʼAtua kia tatou. Mai tona ʼaluʼaga ʼaē ʼe feala ke hoko kia tatou fuli te ʼu ʼaluʼaga ʼaia, ʼe lelei ke tou tokagaʼi fakalelei te ʼu palalau fakaloto fīmālie ʼa te ʼapositolo ko Paulo, ʼaē ʼe tuʼu ia Loma kapite 8. Neʼe fai te ʼu palalau ʼaia ki te kau Kilisitiano ʼaē neʼe fakanofo e te laumālie. Kae ʼe feala ke toe faka ʼuhiga ki te tahi ʼu ōvi, ʼaē neʼe tala ʼe nātou faitotonu heʼe nātou kaumeʼa mo te ʼAtua, ohage ko Apalahamo ʼi te temi muʼa.—Loma 4:20-22; Sakopo 2:21-23.
10, 11. (a) Koteā te ʼu tukugakovi ʼe tau fai e te ʼu fili ki te hahaʼi ʼa te ʼAtua? (b) He koʼe ʼe mole faʼa maʼuhiga te ʼu tukugakovi ʼaia ki te kau Kilisitiano?
10 Tou lau ia Loma 8:31-34. ʼE fehuʼi fēnei e Paulo: “Kapau e kau te Atua mo tatou, pe ko ai ae e fakafehagai mai kia tatou?” ʼE moʼoni, ko Satana pea mo tana mālama agakovi ʼe nātou fakafeagai kia tatou. ʼE feala ke tukugakoviʼi hala tatou e te ʼu fili, māʼia ʼi te ʼu telepinale. Ko ʼihi ʼu mātuʼa Kilisitiano neʼe tukugakoviʼi ʼe nātou fehiʼa ki tanatou ʼu fānau, heʼe mole nātou tali te ʼu faitoʼo ʼaē ʼe mole ʼalutahi mo te lao ʼa te ʼAtua, peʼe mole nātou tuku tanatou fānau ke nātou fai te ʼu ʼaho lalahi faka pagani. (Gaue 15:28, 29; 2 Kolonito 6:14-16) Ko ʼihi kau Kilisitiano agatonu neʼe tukugakoviʼi hala ʼe nātou agatuʼu, heʼe mole nātou matehi anai he tahi ʼi te tau peʼe mole nātou fai politike. (Soane 17:16) Ko ʼihi kau fakafeagai ʼe nātou faka mafola he ʼu loi ʼi te ʼu tala logo, pea mo nātou lau ko te kau Fakamoʼoni ʼa Sehova ʼe ko he magaʼi lotu ʼe kovi.
11 Kae ke tou manatuʼi, māʼia ʼi te temi ʼo te kau ʼapositolo, neʼe ʼui fēnei: “Ko te magai’lotu aena e felavei i te potu fuape mo te fakafehagai.” (Gaue 28:22) ʼE maʼuhiga moʼoni koa te ʼu tukugakovi hala ʼaia? ʼE ko te ʼAtua ʼaē ʼe ina tala te faitotonu ʼa te kau Kilisitiano moʼoni, ʼo fakatafito ki tanatou tui ki te sakilifisio ʼa Kilisito. He koʼe ʼe mole kei ʼofa anai ia Sehova ki tana kau atolasio, kae neʼe ina ʼosi foaki kia nātou te meʼa ʼofa maʼuhiga tokotahi—tona ʼAlo ʼofaina totonu? (1 Soane 4:10) ʼI te temi nei, ʼi te kua fakatuʼuake ʼo Kilisito mai te kau mate pea mo heka ʼi te nima toʼo mataʼu ʼo te ʼAtua, ʼe palalau tuʼumaʼu moʼo hūfaki te kau Kilisitiano. Ko ai koa ʼaē ʼe feala ke ina fakahalaʼi te hūfaki ʼaia ʼe fai e Kilisito maʼa tana kau atolasio, peʼe feala ke ina fakafeagai ki te fakamāu lelei ʼaē ʼe fai e te ʼAtua maʼa tana hahaʼi agatonu? ʼE mole he tahi!—Isaia 50:8, 9; Hepeleo 4:15, 16.
