Kau Tūpulaga, Koutou Fili Ke Koutou Tauhi Kiā Sehova
“Koutou fili maʼa koutou ʼi te ʼaho nei pe ko ai ʼaē ka koutou tauhi ki ai.”—Sosue 24:15.
1, 2. Ko te faʼahiga papitema hala fea neʼe fai ʼi te Keletiate?
“TUKU [te fānau] ke nātou liliu ko he kau Kilisitiano ʼi te temi ʼaē ʼe feala ai ke nātou ʼiloʼi pe ko ai ia Kilisito.” Ko te tagata faitohi ko Tertullien neʼe ina fai te ʼu palalau ʼaia ʼi te fakaʼosi ʼo te lua sēkulō ʼo totatou temi. Neʼe mole ina tali te papitemaʼi ʼo te kihiʼi tamaliki kei meamea, neʼe ko he aga neʼe kamata fai ʼi te Lotu Faka Kilisitiano ʼaposita ʼo tona temi. Ko Auguste, te Tāmai ʼo Te ’Ēkelesia, neʼe mole manatu tahi ia mo Tertullien pea mo te Tohi-Tapu, ʼo ina ʼui ko te papitema ʼe ina toʼo te ʼuli ʼo te agahala olisinale pea ko te tamaliki ʼaē ʼe mamate kae mole heʼeki papitema, ʼe lī nātou ki te ʼifeli. Ko te akonaki ʼaia neʼe tupu ai te toʼotoʼoga ʼaē ke foimo papitemaʼi te kihiʼi tamaliki kei meamea ʼi tonatou ʼosi fānauʼi.
2 Tokolahi te ʼu lotu lalahi ʼo te Keletiate ʼe kei nātou papitemaʼi te ʼu kihiʼi tamaliki kei meamea. Tahi ʼaē meʼa, ʼi te hisitolia, ko te papitemaʼi fakakinau ʼo te kau “pagani” ʼo te ʼu fenua neʼe ʼohofiʼi neʼe fai e te kau pule pea mo te kau takitaki lotu ʼo te ʼu fenua ʼaē ʼe ʼui ko he ʼu fenua Kilisitiano. Kae ko te papitemaʼi ʼo te kihiʼi tamaliki kei meamea pea mo te papitemaʼi fakakinau ʼo te hahaʼi lalahi ʼe mole tuʼu ia ʼi te Tohi-Tapu.
Iā ʼAho Nei, ʼe Mole Fakakinauʼi He Tahi Ke Foaki Tona Maʼuli Ki Te ʼAtua
3, 4. Koteā ʼaē ʼe feala ke tokoni ki te ʼu fānau ʼa he ʼu mātuʼa kua foaki tonatou maʼuli kiā Sehova, ke nātou lotolelei ʼo foaki mo nātou tonatou maʼuli?
3 ʼE fakahā ʼi te Tohi-Tapu kiā mata ʼo te ʼAtua, ko te tamaliki ʼe nātou maʼoniʼoni tatau aipe peʼe ko he tokotahi ʼi tanatou ʼu mātuʼa ʼe ko he Kilisitiano agatonu. (1 Kolonito 7:14) Ko te fānau ʼaia ʼe ko he ʼu kaugana koa kua foaki kiā Sehova? Kailoa. Kae ko te fānau ʼaē neʼe pusiaki e he ʼu mātuʼa kua nātou foaki tonatou maʼuli kiā Sehova, ʼe akoʼi nātou ke feala ki te fānau ʼaia ki ʼamuli ke nātou filifili ke nātou foaki tonatou maʼuli kiā Sehova. Neʼe tohi fēnei e te Hau poto ko Salomone: “Ê toku foha, mulimuli ki te fakatotonu ʼo tau tāmai, pea ʼaua naʼa ke līaki te lao ʼo tau faʼē. . . . Ka ke haʼele anai, pea ʼe ina taki anai koe; ka ke moe anai, pea ʼe ina taupau anai koe; pea ka ke ʼala ake anai, pea ʼe tokaga anai kiā te koe. Koteʼuhi ko te fakatotonu ʼe ko he mālama taki, pea ko te lao ʼe ko he mālama, pea ko te ʼu fakatonutonu ʼo te akonaki ʼe ko te ala ʼo te maʼuli.”—Tāʼaga Lea 6:20-23.
