Kapite 4

Ko Ia ʼAē ʼe Fakamoʼoni Ki Ai Te ʼu Polofeta Fuli

1. Koteā te ʼu meʼa ʼe fakahā mai e te maʼuli ʼo Sesu ʼi muʼa ʼo tana tupu tagata ʼo ʼuhiga mo tana felogoi lelei mo Sehova?

ʼI TANA palalau ʼaē ki tana ʼu felogoi lelei mo Sehova, neʼe tala fēnei e Sesu: “ ʼE ʼofa te Tāmai ki te ʼAlo, pea ʼe ina fakahā age ki ai te ʼu meʼa fuli ʼaē ʼe ina fai e ia totonu.” (Soane 5:19, 20) Ko tana ʼu felogoi lelei ʼaia neʼe kamata ʼi te ʼosi fakatupu ʼo Sesu, kua hili kiai taʼu e afe mo afe ʼi muʼa ʼo tana tupu tagata ʼi te kele. Ko ia neʼe ko te ʼAlo ʼulu tokotahi ʼo te ʼAtua, ko ia tokotahi pe neʼe fakatupu totonu e Sehova. Ko te ʼu meʼa fuli ʼaē, ʼi te lagi, pea mo te kele, neʼe fakatupu ki muli age ʼo tokoni ki ai te ʼAlo ʼulu tokotahi ʼofaina ʼaia. Neʼe toe gāue foki ia ko he Folafola peʼe ko he ʼAve-folafola maʼa te ʼAtua, ko ia ʼaē neʼe fakaʼaogaʼi e te ʼAtua moʼo fakahoko ʼo tona finegalo ki niʼihi. Ko ia ʼaia, ko te ʼAlo ʼo te ʼAtua ʼaē neʼe ʼofa makehe ki ai te ʼAtua, neʼe liliu ia ki ʼamuli ko te tagata ko Sesu Kilisito.—Kol. 1:15, 16; Soane 1:14; 12:49, 50.

2. E feafeaʼi te talanoa ʼa te ʼu lea faka polofeta ʼo te Tohi-Tapu ʼo ʼuhiga mo Sesu?

² ʼI muʼa ʼo te tupu faka milakulo ʼa Sesu ko he tagata, neʼe lahi ʼaupito te ʼu lea faka polofeta neʼe haʼu mai te ʼAtua, neʼe tohi ʼo ʼuhiga mo ia. Ohage ko tona fakahā e te ʼapositolo ko Petelo kia Kolonelio, “ko te kau polofeta fuli . . . ʼe nātou fakamoʼoni kia te ia.” (Gāue 10:43) ʼE lahi te talanoa ʼa te Tohi-Tapu ki te tuʼulaga ʼo Sesu ʼo ʼuhiga mo te tauhi maʼa, koia ʼaē neʼe tala fēnei ai e te ʼaselo ki te ʼapositolo ko Soane: “Atolasio ki te ʼAtua; he neʼe fai te ʼu lea faka polofeta moʼo fakamoʼoni kia Sesu.” (Fkhā. 19:10) Ko te ʼu lea faka polofeta ʼaia ʼe nātou fakahā fakalelei ia Sesu pea mo fakatokagaʼi ia tatou ki te ʼu agaaga kehekehe ʼo te fakatuʼutuʼu ʼa te ʼAtua ʼo ʼuhiga mo ia pea ʼe ʼaoga ʼaupito kia tatou ia ʼaho nei.

Te Meʼa ʼAē Neʼe Fakahā e Te ʼu Lea Faka Polofeta

3. (a) ʼI te lea faka polofeta ʼaē ia Senesi 3:14, 15, ko ai ʼaē neʼe fakatātā e te “gata”? E te te “fafine”? E ‘te hāko ʼo te gata’? (b) He koʼe ko te ‘fakavolu ʼo te ʼulu ʼo te gata’ ʼe maʼuhiga ʼaupito ki te kau kaugana ʼa Sehova?

