Te ʼu Fehuʼi ʼa Te Kau Lautohi

Neʼe ui e Satana kia Eva ʼe mole mate anai mo kapau ʼe ina kai te fuaʼi ʼakau ʼo te fuʼu ʼakau ʼo te malama ki te meʼa ʼae ʼe lelei pea mo te meʼa ʼae ʼe kovi. Kae ʼi tana fai te ʼu palalau ʼaia, neʼe ina fia ui koa te manatu ʼae kua mafola ia ʼaho nei ʼe maʼu e te hahaʼi ia he laumalie tuputupua?

Kailoa ia. Neʼe ui e te Tevolo kia Eva ʼe mole mate anai mo kapau ʼe ina kai te fuaʼi ʼakau ʼae neʼe tapuʼi. ʼI tana fai te ʼu palalau ʼaia, neʼe mole ina fia ui ʼe ʼi ai he koga fakapulipuli ia Eva (ʼae ʼe fakahigoa e ʼihi ia ʼaho nei ko he laumalie ʼe maʼuli tuputupua) ʼe hoko atu pe anai tona maʼuli ʼi he tahi faʼahi. Neʼe ina loiʼi ia Eva ʼe hoko atu pe anai tona maʼuli ʼi te kele. ʼE ina maʼu anai he maʼuli ʼe lelei age pea ʼe maʼuli ʼateaina anai mai te ʼAtua.—Sen. 2:17; 3:3-5.

Ko ʼanafea ʼae neʼe malaga ai te akonaki ʼae ʼo te maʼuli tuputupua mo kapau neʼe mole malaga ʼi Eteni? ʼE mole tou iloʼi papau te faʼahi ʼaia. Kae, ʼe tou iloʼi neʼe kua puli te lotu hala ʼi te temi ʼo Noe. Neʼe mole kei maʼu he lotu hala hili te Tulivio, he neʼe ko Noe pe mo tona famili ʼae neʼe hao pea mo tauhi ki te ʼAtua moʼoni hili te Tulivio.

Koia, ʼe mahino ia ko te akonaki ʼae ʼe maʼuli tuputupua te laumalie ʼo te tagata neʼe malaga hili te Tulivio. ʼI te ʼosi veuki e te ʼAtua ia te lea ʼo te hahaʼi ʼi Papele, neʼe natou mavetevete ai leva “i oluga o te kele katoa.” (Sen. 11:8, 9) ʼE mahino ia, neʼe natou ʼave mo natou te manatu ʼae ʼe maʼu e te hahaʼi ia he laumalie tuputupua. ʼE tatau aipe pe ʼe ko te temi fea ʼae neʼe malaga ai te akonaki hala ʼaia, kae ʼe tou tui papau neʼe haʼu mai ia “te tamai ʼo te loi” ia Satana te Tevolo. Pea neʼe fiafia ia ʼi tana sio ʼae ki te mafola ʼo te akonaki hala ʼaia ʼi te kele katoa.—Soa. 8:44.