ʼE Ke Maʼuhiga ʼAupito Kia Sehova!

1-2. ʼE feafeaʼi hatatou iloʼi papau ʼe tou maʼuhiga ʼaupito kia Sehova?

ʼE MAʼUHIGA ʼaupito te ʼu kaugana ʼa Sehova kia te ia. Kae ʼe faigataʼa ki ʼihi hanatou tui ki te faʼahi ʼaia. ʼE lagi natou manatu feia he neʼe gaohi koviʼi natou e he tahi. ʼE ke toe manatu feia koa mo koe? Kapau koia, ʼe feafeaʼi hau iloʼi papau ʼe ke maʼuhiga kia Sehova?

² ʼE lagi ke leleiʼia anai te vakavakaʼi te ʼu fakamatala ʼi te Tohi-Tapu ʼe ha ai te faʼahiga aga ʼe loto e Sehova ke fai ki te hahaʼi. Neʼe fakaʼapaʼapa tona ʼAlo ko Sesu ki te hahaʼi pea mo agalelei kia natou. ʼI tana fai ʼaia, neʼe ina fakaha ai ko ia mo tana Tamai ʼe nā ʼoʼofa ʼi te kau agavaivai ʼae ʼe natou manatu ʼe mole honatou ʼuhiga. (Soa. 5:​19; Hep. 1:3) ʼI te alatike ʼaeni ʼe tou vakaʼi ai anai (1) pe neʼe tokoni feafeaʼi ia Sesu ki te hahaʼi ke natou mahino ʼe natou maʼuhiga ʼaupito kia Sehova, pea (2) ʼe feafeaʼi hatatou tui papau ʼe tou maʼuhiga ʼaupito ki te ʼAtua.​—Ake. 2:7.

NEʼE TOKONI IA SESU KI TE HAHAʼI KE NATOU MAHINO ʼE ʼI AI TONATOU ʼUHIGA

3. Neʼe feafeaʼi te aga ʼa Sesu ki te hahaʼi Kalilea ʼae neʼe ʼomai ʼo kole tokoni kia te ia?

³ ʼI te faifakamafola ʼa Sesu ʼi Kalilea, neʼe ko tana tuʼa tolu ʼaia, neʼe kaugamalie leva natou neʼe ʼomai ʼo fakalogo ki tana faiakonaki, pea ke ina fakamalolo natou. Neʼe tokagaʼi e Sesu “neʼe natou ogosia pea mo mavetevete ohage ko he ʼu ovi ʼe mole honatou tauhi ovi.” (Mat. 9:​36) Neʼe ui e ʼanatou takitaki lotu ʼe mole natou maʼuhiga he neʼe mole natou ako. Pea neʼe natou toe ui ʼo ʼuhiga mo te hahaʼi “ ʼe ko te kau malaʼia.” (Soa. 7:​47-​49) Kae neʼe fakaʼapaʼapa Sesu ki te hahaʼi ʼaia, ʼo ina toʼo he temi ke ina akoʼi mo fakamalolo natou. (Mat. 9:​35) Neʼe mole gata ai. Neʼe ina toe akoako ʼana apositolo ki te gaue faifakamafola pea mo ui age ke natou fakamalolo te kau mahaki. Neʼe feala ai hanatou tokoni ki he tokolahi.​—Mat. 10:​5-8.

4. Kotea ʼae ʼe tou ako mai te aga ʼa Sesu kia natou ʼae neʼe natou fia logo ki ʼana akonaki?

⁴ Neʼe agalelei ia Sesu mo fakaʼapaʼapa ki te hahaʼi. Neʼe ina fakaha ai ʼe maʼuhiga ʼaupito kia ia mo tana Tamai ia natou ʼae ʼe meʼa noaʼi. Kapau ʼe ke tauhi kia Sehova kae ʼe ke manatu ʼe mole hou ʼuhiga, manatuʼi te aga ʼa Sesu ki te hahaʼi ʼae neʼe natou fia logo ki ʼana akonaki. ʼE tokoni atu anai ke ke mahino ʼe ke maʼuhiga ʼaupito kia Sehova.

