Kapite 8
‘Ko Te Tau Ki Te ʼu Mālohi Fakalaumālie Agakovi’
1. He koʼe ʼe tou fia ʼiloʼi papau te gāue ʼa te ʼu laumālie agakovi?
KO TE hahaʼi ʼaē ʼe mānumānu koloā e lagi nātou kakata manukinuki mokā tou palalau ki te ʼu laumālie agakovi. Kae ʼe mole ko he meʼa fakahuahua. Peʼe nātou tui peʼe kailoa, ko te hahaʼi fuli ʼe nātou kau ki te fakahala ʼa te ʼu temonio. Ko nātou ʼaē ʼe atolasio kia Sehova ʼe mole hāo nātou mai te faʼahi ʼaia. Ko nātou ʼaia ʼe fakahaga tāfito kiai tanatou tau. ʼE fakatokagaʼi fēnei tatou e te ʼapositolo ko Paulo ʼo ʼuhiga mo te tau ʼaia: “Kia tatou ko te tau ʼe mole fai ki te toto pea mo te kakano, kae ʼe fai ki te ʼu puleʼaga, ki te kau takitaki, ki te ʼu pule ʼo te mālama fakapōʼuli ʼaenī, ki te ʼu mālohi fakalaumālie agakovi ʼaē ʼe nonofo ʼi te ʼu potu ʼo te lagi.” (Ef. 6:12) Ia ʼaho nei, kua ʼāsili kovi te tau ʼaia, heʼe kua kapu ifo ia Satana mai te lagi pea kua ʼita ia, heʼe ina ʼiloʼi kua nounou tona temi.—Fkhā. 12:12.
2. ʼE lava feafeaʼi koa hatatou mālo ʼi te ʼu laumālie mālohi?
2 ʼE feafeaʼi anai hatatou mālo ʼi he tau ʼe fai ki te ʼu mālohi fakalaumālie ʼaē ʼe mālohi ʼaupito age ʼi te tagata? ʼE feala te faʼahi ʼaia, ʼaki pe tatatou falala katoa kia Sehova. ʼE ʼaoga ke tou fakalogo kia te ia pea mo muliʼi tana Folafola. Kapau ʼe tou fai te faʼahi ʼaia, ʼe tou fakamamaʼo anai mai te ʼu tuʼutāmaki fakasino, mo te aga ʼaē ʼe mole tonu ke fai, mo te loto pea mo te fakakaukau ʼaē ʼe tau mo te hahaʼi ʼi tanatou tuku ia nātou ke puleʼi e Satana.—Ef. 6:11; Sake 4:7.
Te ʼu Pule ʼo Te Mālama ʼe Nonofo ʼi Te ʼu Potu ʼo Te Lagi
3. Koteā pea ko ai koa ʼaē ʼe fakafeagai fakaʼitaʼita ki ai ia Satana?
3 ʼE fakamahino fakalelei mai e Sehova te agaaga ʼo te mālama ohage ko tana sio mai tona ʼafioʼaga ʼaē ʼi te lagi. Neʼe ina foaki ki te ʼapositolo ko Soane te fakaʼaʼata ʼe hā ai ia te agaaga ʼo Satana ohage he “talakone lahi e lanuʼi afi” kua teuteu, mokā ko he meʼa ʼe feala, ke ina kai te Puleʼaga Mesianike ʼo te ʼAtua ʼi te ʼosi pe ʼo tona tupu ʼi te lagi ʼi te taʼu 1914 ʼo totatou temi. ʼI te mole hoko ʼo te fakatuʼutuʼu ʼaia, neʼe fai e Satana he fakafeagai mālohi ki te kau fakafofoga fakahāhā ʼo te Puleʼaga ʼaia, te lua koga ʼo te hāko ʼo te “ ʼohoana” ʼo te ʼAtua.—Fkhā. 12:3, 4, 13, 17.
