Koutou Nonofo ʼi Te ʼOfa ʼo Te ʼAtua

1, 2. Ko ai totatou holaʼaga ia ʼaho nei?

KAPAU la ʼe koutou haʼele ʼi te ala, kae ʼe lalahi te matagi pea ʼe kamata fakapōʼuli te lagi. ʼE tapa te hila, mo pā te mana, pea mo ʼua lalahi. ʼE koutou lele ʼo kumi he koga meʼa ke koutou fakamalumalu ai. Pea ʼe koutou sio ʼe tuʼu ōvi mai ki te ala ia te fale mālohi, ʼe moamoa, pea mo matalelei. ʼE koutou leleiʼia ʼaupito anai ia te fale ʼaia!

² ʼE tou māʼuʼuli ʼi te ʼu temi maveuveu, pea ʼe fakaʼāsili kovi te ʼu ʼaluʼaga ʼo te malamanei. Kae ʼe ʼi ai totatou holaʼaga ʼe ina lava hāofaki tatou mai he tuʼutāmaki lahi. Ko ai totatou holaʼaga ʼaia? ʼE ʼui fēnei ʼi te Tohi-Tapu: “ ʼE au fia ʼui kiā Sehova: ‘Ko koe toku holaʼaga pea mo toku tule mālohi, toku ʼAtua, ʼaē ʼe au falala anai ki ai.’ ”​—Pesalemo 91:2.

3. Koteā ʼae ʼe tonu ke tou fai ke liliu ia Sehova ko hotatou holaʼaga?

³ ʼE koutou tokagaʼi, ʼe feala ke hāofaki tatou e Sehova, te Tupuʼaga pea mo te Tuʼi ʼAliki ʼo te ʼatulaulau. ʼE feala ke ina hāofaki tatou, heʼe mālohi age ʼi te tagata fuape peʼe ʼi he faʼahiga meʼa pe ʼe feala ke tou tuʼutāmaki ai. Tatau aipe peʼe hoko kiā tatou he tuʼutāmaki, kae ʼe feala kiā Sehova ke ina molehi tona ʼu fua kovi. Koteā ʼaē ʼe tonu ke tou fai ke liliu ia Sehova ko hotatou holaʼaga? ʼE tonu ke tou falala kiā te ia, pea mo mulimuli ki te tokoni ʼaenī ʼi te Folafola ʼa te ʼAtua: “Koutou nonofo ʼi te ʼofa ʼo te ʼAtua.” (Suta 21, MN ) Ei, ʼe tonu ke tou nonofo ʼi te ʼofa ʼo te ʼAtua, ʼo taupau he ʼu felogoi ʼofa mo tatatou Tāmai ʼaē ʼi selo. Kapau ʼe tou fai te faʼahi ʼaia, ʼe tou lava falala ai ʼe ina hāofaki anai tatou. Kae koteā ʼaē ʼe tonu ke tou fai ke feala hatatou felogoi mo te ʼAtua?

TOU MAHINO KI TE ʼOFA ʼO TE ʼATUA KIĀ TATOU PEA MO TOU TALI KI TONA ʼOFA

4, 5. Koteā he ʼu faʼahi ʼe hā ai te ʼofa ʼo Sehova kiā tatou?

⁴ Ke feala hatatou nonofo ʼi te ʼofa ʼo te ʼAtua, ʼe tonu ke tou mahino pe neʼe fakahā feafeaʼi mai e te ʼAtua tona ʼofa ʼaē kiā tatou. Koutou manatuʼi te ʼu akonaki faka Tohi-Tapu ʼaē neʼe koutou ako ʼi te tohi ʼaenī: Ko Sehova, te Tupuʼaga, neʼe ina foaki mai te kele, ke liliu ko hotatou nofoʼaga taulekaleka. Neʼe ina fakatupu ʼi ai te ʼu meʼa kehekehe, ohage ko te meʼa kai, mo te vai, mo te ʼu vao ʼakau, te ʼu manu matalelei, pea mo te ʼu koga meʼa taulekaleka. ʼI tona ʼuhiga Matapuna ʼo te Tohi-Tapu, neʼe fakahā mai e Sehova tona huafa pea mo tona ʼu kalitātē. Tahi ʼaē meʼa, ʼe fakahā mai ʼi tana Folafola neʼe ina fekauʼi mai tona ʼAlo ko Sesu ke haʼu ki te kele, ʼo tali mamahi pea mo mate maʼa tatou. (Soane 3:16) Pea koteā te ʼaoga ʼo te meʼa ʼofa ʼaia kiā tatou? ʼE ina foaki mai he ʼamanaki ki he ka haʼu taulekaleka.

