Faʼahi 2
Ko He Kele Kua Pulihi Ai Te Mamahi
1, 2. Koteā te tahi manatu kehe ʼaē ʼe maʼu e te tokolahi?
KAE, ʼi te malamanei katoa, ko te ʼu tagata ʼe lauʼi miliona ʼe ʼalu kehe ʼosi tanatou manatu. ʼE nātou fakakikite he maʼuli taulekaleka maʼa te hahaʼi. ʼE ʼui maʼa nātou ko heni foki, ʼi te kele, ʼe fakatuʼu ai he malamanei ʼe pulihi ʼosi ai te agakovi pea mo te mamahi. ʼE nātou ʼiloʼi fakapapau kua vave nei pe te pulihi ʼo te ʼu meʼa kovi pea ko he mālama foʼou ka fakatuʼu anai. ʼE nātou ʼui fēnei foki ko te fakatafitoʼaga ʼo te mālama foʼou ʼaia ʼe kua lolotoga nei tona fakatuʼu!
2 Ko te ʼu hahaʼi ʼaia ʼe nātou tui ko te mālama foʼou ʼe mole toe ʼi ai anai he ʼu tau, he ʼu faʼahiga meʼa fakatupu mamahi, he fakapō, heʼeagatonu pea mo he masiva. ʼE ko he mālama ʼe mole toe ʼi ai anai he mahaki, he mamahi, he ʼu loʼimata, pea tatau aipe mo te mate ʼe pulihi anai. ʼI te temi ʼaia, ʼe hikihiki anai te tagata ki te maʼuli haohaoa pea ʼe nātou maʼuʼuli heʼegata anai mo fiafia ʼi he palatiso ʼi te kele. Tahi ʼaē meʼa lelei, ko te kau mate ʼe fakatuʼuake anai pea ʼe feala anai ke nātou maʼuʼuli ʼo heʼegata!
3, 4. He koʼe koa ʼe tui te ʼu hahaʼi ʼaia ki tanatou manatu?
3 Ko te manatu ʼaia ki te temi ka haʼu ʼe ko he moemisi pe koa ia, peʼe ko he meʼa pe ia ʼe tupu ʼi tatatou fakakaukau? Kailoa, ʼe mole ko ia ʼaia. ʼE fakatuʼutuʼu ia ki te tui ʼaē ʼe fakatafito mālohi ki te fakatuʼu moʼoni ʼo te Palatiso (Hepeleo 11:1). He koʼe koa ʼe mālohi te falala ʼa te ʼu hahaʼi ʼaia? Heʼe ko te fakapapau ʼaia ʼe haʼu mai te māfimāfi te Tupuʼaga ʼo te ʼatulaulau.
4 ʼO ʼuhiga mo te ʼu fakapapau ʼa te ʼAtua, ʼe ʼui fēnei e te Tohi-Tapu: “[ʼE mole ʼi ai] he folafola ʼi te ʼu folafola lelei fuli ʼaē neʼe ʼui atu e Sehova, tokotou ʼAtua. Neʼe hoko fuli ia maʼa koutou. Neʼe mole hana folafola ʼi te ʼu folafola ʼaia neʼe mole heʼeki hoko.” “Ko te ʼAtua ʼe mole ko he tagata ke loi (...). Neʼe ina ʼui ʼāpe ʼe ia, pea ʼe mole ina fai ʼāpe anai ia? Pea kapau neʼe palalau, ʼe mole ʼāpe anai na fakahoko ia?” “Ko Sehova ʼo te kautau neʼe ina fakapapau, ʼo ʼui maʼana: ‘ ʼIo, ohage ko taku manatu, ʼe hoko anai ia; pea ohage ko taku tokoni, koʼena te meʼa ka hoko anai.’ ” — Sosue 23:14; Faka au 23:19; Isaia 14:24.
5. Ko te ʼu fehuʼi fea ʼaē ʼe ʼaoga ke ʼi ai hona tali?
5 Kae, kapau ko te finegalo ʼo te ʼAtua ko he fakatuʼu ʼo he palatiso ʼi te kele ʼe mole toe ʼi ai he ʼu mamahi, he koʼe koa ʼe ina fakagafua te ʼu meʼa fakalialia? He koʼe koa neʼe talitali ia, ia taʼu e ono afe, ʼo aʼu mai ki te temi nei, moʼo fakatonutonuʼi ʼo te meʼa ʼaē ʼe kovi? Ko te ʼu sēkulō ʼaia neʼe hoko ai te ʼu mamahi ʼe hā ai koa ʼe mole tokaga moʼoni te ʼAtua kia tatou, peʼe hā mai ai ia ʼe mole ʼi ai he ʼAtua?