Ko Te Fakalogo Faka Lotu ʼi He Loto Fale ʼe Mavetevete ʼi Te Faʼahi ʼo Te Lotu
“ ʼE KOVI age tona mamahi ʼi te mamahi ʼaē ʼe fakatupu e he foʼi hoka. . . . ʼE ʼau logoʼi ʼe hage ko toku sino neʼe tataʼo katoa, kae ʼe mole feala ke sio he tahi kiai.” “ ʼI ʼihi temi, ʼi te lahi fau ʼo taku hoha ʼi toku maʼuli, ʼe ʼau fia līaki ia meʼa fuli . . . peʼe ke ʼau mavae io ʼoku pea ke ʼaua naʼa toe liliu mai.” “ ʼI ʼihi temi ʼe faigataʼa te manatu ki he meʼa ʼe lelei.”
Ko te ʼu palalau ʼaia ʼe fonu ai te ʼu meʼa ʼaē ʼo te loto, ʼe nātou fakahā te ʼu logo mamahi pea mo he ʼu logoʼi e he tahi tana nofo tokotahi. Ko te ʼu palalau ʼaia neʼe fai e te ʼu hahaʼi ʼe leakoviʼi nātou—te ʼu fakakoviʼi, mo te ʼu gaohi koviʼi, mo te leakoviʼi fakalainoa, mo te mole toe gūʼi ʼo he tahi—pea mo te gaohi koviʼi fakasino e te ʼu ʼohoana pea mo te ʼu hahaʼi ʼo te famili. He koʼe koa ʼe gaohi koviʼi feiā te ʼu hahaʼi ʼaia? ʼUhi pe ko te kehekehe ʼo te ʼu meʼa ʼe nātou tui kiai. ʼI te ʼu taʼi ʼaluʼaga ʼaia, ko te maʼuli ʼi he famili ʼe vaelua ʼi te faʼahi ʼo te lotu ʼe fakatupu faigataʼa moʼoni ki te tauhi ʼaē kia Sehova. Kae, tokolahi te kau Kilisitiano ʼe nātou felāveʼi mo te ʼaluʼaga ʼaia ʼe nātou maʼuliʼi te fakalogo faka lotu ʼo lava lelei.
Meʼa lelei pe foki, ko te taʼi mamahi ʼaia pea mo te taʼi hoha ʼaia ʼe mole maʼu ʼi te ʼu loto fale fuli ʼaē ʼe vaelua ʼi te faʼahi ʼo te lotu. Kae ko te meʼa ʼaia ʼe hoko. ʼE feiā koa tokotou loto fale, ohage ko te meʼa ʼaenī neʼe tou fakamatalatala? Koia, e lagi koutou faigataʼaʼia ia te taupau ʼo he fakaʼapaʼapa ki tokotou ʼohoana peʼe ki ʼakotou ʼu mātuʼa. Kapau ko koutou ko he fafine ʼohoana peʼe ko he fānau ʼe koutou maʼuli ʼi te taʼi ʼaluʼaga ʼaia, e feafeaʼi koa hakotou lava lelei ʼo fakahā te fakalogo faka lotu ʼi he loto fale ʼe mavetevete ʼi te faʼahi ʼo te lotu? Koteā te tokoni ʼe feala ke foaki e ʼihi? Pea koteā te manatu ʼa te ʼAtua ʼo ʼuhiga mo te faʼahi ʼaia?
He Koʼe Koa ʼe Faigataʼa Takita Fakalogo?