4 Ko te takitaki ʼa te ʼu mātuʼa Kilisitiano ʼe feala ko he puipui ki te kau tūpulaga, mo kapau ʼe nātou fia mulimuli kiai. Neʼe toe ʼui fēnei e Salomone: “Ko te foha poto, ʼe ina fakafiafiaʼi te tāmai, pea ki he tama vale ʼe ko he fakaloto mamahi ia ʼo tana faʼē.” “Ko koe, Ê toku foha, fakalogo pea ke liliu ʼo poto, pea mo taki tou loto ʼi te ala.” (Tāʼaga Lea 10:1; 23:19) Ei, ke fua lelei kiā koutou kau tūpulaga ia te ʼu akonaki ʼo takotou ʼu mātuʼa, ʼe tonu ke koutou fia tali mokā tokoniʼi koutou pea mo fakatonutonuʼi koutou. ʼE mole koutou tutupu ake ʼaki te poto, kae ʼe feala ke koutou “liliu ʼo poto” pea mo koutou mulimuli ʼaki he lotolelei ki “te ala ʼo te maʼuli.”
Koteā Te Faka ʼUhiga ʼo Te Akoʼi ʼo Te ʼu Manatu ʼa Sehova?
5. Koteā te tokoni neʼe fai e Paulo ki te ʼu tāmai pea mo te fānau?
5 Neʼe tohi fēnei e te ʼapositolo ko Paulo: “ ʼU fānau, koutou fakalogo ki takotou ʼu mātuʼa ʼi te fakatahi mo te ʼAliki, heʼe totonu te meʼa ʼaia: ‘Faka maʼuhiga tau tāmai pea mo tau faʼē,’ ko te ʼuluaki folafola ʼaia ʼe kau kiai mo te fakapapau: ‘Koteʼuhi ke fua lelei kiā te koe pea ke ke maʼuli fualoa ʼi te kele.’ ʼU tāmai, ʼaua naʼa koutou fai ke ʼiʼita takotou fānau, kae ke koutou haga akoʼi age kiā nātou te akonaki pea mo te ʼu manatu ʼa Sehova.”—Efeso 6:1-4, MN.
6, 7. Koteā ʼaē ʼe tonu ke fai e te ʼu mātuʼa moʼo akoʼi age ki tanatou fānau ia “te ʼu manatu ʼa Sehova,” pea he koʼe ʼe mole ko he fakamālohiʼi ʼaia ʼa te ʼu mātuʼa ki tanatou fānau?
6 ʼE ko he aga heʼe faitotonu koa ki he ʼu mātuʼa Kilisitiano hanā takitaki tanā fānau ʼo nā akoʼi age kiā nātou “te akonaki pea mo te ʼu manatu ʼa Sehova”? Kailoa ia. Ko ai ʼaē ʼe ina tauteaʼi anai he ʼu mātuʼa ʼe nā akoʼi age ki tanā fānau te meʼa ʼaē ʼe lelei pea mo te aga ʼaē ʼe tonu ke fai? ʼE mole fakamāuʼi te hahaʼi ʼaē ʼe mole tui ki te ʼAtua heʼe nātou akoʼi age ki tanatou fānau ʼe mole he ʼAtua. ʼE ko he maʼua ki te kau Katolika ke nātou pusiaki tanatou fānau ʼi te lotu Katolika, pea ʼe mole fakamāuʼi nātou ʼi tanatou faiga ʼaia. ʼO toe feiā pe, ʼe mole tonu ke ʼui ko te kau Fakamoʼoni ʼa Sehova ʼe nātou puleʼi te fakakaukau ʼo tanatou ʼu fānau, mokā nātou akoʼi kiā nātou ke nātou mulimuli ki te ʼu manatu ʼa Sehova, ʼo ʼuhiga mo te ʼu moʼoni tāfito pea mo te ʼu pelesepeto ʼo ʼuhiga mo te aga ʼaē ʼe lelei.