⁵ ʼE toe fakalogo tatatou ʼamanaki ʼo ʼuhiga mo te ka haʼu ki te tahi fakatuʼutuʼu ʼa te ʼAtua. Kua fakatuʼu e te ʼAtua te puleʼaga ʼi selo, ʼe ko te Puleʼaga Faka Mesia. Kua vave hoko mai te temi ʼaē ka ina pulihi anai ia te ʼu mamahi fuli pea mo fakaliliu te kele ko he palatiso. ʼI meʼa lelei foki hatatou māʼuʼuli ai ʼo heʼegata ʼi te tokalelei pea mo te fiafia. (Pesalemo 37:29) ʼI te temi ʼaenī, ʼe ina foaki mai he takitaki ke tou fakaʼaogaʼi lelei totatou maʼuli ʼi te temi nei. Neʼe ina foaki mai mo te fealagia ʼo te faikole, ke tou felogoi faʼifaʼitaliha mo ia ʼi he temi pe ʼe tou loto kiai. Koʼena pe he ʼu ʼaluʼaga neʼe tou vakaʼi ʼo ʼuhiga mo te ʼofa ʼo Sehova ki te malamanei pea mo tatou takitokotahi.

6. E feafeaʼi hakotou tali ki te ʼofa ʼaē neʼe fakahā atu e Sehova kiā koutou?

⁶ Koʼeni te fehuʼi maʼuhiga ʼaē ʼe tonu ke koutou tali kiai: Koteā anai taku tali ki te ʼofa ʼo Sehova? Tokolahi ʼe nātou ʼui anai: “ ʼE tonu ke au ʼofa kiā Sehova.” ʼE koutou manatu feiā koa? Neʼe tala mai e Sesu te fakatotonu ʼaē ʼe lahi tokotahi: “ ʼE tonu ke ke ʼofa kiā Sehova, tou ʼAtua, ʼaki tou loto kātoa, pea mo tou nefesi kātoa, pea mo tou laumālie kātoa.” (Mateo 22:​37, MN ) ʼE lahi te ʼu tupuʼaga ke koutou ʼoʼofa ai kiā Sehova ʼAtua, kae koteā ʼaē ʼe tonu ke tou fai moʼo ʼofa kiā Sehova ʼaki totatou loto kātoa, mo totatou nefesi kātoa, pea mo totatou laumālie kātoa? ʼE feʼauga pe koa ʼi hakita manatu ʼofa kiā te ia?

7. Ko te ʼofa ki te ʼAtua ʼe tonu koa ke gata ʼaki pe he meʼa ʼe kita logoʼi? Koutou fakamahino.

⁷ ʼE ʼui ʼi te Tohi-Tapu ko te ʼofa ki te ʼAtua ʼe laka ia ʼi te ʼu meʼa ʼaē ʼe tou logoʼi ʼi totatou loto. ʼE moʼoni ʼe maʼuhiga ke tou logoʼi ʼe tou ʼoʼofa kiā Sehova, kae ʼe ko te kamataʼaga pe ia ʼo tatatou ʼofa moʼoni kiā te ia. Koʼeni tona faʼifaʼitaki: ʼE ʼaoga he tegaʼi ʼapo moʼo fakahomo he fuʼu ʼapo. Kapau ʼe koutou fia kai hakotou foʼi ʼapo, ʼe koutou leleiʼia koa ke foaki atu pe he tegaʼi ʼapo? Kailoa! ʼO toe feiā pe, ko tatatou manatu ʼofa ʼaē kiā Sehova ʼAtua, ʼe ko te kamataʼaga pe ia. ʼE ʼui fēnei mai ʼi te Tohi-Tapu: “Koʼeni te faka ʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu; pea ko tana ʼu fakatotonu ʼe mole mamafa ia.” (1 Soane 5:​3, MN ) Ko te ʼofa moʼoni ki te ʼAtua, ʼe tonu ke ʼi ai hona ʼu fua matalelei, pea ʼe tonu ke fai ʼaki he ʼu gāue.​—Mateo 7:​16-20.