³ Ko te ʼuluaki ʼo te ʼu lea faka polofeta ʼaia neʼe fakahā ʼi te hili ʼo te agatuʼu ʼaē ʼi Eteni. Neʼe kau ki te fakamāu ʼaē neʼe fai e Sehova ki te gata. Neʼe ʼui fēnei e Sehova: “ ʼE ʼau tuku anai he fehiʼa lahi ia koe mo te fafine, ʼi tou hāko pea mo tona hāko. Pea ʼe ina fakavolu anai koe ʼi tou ʼulu pea e ke fakavolu anai ia ia ʼi tona muliʼi vaʼe.” (Sen. 3:14, 15) Neʼe koteā te faka ʼuhiga ʼo te ʼu palalau ʼaia? ʼI tona temi totonu neʼe tuku mai e Sehova ʼihi ʼu lea faka polofeta ke nātou fakamālamaʼi ia te lea faka polofeta ʼaia. Koia kua tou ʼiloʼi ai leva ko te ʼu palalau ʼaia neʼe fai kia Satana te Tevolo, ʼaē neʼe fakatātā e te gata. “Ko te fafine” ʼe ko te kautahi fakaʼaselo agatonu ʼa Sehova ʼaē ʼe hage kia ia ko hona ʼohoana agatonu. Ko te ‘hāko ʼo te gata’ ʼe kau ki ai te kau ʼaselo mo te hahaʼi fuli ʼaē ʼe nātou fakahā ʼi tanatou aga ʼe nātou maʼu te manatu ʼa te Tevolo, ko nātou fuli ʼaē ʼe fakafeagai kia Sehova pea mo tana hahaʼi. Kapau ʼe tou fakasiosio ki te faʼahiga fakaʼaoga ʼo te gata e te Tevolo ʼi Eteni, ʼe tou mahino ai ki te ʼui ʼaē e te lea faka polofeta ‘ko te gata ʼe fakavolu anai ʼi tona ʼulu,’ ʼe ina fakahā te fakaʼauha fakaʼosi ʼo te foha agatuʼu ʼaia ʼo te ʼAtua ʼaē neʼe fasituʼu kia Sehova pea ina fakatupu te ʼu malaʼia lahi ki te malamanei. Kae ki te ʼiloʼi leva pe ko ai te “hāko” ʼaē ka ina fakavolu anai te gata, neʼe nofo ia ko he misitelio tapu ʼi he temi loaloaga.—Lom. 16:25, 26.

4. He koʼe ko te hōloga ʼaē ʼe kau ai Sesu ʼe tokoni kia tatou ke tou ʼiloʼi ai ko ia ko te Hāko ʼaē neʼe fakapapau?

⁴ ʼI te ʼosi ʼo taʼu e 2 000 ki te kamata ʼo te hisitolia ʼo te tagata, neʼe fakahā e Sehova te tahi ʼu meʼa ʼo ʼuhiga mo te lea faka polofeta ʼaia. Neʼe ina fakahā ʼe haʼu anai te Hāko mai te hākoga ʼo Apalahamo. (Sen. 22:15-18) Kae, ko te hākoga ʼaia ʼe ʼalu ʼo kaku ki te Hāko, ʼe mole fakalogo anai ki te hākoga kakano ʼo Apalahamo, kae ʼe fili tonu ia e te ʼAtua. Logope la te lahi ʼo te ʼofa ʼa Apalahamo ki tona foha ko Isemaele, ʼaē neʼe tupu ʼi tana fafine faifekau ko Aka, neʼe ʼui age fakalelei e Sehova ki ai: “Ko taku fuakava, ʼe ʼau fai anai mo Isaake ʼaē ka fānauʼi anai e Sala kia te koe.” (Sen. 17:18-21; 21:8-12) Ki muli age, neʼe mole fai te fuakava ʼaia kia Esau, te ʼuluaki foha ʼo Isaake, kae neʼe fai kia Sakopo, te tupuʼaga ʼo te ʼu telepi e hogofulu-ma-lua ʼo Iselaele. (Sen. 28:10-14) ʼI tona temi totonu neʼe fakahā ko te Hāko ʼe tupu anai ʼi te telepi ʼo Suta, ʼi te ʼapi ʼo Tavite.—Sen. 49:10; 1 Fkma. 17:3, 4, 11-14.

5. ʼI te kamata ʼo te minisitelio ʼo Sesu ʼi te kele, koteā te tahi meʼa neʼe hā lelei ai ko ia ko te Mesia?

