ʼE ʼOfa Mamahi Ia Sehova Ia Koe

1. ʼE feafeaʼi ia Sehova kia koe?

NEʼE kua ke fakakaukauʼi koa peʼe feafeaʼi ia Sehova? ʼE feafeaʼi koa kia koe moka ke faikole kia te Ia? ʼE moʼoni ʼe mole feala ke tou sio mata kia te Ia, kae ʼe fakaʼaogaʼi e te Tohi-Tapu ni aluʼaga kehekehe ʼo ʼuhiga mo ia. ʼE ui ai ko Sehova ʼe ko “he laʼa mo he meʼa tali tau,” ʼe ko he “afi fakaʼauha.” (Pes. 84:11; Hep. 12:29) Pea ʼe fakatatau ia Ia ki te maka ʼae ko te Safile, peʼe ko he meʼa ʼe gigila, pe ko he nuanua malama gigila. (Esk. 1:26-28) ʼI tatatou iloʼi te ʼu faʼahi ʼaia, ʼe feala ai ke tou ʼofolele, peʼe tou manatu ʼe mole tou tuha mo Ia.

2. Kotea ʼae ʼe ina taʼofi tatatou fakaovi ʼae kia Sehova?

² ʼUhi ʼae mole tou sio mata kia Sehova, ʼe lagi faigataʼa hatatou tui ʼe ʼofa ia tatou. ʼE tou manatu koa ʼe mole ʼofa ia Sehova ia tatou ʼuhi ko he aluʼaga fakalotomamahi neʼe tou tau mo ia? Ohage la ko tau matuʼa neʼe lagi heʼeki ina fakaha atu te ʼofa kia koe. ʼE mahino ia Sehova ki te ʼu meʼa ʼae ʼe tou logoʼi pea ʼe ina iloʼi te ʼu tupuʼaga ʼo te faigataʼa ʼo tatatou fakaovi age kia te Ia. Moʼo tokoni kia tatou, ʼe ina fakaha mai ʼi te Tohi-Tapu ko Ia ko he ʼAtua ʼe agamalū.

3. He koʼe ʼe fua lelei anai tatatou palalau ki te ʼofa ʼae ʼe fakaha mai e Sehova kia tatou?

³ Ko te kupu ʼae ʼe ina fakamahino lelei ia Sehova ʼe ko te ʼofa. (1 Soa. 4:8) ʼE ui ʼi te Tohi-Tapu, ko te ʼAtua ʼe ko te ʼofa. Ko te ʼu gaue fuli ʼae ʼe ina fai, ʼe ina fai ʼaki te ʼofa. ʼI te lahi mo te malohi ʼo tona ʼofa, ʼe ina toe fakaha kia natou ʼae ʼe mole ʼoʼofa ia te Ia. (Mat. 5:44, 45) ʼI te alatike ʼaeni, ʼe tou talanoa anai ʼo ʼuhiga mo Sehova pea mo te ʼofa ʼae ʼe ina fakaha mai kia tatou. Ka lahi tatatou ako ʼae ke tou iloʼi te ʼAtua pea ʼe toe lahi age tatatou ʼofa ʼae ia te Ia.

ʼE ʼOFA ʼAUPITO IA SEHOVA IA TATOU

4. Kotea ʼe ke logoʼi ʼi tau iloʼi ʼae ko Sehova ʼe ʼofa mamahi? (Vakaʼi mo te pāki.)

⁴ “Ko Sehova ʼe ʼofa mamahi.” (Sakp. 5:11) ʼE fakatatau ia Ia ki he faʼe ʼe manavaʼofa. (Esa. 66:12, 13) Fakakaukauʼi age muʼa ki he faʼe ʼofa ʼe tokaga lelei ki tana kiʼi toe. ʼE ina fakagaoʼi ʼi ʼona fuga pea ʼaki he leʼo malū, ʼe palalau lelei ki ai. Ka tagi peʼe mamahi hona koga, ʼe tokaga anai ke katoa te ʼu meʼa ʼae ʼe ʼaoga ki ai. Koia, ʼe tou tui papau ʼe puipui anai tatou e Sehova ʼaki tona ʼofa moka tou lotomamahi. Neʼe tohi e te tagata faipesalemo: “ ʼI te lahi ʼo ʼoku tuʼania, neʼe ke fakapelepeleʼi mo fakafimalieʼi au.”​—Pes. 94:19.