Ko te tokaga pe kia kita pea mo te maʼuli galo ʼo te mālama, ʼe ʼi ai tanā mafuliʼaga ki takotou ʼu agamāhani ʼaē ʼe heʼe haohaoa pea mo fakatupu faigataʼa takotou fakalogo faka lotu. ʼE ʼiloʼi e Satana te potu ʼaia, pea ko tana fakatuʼutuʼu ke ina holoʼi takotou faiga ʼaē ke koutou taupau tokotou ʼuhiga Kilisitiano. ʼE ina tau fakaʼaogaʼi ia nātou ʼo te famili ʼaē ʼe mole nātou faʼa leleiʼia peʼe mole pe nātou leleiʼia pea mo fakaʼapaʼapa ki te ʼu lekula faka lotu. Ko te ʼu meʼa ʼaē ʼe koutou faka maʼuhigaʼi ʼi te faʼahi fakalaumālie ʼo feiā mo te faʼahi ʼo te aga ʼaē ʼe tonu ke fai, ʼe kehekehe ʼaupito mo ʼaē ʼo tokotou famili ʼaē ʼe mole nātou tui ki te ʼu meʼa ʼaē ʼe koutou tui kiai. Ko te potu ʼaia ʼe faka ʼuhiga ʼaki ai te kehekehe ʼo te aga pea mo te ʼu gāue ʼaē ʼe fai. (1 Petelo 4:4) E lagi mālohi te ʼu meʼa ʼaē ʼe fai kia koutou ke tupu ʼaki ai hakotou līaki te ʼu lekula faka Kilisitiano, koteʼuhi neʼe koutou fakalogo ki te fakatotonu ʼaenī: “ ʼAua naʼa koutou toe kau mo nātou ki te ʼu gāue ʼaē ʼe mole hona fua ʼaē ʼa te fakapōʼuli.” (Efesi 5:11) Kia nātou, ʼe mole he meʼa ʼe koutou fai ʼe totonu. Ko te fihi ʼaia ʼe tupu ʼuhi pe ko tokotou lotu. Ko te faʼe, neʼe maʼumaʼua ki te tokaga ki tana fānau ʼaē ʼe mahaki, neʼe ina kole age ki tona ʼohoana peʼe feala hana tokoni age ki ai, pea neʼe ina fai age te tali ʼaenī, “ ʼE ke maʼu tou temi ki tau lotu; ʼe mole ʼaoga atu ia he tokoni ki te tokaga ki te fānau.” Ko te ʼu taʼi palalau ʼaia ʼe toe hilifaki mai ki te faigataʼa ʼaē ʼo te fakalogo.
ʼE ʼi ai foki ʼihi temi e lagi mole koutou ʼio ʼo ʼuhiga mo he ʼu meʼa ʼe mole fakafeagai moʼoni ki te Tohi-Tapu. Kae, ʼe koutou mahino ai ʼe koutou kau ki te famili pea ʼe ʼi ai tokotou ʼu maʼua ʼi te faʼahi ʼaia. ʼE ʼui fēnei e Connie, “ ʼE ʼau lotomamahi ʼi te manatu ki te faʼahiga gaohi ʼo mātou e taku tāmai koteʼuhi ʼe ʼau mahino ʼe ina logoʼi hana tō ʼāteaina. ʼE tonu ke ʼau fakamanatu ke ʼaua naʼa ʼau ʼita ki te fakafeagai ʼa taku tāmai. ʼE tonu ke ʼau fakakaukau ia ʼau ʼe ʼi ai te tupuʼaga mālohi ʼo te feiā ʼo te aga ʼo taku tāmai peʼe ko tana līaki mātou. Ko Satana ʼe ko te pule ʼo te tuʼu ʼo te ʼu faʼahiga meʼa ʼaenī.” ʼE fakahā fēnei mai e Susan, ʼaē neʼe ʼohoana ki te tagata ʼe mole tui ki te moʼoni: “ ʼI te kamataʼaga neʼe ʼau manatu ke ʼau mavete mo toku ʼohoana—kae neʼe tuku feiāʼi. Neʼe mahino kia ʼau, neʼe fakaʼaogaʼi ia ia e Satana moʼo ʼahiʼahiʼi ia ʼau.”