5. Kotea ʼae ʼe tou iloʼi ʼo ʼuhiga mo he fafine neʼe felaveʼi mo Sesu ʼi Kalilea?

⁵ Neʼe mole faiakonaki pe Sesu ki he hahaʼi kaugamalie. Neʼe toe tokaga ki te hahaʼi takitokotahi. Ohage la, ʼi te faifakamafola ʼa Sesu ʼi Kalilea neʼe felaveʼi mo he fafine kua taʼu 12 tana mahaki, neʼe maligi te toto ia ia. (Mko. 5:​25) Neʼe ui e te Lao neʼe heʼe maʼa te fafine ʼaia pea ko ʼae ʼe fāfā ki ai ʼe toe heʼe maʼa mo ia. Koia neʼe mole feala ke fakatahi mo ni hahaʼi. Pea neʼe mole feala ke tauhi kia Sehova fakatahi mo ʼihi ʼi te sinakoka pea ʼi te ʼu ʼaho lalahi. (Lev. 15:​19, 25) ʼE mahino papau ia, neʼe mamahi te fafine ʼaia ʼi tona sino pea neʼe ina toe logoʼi tona mole ʼofainaʼi.​—Mko. 5:​26.

6. Neʼe fakamalolo feafeaʼi te fafine ʼae neʼe maligi te toto ia ia?

⁶ Neʼe loto e te fafine ʼaia ke fakamalolo ia ia e Sesu he neʼe mamahi ʼaupito. Kae neʼe mole alu fakahagatonu kia Sesu. Kotea tona tupuʼaga? Neʼe lagi ufiufi ʼi tona mahaki. Pe neʼe lagi mataku naʼa munaʼi ia ia e Sesu he ʼe ʼi te Lao neʼe heʼe maʼa pea neʼe mole tonu ke fakatahi mo te hahaʼi. Koia neʼe haʼu pe ia ʼo fa ki te kofu tuʼa ʼo Sesu he neʼe tui ia ʼe malolo anai. (Mko. 5:​27, 28) Neʼe fakapale tana tui malohi ʼaia, he neʼe ina logoʼi tana kua malolo mai tona mahaki. Neʼe kumi e Sesu pe ko ai ʼae neʼe fa kia te ia. Neʼe haʼu ai te fafine ʼo fakaha age neʼe ko ia. Kotea ʼae neʼe fai e Sesu?

7. Neʼe feafeaʼi te aga ʼa Sesu ki te fafine ʼaia neʼe mamahi ʼaupito? (Maleko 5:​34)

⁷ Neʼe agalelei ia Sesu ki te fafine pea neʼe fakaʼapaʼapa ki ai. Neʼe tokagaʼi e Sesu “neʼe mataku.” (Mko. 5:​33) ʼI tana mahino ʼaia ki te ʼu meʼa ʼae neʼe logoʼi e te fafine, neʼe ina fai age ni palalau fakalotofimalie. Neʼe ina ui age pe la “taʼahine.” Neʼe ko he palalau agalelei ʼaia pea toe ha ai te fakaʼapaʼapa ʼa Sesu mo tona ʼofa ki ai. (Lau ia Maleko 5:​34.) Ko te lakaga pe ʼaia ʼe tahi ʼi te Tohi-Tapu ʼae neʼe palalau feia ia Sesu ki te fafine ʼo ina ui age “taʼahine.” Neʼe lagi palalau feia age he neʼe sio neʼe lahi tana mataku. ʼE mahino ia neʼe fakalotofimalie te ʼu palalau ʼaia ki te fafine! Kapau la neʼe mole fai e Sesu he ʼu palalau feia, ʼe lagi alu te fafine kua malolo ʼi te faʼahi fakasino kae kei lotomamahi pe ia ʼi tana manatu ʼae neʼe ina fai he meʼa ʼe kovi. Neʼe mole fia fakamalolo pe e Sesu te fafine ʼaia. Kae neʼe ina toe loto ke mahino kia ia neʼe ko he ʼofafine ʼo tana Tamai ʼofa ʼae ʼi selo, pea ʼe maʼuhiga kia te ia.