4. (a) Koteā te faʼahi ʼe fakatokagaʼi mai e te Tohi-Tapu ʼo ʼuhiga mo te matapuna ʼo te mālohi ʼo te ʼu puleʼaga fakatagata? (b) Ko ai pea koteā te tupuʼaga ʼo te fakatahitahi ʼo te ʼu pule politike ʼi te temi ʼaenī?
4 Ko te matapuna ʼo te mālohi pea mo te pule ʼaē ʼe maʼu e te ʼu puleʼaga fakatagata neʼe ʼi te meʼa neʼe fakahā kia Soane. Neʼe sio ia ki te manu fekai mo ʼona ʼu koga kehekehe, ko ʼona ʼulu e 7 pea mo ʼona tala e 10, pea ʼe “pule ia ki te ʼu telepi kehekehe mo te hahaʼi mo te ʼu lea pea mo te ʼu puleʼaga kehekehe.” Ko te manu ʼaia ʼe mole ina fakafofoga he puleʼaga pe e tahi, kae ʼe ina fakafofoga te tuʼu faka politike ʼo te malamanei katoa. Neʼe fakahā kia Soane ko te “talakone [ia Satana te Tevolo] neʼe ina foaki ki te manu tona mālohi mo tana hekaʼaga faka hau pea mo te pule lahi.” (Fkhā. 13:1, 2, 7; vakaʼi ia Luka 4:5, 6.) Logope la, peʼe tauhi faka lotu niʼihi ʼi te kau takitaki faka politike, ʼe mole he fenua ʼe kau ʼi te “manu” ʼe fia fakalogo ki te takitaki ʼa Sehova pea mo te Hau neʼe ina fakanofo, ko Sesu Kilisito. Ko nātou fuli ʼe nātou tau moʼo taupau ʼo tonatou ʼuhiga pule. Ia ʼaho nei, ohage ko tona fakahā ʼi te tohi ʼo te Fakahā, “ko te ʼu palalau ʼe haʼu mai te kau temonio” ʼe nātou tānaki fuli te hahaʼi “ki te tau ʼo te ʼaho lahi ʼo te ʼAtua Māfimāfi” ʼi Halamaketone. (Fkhā. 16:13, 14, 16) ʼI tona fakahagatonu, ohage ko te meʼa neʼe palalau kiai ia Paulo, ko te ʼu “pule ʼo te malamanei” ʼe mole ko he ʼu tagata kae “ko te ʼu mālohi fakalaumālie agakovi ʼe nonofo ʼi te ʼu potu ʼo te lagi.” (Ef. 6:12) Ko nātou ʼaē ʼe nātou fia fakahā ʼe nātou atolasio moʼoni kia Sehova, ʼe ʼaoga ke natou mahino lelei ki te ʼuhiga ʼo te ʼu meʼa ʼaia.
5. He koʼe ʼe tonu ke tou tokaga ke ʼaua naʼa tou liliu ʼo lagolago ki te mālama ʼa Satana?
5 ʼI te ʼaho fuli ko totatou maʼuli ʼe tau mo te ʼu faigataʼaʼia ʼe mavetevete ai te famili katoa. ʼE ko he agamāhani hatatou sio ki te hahaʼi ʼe nātou fakahā, ʼaki ʼanatou ʼu palalau peʼe ko niʼihi age faʼahiga meʼa ʼe nātou kau ki te fenua, pe ko te telepi, pe ko te hahaʼi ʼaē ʼe lea tahi mo nātou peʼe ko te kalasi faka sosiale ʼaē ʼe nātou kau kiai. Peʼe nātou lagolago ki he tahi ʼi te ʼu fihi ʼaia, tatau aipe, peʼe mole honatou pikipikiga ʼi ai. Kae, tatau aipe, pe koteā te tupuʼaga ʼo te fihi, pe ko te ʼuhiga ʼo te tagata, peʼe ko te meʼa ʼaē ʼe nātou lagolago kiai, ko ai koa ʼaē ʼe nātou lagolago moʼoni ki ai? ʼE ʼui fakalelei mai e te Tohi-Tapu “ko te malamanei katoa ʼe takoto ia ʼi te mālohi ʼo te agakovi.” (1 Soane 5:19) Kapau koia ʼaia, ʼe lava feafeaʼi ki he tahi ke ʼaua naʼa fakahalaʼi mo te toe ʼo te hahaʼi? ʼAki pe tana lagolago katoa ki te Puleʼaga ʼo te ʼAtua pea mo fakamamaʼo mai te ʼu fihi ʼe mavetevete ai te malamanei.—Soane 17:15, 16.
