Kotea ʼe Feala Ke Ke Fai Ke Fiafia Tou Kiʼi Famili? 2 Koga

Ko te ʼu fanau ʼe ko he meʼa ʼofa mai ia Sehova. ʼE kole e Sehova ki te ʼu matuʼā ke natou tokakaga lelei ki te meʼa ʼofa ʼaia. ʼE ina foaki he ʼu tokoni ki te ʼu matuʼā ke natou lava fai te faʼahi ʼaia. ʼE ina toe foaki he ʼu tokoni ki te ʼu fanau ke feala hanatou tokoni ki te maʼuli fiafia ʼo te famili.

1. Kotea te ʼu tokoni ʼe foaki e Sehova ki te ʼu matuʼā?

ʼE loto e Sehova ke ʼoʼofa te ʼu matuʼā ʼi ʼanatou fanau pea ke lahi age te temi ʼae ʼe natou fakatahi ai mo natou. ʼE ina toe loto ke natou puipui ʼanatou fanau pea mo fakaʼaogaʼi te ʼu pelesepeto moʼo natou akoʼi. (Taʼaga Lea 1:8) ʼE ina ui fenei ki te ʼu tamai: “Ke kotou haga taupau [ʼakotou fanau] . . . pea mo akoʼi natou ʼo mulimuli ki te meʼa ʼae ʼe ui e Sehova.” (Lau ia Efeso 6:4.) ʼE fiafia ia Sehova moka akoʼi e te ʼu matuʼā ʼanatou fanau ʼo mulimuli ki te tokoni ʼaeni kae ʼe mole natou tuku te maʼua ʼaia ki he tahi kehe.

2. Kotea te ʼu tokoni ʼe foaki e Sehova ki te ʼu fanau?

ʼE ui e Sehova ki te ʼu fanau: “Kotou fakalogo . . . ki ʼakotou matuʼā.” (Lau ia Kolose 3:20.) ʼE fiafia ia Sehova mo te ʼu matuʼā moka ʼe fakaʼapaʼapa te ʼu fanau mo fakalogo kia natou. (Taʼaga Lea 23:22-25) Neʼe tuku mai e Sesu he faʼifaʼitaki lelei ʼi tana kei tamasiʼi. Logo la neʼe haoahoa, kae neʼe fakaʼapaʼapa mo fakalogo ki ʼana matuʼā.—Luka 2:51, 52.

3. ʼE feafeaʼi he fakaovi tuʼumaʼu ʼo tou famili ki te ʼAtua?

Kapau ko koe ko he tamai peʼe ko he faʼe, ʼe mahino ia ʼe ke loto ke ʼoʼofa ʼau fanau kia Sehova. ʼE feafeaʼi hau tokoni kia natou? ʼAki hau fai te meʼa ʼaeni ʼe ui ʼi te Tohi-Tapu: “ʼE tonu anai ke ke akoʼi [te ʼu folafola ʼa Sehova] ki ʼou foha, pea mo ke palalau ki ai moka ke nofo ʼi tou ʼapi, peʼe ke haʼele ʼi te ala.” (Tetelonome 6:7) Ko te ui ʼae “akoʼi” ko tona fakaʼuhiga ke fai tuʼumaʼu te faʼahi ʼaia. ʼE kotou iloʼi lelei pe ʼe tonu ke sipela tuʼumaʼu he meʼa ki ʼakotou fanau ke natou manatuʼi tuʼumaʼu. Ko te fakaʼuhiga ʼo te vaega ʼaeni ʼe tonu ke kotou kumi tuʼumaʼu he ʼu faigamalie ke kotou palalau ki ʼakotou fanau ʼo ʼuhiga mo Sehova. ʼE lelei ke kotou toʼo he temi ʼi te vahaʼa fuli ke kotou ako te Tohi-Tapu fakafamili. Kapau heʼeki kolua maʼu fanau, ʼe toe lelei pe ke kolua fai te faʼahi ʼaia.