5. Kotea ʼae ʼe feala ke ke tui ki ai ʼi tau iloʼi ʼae ko Sehova ʼe ko he ʼAtua ʼofa agatonu?

⁵ ʼE agatonu ia Sehova. (Pes. 103:8) Ka tou fai he meʼa ʼe kovi, ʼe mole ina liʼakinaʼi tatou. Ohage la neʼe lotomamahi ia Sehova ʼi te agakovi tuʼumaʼu ʼa te kau Iselaele; kae ʼi tanatou fakahemala neʼe fakaha age e Sehova kia natou tona ʼofa agatonu. Ohage la neʼe ina ui age: “Neʼe ke liliu ʼo maʼuhiga ʼi ʼoku mata, neʼe fakaʼapaʼapaʼi koe pea ʼe au ʼofa ia koe.” (Esa. 43:4, 5) Heʼeki fetogi ia Sehova. ʼE feala ke tou falala tuʼumaʼu kia Sehova, maʼia pe neʼe tou fai ni hala ʼe mole ina liʼakinaʼi anai tatou. Ka tou fakahemala pea mo toe fakaovi kia te ia, ʼe tou sio anai neʼe mole fetogi te ʼofa ʼo Sehova ʼae ia tatou. ʼE ina fakapapau mai “ ʼe fakamolemole lahi anai kia tatou.” (Esa. 55:7) ʼI te Tohi-Tapu, ʼe fakatatau tana fakamolemole ki “he ʼu temi maʼuli fimalie.”​—Gaue 3:19.

6. Kotea ʼae ʼe tou ako mai ia Sakalia 2:8 ʼo ʼuhiga mo Sehova?

⁶ Lau ia Sakalia 2:8. I tana ʼofa ʼae ia tatou, ʼe malave kia Sehova te ʼu meʼa ʼae ʼe tou logoʼi pea ʼe fia tokoni moʼoni mai kia tatou. Ka tou mamahi, ʼe toe mamahi mo ia. Koia ʼe tou tui papau ai ʼe ina tali mai anai moka tou kole fenei age: “Puipui au ohage ko ʼou kanoʼi mata.” (Pes. 17:8) Ko te foʼi mata ʼe ko he koga fakaʼeteʼete pea mo maʼuhiga ʼo te sino. Koia kapau ʼe fakatatau tatou e Sehova ki tona kanoʼi mata, ʼe hage pe ko tana ui ʼae, ‘Ko ia ʼae ʼe ina fakamamahiʼi taku hahaʼi, ʼe ina fakamamahiʼi ia natou ʼae ʼe maʼuhiga ki ʼoku mata.’

7. He koʼe ʼe tonu ke tou fakamalohi tatatou tui ʼae ʼe ʼofa ia Sehova ia tatou?

⁷ ʼE loto e Sehova ke tou tui papau ʼe ʼofa ia tatou. Kae ʼe ina iloʼi ʼi ʼihi temi ʼuhi ko tatatou tau ʼae mo ni aluʼaga fakalotomamahi, ʼe tou feʼekeʼaki peʼe ʼofa koa Sehova ia tatou. Peʼe lagi tou tau nei mo ni aluʼaga faigataʼa ʼe feala ke tou lotolotolua ai ʼo ʼuhiga mo tona ʼofa. Ka tou sio ki tona ʼofa ʼae ia Sesu, mo te kau fakanofo, pea mo tatou ʼe malohi ai tatatou tui ʼae ʼe ʼofa ia Sehova ia tatou.