Te ʼu Kākā ʼa Te Agakovi
6. Koteā te ʼu faʼahiga meʼa ʼe fakaʼaogaʼi e Satana moʼo fakamaliu ʼo te hahaʼi mai te tauhi moʼoni?
6 ʼI te ʼu temi fuli pe ʼo te hisitolia ʼo te malamanei, neʼe fakaʼaogaʼi e Satana te ʼu fakataga, ʼaki te ʼu palalau kovi pea mo te ʼu mamahi fakasino ke maliu te hahaʼi mai te tauhi moʼoni. Kae neʼe ina toe fakaʼaogaʼi foki mo te tahi ʼu kākā.
7. ʼE fakahā feafeaʼi e Satana tona faiva ʼaki tana fakaʼaogaʼi te lotu hala?
7 ʼAki he faiva kākā, neʼe ina tāʼofi te hahaʼi tokolahi ʼi te fakapōʼuli ʼaki te lotu hala, ʼo ina faiga ai ke nātou ʼui, kapau ko tonatou loto ʼaia, pea ʼe nātou tauhi pe ki te ʼAtua. Ko te hahaʼi ʼaē ʼe mole ʼoʼofa fakamalotoloto ki te moʼoni, ʼe feala ke nātou higa ʼo muliʼi ni tauhi faka misitelio peʼe ko ko he ʼu meʼa ʼe uga ai tonatou loto, peʼe nātou hēʼia ʼi he ʼu gāue fakamanamana. (2 Tes. 2:9, 10) Kae kua ʼosi fakatokagaʼi tatou, māʼia mo nātou ʼaē neʼe kau ki te tauhi moʼoni, “ ʼe līaki anai e ʼihi tanatou tui, ʼo nātou muliʼi he ʼu palalau loi pea mo te ʼu akonaki ʼa te kau temonio.” (1 Tim. 4:1) ʼE lava feafeaʼi koa te hoko ʼo te meʼa ʼaia?
8. Neʼe fakahēʼi feafeaʼi e Satana niʼihi neʼe atolasio kia Sehova, ke nātou tauhi ki te lotu hala?
8 ʼAki he faiva kākā ko te Tevolo neʼe ina fakaʼaogaʼi te ʼu vaivaiʼaga ʼa te hahaʼi. Ko he tahi koa ʼe manavasiʼi ki te tagata? Kapau koia ʼaia, ʼe lagi ʼe ina fakaʼaogaʼi anai tona ʼu kāiga peʼe ko tona ʼu vāhaʼa fale ke nātou fakaneke ia ia ke kau mo nātou ki te ʼu meʼa ʼe haʼu mai te lotu hala. Ko he tahi koa ʼe fialahi? ʼE lagi ʼita anai mokā ʼe tokoniʼi ia ia peʼe mokā ʼe mole tali e ʼihi tana ʼu manatu. (Taag. 29:25; 15:10; 1 Tim. 6:3, 4) Kae e feafeaʼi koa mo kapau ko tana kau ki te minisitelio ʼe mole fai ʼaki te ʼofa? ʼO mole ʼui ke ina fakatonutonuʼi tana manatu ke feala ai hana muliʼi te faʼifaʼitaki ʼa Sesu Kilisito, ʼe lagi ʼe ina fia fakalogo anai ‘kia nātou ʼaē ʼe nātou alaala tona ʼu taliga’ ʼo ʼui maʼa nātou ʼe feʼauga pe ʼi te lau ʼo te Tohi-Tapu pea mo he ‘maʼuli maʼa.’ (2 Tim. 4:3) Pe ko he tahi ʼe ulu ki he tahi lotu, peʼe ʼui maʼana ʼe kei kau ia ki tana lotu, ʼe mole faʼa maʼuhiga ia kia Satana, kehe pe ia ke mole atolasio kia Sehova ohage ko tana kole mai ʼi tana Folafola pea mo tana kautahi.