12, 13. (a) Koteā ni ʼaluʼaga ʼe feala ke hoko, ʼe mole nātou fakamavae anai tatou mai te ʼofa ʼo te ʼAtua? (b) Koteā te fakatuʼutuʼu ʼa te Tevolo ʼi tana fakatupu te ʼu faigataʼaʼia kia tatou? (c) He koʼe ʼe mālo ai te kau Kilisitiano?
12 Tou lau ia Loma 8:35-37. ʼE ʼi ai koa he tahi peʼe ko he meʼa ʼe feala ke ina fakamavae tatou mai te ʼofa ʼo Sehova pea mo tona ʼAlo, ia Kilisito Sesu? ʼE feala ke fakaʼaogaʼi e Satana tana hahaʼi gāue ʼi te kele moʼo fakafeagai ki te kau Kilisitiano. ʼI te sēkulō ʼaē kua hili, ʼe lahi te ʼu fenua neʼe fakatagaʼi ai te tokolahi ʼo totatou ʼu tēhina mo tuagaʼane Kilisitiano. Ia ʼaho nei, ʼi te ʼu potu kehekehe, ʼe tau totatou ʼu tēhina ʼi te ʼaho fuli pe mo te ʼu fihifihia faka ekonomika. ʼE tau mo ʼihi te hoge peʼe ko te mole feʼauga ʼo te ʼu mutuʼi meʼa. He koʼe ʼe fakatupu e te Tevolo te ʼu faigataʼaʼia ʼaia? Ko tana fakatuʼutuʼu tāfito ʼe ko te fakaloto vaivai ʼo te kau atolasio moʼoni ʼa Sehova. ʼE loto e Satana ke tou manatu ʼe mole kei ʼofa te ʼAtua kia tatou. Kae ʼe moʼoni koa?
13 Ohage pe ko Paulo, ʼaē neʼe ina fakaʼaogaʼi te Pesalemo 44:22, neʼe tou ako te Folafola ʼa te ʼAtua. Kua tou mahino ʼe hoko te ʼu mamahi ʼaia kia tatou, te ʼu “ōvi” ʼa te ʼAtua, ʼuhi ko tona huafa. ʼE pipiki kiai te tāpuhā ʼo te huafa ʼo te ʼAtua pea mo te lagavaka ʼo tona ʼuhiga tuʼi ʼaliki ʼo te ʼatulaulau. Ko te ʼu tupuʼaga maʼuhiga ʼaia ʼaē ʼe fakagafua ai e te ʼAtua te ʼu ʼahiʼahi, kae ʼe mole hoko ʼuhi ko tana mole kei ʼofa kia tatou. Tatau aipe pe koteā te ʼaluʼaga faigataʼa ʼe feala ke hoko, kae ʼe tou tui papau ko te ʼofa ʼo te ʼAtua ki tana hahaʼi, ʼo kau ai mo tona ʼofa kia tatou takitokotahi, ʼe mole heʼeki fetogi. Ko te mamahi fuli pe ʼaē neʼe lagi hoko kia tatou ʼe liliu anai ko he meʼa fakafiafia mo kapau ʼe tou nofo agatonu. ʼE fakaloto mālohi kia tatou pea mo lagolago kia tatou te ʼiloʼi papau ʼaē ʼe mole feala ke puli te ʼofa ʼo te ʼAtua.