8. Kotea te ʼu faigataʼaʼia neʼe tauʼi e he tuagaʼane mai Pelesile?

⁸ ʼO toe feia ia ʼaho nei, ʼe manatu ʼihi kaugana ʼa te ʼAtua ʼe mole honatou ʼuhiga ʼuhi he natou tau mo ni mahaki. Ohage la ko Mariaa ʼae ʼe pionie katoa ʼi Pelesile. Neʼe tupu ake mole hona ʼu vaʼe pea mo tona nima hema. ʼE ina fakamatala fenei: “Neʼe vaʼi tuʼumaʼu au e te tamaliki ʼi te fale ako pea mo natou faʼu hoku ʼu higoa fakaufiufi. Pea maʼia mo toku famili neʼe natou meʼa noaʼi au.”

9. Ko ai ʼae neʼe tokoni kia Maria ke mahino ʼe maʼuhiga ʼaupito ia ia kia Sehova?

⁹ Ko ai ʼae neʼe tokoni kia Maria ke mahino ʼe ʼi ai tona ʼuhiga? ʼI tana liliu ʼae ko he Fakamoʼoni ʼa Sehova neʼe fai age e te ʼu tehina mo tuagaʼane he ʼu palalau fakalotofimalie ki ai. Neʼe natou toe tokoni ki ai ke ina maʼu te faʼahiga sio ʼa Sehova ʼo ʼuhiga mo ia totonu. ʼE ui e Maria: “Kapau ʼe tonu ke au tohi ia natou fuli ʼae neʼe natou tokoni lahi mai ki haku kaupepa, ʼe mole hao ia! ʼE au fakamalo lahi kia Sehova ʼi tana foaki mai he famili fakalaumalie taulekaleka.” Neʼe tokoni te ʼu tehina mo tuagaʼane ʼo te kokelekasio ʼa Maria ke mahino ʼe maʼuhiga ʼaupito ia ia ki te ʼAtua.

10. Kotea te aluʼaga faigataʼa neʼe tau mo Malia Maketalena, pea kotea ʼae neʼe lagi ina logoʼi? (Vakaʼi mo te ʼu pāki.)

¹⁰ Tou vakaʼi pe neʼe toe tokoni feafeaʼi ia Sesu ki te tahi fafine. Neʼe ko Malia Maketalena, ʼae neʼe ulu sino ai ni temonio ʼe fitu. (Luka 8:2) ʼE mahino ia neʼe faikehe tana aga he neʼe fakaneke ia ia e te ʼu temonio, pea neʼe mole fia fakaovi he tahi kia ia! ʼI te temi fakaʼofaʼofa ʼaia ʼo tona maʼuli neʼe mamahi ʼaupito. Neʼe lagi mataku, mo manatu ʼe mole he tahi ʼe ʼofa ia ia peʼe fia tokoni age. Neʼe lagi kapu e Sesu te ʼu temonio ʼae neʼe natou fakamamahiʼi ia ia, pea neʼe liliu ia Malia Maketalena ko hana tisipulo. Kotea ʼae neʼe toe fai e Sesu ke mahino ia Malia Maketalena ʼe maʼuhiga ki te ʼAtua?