9. ʼAki he faiva kākā, neʼe feafeaʼi te fakaʼaogaʼi e Satana te ʼu felāveʼi fakasino moʼo fakahoko tana ʼu fakatuʼutuʼu?
9 ʼAki he faiva kākā, ʼe toe fakaneke e Satana te hahaʼi ke nātou fakahoko te ʼu meʼa ʼaē ʼe nātou holi kiai ʼi he ʼu ʼaluʼaga kovi. Neʼe ina fai te faʼahi ʼaia ʼo ʼuhiga mo te ʼu felāveʼi fakasino. ʼI tanatou līaki te pelesepeto faka Tohi-Tapu ʼo ʼuhiga mo te aga ʼaē ʼe tonu ke fai, tokolahi te hahaʼi ʼi te mālama ʼe ʼui maʼa nātou, ko te ʼu felāveʼi fakasino ʼa ni hahaʼi ʼe mole heʼeki ʼohoana ʼe ko he meʼa lelei pe ia, peʼe ko he faʼahi ʼe fakamoʼoni ai kua nātou lalahi. Pea e feafeaʼi koa ia nātou ʼaē kua ʼohoana? ʼE ko he agamāhani kia nātou ʼaē ʼe tau mo ni ʼu faigataʼaʼia ʼi te nofo ʼohoana hanatou mavete pea nātou toe ʼohoana, peʼe nātou līaki pe nātou tonatou ʼohoana kae nātou nonofo mo he tahi kehe. Mokā tou tokagaʼi te faʼahiga maʼuli ʼaia, ʼe tou fakaʼamu koa ki te taʼi maʼuli ʼaia peʼe tou ʼui ko te maʼuli faka Kilisitiano ʼe faigataʼa ʼaupito? Ko te kākā ʼa Satana ʼe ina faigaʼi ke ʼui e he tahi ʼe tapuʼi e Sehova kia tatou ia te meʼa ʼaē ʼe lelei. ʼE ina fakaneke tatou ke tou manatu ki te ʼu lelei ʼe feala ke tou maʼu ʼi te temi nei—kae ke ʼaua naʼa tou manatu ki te ʼu ikuʼaga ka hoko anai kia tatou pea mo ʼihi ʼatu, ʼo feiā aipe mo totatou vāhaʼa mo Sehova pea mo tona ʼAlo.—Kal. 6:7, 8; 1 Ko. 6:9, 10.
10. Koteā te ʼu meʼa ʼe fakaʼaogaʼi e Satana moʼo fakalotoʼi ʼo tatou ʼo ʼuhiga mo te agamālohi?
10 Ko te ʼu temi fakafiafia ko te tahi pe ʼaia meʼa ʼe lelei. Ko he ʼu fakafiafia ʼe maʼa ʼe toe lelei foki ki totatou sino, pea mo ʼatatou fakakaukau, feiā mo totatou loto. Kae koteā koa te meʼa ʼe tou fai mokā fakaʼaogaʼi e Satana te ʼu faigamālie ʼo te temi fakafiafia moʼo faigaʼi ke tou galoʼi te manatu ʼa te ʼAtua? Ohage la, ʼe tou ʼiloʼi ko Sehova ʼe fehiʼa kia nātou ʼaē ʼe manako ki te agamālohi. (Pes. 11:5) Kae koteā koa te meʼa ʼe tou fai mokā, ʼi te sinema peʼe ko te televisio, ʼe fakaneke e he ʼata ia te agamālohi, ʼe tou nonofo pe koa ʼo sioʼi, ʼo tou tali fuli te ʼu aga ʼaia? Peʼe kapau ʼe fakahā te agamālohi ʼi te ʼu faigaoʼi, ʼe tou tali koa, ʼo lagi tou kalaga moʼo lagolago ki te kau faigaoʼi?— Vakaʼi ia Senesi 6:13.