14. He koʼe neʼe tui papau ia Paulo ki te ʼofa ʼo te ʼAtua, logola te ʼu faigataʼaʼia neʼe hoko ki te kau Kilisitiano?
14 Tou lau ia Loma 8:38, 39. He koʼe neʼe tui papau e Paulo ʼe mole he meʼa ʼe feala ke ina fakamavae te kau Kilisitiano mai te ʼofa ʼo te ʼAtua? ʼE mahino ia ko te ʼu meʼa ʼaē neʼe hoko kia Paulo ʼi tona minisitelio, neʼe fakamālohi ai tana tui papau ʼe mole feala ke fetogi e te ʼu faigataʼaʼia ʼaia te ʼofa ʼo te ʼAtua kia tatou. (2 Kolonito 11:23-27; Filipe 4:13) Pea neʼe ʼiloʼi e Paulo te fakatuʼutuʼu heʼegata ʼa Sehova pea mo te ʼu meʼa ʼaē neʼe ina fai maʼa Tana hahaʼi ʼi te temi muʼa. ʼE feala koa ke mālo te mate ʼi te ʼofa ʼo te ʼAtua kia nātou ʼaē neʼe tauhi agatonu kia te ia? Kailoa ia! Ko te kau agatonu ʼaia ʼaē ʼe mamate, ʼe mole galoʼi anai nātou ʼi te fakakaukau haohaoa ʼa te ʼAtua, pea ʼe ina fakatuʼuake anai nātou ʼi tona temi totonu.—Luka 20:37, 38; 1 Kolonito 15:22-26.
15, 16. Koutou fakahā mai he ʼu meʼa ʼe mole feala anai ke nātou pulihi te ʼofa ʼo te ʼAtua ki tana ʼu kaugana agatonu.
15 Tatau aipe pe koteā te tuʼutāmaki ʼe feala ke hoko ʼi totatou maʼuli—he fakaʼī, he mahaki ʼe mole kei ʼi ai hona faitoʼo, peʼe ko he fihifihia faka paʼaga—kae ʼe mole he meʼa ʼe feala ke ina pulihi te ʼofa ʼo te ʼAtua ki tana hahaʼi. Ko te ʼu ʼaselo mālolohi, ohage ko te ʼaselo talagataʼa ʼaē neʼe liliu ʼo Satana, ʼe mole feala ke nātou uga Sehova ke tuku tana ʼofa ki tana ʼu kaugana ʼaē ʼe tauhi fakamalotoloto kia te ia. (Sopo 2:3) ʼE feala ki te ʼu puleʼaga ke nātou tapuʼi, mo pilisoniʼi, pea mo gaohi koviʼi te ʼu kaugana ʼa te ʼAtua, pea mo nātou uga te hahaʼi ke mole nātou tali lelei nātou. (1 Kolonito 4:13) Ko te fehiʼa ʼaia ʼa te ʼu puleʼaga ʼe ina lava fakaneke te hahaʼi ke nātou fakafeagai kia tatou, kae ʼe mole līʼakina anai tatou e te Tuʼi ʼAliki.
16 ʼI totatou ʼuhiga Kilisitiano, ʼe mole tonu ke tou matataku ʼi te ʼu meʼa ʼaē neʼe fakahigoaʼi e Paulo ko te ʼu ‘meʼa ʼo te temi nei’—te ʼu meʼa ʼaē ʼe hoko, te ʼu ʼaluʼaga ʼo te tuʼu ʼaenī—peʼe ko te ʼu meʼa ʼaē ka ʼamanaki hoko mai, heʼe mole he meʼa ʼe feala ke ina pulihi te ʼofa ʼo te ʼAtua ki tana hahaʼi. Logola te fakafeagai lahi mai kia tatou ʼa te ʼu mālohi agakovi ʼi te kele pea mo te ʼu mālohi fakapulipuli, kae ʼe lagolago tuʼumaʼu kia tatou te ʼofa agatonu ʼo te ʼAtua. Ohage ko tona fakahā lelei e Paulo, ʼe ‘mole he māʼoluga, ʼe mole he loloto’ ʼe ina tāʼofi anai te ʼofa ʼo te ʼAtua. Ei, ʼe mole he meʼa ʼe feala ke ina fakaloto vaivaiʼi tatou, peʼe ko he meʼa ʼe ina fakakinauʼi tatou, ʼo ina fakamavae anai tatou mai te ʼofa ʼo te ʼAtua; pea ʼe mole he meʼa ʼi te ʼu meʼa ʼaē neʼe fakatupu ʼe ina maumauʼi anai te ʼu felogoi ʼa te Tupuʼaga pea mo tana ʼu kaugana agatonu. ʼE ʼofa tuʼumaʼu te ʼAtua; pea ʼe heʼegata tona ʼofa ʼaia.—1 Kolonito 13:8.