11. Neʼe fakaha feafeaʼi e Sesu kia Malia Maketalena ʼe maʼuhiga ʼaupito ki te ʼAtua? (Vakaʼi mo te ʼu pāki.)

¹¹ Neʼe fakaafe e Sesu ia Malia Maketalena ke kaugā alu mo ia pea mo ʼana tisipulo ʼi tanatou faifakamafola.b Koia neʼe feala ai hana fagono moka faiakonaki ia Sesu ki te hahaʼi. Pea ʼi te ʼaho ʼae neʼe fakatuʼuake ai Sesu neʼe ha kia Malia Maketalena. Neʼe kau ʼi te ʼu tisipulo ʼae neʼe ʼuluaki palalau ki ai Sesu. Neʼe toe kole age pe la e Sesu ke alu ʼo fakaha ki ʼana apositolo kua fakatuʼuake. ʼI te ʼu aluʼaga ʼaia neʼe tokoni ai ia Sesu ke mahino ia Malia Maketalena ʼe maʼuhiga ʼaupito ia ia kia Sehova!​—Soa. 20:​11-​18.

12. He koʼe neʼe manatu ia Lidia ʼe mole feala ke ʼofainaʼi ia ia e he tahi?

¹² Ohage pe ko Malia Maketalena tokolahi ia ʼaho nei ʼe natou manatu ʼe mole feala ke ʼofainaʼi natou. ʼE fakamatala e Lidia, te tuagaʼane mai Sepania, ʼi tana kei fuafatuʼi neʼe faiga e tana faʼe ke ina fakato tona fatu. ʼE manatuʼi e Lidia, maʼia ʼi tana kei veliveli neʼe mole tokaga tana faʼe kia ia pea neʼe ina fai age ni palalau kovi. ʼE ina ui fenei: “ ʼI te mole ʼofa ʼo taku faʼe kia au, neʼe au faiga tuʼumaʼu pe ke ʼofainaʼi au e te hahaʼi pea ke matou kaumeʼa. Neʼe au mataku naʼa mole ʼofa he tahi ia au he neʼe au tui ko au ko he tahi ʼe agakovi ʼuhi ko te ʼu palalau ʼae neʼe fai mai e taku faʼe.”

13. Kotea ʼae neʼe tokoni kia Lidia ke mahino ʼe maʼuhiga ʼaupito kia Sehova?

¹³ ʼI te ako leva e Lidia te Tohi-Tapu neʼe fetogi ai tona maʼuli. Neʼe tokoni tana faikole, mo tana lau te Tohi-Tapu pea mo te agalelei ʼo te ʼu tehina mo tuagaʼane ke mahino ʼe maʼuhiga ʼaupito ia ia kia Sehova. ʼE fakamatala fenei e Lidia: “ ʼE ui tuʼumaʼu mai e toku ʼohoana ʼe ʼofa ia au pea mo ina fakamanatuʼi mai ʼoku kalitate. Neʼe toe palalau feia mai ʼoku kaumeʼa.” ʼE lagi ke iloʼi he tahi ʼi tau kokelekasio ʼe hage ko Lidia pea ʼe tonu ke mahino ʼe maʼuhiga ʼaupito ia ia kia Sehova. ʼE feala ʼaki ʼau palalau mo tau aga ke ke tokoni kia ia.

TOU MAʼU TE FAʼAHIGA SIO ʼA SEHOVA ʼO ʼUHIGA MO TATOU

14. ʼE tokoni feafeaʼi mai ia 1 Samuele 16:7 ke tou maʼu te faʼahiga sio ʼa Sehova ki te hahaʼi? (Vakaʼi mo te ʼa takai “He Koʼe ʼe Maʼuhiga Kia Sehova Ia Tana Hahaʼi?”)

