AKO 11

Ke Maʼuli Tau Faʼahiga Palalau

Loma 12:11

TE MANATU ʼAE KE TAʼOFI: Ke ke fiafia moka ke palalau ke uga ai te hahaʼi ke natou fia maʼuliʼi te meʼa ʼae ʼe natou logo ki ai.

Ke malave kia koe te manatu ʼae ka ke talanoa ki ai. Ka ke teuteuʼi he manatu, fakakaukauʼi lelei tona maʼuhiga. Ke ke iloʼi lelei te ʼu puani ʼae ka ke palalau ki ai, ke ha ai ʼe ke tui papau ki te ʼu faʼahi ʼaia.
Manatuʼi ia natou ʼae ʼe fagono atu. Fakakaukauʼi pe ʼe fua lelei feafeaʼi anai kia natou ia te meʼa ʼae ka ke lau peʼe ke talanoa ki ai. Fakakaukauʼi hona ʼu faʼahiga fai ke toe maʼuhiga age kia natou ʼae ʼe fagono atu.
Ke maʼuli te manatu ʼae ka ke fakaha. Ke ke fiafia moka ke palalau. Ke ha ʼi tou fofoga pea mo te faʼahiga fakaʼaogaʼi ʼo ʼou nima te ʼu meʼa ʼae ʼe ke logoʼi.

Tokaga naʼa ke fakaleluʼi ia natou ʼae ʼe fagono atu ʼo ke fai tuʼumaʼu he faʼahiga haka pe ʼe tahi. Fai he ʼu haka ʼe ʼaoga. Ka ke akoʼi tafito te ʼu manatu maʼuhiga, pea mo uga ia natou ʼae ʼe fagono atu ke natou maʼuliʼi he ʼu manatu, ke ke fiafia. Kae ʼaua naʼa ke lulutu tuʼumaʼu lolotoga tau faipalalau peʼe akonaki, naʼa sosaʼa ia leva e natou ʼae ʼe fagono atu.