Tou Taupau Fakalelei ʼo Talu Ai Te Lotoʼofa ʼo Te ʼAtua
17. (a) He koʼe ko te maʼu ʼo te ʼofa ʼo te ʼAtua ʼe “lelei age ia ʼi te maʼuli”? (b) ʼE tou lava fakahā feafeaʼi ʼe tou taupau fakalelei te lotoʼofa ʼo te ʼAtua?
17 ʼE maʼuhiga feafeaʼi kia koutou te ʼofa ʼo te ʼAtua? ʼE koutou hage koa ko Tavite, ʼaē neʼe ina tohi fēnei: “Ko tou lotoʼofa ʼe lelei age ia ʼi te maʼuli, ʼe vikiʼi anai koe ʼe toku ʼu laugutu. Koia ʼe ʼau tapuakina anai koe lolotoga toku maʼuli katoa; ʼi tou huafa ʼe ʼau hiki anai toku ʼu ʼalofi nima”? (Pesalemo 63:3, 4) ʼE moʼoni, ʼe ʼi ai koa he meʼa ʼe lava foaki mai e te mālama ʼaenī ʼe lelei age ʼi te ʼofa pea mo te kaumeʼa agatonu mo te ʼAtua? Ohage la, ko te kumi ʼaē ke kita maʼu tuʼulaga ʼi te gāue, ʼe lelei age koa ʼi hakita maʼu te loto tokalelei pea mo te fiafia heʼe kita vāhaʼa lelei mo te ʼAtua? (Luka 12:15) Neʼe tonu ki ʼihi Kilisitiano ke nātou filifili peʼe nātou fakafisi kia Sehova peʼe matehi nātou. Neʼe hoko te faʼahi ʼaia ki te kau Fakamoʼoni ʼa Sehova ʼe tokolahi ʼi te ʼu lotoʼā fakamamahi Nasi ʼi te Lua Tau Faka Malamanei. Neʼe tokolahi te ʼu tēhina Kilisitiano ʼaē neʼe nātou fili ke nātou taupau tonatou ʼofa ki te ʼAtua, tatau aipe peʼe tonu ke nātou mamate. Ko nātou ʼaē ʼe nonofo agatonu ʼi tona ʼofa, ʼe feala ke nātou tui papau ʼe nātou maʼu mai te ʼAtua he ka haʼu heʼegata, ko he meʼa ʼe mole feala ke foaki e te mālama kia nātou. (Maleko 8:34-36) Kae ʼe ʼi ai te tahi meʼa ʼe maʼuhiga age ʼi te maʼuli heʼegata.
18. He koʼe ʼe tou holi lahi ki te maʼuli heʼegata?
18 Logola ʼe mole feala hatatou maʼuʼuli ʼo heʼegata mo kapau ʼe mole tou ʼofa kia Sehova, kae koutou fakakaukauʼi age muʼa peʼe feafeaʼi anai te maʼuli heʼegata mo kapau ʼe mole tou fakalogo ki totatou Tupuʼaga. ʼE mahino ia ʼe mole tou fiafia anai, pea ʼe mole ʼi ai anai he ʼuhiga ʼo totatou maʼuli. Neʼe foaki e Sehova ki tana hahaʼi he gāue fakafiafia ke nātou fakahoko ʼi te ʼu ʼaho fakamuli ʼaenī. Koia ʼe feala ke tou falala moʼoni, ko Sehova, Ia ia ʼaē ʼe ina fakahoko tana fakatuʼutuʼu, ʼi te temi ʼaē ka ina foaki ai te maʼuli heʼegata, ʼe ina toe tuku mai anai mo he ʼu meʼa matalelei pea mo lelei ke tou ako pea mo fai. (Tagata Tānaki 3:11) Logola ʼe lahi anai te ʼu meʼa ʼaē ka tou ako ʼi te ʼu taʼu e afe ka hoko mai, kae ʼe mole tou lava ʼiloʼi katoa anai “te loloto o te koloa mo te poto pea mo te malama o te Atua!”—Loma 11:33.