ʼE FAKAHA FEAFEAʼI E SEHOVA IA TONA ʼOFA

8. He koʼe neʼe tui papau ia Sesu ʼe ʼofa tana Tamai ia ia?

⁸ Neʼe fualoa ʼaupito te maʼuli fakatahi ʼa Sehova pea mo Sesu, ʼi ni lauʼi taʼu, ʼi tanā maʼuʼuli ʼi selo. Neʼe malohi ai tanā ʼu felogoi mo tanā feʼofaʼaki. Ohage ko tona ui mai ia Mateo 17:5. Neʼe fakaha lelei e Sehova tona ʼofa ʼae ia Sesu. Neʼe feala pe ke ina ui ‘Ko ia ʼaeni ko toku ʼofaina’ Kae ʼi tana loto ʼae ke tou iloʼi tona ʼofa mamahi ʼae ia te ia, neʼe ina ui fenei: “Ko toku ʼAlo ʼaeni, toku ʼofaina ʼae ʼe au fiafia ai.” Neʼe fiafia ia Sehova kia ia ʼi tana lotolelei ʼae ke ina foaki tona maʼuli ko he sakilifisio. (Efe. 1:7) Neʼe mole lotolotolua ia Sesu ʼo ʼuhiga mo te ʼofa ʼae ʼo tana Tamai. Neʼe tui papau ki te ʼofa moʼoni ʼo tana Tamai ʼo ina logoʼi ai ʼi tona loto. Neʼe ina ui tuʼumaʼu pe ʼe ʼofa tana Tamai ia ia.​—Soa. 3:35; 10:17; 17:24.

9. Ko te kupu fea ʼae neʼe fakaʼaogaʼi e te apositolo ko Paulo ʼo ʼuhiga mo te ʼofa lahi ʼo Sehova ki te kau fakanofo? Fakamahino. (Loma 5:5)

⁹ Neʼe toe fakaha lelei e Sehova tona ʼofa ki te kau kilisitiano fakanofo. (Lau ia Loma 5:5.) Tokagaʼi te kupu “fonu.” ʼE fakamahino ʼi he tohi ʼe haʼu te ʼofa ʼaia kia tatou ohage ko he vai tafe. ʼE malave loto te fakata ʼaeni. ʼE ina fakaha te lahi ʼo te ʼofa ʼo Sehova ki te kau kilisitiano fakanofo pea ʼe natou iloʼi ai tonatou “ ʼofainaʼi e te ʼAtua.” (Suta 1) ʼE fakamahino fenei e te apositolo ko Soane ia te fahaʼi ʼae ʼe natou logoʼi: “Kotou tokagaʼi age muʼa te toe ʼofa lahi ʼae neʼe fakaha mai e te Tamai kia tatou, ke fakahigoaʼi ai tatou ko te ʼu fanau ʼa te ʼAtua!” (1 Soa. 3:1) ʼE gata pe koa te ʼofa ʼo Sehova ki te kau fakanofo? Kailoa. ʼE fakaha mai e Sehova ʼe ʼofa ia tatou takitokotahi.

