Polokalama ʼo Te Fono Gāue
Vāhaʼa ʼo te ʼaho 10 ʼo Sūlio
Katiko 7
12 min: Te ʼu logo ʼo te kokelekasio. Te ʼu Tonu. Koutou fakamanatuʼi te fakatuʼutuʼu ʼo te fai faka mafola ʼaē ka fai ʼi te ʼaho 14 ʼo Sūlio. Koutou fakamatala pe neʼe feafeaʼi ʼi ʼApelili te fai faka mafola ʼo tokotou telituale, pea mo tokotou kokelekasio. Koutou vakaʼi te fakamatala ʼaē ko tona kupu tāfito “Koutou Vakaʼi Te ʼu Pasina Fakamuli,” pea koutou fai he faʼifaʼitaki ʼe ʼaoga anai ki tokotou telituale, ʼo mulimuli ki te ʼu Minisitelio ʼaia.
15 min: “ ‘ ʼE Mole Feala Ke Tuku Tatatou Palalau.’ ” Faka tuʼakoi takotou ʼu ʼuluaki palalau ke minuta tahi, pea hoko atu ʼaki he ʼu fehuʼi pea mo he ʼu tali. Faka maʼuhigaʼi te ʼu tupuʼaga ʼaē ʼe tou fai fakalelei ai tatatou gāue fai faka mafola. Talanoa ki te ʼu puani lelei ʼo Te Tule Leʼo ʼo te ʼaho 15 ʼo Sanualio 1997, ʼi te pasina 23-24.
18 min: “Ke Fai Ia Meʼa Fuli Moʼo Lagalaga.” ʼE fai palalau te ʼu tagata ʼāfea e lua ki te alatike ʼaia. Lau te ʼu palakalafe fuli pea mo te ʼu vaega, pea mo fakahā lelei te ʼu pelesepeto ʼaē ʼe tonu ke tou tokagaʼi. Fakahā te maʼuhiga ʼaē ke tou tokakaga lelei ki te faʼahi ʼo te gāue fakamālama pea mo te fakatupu ʼo he paʼaga. Vakaʼi te ʼu tokoni ʼaē ʼe tuʼu ʼi Te Tule Leʼo ʼo te ʼaho 15 ʼo Malesio 1997, ʼi te pasina 18-19, 22.
Katiko 15 pea mo te faikole fakaʼosi.
Vāhaʼa ʼo te ʼaho 17 ʼo Sūlio
Katiko 23
15 min: Te ʼu logo ʼo te kokelekasio. Lau ʼo te falā. Koutou fakamahino fakanounou peʼe fakaʼaogaʼi feafeaʼi te kaupepa Mokā Mate He Tahi ʼe Tou ʼOfa Mamahi Ai. . . moʼo tokoni ki he tahi ʼe fia logo, ke ina leleiʼia te fakaloto fīmālie moʼoni ʼaē ʼe foaki mai e te Tohi-Tapu.—Vakaʼi te tohi Comment raisonner, ʼi te pasina 325.
10 min: “Te Polokalama Foʼou ʼo Te ʼu Fakatahi Faka Silikosikilipisio.” ʼE fai ʼaki he ʼu fehuʼi pea mo he ʼu tali. Fakaloto mālohiʼi te kokelekasio katoa ke ʼōmai ki te ʼu ʼaho ʼaia e lua. Toe fakaloto mālohiʼi te kokelekasio ke nātou fakaafe te kau ako Tohi-Tapu. Ko tanatou ʼōmai ki te fakatahi ʼaia, ʼe lava tokoni kia nātou ke nātou fia kau tuʼumaʼu ki te ʼu fono ʼo te kokelekasio.