8, 9. E feafeaʼi hatatou fakahā totatou ʼofa pea mo loto fakafetaʼi ki te ʼAtua?

⁸ ʼE tou fakahā totatou ʼofa ki te ʼAtua mokā tou mulimuli ki tana ʼu fakatotonu pea mo maʼuliʼi tana ʼu pelesepeto. ʼE mole faigataʼa fau ia te faʼahi ʼaia. ʼE mole mamafa te ʼu lao ʼa Sehova, kae ʼe nātou faka fealagia mai ke lelei totatou maʼuli, ke tou māʼuʼuli fiafia pea mo māʼuʼuli haohaoa. (Isaia 48:​17, 18) Kapau ʼe tou mulimuli ki te takitaki ʼa Sehova, pea ʼe tou fakahā ai ki tatatou Tāmai ʼaē ʼi selo ʼe tou fakafetaʼi kiā meʼa fuli ʼaē neʼe ina fai maʼa tatou. Kae ko te tokosiʼi iā ʼaho nei ʼe nātou maʼu te taʼi loto fakafetaʼi ʼaia. ʼE mole tou fia hage ko ʼihi hahaʼi ʼaē neʼe nātou maʼuli galo, ʼi te temi ʼaē neʼe kei maʼuli ai Sesu ʼi te kele. Neʼe fakamālōlō e Sesu te ʼu tagata kilia e toko hogofulu, kae ko te tokotahi pe ʼaē neʼe liliu mai ʼo fakamālo kiā Sesu. (Luka 17:​12-17) ʼE mahino ia ʼe tou fia hage anai ko te tagata ʼaē neʼe loto fakafetaʼi, kae mole tou hage ko te toko hiva ʼaē neʼe nātou maʼuli galo!

⁹ Kae koteā te ʼu fakatotonu ʼa Sehova ʼe tonu ke tou mulimuli kiai? Neʼe tou vakaʼi ʼihi ʼo te ʼu fakatotonu ʼaia ʼi te tohi ʼaenī, koia tou toe vakaʼi age muʼa. Kapau ʼe tou mulimuli ki te ʼu fakatotonu ʼa te ʼAtua, pea ʼe feala anai hatatou nonofo ʼi tona ʼofa.

TOU FAKAŌVI KIĀ SEHOVA

10. Koutou fakamahino pe koʼe ʼe maʼuhiga ke tou haga ako ke tou ʼiloʼi ia Sehova ʼAtua.

¹⁰ Ko te kumi ʼaē ke kita mahino kiā Sehova, ʼe ko he potu maʼuhiga ke kita fakaōvi kiā te ia. Ko te faʼahiga fakatuʼutuʼu ʼaia ʼe mole tonu ke fakagata ʼi he temi. Kanapaula neʼe koutou ʼi tuʼa lolotoga he pō momoko, pea mo koutou fakamāfana iā tafa ʼo he afi, ʼe koutou tuku anai koa ke mate te afi? Kailoa. ʼE koutou haga ʼai anai he ʼu moʼi fafie ke haga ʼulo ia te afi. ʼE fakalogo tokotou maʼuli kiai. Ohage pe ko te moʼi fafie ʼe ina haga fakaʼulo ia te afi, ʼe toe feiā mo “te ʼatamai mālama ʼo te ʼAtua,” ʼe ina fakamālohiʼi totatou ʼofa ʼaē kiā Sehova.​—Taʼaga Lea 2:​1-5.

11. Neʼe malave feafeaʼi te faiakonaki ʼa Sesu ki tana ʼu tisipulo?

¹¹ Neʼe loto ia Sesu ke haga fakamaʼuli pea mo fakamālohiʼi e tana kau tisipulo ia tonatou ʼofa ʼaē kiā Sehova pea mo Tana Folafola moʼoni taputapu. ʼI tona ʼosi fakatuʼuake, neʼe akoʼi age e Sesu ki tana ʼu tisipulo e toko lua ʼihi lea faka polofeta ʼo te Tauhi ʼĀfea neʼe ina fakahoko. Neʼe malave feafeaʼi kiā nāua? Neʼe nā ʼui fēnei: “Pe nee mole vela [koa la] ota loto, i tana talanoa mai kia taua i te ala, pea mo tana [“fakamahino,” MN ] mai kia taua [ia] te Tohitapu?”​—Luka 24:32.