⁵ Ia taʼu e 700 ki muʼa ʼatu, neʼe fakahā e te Tohi-Tapu ko Petelehemi te kolo ʼaē ka tupu ai anai te Hāko, kae neʼe ina toe fakahā foki ʼo ʼuhiga mo te hāko ʼaia neʼe tupu “talu mai te ʼu ʼaho ʼo te ʼu temi ʼe mole hona kamataʼaga,” talu mai te temi ʼaē neʼe fakatupu ai ʼi te lagi. (Mikea 5:2) Neʼe fakakikite e te polofeta ko Taniela te temi ʼaē neʼe hā ai ʼi te kele ʼi tona ʼuhiga Fakanofo ʼa Sehova, te Mesia. (Tan. 9:24-26) Pea ʼi te temi ʼaē neʼe fakanofo ai ʼaki te laumālie maʼoniʼoni, neʼe fakahā e te leʼo mai lagi, pe ko ai ia ia. (Mat. 3:16, 17) Koia ʼi te ʼosi liliu ʼa Filipo ko te tisipulo ʼa Sesu, ʼaki tana tui papau, neʼe feala ai tana ʼui fēnei: “Kua mātou maʼu ia ia ʼaē neʼe tohi ki ai ia Moisese, ʼi te Lao, pea mo te kau Polofeta: ko Sesu, foha [vavae] ʼo Sosefo, mai Nasaleti.”—Soane 1:45.

6. (a) ʼI te hili ʼo te mate ʼa Sesu, koteā te ʼu meʼa ʼaē neʼe fakatokagaʼi e tana kau tisipulo? (b) Ko ai te koga tāfito ʼo te ‘hāko ʼo te fafine,’ pea koteā te faka ʼuhiga ʼo te ʼui ʼaē ʼe fakavolu te ʼulu ʼo te gata?

⁶ Ki muli age, neʼe fakatokagaʼi e te kau tisipulo ʼa Sesu ʼe lahi ʼaupito te ʼu talanoa faka polofeta ʼo ʼuhiga mo te Mesia ʼe tuʼu ʼi te Tohi-Tapu. ʼI te hili ʼo tona mate pea mo tona toe fakatuʼuake, ko Sesu totonu “neʼe ina fakamahino kia nātou, ʼi te Tohi-Tapu katoa, te ʼu meʼa ʼaē ʼo ʼuhiga mo ia.” (Luka 24:27) ʼI te temi nei, kua ʼiloʼi papau ia ko Sesu ko te koga tāfito ʼo te ‘hāko ʼo te fafine,’ ko ia ia ʼaē ka ina fakavolu anai te ʼulu ʼo te “gata” ke feala ai te pulihi ʼosi ʼo Satana. ʼAki ia Sesu ʼe fakahoko fuli anai te ʼu fakapapau fuli ʼa te ʼAtua ʼo ʼuhiga mo te malamanei, pea ʼe tou nofo nei ʼo talitali ki ai.—2 Ko. 1:20.

7. ʼI te ʼiloʼi ʼo ia ʼaē ʼe talanoa ki ai te ʼu lea faka polofeta ʼaia, koteā te tahi meʼa ʼe ʼaoga ke tokagaʼi?

⁷ ʼI takotou ʼuluaki lau ʼihi ʼi te ʼu lea faka polofeta ʼaia, neʼe lagi koutou fai te fehuʼi ʼaenī, ohage ko te enuke Etiopea: “Ko ai koa ʼaē ʼe talanoa ki ai te polofeta?” Kae ʼi tana ʼosi maʼu tona tali, neʼe mole tuku ʼaki aipe e te Etiopea. ʼI te ʼosi ʼo tana fakalogo lelei ki tona fakamahino age ʼaē e Filipo, neʼe mahino ai leva kiai, ko tona loto fakafetaʼi ki te faʼahiga fakahoko e Sesu te lea faka polofeta, neʼe ina fakamaʼua ia ia ke ina fai he meʼa, ke ʼalu ʼo papitema. (Gāue 8:32-38; Is. 53:3-9) ʼE tou hage koa ko te tagata ʼaia? ʼI ʼihi temi ʼe ko he faʼahiga fakatātā mai ʼo he lea faka polofeta, ʼaē ka ina uga fakamālohi ia tatou, peʼe lagi lave ki totatou loto te ʼu fakamatala ʼa te Tohi-Tapu totonu, mokā ʼe ina fakahā lelei mai te hoko ʼo te lea faka polofeta.