7 Ohage ko tona ʼui ʼi te tohi Theological Dictionary of the New Testament, ko te kupu faka Keleka ʼaē neʼe fakaliliu ʼaki te kupu “manatu” iā Efeso 6:4, ʼe faka ʼuhiga ki he faʼahiga fai moʼo “fakatonutonuʼi ʼo te ʼatamai, he meʼa ʼe hala, ke lelei age te aga ki te ʼAtua.” E feafeaʼi mokā fakafisi e he tūpulaga te ako ʼo tana ʼu mātuʼa ʼuhi ko te fakaneke ʼo he ʼu kaumeʼa, heʼe fia fai ohage ko nātou? Ko ai ʼaē ʼe feala ke tou ʼui ʼe ina puleʼi tana fakakaukau—ko te ʼu mātuʼa peʼe ko te ʼu kaumeʼa ʼo te tūpulaga? Kapau ʼe fakamālohiʼi e te ʼu kaumeʼa ia te tūpulaga ke toloke, peʼe ke ʼinu, peʼe ke ina fai he aga heʼeʼaoga, ʼe tonu koa ke fakamāuʼi te ʼu mātuʼa ʼi tanā faiga ke fetogi te fakakaukau ʼa tanā tamasiʼi pea mo tokoni kiā ia ke ina ʼiloʼi te ʼu fua kovi ʼo te taʼi aga ʼaia?
8. Koteā ʼaē neʼe fai e te faʼē pea mo te kui fafine ʼa Timoteo, ke nā ‘fakalotoʼi ia ia ke tui’?
8 Neʼe faitohi fēnei e te ʼapositolo ko Paulo ki te tūpulaga ko Timoteo: “Haga nofo ʼi te ʼu meʼa ʼaē neʼe ke ako pea neʼe fakalotoʼi koe ke ke tui kiai, ʼi tau ʼiloʼi ʼaē pe ko ai ʼaē neʼe nātou akoʼi atu kiā koe te ʼu meʼa ʼaia, pea talu mai tau kei veliveli ʼe ke ʼiloʼi te ʼu tohi taputapu, ʼaē ʼe feala ke nātou fakaliliu koe ke ke poto ki te fakamaʼuli, ʼaki te tui ʼaē ʼo ʼuhiga mo Kilisito Sesu.” (2 Timoteo 3:14, 15, MN ) Talu mai te kei veliveli ʼa Timoteo, ko tana faʼē pea mo tana kui fafine neʼe nā fakatafito mālohi tana tui ki te ʼAtua ʼaki te ʼatamai mālama ʼo te Tohi-Tapu. (Gaue 16:1; 2 Timoteo 1:5) Ki muli age, ʼi tanā liliu ko he ʼu fafine Kilisitiano, neʼe mole nā fakakinauʼi ia Timoteo ke tui kae neʼe nā “fakalotoʼi” ia ia, ke fakakaukauʼi lelei e Timoteo ʼo mulimuli ki te ʼatamai mālama ʼo te Tohi-Tapu.
ʼE Fakaafe Koe e Sehova Ke Ke Filifili
9. (a) Koteā ʼaē neʼe makehe ai te hahaʼi ʼaē neʼe fakatupu e Sehova, pea koteā tona tupuʼaga? (b) Neʼe fakaʼaogaʼi feafeaʼi e te ʼAlo ʼulu tokotahi ʼa te ʼAtua tona loto faʼitaliha?
9 Neʼe feala pe ke faʼu e Sehova te hahaʼi ohage ko ni ʼu masini, ke ina fakatuʼutuʼu ke nātou fai tona finegalo pea ke mole nātou fai he tahi age meʼa. Kae neʼe ina fakatupu makehe nātou, ʼaki te loto faʼitaliha. ʼE loto e totatou ʼAtua ke fakalogo te hahaʼi kiā te ia ʼaki he lotolelei. ʼE fiafia ʼi tana sio ki te hahaʼi, mātua pea mo tūpulaga, ʼe nātou tauhi kiā te ia heʼe nātou ʼoʼofa kiā te ia. Ko te faʼifaʼitaki lelei tokotahi ʼo he tahi neʼe fakalogo ki te finegalo ʼo te ʼAtua, ʼe ko tona ʼAlo ʼulu tokotahi, ʼaē neʼe ʼui fēnei e Sehova ʼo ʼuhiga mo ia: “Ko ia nei ko toku ʼAlo, ia te ʼofaina, ʼaenī kua au fiafia ʼaupito ia te ia.” (Mateo 3:17, MN ) Neʼe ʼui fēnei e te ʼAlo ʼuluaki tupu ʼaia ki tana Tāmai: “Neʼe au fiafia, Ê toku ʼAtua, ʼi te fai ʼo tou finegalo, pea ko tau lao ʼe nofo ʼi toku loto.”—Pesalemo 40:8; Hepeleo 10:9, 10.