12, 13. (a) E feafeaʼi te aga ʼa te tokolahi ia ʼaho nei, ʼo ʼuhiga mo te ʼofa ki te ʼAtua pea mo te Tohi-Tapu? (b) Koteā ʼaē ʼe tonu ke tou fai ke mole puli totatou ʼofa?

¹² ʼI takotou kamata ako ia te ʼu meʼa ʼaē ʼe akoʼi moʼoni mai ʼi te Tohi-Tapu, neʼe koutou fakatokagaʼi koa ko tokotou loto, neʼe fiafia ʼo ʼuhiga mo Sehova, mo loto māfana, pea mo ʼofa ki ai? ʼE mahino ia, pea ko te tokolahi neʼe nātou logoʼi te meʼa ʼaia. Ko te meʼa ʼaē ʼe faigataʼa, ʼe ko te taupau ʼo te ʼofa mālohi ʼaia ke haga maʼuli pea mo tuputupu. ʼE mole tou fia mulimuli ki te aga ʼa te malamanei iā ʼaho nei, he neʼe fakakikite fēnei e Sesu: “Ko te ʼofa ʼo te tokolahi ʼe [puli] anai ia.” (Mateo 24:​12, MN ) Koteā ʼaē ʼe tonu ke koutou fai ke mole puli tokotou ʼofa ʼaē kiā Sehova pea mo te ʼu moʼoni ʼo te Tohi-Tapu?

¹³ Koutou haga ako ke koutou ʼiloʼi ia Sehova ʼAtua pea mo Sesu Kilisito. (Soane 17:3) Koutou metitāsioʼi, peʼe koutou fakakaukauʼi, te ʼu meʼa ʼaē ʼe koutou ako ʼi te Folafola ʼa te ʼAtua, ʼo koutou fehuʼi fēnei kiā koutou totonu: ‛Ko te faʼahi ʼaenī ʼe ina akoʼi mai teā ʼo ʼuhiga mo Sehova ʼAtua? Koteā te tahi tupuʼaga ke au ʼofa ai kiā te ia ʼaki toku loto kātoa, mo toku ʼatamai kātoa, pea mo toku nefesi kātoa?’ (1 Timoteo 4:15) Ko te taʼi metitāsio ʼaia ʼe ina haga taupau anai ke mālohi tokotou ʼofa kiā Sehova, ohage ko he afi ʼe mole mate.

14. He koʼe ʼe ʼaoga te faikole moʼo fakatuputupu tatatou ʼofa kiā Sehova?

¹⁴ Ko te faikole tuʼumaʼu, ʼe ko te tahi ʼaia faʼahi moʼo taupau ke mālohi totatou ʼofa kiā Sehova. (1 Tesalonika 5:17) ʼI te Kapite 17 ʼo te tohi ʼaenī, neʼe tou vakaʼi ai ko te faikole ʼe ko he meʼa ʼofa maʼuhiga mai te ʼAtua. Ohage pe ko he ʼu felogoi fakatagata ʼe tuputupu ʼuhi ko he felogoi ʼe fai tuʼumaʼu pea mo faʼifaʼitaliha, ʼo toe feiā pe, ko tatatou ʼu felogoi mo Sehova ʼe haga mālohi anai pea mo tuputupu mo kapau ʼe tou faikole tuʼumaʼu kiā te ia. ʼE maʼuhiga ke tou tōkakaga ki tatatou ʼu faikole, naʼa liliu ko he ʼu palalau ʼe tou lau liuliuga, kae mole kei ʼalu ai totatou loto peʼe mole kei ʼi ai hona ʼuhiga kiā tatou. ʼE tonu ke tou palalau kiā Sehova ohage ko he kiʼi tamasiʼi ʼe palalau ki tana tāmai agalelei. ʼE moʼoni ʼe tou palalau anai kiā te ia ʼaki he aga fakaʼapaʼapa, kae ke tou palalau fakahagatonu ki te ʼu meʼa ʼaē ʼi totatou loto. (Pesalemo 62:8) Ei, ko te ako takitokotahi ʼo te Tohi-Tapu pea mo te ʼu faikole fakamalotoloto, ʼe ko he ʼu koga maʼuhiga ʼo tatatou tauhi, pea ʼe feala ʼaki te ʼu faʼahi ʼaia ke tou nonofo ʼi te ʼofa ʼo te ʼAtua.