8. Ko te ʼu faʼifaʼitaki faka polofeta e fā ʼe tuʼu ʼi henī ʼo ʼuhiga mo Sesu Kilisito. Koutou fakakaukauʼi te ʼu fehuʼi pea mo te ʼu vaega ʼaē ʼe tuʼu ai, ʼo koutou vakaʼi peʼe feafeaʼi he lave ʼo te ʼu lea faka polofeta ʼaia kia tatou. Koutou vakaʼi takitahi pe te ʼu fehuʼi.

⁸ Koutou vakaʼi peʼe feafeaʼi tona fai ʼaki te ʼu lea faka polofeta pea mo te ʼu faʼifaʼitakiʼaga faka polofeta ʼo ʼuhiga mo Sesu Kilisito ʼaenā ʼe tuʼu ʼi lalo. Koutou tali ki te ʼu fehuʼi ʼaki hakotou fakaʼaogaʼi te ʼu vaega ʼaē neʼe tuku atu.

(1) ʼE tokoni feafeaʼi kia tatou te fakamatala ʼaē ʼo ʼuhiga mo te faiga ʼa Apalahamo ke ina sakilifisioʼi ia Isaake, ke feala ai hatatou maʼu te loto fakafetaʼi ki te meʼa ʼaē neʼe fai e Sehova ʼi tana foaki he totogi ʼaki tona ʼAlo? (Soane 3:16; Sen. 22:1-18 [koutou fakatokagaʼi peʼe feafeaʼi te talanoa ʼo ʼuhiga mo Isaake ʼi te vaega 2])

Koteā te meʼa ʼaē ʼe tonu ke tou ʼiloʼi papau ai? (Lom. 8:32, 38, 39)

Kae koteā koa te meʼa ʼaē ʼe fakamaʼuaʼi ke tou fai? (Sen. 22:18; Soane 3:36)

(2) ʼI tana fakahā ia Sesu ko te polofeta ʼe tatau mo Moisese, koteā te maʼua maʼuhiga ʼaupito ʼaē ʼe toe fakamanatu mai e te Tohi-Tapu kia tatou? (Gāue 3:22, 23; Teu. 18:15-19)

Koteā te tahi ʼu meʼa ʼaē neʼe talanoa kiai ia Sesu, pea he koʼe ʼe ʼalutahi mo te ʼu meʼa ʼaē ʼe hoko ʼi te temi ʼaenī? (Mat. 28:18-20; 19:4-9; 18:3-6)

(3) ʼI tana fakamahino mai te meʼa ʼaē neʼe fakatātā e te tuʼulaga faka pelepitelo ʼo Alone, koteā te ʼu kalitate taulekaleka ʼo Sesu, te pelepitelo lahi, ʼaē ʼe fakatokagaʼi mai e te Tohi-Tapu? (Hep. 4:15 ki te 5:3; 7:26-28)

ʼE tonu ke feafeaʼi tatatou ʼu manatu, mokā tou faikole ki te ʼAtua ʼaki ia Kilisito ke tokoni mai kia tatou ke tou tauʼi totatou ʼu vaivaiʼaga?

(4) ʼI te māʼoluga ʼo te sakilifisio ʼa Sesu (ʼaē ʼe ina fetogi te ʼu sakilifisio fuli ʼaē neʼe fai ʼi te lao ʼa Moisese), he koʼe ʼe tonu ke tou tokaga lelei ke ʼaua naʼa tou fakamāhani ʼo fai he ʼu meʼa ʼe tou ʼiloʼi papau ʼe mole leleiʼia e te ʼAtua? (Hep. 10:26, 27)

Kapau ʼe tou ʼiloʼi papau ko tatatou ʼamanaki ki te maʼuli ʼe hoki feala pe ʼaki te sakilifisio ʼa Sesu, koteā te ʼu faʼahiga meʼa ka tou fai fakavilivili anai? (Hep. 10:19-25)

E Feafeaʼi Koa Te Fakahā ʼo Tatatou Tui Kia Kilisito?