10. Koteā ʼaē ʼe tonu ke tou fai ke tali e Sehova tatatou tauhi?
10 ʼO ʼuhiga mo nātou ʼaē ʼe nātou tauhi kiā Sehova ʼo fakalogo ki te takitaki ʼo tona ʼAlo, ʼe ʼamanaki e Sehova ke nātou toe fia fakahoko feiā mo nātou ia Tona finegalo. Neʼe fakakikite fēnei ʼi te hiva ʼo te tagata fai pesalemo: “Ko tau hahaʼi ʼe nātou foaki fakamalotoloto anai ia nātou ʼi te ʼaho ʼo tou ʼu mālohi faka solia. ʼI te taulekaleka ʼo te maʼoniʼoni, ʼi te mafoa ʼo te ʼaho, kua ʼi ai tau kau tūpulaga ohage ko he ʼu mosiʼi hahau.” (Pesalemo 110:3) Ko te kautahi kātoa ʼa Sehova, ko te tahi koga ʼi selo pea mo te tahi koga ʼi te kele, ʼe gāue ʼo fakalogo ʼaki te ʼofa ki te finegalo ʼo te ʼAtua.
11. Koteā ʼaē ʼe feala ke filifili ke fai e te kau tūpulaga ʼaē ʼe pusiaki e he ʼu mātuʼa kua nā foaki tonā maʼuli kiā Sehova?
11 Koia, kau tūpulaga, ʼe tonu ke mahino kiā koutou ʼe mole fakakinauʼi koutou e takotou ʼu mātuʼa peʼe ko te ʼu tagata ʼāfea ʼo te kokelekasio ke koutou papitema. ʼE tonu ko koutou ʼaē ʼe koutou loto ke koutou tauhi kiā Sehova. ʼI te temi muʼa, neʼe ʼui fēnei e Sosue ki te kau Iselaele: “Koutou tauhi kiā [Sehova] ʼaki te faitotonu pea mo te moʼoni . . . Koutou fili maʼa koutou ʼi te ʼaho nei pe ko ai ʼaē ka koutou tauhi ki ai.” (Sosue 24:14-22) ʼO toe feiā, ʼe tonu ke koutou filifili e koutou ke foaki tokotou maʼuli kiā Sehova pea mo fai tona finegalo.
Koutou Fakahoko Tokotou Maʼua
12. (a) Logola ʼe akoʼi e te ʼu mātuʼa tanatou fānau, kae koteā ʼaē ʼe mole feala ke nātou fai maʼa nātou? (b) Ko te temi fea ʼaē ʼe maʼu ai e he tūpulaga iā muʼa ʼo Sehova te maʼua ʼaē ke ina filifili te meʼa ʼaē ka ina fai?
12 ʼE hoko mai te temi ʼaē ʼe mole kei puipui koutou kau tūpulaga e te agatonu ʼo takotou ʼu mātuʼa. (1 Kolonito 7:14) Neʼe tohi fēnei e te tisipulo ko Sakopo: “Ko he tahipe e ina iloi te fai o te mea ae e lelei, pea e mole ina fai ia, e ko te agahala ia kia te ia.” (Sakopo 4:17) ʼE mole feala ke tauhi te ʼu mātuʼa ki te ʼAtua maʼa tanatou ʼu fānau pea ʼe mole feala ki te fānau hanatou tauhi ki te ʼAtua maʼa tanatou ʼu mātuʼa. (Esekiele 18:20)ʼE ke ʼiloʼi koa ia Sehova pea mo tana ʼu fakatuʼutuʼu? Kua feala koa ke ke fakamahino te ʼu meʼa ʼaē ʼe ke ako pea mo ke kamata felogoi mo ia? ʼE mole tonu koa la ke manatu e te ʼAtua ʼe feala ke ke filifili ke ke tauhi kiā te ia?