Ko te ʼu faiga ʼa Satana ʼaē ke koutou logoʼi ʼe mole hokotou ʼuhiga ʼe feala pe ke hage ia ʼe mālohi. ʼE feala ke fakalaka he ʼu ʼaho ʼe mole kei koutou fegūfi mo tokotou hoa. ʼE feala ke hage ʼe koutou maʼuli tokotahi. Ko te potu ʼaia ʼe ina holoʼi te falala pea mo te fakaʼapaʼapa ʼaē kia kita pea ʼe ina ʼahiʼahiʼi takotou fakalogo faka lotu. ʼE toe feala foki ki te tamaliki ke nātou gaʼegagaʼe fakasino ʼo feiā mo te faʼahi ʼo te loto. Ohage la, logope te fakafeagai ʼa tanatou ʼu mātuʼa, neʼe agatonu aipe te kau tūpulaga Kilisitiano e toko tolu ʼo kau ki te ʼu fono. Neʼe fakamoʼoni e te tokotahi ia nātou, ʼi te temi nei ʼe gāue temi katoa ki te minisitelio: “Neʼe mamahi ʼomātou ʼu loto pea mo gaʼegagaʼe; neʼe mole feala hamatou momoe; neʼe mātou lotomamahi ʼaupito.”
Koteā ʼAē ʼe Loto e Te ʼAtua Ke Koutou Fai?
Ko te fakalogo ki te ʼAtua ʼe ʼuluaki tuʼumaʼu, pea ko te fakalogo fakakoga ki te pule ʼo te ʼohoana ʼe tonu ke fai tuʼumaʼu ʼo mulimuli ki te takitaki ʼa Sehova. (Gāue 5:29) E lagi faigataʼa te faʼahi ʼaia, kae ko he meʼa ʼe feala. Koutou haga kumi tokoni mai te ʼAtua. ʼE loto e ia ke koutou “atolasio kia te ia ʼaki te laumālie pea mo te moʼoni,” pea mo koutou fakalogo pea mo mulimuli ki tana takitaki. (Soane 4:24) Ko te mālama ʼaē mai te Folafola ʼa te ʼAtua, ohage pe ko tana fakafonu te loto ʼaki te agalelei ʼaē ʼe totonu, ʼe ina uga he fakalogo ʼaki he lotolelei. Logope ko te ʼu ʼaluʼaga ʼo koutou takitokotahi ʼe feala ke fetogi, kae ko Sehova pea mo tana Folafola ʼe mole fetogi ia. (Malakia 3:6; Sake 1:17) Neʼe tuku e Sehova te ʼuhiga pule ki te tagata ʼohoana. Ko te faʼahi ʼaia ʼe moʼoni, tatau aipe pe ina tali te ʼuhiga pule ʼa Kilisito peʼe kailoa. (1 Kolonito 11:3) Logope ko te ʼuhiga pule ʼo te tagata ʼaē ʼe mole tui kia Sehova e lagi faigataʼa tona tali pea mo tona kātakiʼi mokā ina gaohi koviʼi pea mo fakalainoaʼi koutou, ʼe ʼui fēnei e te tisipulo ko Sake: “Ko te poto mai ʼoluga ʼe . . . fakalogo fakalelei.” (Sake 3:17) Ko te ʼiloʼi totonu ʼo te ʼuhiga pule ʼaia pea mo tona tali, ʼe fakamaʼua kiai te laumālie ʼa te ʼAtua, tāfito tona fua ʼaē ko te ʼofa.—Kalate 5:22, 23.
Ka koutou ʼofa ki he tahi, ʼe faigafua age te fakahā ʼo te fakalogo faka lotu ki te tuʼulaga pule ʼaē neʼe hinoʼi e te ʼAtua. ʼE tokoni fēnei mai e Efesi 5:33: “Ke koutou tahi ʼofa feiā ki tona ʼohoana, ohage pe ko kita totonu; pea ki tona faʼahi, ko te fafine ʼe tonu ke ina fai he fakaʼapaʼapa lahi ki tona ʼohoana.”