20 min: Ko Ai Te Faʼifaʼitaki ʼAē ʼe Tonu Ke Koutou Mulimuli Ki Ai? ʼE fai e te tāmai tana ako faka famili, ʼaki hana tamasiʼi e tahi pe ko hana ʼu tamaliki e lua. ʼE ina fakatokagaʼi kua lahi te fai palalau ʼo tana ʼu tamaliki ki te ʼu hahaʼi faigaoʼi, mo te ʼu hahaʼi gaoʼi ʼata, mo te ʼu hahaʼi ʼo te televisio, pea mo te hahaʼi fai mahōlō. ʼE ina fakahā tana tuʼania ki te faʼahi ʼaia, heʼe ko te taʼi ʼu fai palalau ʼaia ʼe hā ʼaki ai te manatu ʼa te mālama. ʼE nātou fai palalau ki te Réveillez-vous ! ʼo te ʼaho 22 ʼo Maio 1998, pasina 12 ki te 14. Kua mahino ki te kau tūpulaga, ʼe fakatupu tuʼutāmaki tanatou leleiʼia fau te ʼu hahaʼi ʼo te mālama, pea ʼe nātou ʼiloʼi ko te ʼiloa ʼi te mālama, ʼe mole ina foaki he meʼa ki te kau Kilisitiano. ʼE nātou talanoa ki te ʼu lelei ʼaē ʼe feala ke nātou maʼu, mo kapau ʼe nātou faʼifaʼitaki ki tanatou ʼu mātuʼa, mo te kau tagata ʼāfea pea mo te tahi ʼu faʼifaʼitaki ʼi te kokelekasio—kae tāfito ki te faʼifaʼitaki ʼa Sesu Kilisito.
Katiko 34 pea mo te faikole fakaʼosi.
Vāhaʼa ʼo te ʼaho 24 ʼo Sūlio
Katiko 45
5 min: Te ʼu logo ʼo te kokelekasio.
15 min: ʼE Tou Fakahā Ko Tatou Ko Te ʼu Minisi ʼo Te ʼAtua. ʼE fai palalau te ʼu tagata faifekau faka minisitelio e lua ki te tokoni faka Tohi-Tapu ʼaē ʼe tuku mai ʼi Te Tule Leʼo ʼo te ʼaho 15 ʼo Tesepeli 1998, ʼi te pasina 19 ki te 20. ʼE mahino kia nāua ʼe maʼua ke nā fakahoko lelei tona ʼuhiga tagata faifekau faka minisitelio, pea ʼe nā vakaʼi pe koteā ʼaē ʼe feala ke nā fai takitokotahi moʼo fakahā ʼe nā fakahoko tonā ʼu maʼua. ʼE nā ʼiloʼi ʼe tonu ke nā tuku he faʼifaʼitaki lelei ʼi te fai faka mafola pea ʼe nā vakaʼi pe koteā te ʼu meʼa ʼaē ʼe feala ke nā fai moʼo lagolago ki te kau tagata ʼāfea, moʼo tokoni ki te kokelekasio. ʼE nā tali ke nā fai ia meʼa fuli ʼaē ʼe nā lavaʼi, moʼo tokoni ki te kokelekasio ke nātou mahino ki te kua nounou ʼo te temi, pea ke nātou tuputupu ʼi te faʼahi fakalaumālie.
10 min: Tou Faitohi Ki Te Hahaʼi ʼAē ʼe Mole Feala Hatatou Maʼu ʼi Te Fai Faka Mafola. Ko te akonaki pea mo te fai palalau mo te kokelekasio. Kua faigataʼa te maʼu atu ʼo te hahaʼi kiō nātou, koia neʼe faitohi ʼihi kau fai faka mafola, pea neʼe fua lelei tanatou gāue ʼaia. Koʼeni te ʼu tokoni ʼaē ʼe tonu ke tou mulimuli kiai: ʼE tonu ke nounou te tohi, mo fakatafito ki te Tohi-Tapu pea ke fai ʼaki he aga fakaʼapaʼapa. Koutou tohi tokotou higoa ʼi te tohi ʼaia. Koutou tohi fakalelei, peʼe koutou tā ʼaki he masini tā. Koutou fakahā age te tuʼasila ʼo te Fale ʼo te Puleʼaga, pea mo te ʼu hola ʼaē ʼe fai ai te ʼu fono, pea mo koutou fakaafe ke haʼu ki te ʼu fono ʼaia. ʼAua naʼa koutou ʼui age ke faitohi ki te tuʼasila ʼo te Sosiete. Koutou vakaʼi te ʼu tokoni ʼaē ʼe maʼu ʼi te tohi Manuel pour l’École du ministère théocratique, pasina 86-7, pea mo te alatike Te Tali Ki ʼAkotou ʼu Fehuʼi ʼo te Minisitelio ʼo Novepeli 1996.