11. Tatau aipe pe ko he tahi kua ina ʼiloʼi te moʼoni ʼo ʼuhiga mo te fai fakalauʼakau, koteā te tuʼutāmaki ʼe feala ke hoko ki ai mokā ʼe mole nofo tokaga?
11 ʼE tou ʼiloʼi foki ko nātou ʼaē ʼe kau ki he faʼahiga meʼa fakatemonio—te ʼiloʼi fakatomuʼa ʼo te meʼa ka hoko, te faifakalauʼakau peʼe ko te palalau mo te kau mate—ʼe “ko he meʼa fakalialia ia kia Sehova.” ʼE mole tou maʼu anai te manatu ʼaē ke tou ʼolo ki he tahi ʼe faifakalauʼakau pea ʼe lagi ʼe mole tou tali anai ia ia ʼi totatou loto fale ke haʼu ʼo fai tana ʼu gāue fakatemonio. Kae ʼe tou fakalogo anai koa kia nātou, mokā ʼe nātou hā mai ʼi te televisio? Logope la tatatou mole tali ʼaē ke faitoʼo tatou e he tahi ʼe faifakalauʼakau, ʼe tou haʼi anai koa he meʼa ʼi te nima ʼo he kiʼi tamasiʼi neʼe hoki tupu, heʼe ʼi tatatou manatu ko te meʼa ʼaia ʼe ina taupau anai ia ia mai te tuʼutāmaki? Peʼe, ʼi tatatou ʼiloʼi ʼaē ʼe tautea e te Tohi-Tapu ‘te fakalauʼakauʼi ʼo he tahi,’ ʼe tou faka fealagia koa ki he tagata gaohi meʼa mana ke ina puleʼi tatatou fakakaukau, tatau aipe peʼe ina fai ʼi he kiʼi temi siʼisiʼipe?—Teu. 18:10-12; Kal. 5:9-21.
12. (a) E feafeaʼi te fakaʼaogaʼi ʼo te musika ke tuputupu ia tatou he ʼu fakakaukau ʼe tou ʼiloʼi lelei ʼe kovi? (b) E feafeaʼi te hā ʼi he teu ʼo he tahi, ʼi te faʼahiga faʼu ʼo tona ʼulu, peʼe ko tana palalau, ʼe ina faka maʼuhigaʼi te ʼu hahaʼi ʼaē ʼe mole leleiʼia e Sehova? (c) Koteā te meʼa ʼe tonu ke tou fai ke ʼaua naʼa tou higa ʼi te ʼu kākā ʼa Satana?
12 Neʼe tou lau ʼi te Tohi-Tapu ‘ko te folonikasio pea mo te heʼemaʼa ʼi tona ʼu faʼahiga ʼaluʼaga fuli, ke ʼaua naʼa ia tatou ʼaki he ʼu manatu kovi.’ (Ef. 5:3-5) Kae ʼe feafeaʼi anai mokā ko te ʼu kupu ʼaia ʼe fakaʼaogaʼi ʼi he musika, ʼi he hiva ʼe logo lelei peʼe ko he musika ʼe logoaʼa? E lagi feala ke tou hivahiva he ʼu kupu ka mole tou mahino ko he ʼu palalau ʼe fakavikiviki ki te ʼu felāveʼi fakasino ʼi tuʼa atu ʼo te nofo ʼohoana, mo te fakaʼaogaʼi ʼo te toloke pea mo niʼihi ʼatu ʼu meʼa? Peʼe, māʼiape la tatatou ʼiloʼi ʼaē, ʼe mole tonu ke tou muliʼi te faʼahiga maʼuli ʼo te hahaʼi ʼaē ʼe nātou fai te taʼi aga ʼaia, e lagi feala pe ke tou fia fakatatau kia nātou ʼo faʼifaʼitakiʼi tonatou ʼu teu, pea mo te faʼu ʼo tonatou ʼulu ʼo feiā aipe mo tanatou faʼahiga palalau? ʼI kākā leva ʼo Satana! ʼE ina fakaʼaogaʼi te ʼu meʼa fakakākā moʼo fakaneke ʼo te hahaʼi ke nātou muliʼi tana ʼu manatu kovi! (2 Ko. 4:3, 4) Ke ʼaua naʼa tou kau kia nātou ʼaē ʼe higa ʼi tana ʼu kākā, ʼe tonu ke tou tokakaga naʼa tou hēʼia ʼi te mālama. Ke ʼaua naʼa galo ia tatou pe ko ai “te ʼu pule ʼo te mālama fakapōʼuli ʼaenī,” pea ke tou haga tauʼi ʼanatou ʼu fakahala.—Ef. 6:12; 1 Pe. 5:8.