KOUTOU MAʼU TE FIAFIA ʼI TAKOTOU TAUHI

15, 16. He koʼe ʼe tou lava ʼui ko te faka mafola ʼo te logo ʼo te Puleʼaga, ʼe ko he pilivilesio pea ʼe ko he koloā?

¹⁵ Ko te ako takitokotahi ʼo te Tohi-Tapu pea mo te faikole, ʼe ko he ʼu agaaga ʼo te tauhi ʼe tou fai takitokotahi. Kae ʼi te lakaga nei, tou vakaʼi he koga ʼo te tauhi ʼe tou fakahoko iā muʼa ʼo te kaugamālie: ko tatatou fakamatala te ʼu meʼa ʼaē ʼe tou tui kiai. Kua koutou vaevae koa mo ʼihi he ʼu moʼoni ʼa te Tohi-Tapu? Kapau koia, pea kua koutou kau ki te pilivilesio taulekaleka. (Luka 1:74) Ka tou vaevae mo ʼihi te ʼu moʼoni ʼaē ʼe tou ako ʼo ʼuhiga mo Sehova ʼAtua, ʼe tou fakahoko ai te gāue maʼuhiga ʼaē neʼe fakatotonu ki te kau Kilisitiano moʼoni fuli: ia te faka mafola ʼo te logo lelei ʼo te Puleʼaga ʼo te ʼAtua.​—Mateo 24:14; 28:​19, 20.

¹⁶ Neʼe ʼui e te ʼapositolo ko Paulo, ko tana minisitelio ʼe ko he meʼa maʼuhiga, ʼo ina fakatatau ki he koloā. (2 Kolonito 4:7) Ko te gāue lelei ʼaupito ʼaē ʼe feala ke koutou fai, ʼe ko te fai palalau mo te hahaʼi ʼo ʼuhiga mo Sehova ʼAtua pea mo tana ʼu fakatuʼutuʼu. ʼE ko he gāue ʼe tou fai maʼa te Pule ʼaē ʼe lelei ʼaupito, pea ʼe tou maʼu ai anai he ʼu fakapale ʼe lahi ʼaupito. Ka koutou kau ki te gāue ʼaia, pea ʼe koutou tokoni ai ki te hahaʼi loto moʼoni, ke nātou fakaōvi ki tatatou Tāmai ʼaē ʼi selo, pea ke nātou haʼele ʼi te ala ʼaē ʼe ina taki ki te maʼuli heʼegata. ʼE mole he tahi age gāue ʼe fakafiafia ʼaupito! Tahi ʼaē meʼa, ko te fagonogono ʼo ʼuhiga mo Sehova pea mo tana Folafola, ʼe ina fakatuputupu takotou tui pea mo ina toe fakamālohi age tokotou ʼofa kiā te ia. Pea ʼe maʼuhiga kiā Sehova takotou ʼu faiga. (Hepeleo 6:10) Kapau ʼe koutou lagolago mālohi ki te gāue ʼaia, pea ʼe feala anai hakotou nonofo ʼi te ʼofa ʼo te ʼAtua.​—1 Kolonito 15:58.

17. He koʼe ia ʼaho nei, ʼe tonu ke tou foimo fai ia te minisitelio faka Kilisitiano?

¹⁷ ʼE maʼuhiga ke tou manatuʼi ko te faka mafola ʼo te Puleʼaga, ʼe ko he gāue ʼe tonu ke foimo fai. ʼE ʼui fēnei ʼi te Tohi-Tapu: “Faka mafola te Folafola, ʼo haga fai [ia te gāue ʼaia].” (2 Timoteo 4:​2, MN ) He koʼe ʼe tonu ke tou foimo fai ia te gāue ʼaia? Heʼe ʼui fēnei mai ʼi te Tohi-Tapu: “Ko te ʼaho lahi ʼo Sehova kua ōvi mai. Kua ōvi mai, pea ʼe fakavilivili ʼaupito mai.” (Sofonia 1:14) Ei, ʼe fakavilivili mai te temi ʼaē ka fakaʼauha kātoa ai e Sehova te mālama ʼaenī. Koia ʼe tonu ai ke tou fakaʼiloʼilo ia te faʼahi ʼaia ki te hahaʼi! ʼE tonu ke nātou ʼiloʼi ʼe ko te temi ʼaenī ʼaē ʼe tonu ke nātou filifili ai ia Sehova, ko honatou Tuʼi ʼAliki. “ ʼE mole tauhala anai” te fakaʼosi.​—Hapakuke 2:3.