TA FAKALOLOTO

4. Akoʼi ʼakolua fanau ʼaki te ʼofa

ʼE mole ko he koga ʼe faigafua ia te akoʼi ʼo he fanau. ʼE feafeaʼi he tokoni atu ʼa te Tohi-Tapu? Lau ia Sakopo 1:19, 20, pea fai te ʼu fehuʼi ʼaeni:

• ʼE fakaha feafeaʼi e te ʼu matuʼā ʼe natou ʼoʼofa ʼi ʼanatou fanau moka natou palalau mo natou?

• He koʼe ʼe mole tonu ʼi he tahi ʼo te ʼu matuʼā ke ina fakatonutonuʼi tana fanau moka ʼe ita?a

5. Puipui ʼakolua fanau

Kapau ʼe kolua fia puipui ʼakolua fanau, pea ʼe maʼuhiga ke kolua palalau mo natou ki te ʼu felaveʼi fakasino. ʼE feala ke kolua ufiufi ʼi te palalau ki ai. Vakaʼi te ʼATA VITEO, pea fai te ʼu fehuʼi ʼae ʼe hoa mai.

ʼATA VITEO: Ke Kotou Puipui ʼAkotou Fanau Mai “Te Meʼa ʼAe ʼe Kovi” (2:58)

• He koʼe ʼe faigataʼa ki ʼihi matuʼā hanatou palalau ki te ʼu felaveʼi fakasino mo ʼanatou fanau?

• Kotea neʼe fai e te ʼu matuʼā ke natou lava fai te faʼahi ʼaia?

Neʼe kua fakakikite ʼi te Tohi-Tapu ia te liliu ʼa te malama ʼo Satana ʼo ʼaʼasili kovi. Lau ia 2 Timoteo 3:1, 13, pea fai te fehuʼi ʼaeni:

• Ko te hahaʼi agakovi ʼae ʼe talanoa ki ai te vaega 13, ʼe kau ai ia natou ʼae ʼe natou fakaʼalikiʼi te ʼu kihiʼi tamaliki. He koʼe ʼe maʼuhiga ke palalau te ʼu matuʼā ki te ʼu felaveʼi fakasino mo ʼanatou fanau pea mo fakamahino age tonatou faʼahiga puipui mai te ʼu hahaʼi ʼaia?

Kua ke iloʼi koa?

ʼE lahi te ʼu meʼa gaue ʼa te kau Fakamoʼoni ʼa Sehova ʼe tokoni ki te ʼu matuʼā ke natou palalau ki te ʼu felaveʼi fakasino mo ʼanatou fanau pea mo puipui natou mai honatou fakaʼalikiʼi. Koʼeni ʼihi meʼa gaue:

• Puipui ʼAkolua Fanau (ʼata viteo)

• Écoute le grand Enseignant, chapitres 10 mo 32

• “Parler de sexualité à son enfant” (Réveillez-vous ! N° 5 2016)

6. Fakaʼapaʼapa ki ʼau matuʼā

ʼATA VITEO: ʼE Feafeaʼi Haku Felogoi Mo ʼAku Matuʼā (2:19)

• He koʼe ʼe tonu ki he tupulaga ke felogoi mo ʼana matuʼā ʼaki he aga fakaʼapaʼapa?

• ʼE fakaha feafeaʼi e he tupulaga ʼe fakaʼapaʼapa ki ʼana matuʼā moka palalau kia naua?

Lau ia Taʼaga Lea 1:8, pea fai te fehuʼi ʼaeni:

• Kotea anai ʼe tonu ke fai e he tupulaga moka tokoniʼi ia ia e ʼana matuʼā?

7. Kotou ako fakatahi te Tohi-Tapu

ʼE fakatuʼutuʼu e te ʼu famili ʼae ʼe tauhi kia Sehova he temi ʼi te vahaʼa fuli ke natou fai ai tanatou ako fakafamili. Kotea ʼe natou fai ʼi te ako fakafamili ʼaia? Vakaʼi te ʼATA VITEO, pea fai te ʼu fehuʼi ʼae ʼe hoa mai.