Koutou tokagaʼi ia Sesu. Neʼe leakoviʼi ia ia pea neʼe gaohi koviʼi tona sino, kae neʼe mole ina liufaki tuʼa tahi te kovi ki he tahi. Neʼe ina taupau tuʼumaʼu aipe tona maʼuli haohaoa. (1 Petelo 2:22, 23) Ke faʼa tali e Sesu he ʼu fakalainoaʼi lalahi feiā, neʼe ʼaoga ia ke ina maʼu he toe faʼa kātaki pea mo he ʼofa mamahi ki tana Tāmai, ko Sehova. Kae, ko te ʼofa “ ʼe ina kātakiʼi ia meʼa fuli.”—1 Kolonito 13:4-8.
Neʼe fakamanatuʼi age e Paulo ki tona kaugā gāue ko Timoteo, pea ʼe ina fakamanatuʼi mai kia tatou ia ʼaho nei te faʼahi ʼaenī: “Neʼe mole foaki mai e te ʼAtua he laumālie fula, kae ko he laumālie mālohi, ʼofa pea mo fakapotopoto.” (2 Timoteo 1:7) Ko te ʼofa mamahi kia Sehova pea mo Sesu Kilisito ʼe feala ke ina uga koutou ke koutou fakahā te fakalogo faka lotu, ʼi te temi ʼaē ʼe hage ai ko te ʼaluʼaga ʼe mole feala ke kātakiʼi. Ko te aga fakapotopoto ʼe tokoni anai kia koutou ke koutou taupau he sio fakapotopoto pea mo koutou haga faka maʼuhigaʼi takotou felogoi mo Sehova pea mo Sesu Kilisito.—Vakaʼi ia Filipe 3:8-11.
Ko Te ʼu ʼOhoana ʼAē ʼe Fua Lelei Kia Nātou Tanatou Fakahā ʼo Te Fakalogo Faka Lotu
ʼI ʼihi temi, e lagi tonu ke koutou fakatalitali fualoa ke koutou sio ki te tokaga ʼa Sehova ki takotou ʼu fihifihia. Kae, ko tona nima ʼe mole nounou ʼi he temi. ʼE tokoni fēnei e te fafine neʼe fua lelei kia ia tana fakahā ʼo te fakalogo faka lotu, “Koutou fai tuʼumaʼu te ʼu meʼa ʼe faka fealagia atu pea mo te ʼu pilivilesio ʼaē ʼe tuku atu e Sehova—ko te tauhi kia te ia ʼi te ʼu fono pea mo te ʼu fakatahi, ko te ako, ko te gāue faka mafola, pea mo te faikole.” Ko ʼakotou ʼu faiga ʼaē ʼe tapuakina e Sehova, ka mole ko te ʼu ikuʼaga pe ʼo te ʼu meʼa ʼaē neʼe koutou fai. Ia 2 Kolonito 4:17, neʼe ʼui fēnei e te ʼapositolo ko Paulo ‘ko te mamahi ʼe faka temi pe, kae ʼe ina fakatupu maʼa tatou he kolōlia ʼe heʼegata.’ Koutou metitasio ki te potu ʼaia. ʼE liliu anai te meʼa ʼaia, ko he meʼa fakaloto mālohiʼi ʼo koutou. ʼE ʼui fēnei e te fafine: “Ko toku maʼuli faka famili ʼe mole fakaaʼu ke lelei age, pea ʼi ʼihi temi ʼe ʼau feʼekeʼaki peʼe fiafia ia Sehova kia ʼau. Kae ko te meʼa e tahi ʼe ʼau faka ʼuhiga ko he tapuakina mai ia Sehova, ko taku maʼu he fakakaukau lelei age ʼi toku ʼohoana ʼi te ʼu ʼaluʼaga faigataʼa ʼaia. ʼI totatou ʼuhiga Kilisitiano, ko te ʼiloʼi ʼaē ko tatatou ʼu aga ʼe nātou fakafiafia ia Sehova ʼe ina fakaliliu ai te fihifihia katoa ko he meʼa ʼe ʼaoga.”
