Ke Lahi ʼAupito Tatatou Gāue
1 Ko te hahaʼi ʼa Sehova ʼe lahi ʼaupito tonatou maʼumaʼua. ʼE lahi ʼaupito ʼotatou ʼu maʼua ʼi totatou famili, ʼi te gāue, pea mo te faleako. Pea ʼe mole gata ʼaki aipe, ʼe “lahi ʼaupito te ʼu gāue ʼi te ʼAliki.” (1 Ko. 15:58) ʼE tonu ke tou teuteu ʼo ʼuhiga mo te faʼahi ʼaia pea ke tou ʼolo ki te ʼu fono ʼo te kokelekasio ʼi te vāhaʼa fuli. ʼE fakaloto mālohiʼi tatou ke ʼaua naʼa tou tuku he vāhaʼa ke fakalaka ka mole tou kau ki te gāue faka mafola. ʼE tonu ke tou fakatuʼutuʼu he temi ʼaoga moʼo fai tuʼumaʼu ʼo tatatou ako takitokotahi pea mo tatatou ako faka famili. Ko te ʼu tagata ʼāfea pea mo te ʼu tagata faifekau faka minisitelio ʼe lahi ʼaupito ʼonatou ʼu maʼua ʼi te kokelekasio. ʼI he tahi temi, ʼe ʼui mai kia tatou ke tou tokoni ki niʼihi ʼe ʼaoga kia nātou he tokoni.
2 ʼI ʼihi temi, ko ʼihi ia tatou e lagi ʼe lahi fau tonatou maʼumaʼua ʼi te ʼu meʼa fuli ʼaē ʼe tou fai. Kae, ko te hahaʼi ʼaē ʼe maʼumaʼua ʼe feala ke nātou kau ʼi te hahaʼi fiafia, mo kapau ʼe nātou fakapotopoto pea mo nātou taupau he manatu ʼe lelei.—Tnk. 3:12, 13.
3 Ko te ʼapositolo ko Paulo ʼe ko he tagata neʼe lahi ʼaupito tana gāue. Logope la tana gāue ʼaē ke ina maʼu ai te ʼu meʼa ʼe ʼaoga ki tona maʼuli ʼi tana faʼu te ʼu fale lā, neʼe lahi age tana gāue ʼi te ʼu ʼapositolo. Neʼe mole vaivai ia ʼi tana gāue evaselio, ʼo fai faka mafola ki te hahaʼi pea ʼi te ʼu ʼapi, kae neʼe mole ina meʼa noaʼi tona ʼu maʼua ʼaē ko te tagata tauhi ōvi ki te faga ōvi. (Gāue 20:20, 21, 31, 34, 35) Logope la tana maʼumaʼua, neʼe loto tuʼumaʼu ia Paulo ke lahi age tana gāue ʼi te gāue ʼa Sehova.—Vakaʼi ia Loma 1:13-15.
4 Neʼe taupau e Paulo tana fakapotopoto pea mo he loto fiafia ʼo ina tuku tana falala ki te mālohi ʼaē ʼe tuku age e Sehova. Neʼe ina fakatokagaʼi ko tona minisitelio ʼe fua lelei pea ʼe fakaloto fīmālie ki ai. (Filp. 4:13) Neʼe ina ʼiloʼi ʼe mole galoʼi anai e te ʼAtua tana gāue. (Hep. 6:10) Ko te fiafia ʼi te tokoni ki niʼihi ke nātou ʼiloʼi ia Sehova neʼe fakaloto mālohiʼi ai ia. (1 Tes. 2:19, 20) Ko tana ʼiloʼi papau ʼaē ʼe hoko anai tana ʼamanaki ʼaē ʼe fakatafito ki te Tohi-Tapu neʼe uga ai ia ia ke faiva ʼi tana gāue.—Hep. 6:11.
5 ʼE tonu foki ke tou tokagaʼi te ʼu fua lelei ʼo tatatou gāue. Ko tatatou ʼolo ki te ʼu fono ʼi te vāhaʼa fuli pea mo tatatou kau ʼaē kiai, ʼe ʼaoga ki tatatou tuputupu pea ʼe fakaloto mālohi ki niʼihi. (Hep. 10:24, 25) Ko tatatou faiga fakamalotoloto moʼo fakahā ʼo te logo lelei ki te hahaʼi fuli ʼe kau ki te tuputupu ʼo te kokelekasio, ʼo tou uga te fia logo ʼa te hahaʼi pea mo tou tokoni kia nātou ʼaē ʼe foʼofoʼou ke fakatahi mo tatou. (Soane 15:8) Ko tatatou lagolago ki niʼihi ʼaē ʼe ʼaoga kia nātou he tokoni ʼe fakatupu ai te faifaitahi, he logo tahi faka famili ʼi te kokelekasio. (Sake 1:27) Pea tahi ʼaē meʼa, ohage ko Paulo, ke ʼaua naʼa galo ia tatou ko tatatou maʼumaʼua ʼi te fai ʼo te ʼu gāue ʼaē ʼe lelei, ʼe fiafia ai Sehova ʼAtua. ʼE tou tokagaʼi te faʼahi ʼaia ohage he pilivilesio lahi tatatou gāue ʼaē kia te ia. Kia tatou ʼe mole he tahi meʼa ʼe lelei age ʼi te maʼuli ʼaenī!
6 ʼE ʼi ai te tahi fua lelei ʼe tou maʼu ʼi te lahi ʼaupito ʼo tatatou gāue. Mokā tou maʼumaʼua ʼi te kumi ʼo te ʼu meʼa fakalaumālie, ʼe hage kia tatou ʼe mole loaloaga ia te temi. ʼI tatatou ʼiloʼi ʼaē ko te fakalaka ʼo te ʼu ʼaho ʼe tou fakaōvi ai ki te mālama foʼou, ʼe tou tali fakalelei totatou maʼuli maʼumaʼua ʼi te temi nei. ʼE tou ʼiloʼi foki ʼe ko he aga fakapotopoto tatatou nonofo maʼumaʼua, mai tona ʼaluʼaga ʼaē ʼe mole lahi hotatou temi ke tou mulimuli ai ki he ʼu fakatuʼutuʼu vaʼiganoa ʼo te mālama ʼaenī.—Ef. 5:15, 16.
7 ʼE mahino papau ia, ʼe lahi ʼaupito te ʼu gāue ʼi te ʼAliki. Kae ʼe feala hatatou fiafia mokā ʼe tou haga tuku tatatou falala kia Sehova ʼAtua pea mo Sesu Kilisito, ʼaē ʼe nā fakaloto mālohi pea mo fakapale tatou.—Mat. 11:28-30; 1 Soane 5:3.