¹⁴ Ke ke manatuʼi ʼe mole tatau te sio ʼa Sehova kia koe mo ʼae ʼa te hahaʼi ʼo te malama ʼaeni. (Lau ia 1 Samuele 16:7.) Ki te hahaʼi ʼo te malamanei ʼe maʼuhiga he tahi ʼuhi ko tona tupulaga mo finemui, peʼe maʼu paʼaga, pe neʼe ako ʼi te ʼu fale ako maʼoluga. Kae ʼe mole ko te faʼahiga sio ʼaia ʼa Sehova. (Esa. 55:​8, 9) Koia, ke ke maʼu te faʼahiga sio ʼa Sehova ʼo ʼuhiga mo koe kae mole hage ko te sio ʼa te hahaʼi ʼo te malama. ʼE feala ke ke lau he ʼu fakamatala ʼi te Tohi-Tapu ʼe fakaha ai neʼe ʼofa ia Sehova kia natou ʼae neʼe manatu ʼe mole honatou ʼuhiga. Ohage ko Elia, mo Naomi pea mo Ana. ʼE toe feala ke ke tohi te ʼu aluʼaga ʼae neʼe hoko ʼi tou maʼuli ʼe ha ai ʼe ʼofa moʼoni ia Sehova ia koe. Pea tahi, ʼe feala ke ke lau ʼi ʼatatou tohi he ʼu alatike ʼe talanoa ai ki te faʼahiga manatu ʼa he tahi ʼo ʼuhiga mo ia totonu.c

15. He koʼe ko Taniela neʼe “ko he tagata ʼe maʼuhiga ʼaupito” kia Sehova? (Taniela 9:​23)

¹⁵ Ke ke tui papau ʼe ke maʼuhiga ʼaupito kia Sehova ʼuhi ko tau nofo agatonu. ʼI te lagi taʼu 90 ʼo te polofeta ko Taniela, neʼe logo “gaʼegaʼe ʼaupito” pea mo lotovaivai. (Tan. 9:​20, 21) Neʼe fakalotomalohiʼi feafeaʼi ia ia e Sehova? Neʼe fekauʼi ifo e te ʼAtua ia te ʼaselo ko Kapeliele ke ina fakamanatuʼi age kia Taniela, neʼe “ko he tagata ʼe maʼuhiga ʼaupito” pea kua tali ʼana faikole. (Lau ia Taniela 9:​23.) He koʼe neʼe maʼuhiga ʼaupito ia Taniela ki te ʼAtua? Koteʼuhi ko Taniela neʼe ko he tagata faitotonu mo agatonu. (Esk. 14:14) Neʼe tohi e Sehova te fakamatala ʼaia ʼi te Tohi-Tapu moʼo fakafimalieʼi ʼo tatou. (Loma 15:4) ʼE toe fakalogo ia Sehova ki ʼau faikole, pea ʼe maʼuhiga kia te ia tau faitotonu, pea mo tau tauhi agatonu kia te ia.​—Mik. 6:​8, te ʼu nota.; Hep. 6:​10.

16. Kotea ʼae ʼe feala ke tokoni atu ke ke mahino ko Sehova ʼe ko he Tamai ʼe ʼofa ia koe?

¹⁶ Ke ke mahino ko Sehova ʼe ko he tamai ʼe ʼofa ia koe. ʼE mole loto e Sehova ke ina valokiʼi koe kae ke tokoni atu. (Pes. 130:3; Mat. 7:​11; Luka 12:​6, 7) Tokolahi te kau Kilisitiano ʼe natou manatu ʼe mole honatou ʼuhiga, neʼe natou metitasio ki te manatu ʼaia, pea mo maʼu ai he fakalotofimalie. Tou vakaʼi te aluʼaga ʼo Michelle, ko te tuagaʼane mai Sepania. Neʼe ina logoʼi ʼe mole ʼofainaʼi pea ʼe mole hona ʼuhiga, koteʼuhi neʼe fai age e tona ʼohoana he ʼu palalau kovi lolotoga ni taʼu. ʼE ina ui fenei: “Ka au logoʼi ʼe mole hoku ʼuhiga, ʼe au faiga ke au fakakaukauʼi ʼe fua au e Sehova, mo ina fakaha mai tona ʼofa pea mo ina puipui au.” (Pes. 28:9) Kae ko Lauren, ko te tuagaʼane mai Afelika Saute, ʼe ina manatuʼi tuʼumaʼu: “Kapau neʼe taki mai au e Sehova kia te ia ʼaki te ʼu maea ʼo te ʼofa, mo tokoni mai ke au nofo ovi kia te ia talu mai fualoa, pea mo ina fakaʼaogaʼi au moʼo akoʼi tana Folafola ki ʼihi, pea ʼe mahino papau ia, ʼe au maʼuhiga ʼaupito kia te ia pea ʼe ʼi ai toku ʼaoga.”​—Oseo 11:4.