ʼE fakapapau e Sehova ʼe mole ina tuku anai ke hoko kia koutou he ʼu ʼaluʼaga ʼe mole koutou lava kātakiʼi. Koutou falala kia ia. ʼE ina ʼiloʼi lelei age te ʼu meʼa ia koutou, pea ʼe ina ʼiloʼi lelei age ia koutou, ia koutou totonu pe. (Loma 8:35-39; 11:33; 1 Kolonito 10:13) Ko te faikole kia Sehova ʼi he ʼu ʼaluʼaga faigataʼa ʼe ko he tahi tokoni ʼaia. Koutou faikole ke takitaki koutou e tona laumālie, tāfito la mokā mole koutou ʼiloʼi pe ko te ala fea ʼaē ʼe tonu ke koutou ʼolo ai peʼe ko te fakaʼaluʼalu ʼo he ʼaluʼaga. (Tāʼaga Lea 3:5; 1 Petelo 3:12) Koutou faikole tuʼumaʼu kia te ia ke koutou maʼu te faʼa kātaki, mo te loto lolomi, pea mo te agavaivai ke koutou fakalogo ki te tuʼulaga pule ʼi tokotou maʼuli. Neʼe ʼui fēnei e te tagata fai pesalemo: “Ko Sehova ʼe ko toku Maka, pea mo toku tule mālohi, pea ʼe ko Ia ʼaē ʼe ina foaki mai ke ʼau hāo.” (Pesalemo 18:2) Ko te manatuʼi ʼo te faʼahi ʼaia ko he tokoni fakaloto mālohi maʼa nātou ʼaē ʼe nonofo ʼi te ʼu loto fale ʼaē ʼe mavetevete ʼi te faʼahi ʼo te lotu.
Ia meʼa fuli, koutou tuku ʼakotou ʼu faiga fuli ke koutou fakaliliu tokotou nofo ʼohoana, ko he meʼa fakafiafia. ʼIo, neʼe kua ʼiloʼi e Sesu ko te logo lelei ʼe ina fakatupu anai he ʼu mavetevete. Kae, ʼofa pe naʼa hoko he mavete ʼuhi ko takotou aga. (Mateo 10:35, 36) ʼAki te manatu ʼaia ʼi totatou ʼatamai, ko te gāue tahi ʼe ina fakasiʼisiʼi te ʼu fihifihia faka taumatuʼa. ʼAki pe takotou fakahā te aga ʼaia ʼe lelei, ʼe feala ke lahi hana tokoni ki te tāʼofi ʼo te ʼu fihifihia ke ʼaua naʼa fakatupu ʼaki he ʼu fihifihia ʼe kovi ʼaupito pea mo he ʼu felogoi kehekehe. ʼE maʼuhiga ʼaupito te faʼa kātaki pea mo te ʼofa. Koutou ‘agamālū’ pea mo koutou ‘lolomi ia koutou ʼi te agakovi.’—2 Timoteo 2:24.
Neʼe liliu te ʼapositolo ko Paulo “ko te faʼahiga meʼa kehekehe maʼa te hahaʼi kehekehe.” (1 Kolonito 9:22) ʼO toe feiā pe, logope ʼe mole koutou fakatō laloʼi ʼakotou ʼu maʼua faka Kilisitiano, e lagi ʼaoga ke koutou fakatonutonuʼi takotou polokalama ke lahi te temi ʼaē ʼe koutou nonofo ai mo tokotou ʼohoana pea mo tokotou famili. Koutou foaki he temi ʼe lahi ʼaupito kia ia ʼaē neʼe koutou fili ke maʼuli mo koutou. Koutou fakahā te fakaʼapaʼapa faka Kilisitiano. ʼE ko he fakahā ʼaia ʼo te fakalogo faka lotu.
Ko he fafine ʼohoana ʼe manavasiʼi ki te ʼAtua pea mo fakalogo ʼe aga malū pea mo agalelei, ʼe ina fakatokagaʼi ʼe faigafua age te fakahā ʼo te fakalogo faka lotu. (Efesi 5:22, 23) Ko te ʼu palalau ʼaē ʼe mālie, “neʼe fakamagoni ʼaki te māsima,” ʼe nātou tokoni ki te fakasiʼisiʼi ʼo te hoko putuputu ʼo te ʼu fihi ʼaē ʼe feala ke hoko.—Kolose 4:6; Tāʼaga Lea 15:1.