18. He koʼe ʼe tonu ke tou fakatahi mo te kau Kilisitiano moʼoni ʼo atolasio kiā Sehova?

¹⁸ ʼE loto e Sehova ke tou fakatahi mo te kau Kilisitiano moʼoni ʼo atolasio kiā te ia. Koia ʼaē ʼe ʼui fēnei ai ʼi tana Folafola: “Tou fetokagaʼaki ke tou uga ia tatou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi, ohage ko te agamāhani ʼa ʼihi, kae ke tou fefakaloto mālohiʼaki, tāfito la heʼe kua koutou sio ki te fakaōvi mai ʼo te ʼaho.” (Hepeleo 10:​24, 25, MN ) Ka tou fakatahitahi mo ʼotatou ʼu tēhina mo tuagaʼane ʼi te ʼu fono faka Kilisitiano, ʼe ko he faigamālie ʼaia ke tou fakavikiviki ai pea mo atolasio ki totatou ʼAtua ʼofa. Tahi ʼaē meʼa, ʼe tou feʼugaʼaki pea mo fefakaloto mālohiʼi aki.

19. Koteā ʼaē ʼe tonu ke tou fai ke toe mālohi ai te ʼu noʼo ʼo te ʼofa ʼi te kokelekasio faka Kilisitiano?

¹⁹ Ka tou fakatahi mo te kau atolasio ʼa Sehova, ʼe toe mālohi te ʼu noʼo ʼo te ʼofa pea mo tatatou ʼu fakakaumeʼa ʼi te kokelekasio. ʼE maʼuhiga ia te kumi ʼo te meʼa ʼaē ʼe lelei ʼi totatou ʼu kaugā fagona Kilisitiano, ohage pe ko Sehova ʼe ina tokagaʼi ia te meʼa ʼaē ʼe lelei iā tatou. ʼAua naʼa koutou fakamaʼua ia te maʼoniʼoni ki ʼokotou ʼu kaugā fagona. Tou manatuʼi, ʼe tou kehekehe ʼi tatatou tuputupu fakalaumālie, pea ko tatou fuli ʼe tou agahala. (Kolose 3:13) Koutou faiga ke koutou fakakaumeʼa lelei mo nātou ʼaē ʼe ʼoʼofa mālohi kiā Sehova, pea ʼe koutou tuputupu anai ʼi te faʼahi fakalaumālie. Ei, ʼe feala anai hakotou nonofo ʼi te ʼofa ʼo Sehova, mo kapau ʼe koutou tauhi fakatahi kiā te ia mo tokotou ʼu tēhina mo tuagaʼane. Koteā te fakapale ʼaē ʼe foaki e Sehova kiā nātou ʼaē ʼe nātou tauhi agatonu kiā te ia pea mo nātou nonofo ʼi tona ʼofa?

TOU FAIGA KI “TE MAʼULI MOʼONI”

20, 21. Koteā ia “te maʼuli moʼoni,” pea he koʼe ʼe ko he ʼamanaki taulekaleka?

²⁰ Moʼo fakapale tana ʼu kaugana agatonu, ʼe foaki age e Sehova ia te maʼuli, kae ko te faʼahiga maʼuli fea? ʼE koutou māʼuʼuli moʼoni koa ʼi te temi nei? ʼE ʼio anai kiai te tokolahi, heʼe tou mānava, ʼe tou kakai, pea mo tou ʼiʼinu. ʼE moʼoni ʼe tou māʼuʼuli. Pea ʼi te ʼu temi ʼaē ʼe tou fiafia ʼaupito ai, ʼe lagi tou ʼui fēnei: “Koʼeni la te maʼuli moʼoni!” Kae ʼe fakahā mai ʼi te Tohi-Tapu, ʼi tona fakahagatonu, ʼe mole he tahi iā ʼaho nei ʼe maʼuli moʼoni.