9. He koʼe ʼe mole ʼi ai he fakamaʼuli ʼi tuʼa atu ʼo Sesu Kilisito?

9 ʼI tana ʼosi fakamahino ʼi te telepinale lahi ʼo te kau Sutea ʼi Selusalemi ko te ʼu lea faka polofeta neʼe fakahoko e Sesu, neʼe fakaʼosi fēnei e te ʼapositolo ko Petelo ʼaki te ʼu palalau mālohi ʼaenī: “ ʼE mole ʼi ai he fakamaʼuli ʼi he tahi atu, heʼe mole ʼi te lalo lagi he tahi higoa neʼe tuku ki te hahaʼi, ʼe tonu ke tou maʼuli ai.” (Gāue 4:11, 12; Pes. 118:22) Ko te hākoga fuli ʼa Atama ʼe agahala, pea neʼe fakatūʼa nātou ki te mate ʼuhi ko te agahala, pea ko tonatou mate ʼe mole hona ʼuhiga moʼo totogi ʼaki he tahi. Kae ko Sesu, neʼe haohaoa ia, pea ko te momoli ʼo tona maʼuli neʼe maʼuhiga ia ʼi te faʼahi faka sakilifisio. (Pes. 49:6-9; Hep. 2:9) Neʼe ina foaki ki te ʼAtua te totogi ʼe tatau tona maʼuhiga mo te maʼuli ʼaē neʼe pulihi e Atama ki tona hākoga. Koteā koa te ʼu fua lelei ʼaē neʼe tou maʼu ai?—1 Tim. 2:5, 6.

10. Koutou fakamahino pe koteā he fua lelei ʼaupito ʼe tou maʼu ʼaki te sakilifisio ʼa Sesu.

¹⁰ Kua feala ke tou maʼu he leʼo ʼo loto ʼe maʼa ʼaki te fakamolemole ʼo te agahala—ʼe ko he meʼa ʼe laka age ia ʼi te ʼu sakilifisio manu ʼaē neʼe fakatotonu ʼi te lao ʼa Moisese, ʼaē neʼe mole feala foki ke fīmālie ai Iselaele. (Gāue 13:38, 39; Hep. 9:13, 14) Kae ki te faʼahi ʼaia, ʼe tonu ke tou agatonu kia tatou totonu pea mo tou tui moʼoni kia Sesu Kilisito. ʼE tou mahino papau koa ki te ʼaoga ʼo te sakilifisio ʼa Kilisito kia tatou takitokotahi? “Kapau ʼe tou ʼui: ‘ ʼE mole ʼi ai hamatou agahala,’ pea ʼe tou hēʼia, pea ʼe mole ia tatou te moʼoni. Kapau ʼe tou vete tatatou ʼu agahala, pea ʼe agatonu mo faitotonu ke ina fakamolemole tatatou ʼu agahala pea mo fakamaʼa tatou mai te heʼe agatonu fuli pe.”—1 Soane 1:8, 9.

11. He koʼe ko te papitema ʼi te vai ʼe maʼuhiga ʼaupito ke tou maʼu ai he leʼo ʼo loto ʼe lelei ia muʼa ʼo te ʼAtua?

¹¹ ʼE mahino ia, ʼe ʼi ai te ʼu hahaʼi ʼe nātou ʼiloʼi tonatou ʼuhiga agahala, ʼe nātou lau ʼe nātou tui kia Kilisito, pea ʼe nātou palalau ki te hahaʼi ʼo ʼuhiga mo te Puleʼaga ʼo te ʼAtua ohage ko tona fai e Sesu, kae mole nātou faiga ke katoa tanatou tui kia Kilisito. ʼO feafeaʼi? Ohage ko tona fakahā mai e te Tohi-Tapu, ʼi te ʼuluaki sēkulō ka liliu niʼihi ko he ʼu hahaʼi ʼe tui moʼoni, neʼe feafeaʼi tanatou fakahā te faʼahi ʼaia ki te hahaʼi fuli? Neʼe nātou fakahā ʼaki tanatou papitema. Koteā tona tupuʼaga? Koteʼuhi neʼe fakatotonu e Sesu ki tana kau tisipulo ke nātou papitema. (Mat. 28:19, 20; Gāue 8:12; 18:8) Ka lave ʼi te loto ʼo he tahi ia te ʼofa ʼo Sehova ʼaē neʼe ina fakahā ʼaki ia Sesu Kilisito, ʼe mole ina toe faka tatāʼofi ia ia. ʼE ina fai anai te ʼu fetogi ʼaē ʼe ʼaoga ʼi tona maʼuli, ʼo ina foaki ia ia ki te ʼAtua pea ʼe ina fakaʼiloga ʼaki te papitema ʼaē ʼi te vai. Ohage ko tona ʼui mai ʼi te Tohi-Tapu, ko te fakahā ʼaia ʼo takita tui e kita ‘kole ki te ʼAtua he leʼo ʼo loto ʼe lelei.’—1 Pe. 3:21.