ʼE fakatokaga atu e te agapoto faka lotu ke koutou fakagata fakavilivili te ʼu fihifihia pea mo koutou fakatokatoka ke tokalelei ʼaki he ʼu palalau lelei ʼe fakatupu lotomālohi, ʼi hakotou ʼolo ʼo momoe ʼaki he loto “ ʼita.” (Efesi 4:26, 29, 31) ʼE maʼua ki te faʼahi ʼaia ke ʼi ai te agavaivai. Koutou falala katoa kia Sehova ke ina fakamālohiʼi koutou. ʼAki te agavaivai, neʼe fakamoʼoni fēnei e te fafine Kilisitiano: “ ʼI te hili ʼo taku faikole fakamalotoloto, neʼe ʼau logoʼi te fakamālohiʼi ʼo ʼoku e te laumālie ʼa Sehova ke ʼāsili age toku ʼofa ki toku ʼohoana.” ʼE tokoni fēnei e te Folafola ʼa te ʼAtua: “ ʼAua naʼa koutou liufaki ki he tahi te agakovi moʼo fetogi ʼaki te agakovi. . . . Koutou haga mālo aipe ʼi te agakovi ʼaki te agalelei.” (Loma 12:17-21) ʼE ko he tokoni fakapotopoto ia ʼaenī pea ʼe ko te ala ʼo te fakalogo faka lotu.
Ko He Kau Tamaliki ʼe Nātou Fakahā Te Fakalogo Faka Lotu
Koʼeni te tokoni ʼa Sehova kia koutou, ʼu tamaliki ʼaē ʼe maʼuʼuli ʼi te ʼu famili ʼe mavetevete ʼi te faʼahi ʼo te lotu: “Koutou talagafua ki ʼakoutou ʼu mātuʼa ia meʼa fuli pe, heʼe ko te meʼa ʼaia ʼe lelei ʼi te ʼAliki.” (Kolose 3:20) Koutou fakatokagaʼi ko te ʼAliki ko Sesu Kilisito ʼe tonu ke tokagaʼi. Koia, ko te fakalogo ki te ʼu mātuʼa ʼe mole ko he fakamaʼua katoa. ʼI he faʼahiga fakaliliu ko te tokoni ʼo Gāue 5:29, ʼaē ke “fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata,” ʼe toe faka ʼuhiga pe foki ki te kau tūpulaga. ʼE malaga he ʼu lakaga ʼe tonu anai ke koutou fai he tonu ʼo ʼuhiga mo te meʼa ʼaē ʼe tonu ke koutou fai ʼo fakatafito ki te meʼa ʼaē ʼe koutou ʼiloʼi ʼe lelei ʼo mulimuli ki te Tohi-Tapu. E lagi iku ai ki he faʼahiga fakatūʼa ʼi takotou fakafisi ʼi te fai ʼo he meʼa ʼo te tauhi hala. Logope ko te faʼahi ʼaia ʼe ko he meʼa ʼe mole fakatupu fiafia, ʼe feala ke koutou maʼu he fakaloto fīmālie pea mo toe feala pe foki ke koutou fakafiafia ʼi takotou mamahi ʼuhi ko takotou fai ʼo te meʼa ʼaē ʼe totonu ia mata ʼo te ʼAtua.—1 Petelo 2:19, 20.
