“Ke Fai Ia Meʼa Fuli Moʼo Lagalaga”
1 ʼI tatatou ʼu felogoi mo totatou ʼu tēhina, ʼe tonu ke tou fai te meʼa ʼaē ʼe lelei moʼo lagalaga ʼo nātou. Ko tona faka ʼuhiga, ke tou tokaga ʼo puipui tonatou maʼuli fakalaumālie. Kapau ʼe tou fai he faʼahiga gāue fakamālama ʼe ina fakahaʼele te fakatau ʼo he meʼa, pe ko te fai ʼo he faʼahiga gāue, pea ʼe tonu ke tou tokaga ke ʼaua naʼa fakatupu tūkia he meʼa ki totatou ʼu tēhina.—2 Ko. 6:3; Filp. 1:9, 10.
2 Ko ʼihi kua nātou kau ki te ʼu faʼahiga gāue kehekehe, pea ʼe nātou fia fakatau ki tonatou ʼu tēhina te ʼu meʼa ʼo tanatou gāue. Ko ʼihi sosiete faifakatau, ʼe nātou ʼui ki tonatou ʼu hahaʼi fakafofoga, ke nātou faka ʼuhiga te hahaʼi fuli, ohage ko he tahi ʼe ina toʼo anai te ʼu meʼa ʼaē ʼe nātou fakatau—ʼo kau ki ai mo te hahaʼi ʼaē ʼe nātou lotu tahi. Ko ʼihi tēhina neʼe nātou fai te ʼu fono lalahi ʼa te kau Fakamoʼoni, moʼo ʼeke nātou ke nātou kau ki he ʼu matani gāue faifakatau. Ko ʼihi ʼe nātou fai tanatou gāue ʼaia, ʼo nātou fakahā ki tonatou ʼu tēhina ke nātou toʼo te ʼu nusipepa, mo te ʼu kaupepa, mo te ʼu meʼa ʼaē ʼe talanoa kiai te Internet, pea mo te ʼu foʼi fime ʼaē ʼe mole lahi tona toʼo. ʼE lelei koa ki he Kilisitiano ke ina fakaʼaogaʼi tona ʼu felogoi mo tona ʼu tēhina fakalaumālie moʼo fai tana ʼu fakatau? Kailoa!—1 Ko. 10:23, 24, 31-33.
3 ʼU Tēhina, Koutou Nonofo Tokaga: ʼE mole faka ʼuhiga leva, ʼe mole feala ki he Kilisitiano ke ina fai he gāue mo he tahi tēhina. ʼE ʼa kita takitokotahi tona vakaʼi. Kae neʼe kamata kau ʼihi ki he ʼu gāue ʼe nātou fakaneke te loto mānumānu, pea ʼe nātou uga tonatou ʼu tēhina ke nātou kaugā gāue, peʼe nātou fakatupu tanatou paʼaga. Kae ʼe lahi te ʼu matani gāue ʼe mole haʼele lelei tanatou gāue, ʼo tupu ʼaki ai te ʼu tuʼuga maʼua ʼe tonu ke huʼi. Logola ko nātou ʼaē neʼe nātou kau ki te ʼu matani gāue ʼaia, neʼe nātou fia maʼu vave hanatou falā, kae mo kapau ʼe mole iku lelei te gāue ʼaia, pea ʼe feala ke tukugakoviʼi ia ia ʼaē neʼe tupu ai te fakatuʼutuʼu ʼaia. ʼUluaki ʼe tonu ke ina fakakaukauʼi lelei, mo kapau ʼe mole iku lelei te gāue, pea koteā anai tona ʼu fua ki tona ʼu tēhina, ʼi te faʼahi fakalaumālie pea mo te faʼahi fakasino. ʼUhi heʼe fakaʼapaʼapa pea mo falala lahi te kokelekasio kia nātou ʼaē ʼe ʼi ai honatou ʼu pilivilesio faka teokalatike, koia ʼe tonu ai kia nātou ʼaia ke nātou tokakaga tāfito ki tanatou ʼu gāue fakamālama. ʼE mole lelei anai ke nātou fakaʼaogaʼi kovi te falala ʼo tonatou ʼu tēhina. Pea ʼe feala ke toʼo te ʼu pilivilesio ʼa he tēhina, mo kapau ʼe mole kei fakaʼapaʼapaʼi ia ia e te hahaʼi.
4 ʼE tou fakatuʼutuʼu “ke fai ia meʼa fuli moʼo lagalaga.” (1 Ko. 14:26) ʼAua naʼa tou fakahū peʼe tou palalau ki he ʼu gāue fakamālama ʼi te loto kokelekasio. Ko te ʼu meʼa ʼaia, ʼe mole honatou pikipikiga mo te ʼu tupuʼaga faka Tohi-Tapu ʼaē ʼe tou fakatahitahi ai.—Hep. 10:24, 25.