12. Kapau ʼe tou ʼiloʼi papau neʼe tou agahala, koteā te meʼa ʼaē ʼe tonu ke tou fai, pea koteā tona tupuʼaga?

¹² ʼIo, logope la tatatou ʼosi papitema, ka ko te agahala ʼe mole gata anai ia. Koteā anai te meʼa ka tou fai? “ ʼE ʼau tohi atu kia koutou te ʼu meʼa ʼaenī ke ʼaua naʼa koutou agahala,” ko te ʼui ʼaia ʼa te ʼapositolo ko Soane. Koia ke ʼaua naʼa tou meʼa noaʼi tatatou ʼu agahala takitokotahi, ʼi tatatou ʼu gāue, ʼi tatatou ʼu palalau peʼe ʼi tatatou aga. “Kae, kapau ʼe agahala he tahi, ʼe ʼi ai totatou tokoni ia tafa ʼo te Tāmai, ko Sesu Kilisito, ko te agatonu. Ko ia, ko te sakilifisio faifakalelei ʼo ʼuhiga mo ʼatatou ʼu agahala, pea ʼe mole gata ʼaki pe ʼaē ʼa tatou, kae ʼe toe kau ai mo te ʼu agahala ʼo te malamanei katoa.” (1 Soane 2:1, 2) Ko tona faka ʼuhiga koa, ko he faʼahiga meʼa pe ʼe tou fai, kapau ʼe tou kole ki te ʼAtua, ke ina fakamolemole tatatou ʼu agahala,’ pea ʼe lelei anai ia meʼa fuli? Kailoa. Ko te kalavi ʼo te fakamolemole, ko te fakahemala moʼoni. E lagi feala ke toe ʼaoga kia tatou te tokoni ʼa te ʼu tagata ʼāfea ʼo te kokelekasio faka Kilisitiano. ʼE tonu ke mahino kia tatou ko te meʼa ʼaē neʼe tou fai ʼe kovi pea ke tou fakahemala fakamalotoloto ʼo ʼuhiga mo te ʼu meʼa ʼaia, ke feala ai hatatou faiga mālohi ke ʼaua naʼa toe hoko te meʼa ʼaia. (Gāue 3:19; Sake 5:13-16) Kapau ʼe tou fai feiā, ʼe mahino papau ia ʼe tokoni anai Sesu kia tatou. ʼAki tatatou tui ki te ʼuhiga faifakalelei ʼo tona sakilifisio, ʼe feala ai hatatou toe maʼu te ʼofa ʼo Sehova, pea ʼe ʼaoga te faʼahi ʼaia, ke lelei ai tatatou tauhi ʼaē kia te ia.

13. (a) Koutou fakahā he tahi fua lelei ʼe foaki mai e te sakilifisio ʼa Sesu. (b) He koʼe ko tatatou gāue ki te ʼAtua ʼe mole feala ke tou maʼu ai te fakapale? (c) Kae kapau ʼe tou maʼu te tui moʼoni, koteā anai te meʼa ka tou fai?