²¹ ʼE ʼui ʼi te Folafola ʼa te ʼAtua, ke tou “puke maʼu ia te maʼuli moʼoni.” (1 Timoteo 6:​19, MN ) ʼE hā ʼaki te ʼu palalau ʼaia, ko “te maʼuli moʼoni” ʼe ko he fakaʼamu ʼe tou maʼu anai ʼi te ka haʼu. Ei, ka tou liliu anai ʼo haohaoa, ʼe tou lava ʼui ai anai kua tou māʼuʼuli moʼoni, heʼe tou māʼuʼuli anai ohage ko te meʼa ʼaē neʼe finegalo kiai te ʼAtua ʼi te kamata. ʼE tou maʼu anai “te maʼuli moʼoni,” ia te maʼuli heʼegata, ʼi te temi ʼaē ka tou māʼuʼuli ai anai ʼi te Palatiso fakakelekele, ʼi te haohaoa mai te mahaki, ʼi te tokalelei pea mo te fiafia. (1 Timoteo 6:12) ʼI ʼamanaki taulekaleka leva!

22. E feafeaʼi hatatou “puke maʼu ia te maʼuli moʼoni”?

²² E feafeaʼi hatatou “puke maʼu ia te maʼuli moʼoni”? ʼI te koga tohi ʼaia, ʼe fakaloto mālohiʼi e Paulo ia te kau Kilisitiano ke nātou “gāue moʼo fai te meʼa ʼaē ʼe lelei” pea ke nātou “koloaʼia ʼi te ʼu gāue lelei.” (1 Timoteo 6:​18, MN ) Koia ʼe mahino mai, ʼe fakalogo tatatou maʼu ia te maʼuli moʼoni ki tatatou mulimuli ki te ʼu moʼoni ʼaē neʼe tou ako ʼi te Tohi-Tapu. Kae ʼe faka ʼuhiga koa ʼi te ʼu palalau ʼa Paulo, ʼe tou maʼu “te maʼuli moʼoni” heʼe tou fai he ʼu gāue lelei? Kailoa, heʼe ʼi tona fakahagatonu, ko te maʼuli taulekaleka ʼaia ʼe fakalogo ki “te ʼofa makehe” ʼo te ʼAtua. (Loma 5:​15, MN ) Kae ʼe fiafia ia Sehova ʼi te fakapale ʼo nātou ʼaē ʼe nātou tauhi agatonu kiā te ia, pea ʼe ina fakaʼamu ke koutou maʼu ia “te maʼuli moʼoni.” Ko nātou ʼaē ʼe nātou nonofo ʼi te ʼofa ʼo te ʼAtua, ʼe nātou maʼu anai te maʼuli fiafia mo tokalelei ʼaia, ia te maʼuli heʼegata.

23. He koʼe ʼe maʼuhiga ke tou nonofo ʼi te ʼofa ʼo te ʼAtua?

²³ ʼE lelei kiā tatou takitokotahi ke tou fai te ʼu fehuʼi ʼaenī: ‛ʼE au mulimuli koa ki te faʼahiga atolasio ʼaē neʼe fakatotonu mai e te ʼAtua ʼi te Tohi-Tapu?’ Kapau ʼi te ʼaho fuli, ʼe tou sivi ia tatou totonu ʼo tou sio ʼe tou fai ia te faʼahi ʼaia, pea ʼe tou haʼele ʼi te ala ʼaē ʼe lelei. ʼE tou lava falala kiā Sehova ʼe ko totatou holaʼaga. ʼE ina hāofaki anai tana kau agatonu ʼi te ʼu ʼaho fakamataku ʼo te mālama ʼāfea ʼaenī. Tahi ʼaē, ʼe puipui anai tatou e Sehova ʼi te tuʼu foʼou ʼo te ʼu meʼa ʼaē ʼe faka kolōlia, ʼaē kua ōvi mai leva. ʼI meʼa fakafiafia anai hatatou māʼuʼuli ʼi te temi ʼaia! Kapau ʼe koutou filifili lelei te meʼa ʼaē ʼe koutou loto kiai, pea ʼe koutou maʼu anai ia “te maʼuli moʼoni,” ʼaē neʼe loto kiai e Sehova ʼAtua, ia te maʼuli heʼegata.