ʼATA VITEO: Ako Fakafamili: ʼOna Faigataʼaʼia Mo ʼOna Fua Lelei (8:04)

• Kotea ʼe feala ke fai e he famili ke natou fakahoko tuʼumaʼu tanatou Ako Fakafamili?

• Kotea ʼe feala ke fai e he tahi ʼi te ʼu matuʼā ke ʼi ai he ʼuhiga ʼo te ako fakafamili pea ke fakafiafia?—Vakaʼi te ʼuluaki pāki ʼo te kapite ʼaeni.

• Kotea ʼe feala ke ina taʼofi takotou ako fakatahi ia te Tohi-Tapu?

Neʼe loto e Sehova ke palalau tuʼumaʼu te ʼu famili Iselaele ki tana Folafola. Lau ia Tetelonome 6:6, 7, pea fai te fehuʼi ʼaeni:

• ʼE feafeaʼi hau maʼuliʼi te pelesepeto ʼaeni?

He ʼu tokoni ki te ako fakafamili:

• Te teuteuʼi ʼo te ʼu fono.

• Lau he hisitolia Fakatohi-tapu ʼe leleiʼia e tou famili pea mo faipalalau ki ai.

• Kapau ʼe kei liliki ʼakolua fanau, kolua toʼo mai te jw.org he kiʼi gaue maʼa natou.

• Kapau kua lalahi ʼakolua fanau, kotou faipalalau ki he alatike ʼi te jw.org.

• Kotou faʼifaʼitakiʼi he hisitolia Fakatohi-tapu.

• Kotou vakaʼi he ʼata viteo ʼi te jw.org pea mo faipalalau ki ai.

MANATU TAFITO

ʼE loto e Sehova ke ʼoʼofa te ʼu matuʼā ʼi ʼanatou fanau, mo akoʼi pea mo puipui natou. ʼE ina toe loto ke fakaʼapaʼapa mo fakalogo te ʼu fanau ki ʼanatou matuʼā pea ke natou ako fakatahi te Tohi-Tapu.

Fehuʼi Fakamanatu

• ʼE lava akoʼi mo puipui feafeaʼi e te ʼu matuʼā ʼanatou fanau?

• ʼE feafeaʼi he fakaʼapaʼapa ʼa te ʼu fanau ki ʼanatou matuʼā?

• Kotea te ʼu fua lelei ʼe tou maʼu moka tou toʼo he temi ʼi te vahaʼa fuli ki te fai ʼo te ako fakafamili?

TE TAHI ʼU MANATU

ʼE feafeaʼi hakolua tokoni ki hakolua fanau kei veliveli ke liliu ko he tahi kua fakapotopoto?

“Ni Ako ʼe Ono ʼe ʼAoga Ki Te ʼu Fanau” (Kotou ʼAʼala! N° 2 2019)

He ʼu tokoni ʼaoga maʼa natou ʼae ʼe tokaga lelei ki he tahi ʼo ʼanatou matuʼā kua vaivai.

“Kotea ʼAe ʼe Ui ʼi Te Tohi-Tapu Moka Tou Tokakaga Lelei Ki ʼAtatou Matuʼā Kua Vaivai?” (Alatike ʼi te jw.org)

Te hisitolia ʼo he tagata neʼe mole ina iloʼi pe ʼe feafeaʼi te pusiaki ʼo he ʼu fanau kae neʼe lava liliu ko he tamai agalelei.

“Neʼe Akoʼi Mai e Sehova Te Faʼahiga Takitaki ʼo Tomatou Famili” (5:58)

Kotea ʼe feala ke fai e he tamai moʼo fakamalohiʼi ʼanā felogoi mo tona foha.

“Comment un père peut-il rester proche de son fils ?” (Ko Te Tule Leʼo [Fakafalani] ʼaho 1 ʼo Novepeli 2011)