Te ʼu Fehuʼi ʼa Te Kau Lautohi

Ia Pesalemo 61:8 (NWT) neʼe tohi e Tavite ʼe ina fakavikiviki anai te huafa ʼo te ʼAtua “ ʼo talu ai.” Ko tona fakaʼuhiga koa neʼe manatu ʼe mole mate anai?

ʼOho. Ko te ʼu palalau ʼae neʼe tohi e Tavite ʼe totonu pe ia.

Tokagaʼi te ʼu meʼa ʼae neʼe ina tohi ʼi te vaega ʼaia pea mo te tahi ʼu vaega ʼe tatau. “ ʼE au fai anai ni hiva ki tou huafa ʼo talu ai ke au fakahoko ʼaku fakapapau ʼi te ʼaho mo te ʼaho.” “E au fakavikiviki anai kia koe i toku loto katoa, [“Sehova,” NWT], toku Atua! Pea e au fakakololia anai ki tou huafa o heegata.” “E au fakakololia anai ki tou huafa i te temi fuli, o heegata.”​—Pes. 61:8 (NWT); 86:12; 145:1, 2.

ʼI te tohi e Tavite te ʼu palalau ʼaia neʼe mole manatu ia ʼe mole mate anai. Neʼe malama ki te ui ʼae ʼa Sehova ko te agahala ʼe iku anai ki te mate. Pea neʼe ina iloʼi ʼe agahala mo ia. (Sen. 3:3, 17-19; Pes. 51:6, 7) Neʼe ina toe iloʼi foki maʼia mo te ʼu tagata agatonu ohage la ko Apalahamo, Isaake mo Sakopo, neʼe natou mamate. Pea neʼe mahino pe ʼe toe mate anai mo ia. (Pes. 37:25; 39:5) Kae ko te ʼu palalau ʼae neʼe ina tohi ia Pesalemo 61:8, ʼe ha ai tana loto pea mo tana fakatotonu ʼae ke ina fakavikiviki ia te ʼAtua ʼo talu ai, ko tona fakaʼuhiga ʼi te temi katoa ʼo tona maʼuli.​—2 Sam. 7:12.

ʼI ʼihi temi neʼe tohi e Tavite he ʼu aluʼaga ʼo tona maʼuli, ohage ko tona fakaha ʼi te ʼu ʼuluaki vaega ʼo te ʼu Pesalemo 18, 51 pea 52. ʼI te Pesalemo 23, ʼe ui e Tavite ko Sehova ʼe ko he tauhi ovi, ohage pe ko ia, pea ʼe ina takitaki, mo fakafimalie pea mo puipui. Koia la ʼae neʼe fia tauhi ai ia Tavite ki te ʼAtua ʼi te ʼaho fuli pe ʼo tona maʼuli.​—Pes. 23:6.

Tahi ʼae, manatuʼi neʼe takitaki e Sehova te ʼu meʼa fuli ʼae neʼe tohi e Tavite. ʼI te ʼu meʼa ʼae neʼe ina tohi, ʼe kau ai te ʼu lea fakapolofeta ʼe fakakikite ai te ʼu aluʼaga ka hoko ki muli age. Ohage la ʼi te Pesalemo 110, neʼe palalau ki te temi ʼae ka heka ai tona ʼAliki ʼi te toʼomataʼu ʼo te ʼAtua ʼi selo, pea ʼe foaki age anai he toe malohi lahi. Kotea tona tupuʼaga? Ke ina puleʼi te ʼu fili ʼo te ʼAtua pea mo “fai te fakamaau i te lotolotoga o te atu puleaga” ʼo te kele. Ko Tavite neʼe ko te kui ʼo te ʼAliki ʼaia, te Mesia, ʼae ka hau anai ʼi selo pea mo pelepitelo “o heegata.” (Pes. 110:1-6) Neʼe ui e Sesu ko te lea fakapolofeta ʼae ia Pesalemo 110 ʼe fakaʼuhiga kia ia pea ʼe hoko anai ki muli age.​—Mat. 22:41-45.

Neʼe takitaki e Sehova ia Tavite ke faitohi ʼo ʼuhiga mo tona temi pea mo te temi ki muli age, moka fakatuʼuake anai ke ina fakavikiviki ia Sehova ʼo talu ai. Koia ʼe tou toe mahino ai ko te Pesalemo 37:10, 11, 29 ʼe feala ke fakaʼuhiga ki te temi ʼae neʼe tohi ai, ʼo feia pe mo te ka haʼu. Ko te ʼu vaega ʼaia neʼe fakahoko ʼi te temi muʼa ʼi Iselaele, pea ʼe fakahoko anai ʼi te ka haʼu moka fakahoko e te ʼAtua ʼana fakapapau.​—Vakaʼi te palakalafe 8 ʼi te alatike “ ʼE Ke Nofo Anai Mo Au ʼi Te Palatiso” ʼi te nusipepa ʼaeni.

Koia ia Pesalemo 61:8 pea mo te tahi ʼu vaega ʼe tatau, ʼe fakaha ai e Tavite tana fia fakavikiviki ia Sehova ʼi Iselaele ʼi te temi katoa ʼo tona maʼuli. Pea ʼe toe fakaha ai te meʼa ʼae ka fai anai e Tavite ʼi te ka haʼu moka fakatuʼuake e Sehova.