15 min: Koutou fakaʼaogaʼi he ʼu ʼuluaki palalau lelei. Koutou filifili he ʼu ʼuluaki palalau e lua peʼe tolu mai te ʼu pasina 4 ki te 10 ʼo te kaupepa Tokoni Ki Te ʼu Fai Palalau, pea vakaʼi peʼe feafeaʼi hona fakaʼaogaʼi fakalelei ʼi tokotou telituale. Koutou fehuʼi ki te kokelekasio “Koteā te ʼu ʼuluaki palalau ʼaē ʼe koutou fakaʼaogaʼi mokā koutou felāveʼi mo he tahi ʼi te ala, ʼi te fagonogono faigamālie, peʼe ʼi te tahi ʼu faʼahiga fai ʼo te fai faka mafola?” Kapau ʼe maʼu he temi, pea fai he faʼifaʼitaki e tahi peʼe lua.
Katiko 54 pea mo te faikole fakaʼosi.
Vāhaʼa ʼo te ʼaho 31 ʼo Sūlio
Katiko 66
15 min: Te ʼu logo ʼo te kokelekasio. Koutou fakamanatuʼi ke ʼaumai te ʼu pepa tānaki ʼo Sūlio. Koutou kole age ki te kokelekasio ke nātou fakamatala pe neʼe feafeaʼi tanatou tufa te ʼu kaupepa ʼi te māhina ʼaenī.
12 min: Te akonaki ʼe ʼaoga ki te kokelekasio.
18 min: “ ʼE Koutou Leleiʼia Koa Te Faʼa Kātaki ʼa Sehova?” Fai ʼaki he ʼu fehuʼi pea mo he ʼu tali. Fai mo he ʼu fakamahino lelei ʼo ʼuhiga mo te faʼa kātaki fualoa ʼa Sehova.—Vakaʼi te tohi 2 ʼo te Perspicacité, ʼi te pasina 499 ki te 500.
Katiko 75 pea mo te faikole fakaʼosi.
Vāhaʼa ʼo te ʼaho 7 ʼo ʼAukusito
Katiko 161
10 min: Te ʼu logo ʼo te kokelekasio. Fakahā ʼe fakatuʼutuʼu te fai faka mafola ʼi te ʼaho 15 ʼo ʼAukusito.
17 min: “ ʼE Koutou Umiuminoa Koa?” Fai ʼaki he ʼu fehuʼi pea mo he ʼu tali. Koutou fakamatala he faʼifaʼitaki fakaloto mālohi ʼo te Annuaire 1997, ʼi te pasina 43-44.
18 min: Koutou Liliu ʼo Poto ʼi Tokotou Ka Haʼu. Ko te akonaki ʼe fai e te tagata ʼāfea. Ko te kau tūpulaga ʼe nātou fia maʼu honatou ka haʼu fakafiafia mo nātou ʼaē ʼe nātou manako ki ai. Logope la ʼe ko te natula ʼaia ʼo te tagata, kae ʼe tonu ke nātou mulimuli ki te ʼu tokoni fakaʼatua mo kapau ʼe nātou loto ke lava lelei tanatou ʼu fakatuʼutuʼu. (Taag. 19:20) ʼI te temi tūpulaga ʼe mālohi te ʼu holi ʼa te tamaliki tagata ki te ʼu tamaliki fafine, pea mo te tamaliki fafine ki te ʼu tamaliki tagata. Kapau ʼe mole nātou lolomi tonatou ʼu holi ʼaia, pea ʼe lava fua kovi kia nātou. ʼE feala ke tou feʼekeʼaki peʼe fakapotopoto koa ki he kau tūpulaga ke nātou holi ki he taʼahine pe ki he tama, mo nātou femanakoʼaki pea mo nātou fakatahi ai. Vakaʼi te tokoni ʼaē ʼe tuʼu ʼi te tohi Les jeunes sʼinterrogent, ʼi te pasina 231 ki te 235. Faka maʼuhigaʼi te ʼu puani tāfito ʼo Te Tule Leʼo ʼo te ʼaho 15 ʼo Novepeli 1999, ʼi te pasina 18 ki te 23, ʼaē ʼe fakahā ai te maʼuhiga ʼaē ke fakahoko katoa e te kau tūpulaga tonatou maʼua ki te ʼAtua. Fakaloto mālohiʼi te kau tūpulaga ke nātou fakakaukauʼi te tokoni ʼaia, pea ke nātou fai palalau mo tanatou ʼu mātuʼa, mo kapau ʼe ʼi ai hanatou ʼu fehuʼi.
Katiko 65 pea mo te faikole fakaʼosi.