17. Kotea ʼae ʼe feala ke tokoni atu ke ke tui papau ʼe ke maʼu te ʼofa ʼo Sehova? (Pesalemo 5:​12) (Vakaʼi mo te pāki.)

¹⁷ Ke ke tui papau ʼe ke maʼu te ʼofa ʼo Sehova. (Lau ia Pesalemo 5:​12.) Neʼe fakatatau e Tavite te ʼofa ʼo Sehova ki he “meʼa tali tau lahi” ʼe ina puipui ia te kau faitotonu. Ka ke tui papau ʼe tokoni atu ia Sehova pea mo ke maʼu tona ʼofa, ʼe feala ke ina puipui ai koe mai tau ʼu manatu ʼae ʼe mole hou ʼuhiga. ʼE feafeaʼi hau iloʼi ʼe ke maʼu te ʼofa ʼo Sehova? Neʼe tou vakaʼi ʼe foaki mai e Sehova ia te Tohi-Tapu moʼo fakaha mai te meʼa ʼae ʼe ina logoʼi ʼo ʼuhiga mo tatou. ʼE ina toe fakaʼaogaʼi te kau tagata ʼafeā, mo ʼou kaumeʼa, pea mo ʼihi tehina mo tuagaʼane moʼo fakamanatuʼi atu, ʼe ke maʼuhiga ʼaupito kia te ia. Kotea anai ʼe tonu ke ke fai moka fai atu he ʼu palalau fakalotomalohi feia?

18. He koʼe ʼe tonu ke ke tali moka vikiʼi koe?

¹⁸ Ka vikiʼi koe e natou ʼae ʼe natou iloʼi lelei koe, pea mo ʼoʼofa ia koe, ʼaua naʼa ke manatu ʼe mole tuha ia mo koe. Ke ke manatuʼi ʼe lagi fakaʼaogaʼi e Sehova ia natou ʼaia ke ke tui papau ʼe ke maʼu ia tona ʼofa. ʼE ui fenei e Michelle, ʼae neʼe tou talanoa ki ai ʼi ʼoluga: “ ʼAki te temi, ʼe au faiga ke au tali te ʼu palalau lelei ʼae ʼe fai mai e ʼihi. ʼE mole faigafua kia au, kae ʼe au iloʼi ko te meʼa ʼaia ʼe loto e Sehova ke au fai.” Neʼe tokoni lahi te kau tagata ʼafeā kia Michelle ke mahino ʼe ʼofa Sehova ia ia. ʼE pionie ia Michelle ʼi te temi nei, pea ʼe tokoni ki te ʼu gaue ʼae ʼi te Petele.

19. He koʼe ʼe ke tui papau ʼe ke maʼuhiga ʼaupito ki te ʼAtua?

¹⁹ ʼE fakamanatuʼi mai e Sesu ʼe tou maʼuhiga ʼaupito ki tatatou Tamai ʼae ʼe ʼi selo. (Luka 12:24) Koia, ʼe tou tui papau ʼe tou maʼuhiga ʼaupito kia Sehova. ʼAua naʼa tou galoʼi te fahaʼi ʼaia. Pea tou fai ia meʼa fuli ke tou tokoni ki ʼihi ke natou mahino ʼe natou maʼuhiga ʼaupito ki te ʼAtua.