Te ʼu Mahafu Ke Tou Mālo Ai
13. Logope la totatou heʼe haohaoa, ʼe lava feafeaʼi koa hatatou mālo ʼi te mālama ʼaē ʼe puleʼi e Satana?
13 ʼI muʼa ʼo tona mate, neʼe ʼui age e Sesu ki tana kau ʼapositolo: “Koutou lototoʼa! Kua ʼau mālo ʼi te malamanei.” Mo nātou foki la ʼaia neʼe feala ke nātou mālo ʼi te tau ʼaia, pea hili kiai taʼu e 60, neʼe tohi fēnei e te ʼapositolo ko Soane: “Ko ai ʼaē ʼe mālo ʼi te malamanei, ʼe mole gata pe koa la kia ia ʼaē ʼe tui ko Sesu ko te ʼAlo ʼo te ʼAtua?” (Soane 16:33; 1 Soane 5:5) ʼE tou fakahā te tui ʼaia ʼi tatatou fakalogo ki te ʼu lao ʼa Sesu pea ke tou falala ki te Folafola ʼa te ʼAtua, ohage ko te meʼa ʼaē neʼe ina fai. Kae koteā koa he tahi meʼa ʼe tonu ke tou fai? Ke tou nonofo ʼo pipiki tuʼumaʼu ki te kokelekasio ʼaē ʼe ina puleʼi. Ka tou agahala, tou fakahemala fakamalotoloto pea mo tou kumi te fakamolemole ʼa te ʼAtua ʼaki te sakilifisio ʼo Sesu. Kapau ʼe tou fai feiā, logope la totatou sino agahala, ʼe toe feala foki ke tou mālo.
14. (a) Koutou lau ia Efesi 6:13-18. (b) Fakaʼaogaʼi te ʼu fehuʼi pea mo te ʼu vaega neʼe tuku mai moʼo palalau ki te ʼu tapuakina ʼe tou maʼu, ʼaki te ʼu koga kehekehe ʼo te teu tau fakalaumālie.
14 Ke iku lelei te faʼahi ʼaia, ʼe tonu ke tou teuʼi “te teu tau katoa ʼa te ʼAtua,” ke ʼaua naʼa galo hona koga e tahi. Koutou avahi takotou Tohi-Tapu ia Efesi 6:13-18 pea koutou lau te fakamatalatala ʼo te teu tau ʼaia. Pea, ʼi takotou tali ki te ʼu fehuʼi ʼaē ʼe tuʼu ʼi lalo, koutou vakaʼi peʼe lava feafeaʼi he puipui ʼo koutou e te ʼu koga kehekehe ʼo te teu tau ʼaia.
“Nonoʼo te ʼu koga loto ʼaki te moʼoni”
Tatau aipe, peʼe tou ʼiloʼi te moʼoni, e feafeaʼi totatou puipui e te ako, te metitasioʼi ʼo te moʼoni ʼo te Tohi-Tapu pea mo te ʼolo tuʼumaʼu ʼaē ki te ʼu fono? (Filp. 3:1; 4:8, 9; 1 Ko. 10:12, 13; 2 Ko. 13:5; 1 Pe. 1:13, Kingdom Interlinear; Darby)
“Te kofu ukamea ʼo te faitotonu”
Ko ai te faʼifaʼitaki ʼo te faitotonu ʼaia? (Fkhā. 15:3)
Koutou fakahā, peʼe hoko feafeaʼi kia ia ʼaē ʼe talagataʼa ki te ʼu folafola ʼa Sehova ʼi tana mole taupau te ʼofa ki tana ʼu lao, te ʼu faigataʼaʼia ʼi te faʼahi fakalaumālie. (Vakaʼi ia 1 Samuele 15:22, 23; Teutalonome 7:3, 4.)