¹³ Ko te sakilifisio ʼa Sesu neʼe ina faka fealagia kia tatou ia te maʼuli heʼegata, ʼi te lagi ki te “kiʼi faga ōvi,” pea ʼi te kele ʼaē ka fakaliliu anai ko he palatiso maʼa te ʼu lauʼi miliale hahaʼi. (Luka 12:32; Fkhā. 20:11, 12; 21:3, 4) ʼE mole tou maʼu te fakapale ʼaia ʼuhi pe ko tatatou gāue. Tatau aipe, pe koteā te ʼu meʼa ʼe tou fai ʼi tatatou gāue ʼaē kia Sehova, ʼe mole feala ia ke tou ʼui, ʼe maʼua ke foaki mai e te ʼAtua te maʼuli kia tatou. Kailoa, ko te maʼuli heʼegata ʼe “ko te meʼa ʼofa ʼaē ʼe foaki mai e te ʼAtua . . . ʼaki ia Kilisito Sesu totatou ʼAliki.” (Lom. 6:23, Ef. 2:8-10) Kae, kapau ʼe tou tui ki te meʼa ʼofa ʼaia pea mo tou maʼu te loto fakafetaʼi ki te faʼahiga meʼa neʼe fai moʼo fealagia ʼo te meʼa ʼofa ʼaia, ʼe tou fakahā anai ʼi tatatou ʼu aga. ʼI tatatou mahino pe neʼe feafeaʼi te taulekaleka ʼo te fakaʼaogaʼi e Sehova ia tona ʼAlo moʼo fakahoko ʼo Tona finegalo pea ʼe maʼuhiga ke tou faʼifaʼitaki lelei fuli kia Sesu, ʼe tou fakaliliu anai te minisitelio faka Kilisitiano ko te meʼa ʼaē ʼe maʼuhiga ʼaupito ʼi totatou maʼuli. Ko tatatou tui ʼe ʼiloga anai ʼi tatatou palalau ʼaki he loto katoa ki te hahaʼi ʼo ʼuhiga mo te meʼa ʼofa taulekaleka ʼaia ʼo te ʼAtua.—Vakaʼi ia Gāue 20:24.

14. ʼE lagolago feafeaʼi te tui moʼoni ʼaē kia Sesu Kilisito ki te logo tahi?

¹⁴ Ko te taʼi tui ʼaia ʼe tokoni lelei ki te logo tahi! ʼAki te tui ʼaia, ʼe tou logoʼi ʼi totatou loto ʼe tou ōvi lelei kia Sehova, ki tona ʼAlo pea mo ʼihi ʼi te kokelekasio faka Kilisitiano. (1 Soane 3:23, 24) ʼE ina uga tatou ke tou fakafiafia ʼi te haga ʼa Sehova ʼi tona manavaʼofa, ʼo foaki ki tona ʼAlo “te higoa ʼaē ʼe māʼoluga age ʼi te higoa fuli pe [gata pe ki te huafa ʼo te ʼAtua], koteʼuhi ʼaki te huafa ʼo Sesu, ke tuʼutuli ia nātou fuli ʼaē ʼi te lagi, pea mo nātou ʼaē ʼi te kele, pea mo nātou ʼaē ʼi te lalo kele, pea ke fakahā e te ʼalelo fuli pe, ko Sesu Kilisito ʼe ʼAliki ʼi te kolōlia ʼo te ʼAtua te Tāmai.”—Filp. 2:9-11.

Toe Fakamanatu

● ʼI te temi ʼaē neʼe hā ai te Mesia, he koʼe neʼe ʼiloʼi lelei ia ia e nātou ʼaē neʼe tui moʼoni ki te Folafola ʼa te ʼAtua?

● ʼE lave feafeaʼi kia tatou te ʼu faʼifaʼitaki faka polofeta ʼaē neʼe fakahoko e Sesu, ohage ko tona tuʼu ʼaē ʼi te pasina 34?

● Ko te ʼu faʼahi fea ʼaē kua fua lelei ai te sakilifisio ʼo Sesu kia tatou? E feafeaʼi hatatou fakahā ʼo tatatou loto fakafetaʼi ki te sakilifisio ʼaia?

[Talanoa]

Te ʼu Faʼifaʼitaki Faka Polofeta ʼo ʼUhiga Mo Sesu—ʼE lave feafeaʼi kia koutou?

Te momoli e Apalahamo ia Isaake

Ko Moisese, ko te ʼave-folafola ʼa te ʼAtua

Ko Alone, ko te pelepitelo lahi

Te ʼu sakilifisio manu