Mai tona ʼaluʼaga ʼaē ko ʼakotou ʼu manatu ʼe takitaki e te ʼu fakatuʼutuʼu ʼo te Tohi-Tapu, e lagi kehekehe ʼakotou ʼu manatu mo ʼaē ʼo takotou ʼu mātuʼa ʼi ʼihi faʼahiga puani. ʼE mole faka ʼuhiga leva ko nātou ko ʼakotou ʼu fili. Tatau aipe pe mole ko he ʼu kaugana ʼa Sehova kua nātou foaki tonatou maʼuli ki ai, ʼe tāu mo nātou he fakaʼapaʼapa ʼe mata feʼauga. (Efesi 6:2) Neʼe ʼui fēnei e Salomone: “Fakalogo ki tau tāmai ʼaē neʼe ina fakatupu koe, pea ʼaua naʼa ke fehiʼa ki tau faʼe.” (Tāʼaga Lea 23:22) Koutou faigaʼi ke koutou mahino ki te lotomamahi ʼe logoʼi e nātou ʼi takotou faiga ʼi he tui ʼe mata faikehe kia nātou. Koutou felogoi mo nātou, pea “ke ʼiloʼi takotou fakapotopoto e te tagata fuli pe.” (Filipe 4:5) Koutou fakahā te ʼu meʼa ʼe koutou logoʼi ʼi tokotou loto pea mo te ʼu meʼa ʼe koutou hoha kiai. Koutou pipiki maʼu ki te ʼu fakatuʼutuʼu faka lotu, kae, “kapau ko he meʼa ʼe feala, tāfito mo kapau ko he meʼa ʼe fakalogo kia koutou, koutou maʼuli ʼi te tokalelei mo te tagata fuape.” (Loma 12:18) Ko takotou fakalogo ki te pule ʼo takotou ʼu mātuʼa ʼi te temi nei ʼe ina fakahā kia Sehova ʼe koutou holi ke koutou haga fakalogo ohage ko he tagata fakalogo ʼo te Puleʼaga.
Te Meʼa ʼe Feala Ke Fai e Niʼihi
ʼE ʼaoga ki te kau Kilisitiano ʼaē ʼe maʼuʼuli ʼi te ʼu famili ʼe mavetevete ʼi te faʼahi ʼo te lotu, he lagolago pea mo he lotomahino mai tanatou ʼu kaugā fagona ʼi te tui. Ko te potu ʼaia ʼe ʼiloga lelei ʼi te ʼu palalau ʼa te tahi neʼe ina ʼui fēnei: “ ʼE ʼau logoʼi ʼe mole haku ʼamanaki e tahi pea mo he tokoni, koteʼuhi ʼe mole he meʼa ʼe lava fai e he tahi, pea ʼe mole he meʼa ʼe ʼau lava fai moʼona fetogi. ʼE ʼau falala kia Sehova ʼo ʼuhiga mo te fakahoko ʼo tona finegalo ʼi tomatou famili, logo aipe he faʼahiga ʼaluʼaga ʼe hoko kia ʼau.”
Ko te fakatahi mo te ʼu tēhina pea mo te ʼu tuagaʼane fakalaumālie ʼi te ʼu fono faka Kilisitiano ʼe ko he holaʼaga. Neʼe fakamatalatala tonu pe e te fafine ʼaia tona maʼuli ʼo ina ʼui “ ʼe hage ʼe faʼufaʼu e he ʼu faʼahiga maʼuli kehekehe e lua. Ko te tahi ʼe maʼua ke ʼau ʼi ai, pea ko te tahi ʼe ʼau fiafia ʼi te ʼi ai.” Ko te ʼofa ʼo te fale tautehina ʼe ko ia ʼaē ʼe ina faka fealagia kia nātou ʼaē ʼe mamahi ke nātou kātaki pea ke nātou tauhi ʼi te ʼu ʼaluʼaga fuli. Koutou manatuʼi ia nātou ʼi ʼakotou ʼu faikole. (Efesi 1:16) Koutou fai tuʼumaʼu he ʼu palalau lelei pea mo fakaloto mālohi kia nātou, ʼi te lakaga fuli. (1 Tesalonika 5:14) Mokā ʼe ʼaoga pea mo mata feʼauga, koutou manatuʼi ia nātou ʼi ʼakotou ʼu gāue faka teokalatike pea mo te ʼu temi fakafiafia.