“Te ʼu vaʼe moʼo tala ʼo te logo lelei ʼo te tokalelei”
He koʼe ʼe hāofaki tatou mokā ʼe tou ʼolo ki te hahaʼi ʼo fakahā kia nātou te ʼu fakatuʼutuʼu ʼa te ʼAtua ʼo ʼuhiga mo te tokalelei? (Lom. 10:15; Pes. 73:2, 3; 1 Tim. 5:13)
“Te meʼa tali tau lahi ʼo te tui”
Kapau ʼe loloto tatatou tui, koteā anai te meʼa ka tou fai mokā ʼe faiga niʼihi ke tou lotolotolua peʼe ke tou manavasiʼi? (Vakaʼi ia 2 Timoteo 1:12; 2 Hau 6:15-17.)
“Te puloga ʼo te fakamaʼuli”
E feafeaʼi te tokoni ʼa te falala ki te fakamaʼuli ki he tahi ke fakamamaʼo mai te hoha fakavale ki te ʼu koloā fakamālama? (1 Tim. 6:7-10, 19)
“Te heletā ʼo te laumālie”
Koteā koa te meʼa ʼe tonu ke tou pipiki tuʼumaʼu kiai mokā tou tekeʼi te ʼu meʼa ʼaē ʼe nātou tauʼi totatou maʼuli fakalaumālie pea mo te maʼuli ʼo ʼihi? (Pes. 119:98; Taag. 3:5, 6; vakaʼi ia Mateo 4:3, 4.)
ʼO ʼalutahi mo te faʼahi ʼaia, koteā te tahi meʼa ia Efesi 6:18, 19, ʼe maʼuhiga kia tatou ke tou mālo ai ʼi te tau fakalaumālie ʼaia? ʼE tonu ke lahi feafeaʼi hatatou fakaʼaogaʼi te faʼahi ʼaia, pea ʼo ʼuhiga mo ai?
15. (a) Ko tatou ʼāteaina pe koa ʼaē ʼe tou fai te tau fakalaumālie ʼaia? (b) E feafeaʼi koa hatatou kau ʼi te tau ʼaia?
15 ʼI totatou ʼuhiga kau solia ʼa Kilisito, ʼe tou kau ʼi te toe kautau ʼe lolotoga kau nei ʼi te tau fakalaumālie. Kapau ʼe tou nonofo tokaga pea mo fakaʼaoga lelei te teu tau katoa ʼaē ʼe tuku mai e te ʼAtua, ʼe mole tou mamate anai ʼi te tau ʼaia. Kae, ʼe tou fakaloto mālohiʼi anai pea mo tou tokoni anai ki ʼotatou ʼu tēhina ʼaē ʼe tauhi ki te ʼAtua. ʼE tou nonofo teuteu anai pea mo tou kau fakavilivili ki te tau ʼo faka mafola te logo lelei ʼo te Puleʼaga faka Mesianike ʼo te ʼAtua, ko te puleʼaga ʼaia, ʼaē ʼe fakafeagai mālohi kiai Satana.
Toe Fakamanatu
● He koʼe ʼe faiga te kau atolasio ʼa Sehova ke nātou ʼāteaina mai te ʼu tokakovi ʼaē ʼe fakatupu maveuveu ai te malamanei?
● Koteā te ʼu faʼahiga kākā ʼa Satana ʼe ina fakaʼaogaʼi ke higa ai te kau Kilisitiano ʼi te faʼahi fakalaumālie?
● E feafeaʼi te hāofaki ʼo tatou e te teu tau ʼaē ʼe tuku mai e te ʼAtua, mai te ʼu faʼahi tāfito ʼo te tau fakalaumālie?