13. Koteā te ʼu fehuʼi ʼe tonu ke fai e te kau tūpulaga ʼaē ʼe mole heʼeki papitema?
13 Ko koe koa ko he tūpulaga mole heʼeki ke papitema, neʼe pusiaki koe e te ʼu mātuʼa ʼe nā tauhi ki te ʼAtua, mo ke kau ki te ʼu fono pea lagi ke faka mafola te logo lelei ʼo te Puleʼaga? Kapau koia, pea ʼe tonu ke ke fai fakalelei ia te ʼu fehuʼi ʼaenī: ‘He koʼe ʼe au fai te ʼu gāue ʼaia? ʼE au kau koa ki te ʼu fono pea mo fai faka mafola ʼuhi heʼe ko te loto ʼaia ʼo taku ʼu mātuʼa, peʼe ʼuhi ko taku fia fakafiafia ia Sehova?’ Kua koutou vakavakaʼi koa “te finegalo ʼo te ʼAtua, tona lelei, tona tali lelei, pea mo tona haohaoa”?—Loma 12:2, MN.
Koteā Te Tupuʼaga ʼo Te Fakaholomuli ʼo Te Papitema?
14. Ko te ʼu faʼifaʼitaki faka Tohi-Tapu fea ʼaē ʼe fakahā ai ʼe mole tonu ke fakaholomuli te papitema?
14 “Koteā ʼaē ʼe ina tāʼofi toku papitema?” Ko te tagata Etiopea ʼaē neʼe ina fai te fehuʼi ʼaia ki te tagata faka mafola evaselio ko Filipe, neʼe hoki ina ʼiloʼi age pe ko Sesu neʼe ko te Mesia. Kae ko te Etiopea neʼe feʼauga tona ʼatamai mālama ʼo ʼuhiga mo te Tohi-Tapu, ke mahino ai kiā ia ʼe mole tonu ke fakatuatuai moʼo fakahā tana fia tauhi kiā Sehova ʼo kau ki te kokelekasio, pea neʼe fiafia lahi ai. (Gaue 8:26-39, MN ) ʼO toe feiā pe, ko te fafine ʼe higoa ko Litia, ʼaē neʼe avahi tona loto “ke lahi, ke feala ai hana tokaga ki te ʼu meʼa ʼaē neʼe palalau kiai Paulo,” neʼe “papitema” atu aipe, ia ia pea mo tona loto fale. (Gaue 16:14, 15, MN ) ʼO toe feiā mo te tagata leʼo pilisoni ʼi te kolo ʼo Filipe, neʼe fakalogo kiā Paulo pea mo Silasi ʼi tanā “tala age kiā ia te folafola ʼa Sehova,” pea “neʼe papitemaʼi atu aipe . . . ia ia pea mo tona famili.” (Gaue 16:25-34, MN ) Koia, kapau kua koutou mahino ki te ʼu akonaki tāfito ʼo ʼuhiga mo Sehova pea mo tana ʼu fakatuʼutuʼu, mo koutou loto moʼoni ke koutou fai tona finegalo, pea mo koutou tuku he faʼifaʼitaki lelei ʼi te kokelekasio pea mo koutou kau tuʼumaʼu ki te ʼu fono pea mo te faka mafola ʼo te logo lelei ʼo te Puleʼaga, koteā te tupuʼaga ʼo takotou fakaholomuli ke koutou papitema?—Mateo 28:19, 20.
15, 16. (a) Koteā te faʼahiga manatu ʼaē ʼe mole lelei, ʼe feala ke ina tāʼofi ʼihi tūpulaga ke nātou papitema? (b) ʼE lava liliu feafeaʼi te foaki ʼo totatou maʼuli pea mo te papitema ko he puipuiʼaga maʼa te kau tūpulaga?