Te ʼu Tapuakina Pea Mo Te ʼu Lelei ʼe Maʼu ʼi Te Fakalogo Faka Lotu
Koutou metitasio ki te ʼu tapuakina pea mo te ʼu lelei ʼaē ʼe maʼu ʼi te fakahā ʼo te fakalogo faka lotu ʼi he loto fale ʼe mavetevete ʼi te faʼahi ʼo te lotu. Koutou faiga tuʼumaʼu ke koutou fakalogo. ‘ ʼAua naʼa koutou fiu.’ (Kalate 6:9) Ko te faʼa kātaki ʼi he ʼu ʼaluʼaga faigataʼa pea mo he ʼu aga heʼe faitotonu “ ʼuhi ko tana mahino ki te ʼAtua . . . ʼe ko he meʼa ia ʼe leleiʼia” e te ʼAtua. (1 Petelo 2:19, 20) Koutou haga fakalogo, mo kapau ʼe mole fakatō laloʼi te ʼu fakatuʼutuʼu faitotonu pea mo te ʼu lekula ʼa Sehova. Ko te faʼahi ʼaia ʼe ina fakahā te agatonu ki te fakatuʼutuʼu ʼa Sehova. ʼE feala pe ke hāofaki e takotou aga faka lotu te maʼuli ʼo tokotou ʼohoana, mo takotou fānau, pea mo ʼaē ʼo takotou ʼu mātuʼa.—1 Kolonito 7:16; 1 Petelo 3:1.
ʼI takotou faiga ʼaē ke koutou fakahoko te ʼu meʼa ʼe fakaʼui pea mo te ʼu meʼa ʼe fakaʼamu ʼo he famili ʼe mavetevete ʼi te faʼahi ʼo te lotu, koutou manatuʼi te maʼuhiga ʼo te nofo agatonu kia Sehova ʼAtua pea mo Sesu Kilisito. ʼE lagi feala ke koutou tō ʼi he ʼu fihifihia lahi, kae ko te līaki ʼo te agatonu ʼe ko te līaki ʼo te meʼa fuli, ʼo kau kiai te maʼuli. Neʼe ʼui fēnei e te ʼapositolo ko Paulo: “Ko te ʼAtua . . . neʼe palalau mai kia tatou, ʼi te fakaʼosi ʼo te ʼu ʼaho ʼaenī, ʼaki te ʼAlo ʼaē neʼe ina hili ki ai te tōfiga ʼo te meʼa fuli, pea ʼaki ia ia neʼe ina fai te ʼu tuʼu ʼo te ʼu faʼahiga meʼa.” Ko te ʼiloʼi ʼo te “fakamaʼuli lahi ʼaupito” ʼaia ʼe ina fakamālohiʼi anai koutou ke koutou fakalogo.—Hepeleo 1:1, 2; 2:3.
Ko takotou fakalogo pea mo takotou pipiki mālohi ki te ʼu lekula faitotonu ʼo ʼuhiga mo te aga ʼaē ʼe tonu ke fai, ʼe ko he puipui fakatupu hāofaki kia koutou pea mo tokotou hoa ʼaē ʼe mole tui kia Sehova. Ko te agatonu ʼe ina fakatupu he ʼu noʼo mālohi ʼo te famili. ʼE ʼui fēnei ia Tāʼaga Lea 31:11 ʼo ʼuhiga mo he fafine ʼe mafai pea mo agatonu: “Ko te loto ʼo tona tagata pule ʼe falala kia te ia.” Ko takotou aga fakapoipoi pea mo takotou fakaʼapaʼapa lahi ʼe feala ke nā avahi te ʼu mata ʼo tokotou ʼohoana ʼaē ʼe mole tui kia Sehova. ʼE feala ke ina ʼaumai ia ia ke ina tali te moʼoni ʼa te ʼAtua.
ʼIo, ko te fakalogo faka lotu ʼe maʼuhiga pea ʼe ina fakatupu hāofaki. Koutou faikole ʼo ʼuhiga mo te potu ʼaia ʼi tokotou maʼuli faka famili. ʼE iku ai anai ki he fakakaukau ʼe fīmālie pea ʼe ina fakavikiviki anai ia Sehova.