ʼE Kotou Fakalogo Koa Ki Te ʼAtua?

“Fakaha mai te meʼa ʼae ʼi tou loto, pea ʼe au fiafia anai ʼi tona fakahoko.” ʼE lagi mole kotou fai anai te ʼu palalau ʼaia ki he tahi ʼe mole kotou iloʼi lelei. Kaʼe ʼe faigafua takotou fai ia te ʼu palalau ʼaia ki hokotou kaumeʼa lelei. ʼE faigafua ki he ʼu kaumeʼa lelei ke natou fetokoniʼaki.

ʼE ui ʼi te Tohi-Tapu ʼe fai tuʼumaʼu e Sehova ia te ʼu faʼahi ʼae ʼe ina iloʼi e fiafia ai ʼana kaugana. Ohage la, neʼe ui fenei e te Hau ko Tavite, ʼae neʼe felogoʼi lelei mo te ʼAtua: “[Sehova,] toku Atua! Nee ke liuliuga au gaue fakatalakitupua mo au fakatuutuu kia matou. . . . Kae e natou lahi fau ke au fakamatala fuli natou.” (Pesalemo 40:6) Pea tahi, ʼe fakafiafiaʼi e Sehova ia te loto ʼo natou ʼae ʼe mole natou iloʼi ia ia, ʼo ina ‘fakafonu ʼonatou loto ʼaki te meʼa kai pea mo te fiafia.ʼ—Gaue 14:17.

Mai tona aluʼaga ʼae ʼe fakafiafiaʼi e Sehova ia te loto ʼo ʼihi, ʼe mole tonu koa la ke fai e te ʼu kaumeʼa ʼo te ʼAtua ia he ʼu faʼahi moʼo ‘fakafiafiaʼi tona loto?ʼ (Taaga Lea 27:11) Kaʼe ʼe ke lava fakafiafiaʼi feafeaʼi ia te loto ʼo te ʼAtua? ʼE tali fenei ʼi te Tohi-Tapu: “Aua naa koutou galoi te fai o te mea e lelei pea mo te mauli vaevae, koteuhi ko te u faahiga sakilifisio aia e leleiia e te Atua.” (Hepeleo 13:16) Ko tona fakaʼuhiga koa ʼe tonu pe ke tou fai ia te meʼa ʼae ʼe lelei pea mo maʼuli vaevae, ke fiafia ai ia Sehova?

ʼE ui fenei ʼi te Tohi-Tapu: “Hala mo te tui, e mole feala ke lelei he tahi ki te Atua.” (Hepeleo 11:6) ʼE mahino ia ‘neʼe fakahigoaʼi ia Apalahamo ko te kaumeʼa ʼo te ʼAtuaʼ koteʼuhi ‘neʼe tui ia ki te ʼAtua.ʼ (Sakopo 2:23) Neʼe toe fakaha lelei e Sesu ia te maʼuhiga ʼae ke tou “tui ki te Atua,” mo kapau ʼe tou loto ke tapuakiʼi tatou e te ʼAtua. (Soane 14:1) Kaʼe ʼe kotou lava maʼu feafeaʼi ia te tui ʼae ʼe loto e te ʼAtua ke maʼu e natou ʼae ʼe fia fakaovi age kia te ia? ʼE tonu ke kotou kamata ako ia te Folafola ʼa te ʼAtua, te Tohi-Tapu. ʼAki takotou fai ia te faʼahi ʼaia, ʼe kotou iloʼi ai tona finegalo pea mo ako ke “kotou lelei kia ia i te u mea fuli.” Pea ʼaki te tuputupu ʼo tokotou ʼatamai malama ʼo ʼuhiga mo Sehova pea mo maʼuliʼi ʼana lekula faitotonu, ʼe tuputupu ai anai ia takotou tui pea mo kotou fakaovi ai kia te ia.—Kolose 1:9, 10.