15 ʼE lagi mole koutou fia fakahoko te faʼahi maʼuhiga ʼaia heʼe koutou mātataku naʼa koutou fai he aga ʼe kovi? Kapau koia, koutou fakakaukauʼi te faʼahi ʼaenī: ʼE koutou fakafisi anai koa ke koutou fai takotou pelemi ʼuhi pe he koutou mātataku naʼa koutou fakaʼī ʼi he ʼaho? Kailoa ia! Koia kapau ʼe koutou mulimuli ki te ʼu fakamaʼua, pea ʼaua naʼa koutou lotolotolua ki te papitema. ʼI tona ʼuhiga moʼoni, mo kanapaula neʼe kua koutou foaki tokotou maʼuli kiā Sehova pea mo tali ke koutou fai tona finegalo, pea ʼe uga mālohi ai anai koutou ke koutou faiga ke ʼaua naʼa koutou fai he aga ʼe kovi. (Filipe 4:13) Koia kau tūpulaga, ʼaua naʼa koutou manatu ʼe mole ʼi ai hakotou ʼu maʼua mo kapau ʼe koutou fakaholomuli te papitema. Ka kua koutou lava fakahoko takotou ʼu maʼua, peʼe kua koutou papitema peʼe kailoa, kae ʼe koutou huʼi maʼua anai kiā Sehova ki te aga ʼaē ʼe koutou fai.—Loma 14:11, 12.
16 Maʼa te tokolahi ʼo te kau Fakamoʼoniʼi te malamanei, ko tanatou papitema ʼi tanatou kei tūpulaga neʼe tokoni lahi kiā nātou. Ohage la tou tokagaʼi age muʼa te Fakamoʼoni ʼi te Potu Uesite ʼo Eulopa pea ko tona taʼu 23. ʼE ina ʼui ko tana papitema ʼi tona taʼu 13 neʼe ina uga ia ia ke tokaga ke ʼaua naʼa tō ki “te ʼu holi ʼo te temi tūpulaga.” (2 Timoteo 2:22, MN ) ʼI ni ʼu taʼu ki muʼa atu, neʼe ina fai te tonu ʼaē ke liliu ko he minisi ʼe gāue temi kātoa. Iā ʼaho nei, ʼe fiafia ʼi te gāue ʼi te filiale ʼa te kau Fakamoʼoni ʼa Sehova. ʼE lahi te ʼu tapuakina ʼe maʼu anai e te kau tūpulaga fuli ʼaē ʼe nātou filifili ke nātou tauhi kiā Sehova, pea ʼe feala ke ke maʼu mo koe ia te ʼu tapuakina ʼaia.
17. Ko te ʼu faʼahi fea ʼaē ʼe ʼaoga ai ke tou haga mahino pe koteā “te finegalo o te Aliki”?
17 Ko te foaki ʼo te maʼuli pea mo te papitema ʼe ko he kamataʼaga ʼaia ʼo he maʼuli moʼo fai ai te finegalo ʼo Sehova ʼi te ʼu faʼahi fuli pe ʼo totatou maʼuli. Moʼo fakahoko tatatou foaki ʼaia ʼo totatou maʼuli ʼe tonu ke tou ‘totogi te temi.’ ʼO feafeaʼi? ʼO tou toʼo te temi ʼaē ʼe tou fakaʼaogaʼi moʼo fai he ʼu gāue vaʼiganoa, kae ke tou fakaʼaogaʼi moʼo ako lelei ai te Tohi-Tapu, mo kau tuʼumaʼu ki te ʼu fono, pea mo kau lahi ki te faka mafola ʼo te “Logolelei . . . o te Puleaga.” (Efeso 5:15, 16; Mateo 24:14) Ko tatatou foaki ʼo totatou maʼuli kiā Sehova pea mo tatatou fia fai tona finegalo ʼe fua lelei anai ʼi te ʼu faʼahi fuli ʼo totatou maʼuli, ʼi tatatou ʼu fakafiafia, tatatou ʼu agamāhani ʼi te kai pea mo te ʼinu, pea mo te musika ʼaē ʼe tou fakalogo. He koʼe ʼe mole koutou filifili he fakafiafia ʼe feala anai hakotou fai ʼo talu ai? Ko te ʼu lauʼi afe kau Fakamoʼoni tūpulaga loto fiafia, ʼe nātou ʼui atu anai ʼe lahi te ʼu ʼaluʼaga ʼe feala ke tou fakafiafia kae mole tou talagataʼa anai ki “te finegalo o te Aliki.”—Efeso 5:17-19.