ʼE ʼOfa Te Tāmai Kia Koutou
19. Koteā te fakaloto fīmālie neʼe foaki e Sesu Kilisito ki tana ʼu tisipulo ʼi tona temi mavae?
19 ʼI te ʼaho 14 ʼo Nisani ʼo te taʼu 33 ʼo totatou temi, ʼi tana taumafa fakamuli mo tana kau ʼapositolo agatonu e toko 11, neʼe lahi te ʼu palalau ʼaē neʼe fai e Sesu moʼo fakaloto mālohiʼi ʼo nātou ki te ʼu meʼa ka hoko. Neʼe nātou nonofo mo Sesu ʼi tona ʼu mamahi, pea neʼe nātou logoʼi takitokotahi tona ʼofa kia nātou. (Luka 22:28, 30; Soane 1:16; 13:1) Pea neʼe faka fīmālieʼi nātou e Sesu, ʼo ʼui maʼana: “E ofa te Tamai ia koutou.” (Soane 16:27) ʼE mahino ia, neʼe tokoni lahi te ʼu palalau ʼaia ki te kau tisipulo ke nātou ʼiloʼi ʼe ʼofa tanatou Tāmai ʼaē ʼi selo kia nātou!
20. Koteā ʼaē ʼe koutou fakatotonu ke koutou fai, pea koteā ʼaē ʼe feala ke koutou falala kiai?
20 Tokolahi ia nātou ʼaē kei maʼuʼuli kua lauʼi taʼu tanatou tauhi agatonu kia Sehova. ʼE mahino ia, ʼi muʼa ʼo te fakaʼosi ʼo te tuʼu agakovi ʼaenī, ʼe toe ʼāsili anai te ʼu ʼahiʼahi ʼaē ka hoko kia tatou. Ka hoko he ʼu ʼahiʼahi peʼe ko he ʼu faigataʼaʼia, ʼaua naʼa koutou lotolotolua ai ʼo ʼuhiga mo te ʼofa agatonu ʼo te ʼAtua kia koutou. ʼE moʼoni te faʼahi ʼaenī: ʼe ʼofa Sehova kia koutou. (Sakopo 5:11) Tou haga fai te ʼu meʼa ʼaē ʼe fakatotonu mai, ʼo tou mulimuli fakalelei ki te ʼu fakatonutonu ʼa te ʼAtua. (Soane 15:8-10) ʼOfa pe ke tou fakaʼaogaʼi te ʼu ʼaluʼaga fuli pe moʼo vikiʼi tona huafa. ʼE tonu ke tou fakatotonu mālohi ke tou vāhaʼa lelei mo Sehova ʼo tou faikole pea mo ako tana Folafola. Tatau aipe pe koteā ʼaē ʼe feala ke hoko, kae kapau ʼe tou faiga lahi ke tou fakafiafia ia Sehova, pea ʼe tou nonofo anai ʼi te tokalelei, ʼo tou falala katoa ki tona ʼofa heʼegata.—2 Petelo 3:14.
ʼE Koutou Tali Feafeaʼi Anai
• Ko te ʼofa tāfito ʼo ai ʼaē ʼe ʼaoga kia tatou, moʼo taupau tatatou fakapotopoto ʼi te faʼahi fakalaumālie pea mo totatou loto?
• Koteā te ʼu meʼa ʼaē ʼe mole feala ke pulihi ai te ʼofa ʼo Sehova ki tana ʼu kaugana?
• He koʼe ko te maʼu ʼo te ʼofa ʼo Sehova ʼe “lelei age ia ʼi te maʼuli”?
[Paki ʼo te pasina 13]
Kapau ʼe hage ʼe tou mavae mai te ʼofa ʼo te ʼAtua, pea ʼe feala ke tou fakatonutonuʼi totatou ʼaluʼaga
[Paki ʼo te pasina 15]
Neʼe mahino kia Paulo pe koʼe neʼe fakatagaʼi