“ ʼE Mātou ʼOlo Anai Mo Koutou”
18. Ko te fehuʼi fea ʼaē ʼe tonu ke fai e te kau tūpulaga?
18 ʼO kamata ʼi te taʼu 1513 ʼi muʼa ʼo totatou temi ʼo aʼu ki te Penikosite ʼo te taʼu 33 ʼo totatou temi, neʼe maʼu e Sehova ʼi te kele tana hahaʼi kua fakatuʼutuʼu neʼe ina filifili ke nātou fakahoko tana tauhi pea mo liliu ko hana kau fakamoʼoni. (Isaia 43:12) Ko te kau Iselaele tūpulaga neʼe nātou tutupu ake ʼi te puleʼaga ʼaia. Talu mai te Penikosite, ʼe maʼu e Sehova he “puleʼaga” foʼou ʼi te kele, te Iselaele fakalaumālie, “he hahai ki tona huafa.” (1 Petelo 2:9, 10, MN; Gaue 15:14; Kalate 6:16) ʼE ʼui e te ʼapositolo ko Paulo ko Kilisito neʼe ina fakamaʼa “he hahai maʼana, e natou faʼafai i te u gaue lelei.” (Tito 2:14) Kau tūpulaga, ʼe ʼa koutou te ʼiloʼi ʼaē peʼe ko ai te hahaʼi ʼaia. Ko ai iā ʼaho nei ʼe nātou faʼufaʼu “te puleʼaga faitotonu, ʼaē ʼe nofo agatonu,” ʼe nātou mulimuli ki te ʼu pelesepeto ʼa te Tohi-Tapu, mo gāue ohage ko he kau Fakamoʼoni agatonu ʼa Sehova, pea mo nātou tala ʼe ko tona Puleʼaga ia te ʼamanaki pe ʼaia e tahi maʼa te malamanei? (Isaia 26:2-4) Koutou vakaʼi te ʼu gāue ʼa te ʼu lotu ʼo te Keletiate pea mo te tahi ʼu lotu, pea koutou fakatatau tanatou aga pea mo te ʼu meʼa ʼe fakamaʼua ʼi te Tohi-Tapu ki te kau kaugana moʼoni ʼa te ʼAtua.
19. Koteā ʼaē kua tui kiai te ʼu toko lauʼi miliona hahaʼi ʼi te malamanei?
19 Ko te ʼu toko lauʼi miliona hahaʼi ʼi te malamanei, ʼo kau ai mo te kau tūpulaga tokolahi, kua nātou tui ko te toe ʼo te kau Fakamoʼoni ʼa Sehova ʼaē neʼe fakanofo ʼe ko nātou te “puleʼaga faitotonu” ʼaia. ʼE nātou ʼui fēnei ki te kau Iselaele fakalaumālie ʼaia: “ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou.” (Sakalia 8:23) ʼE mātou fakaʼamu moʼoni pea mo faikole, ʼu tūpulaga, ke koutou filifili ke koutou kau ki te hahaʼi ʼa te ʼAtua pea mo koutou “fili te maʼuli”—te maʼuli heʼegata ʼi te mālama foʼou ʼa Sehova.—Teutalonome 30:15-20; 2 Petelo 3:11-13.
Moʼo Fakamanatu
• Koteā te faka ʼuhiga ʼo te akoʼi ʼo te ʼu manatu ʼa Sehova?
• Ko te faʼahiga tauhi fea ʼaē ʼe tali e Sehova?
• Koteā ʼaē ʼe feala ke filifili e te kau tūpulaga fuli ʼaē neʼe pusiaki e te ʼu mātuʼa kua foaki tonatou maʼuli kiā Sehova?
• He koʼe ʼe mole tonu ke fakaholomuli te papitema?
[Paki ʼo te pasina 26]
Ko ai ʼaē ka koutou fakalogo anai ki ai?
[Paki ʼo te pasina 28]
ʼE lava puipui feafeaʼi koutou mokā koutou foaki tokotou maʼuli kiā Sehova pea mo koutou papitema?
[Paki ʼo te pasina 29]
Koteā ʼaē ʼe ina tāʼofi koutou ke koutou papitema?