10. Kia koe kotea te meʼa ʼofa lahi ʼae neʼe foaki atu e Sehova?

¹⁰ Kotea te fakamoʼoni ʼe lahi age ʼo ʼuhiga mo te ʼofa ʼo Sehova? Ko te totogi. Ko te fahaʼi ʼaia neʼe heʼeki fakahoko e he tahi! (Soa. 3:16; Loma 5:8) Neʼe foaki e Sehova tona ʼAlo ʼae neʼe ʼofa mamahi ai ko he sakilifisio. Neʼe ina fakagafua ke mate maʼa te hahaʼi fuli, ke feala ai ke fakamolemole ʼanatou agahala pea ke natou liliu ai ko Hona ʼu kaumeʼa. (1 Soa. 4:10) Kapau ʼe tou fakakaukauʼi te maʼuhiga ʼo te totogi ʼae neʼe fai e Sehova mo Sesu maʼa tatou, pea ʼe toe lahi age anai tatatou lotofakafetaʼi ʼo ʼuhiga mo te ʼofa ʼae neʼe ina fakaha mai kia tatou takitokotahi. (Kal. 2:20) Neʼe mole foaki pe te totogi ʼuhi ʼae neʼe fakamaʼua e te faitotonu ʼa Sehova. Kae ʼe ko he meʼa ʼofa ia neʼe fai ʼaki te ʼofa. Neʼe fakaha e Sehova ia tona ʼofa ʼae kia tatou ʼi tana foaki mai tona ʼAlo ʼae neʼe maʼuhiga ʼaupito kia ia ko he sakilifisio. Neʼe ina fakagafua ke mamahi pea mo mate ia Sesu maʼa tatou.

11. Kotea ʼae ʼe tou ako mai ia Selemia 31:3?

¹¹ Ohage pe ko tatatou kua ʼosi vakaʼi, neʼe mole taupau e Sehova te ʼu fahaʼi ʼae ʼe ina logoʼi, kae ʼe ina fakaha lelei mai tona ʼofa. (Lau ia Selemia 31:3.) ʼUhi ko tona ʼofa neʼe ina taki mai tatou kia te ia. (Vakaʼi Tetelonome 7:7, 8.) ʼE mole he meʼa peʼe ko he tahi ʼe feala anai ke ina fakamavae tatou mai te ʼofa ʼaia. (Loma 8:38, 39) Kotea ʼae ʼe ke logoʼi ʼi tau iloʼi ʼae ʼe ʼofa ia Sehova ia koe? Lau te Pesalemo 23, pea ʼe ke sio ai pe neʼe logoʼi feafeaʼi e Tavite ia te ʼofa ʼo Sehova pea ʼe toe malave feia pe anai kia koe.

KOTEA ʼAE ʼE KE LOGOʼI ʼI TAU ILOʼI ʼE ʼOFA SEHOVA IA KOE?

12. ʼE ke fakamahino fakanounou feafeaʼi anai te Pesalemo 23?

¹² Lau ia Pesalemo 23:1-6. Ko te Pesalemo 23 ʼe ko he hiva ʼe fakaha ai e Tavite tana tui papau ʼae ʼe ʼofa pea mo tokaga lelei ia Sehova kia ia. ʼE fakaha ai tana ʼu felogoi lelei pea mo Sehova ia tona Tauhi ovi. Neʼe tuku ʼe Tavite ia ia ke takitaki e Sehova, ʼo ina logoʼi ai tona puipui pea neʼe falala katoa kia te Ia. Neʼe iloʼi e Tavite ʼe taupau anai ia ia ʼe te ʼofa agatonu ʼo Sehova ʼi te ʼaho fuli ʼo tona maʼuli. He koe neʼe tui papau ki te faʼahi ʼaia?

13. He koe neʼe tui papau ia Tavite ʼe tokoni tuʼumaʼu ia Sehova kia ia?

¹³ “ ʼE mole au masiva anai ʼi he meʼa.” Neʼe logoʼi ʼe Tavite te fakapelepeleʼi ʼo tona loto he neʼe foaki tuʼumaʼu pe e Sehova te ʼu meʼa fuli ʼae neʼe ʼaoga kia ia. Neʼe ina iloʼi ko tona ʼAtua neʼe ko tona kaumeʼa pea neʼe leleiʼia ai ia ia. Koia neʼe tui papau ia Tavite logo la he ʼu aluʼaga ʼe tau anai mo ia ʼe foaki pe anai e Sehova te ʼu meʼa ʼae ʼe ʼaoga kia ia. Neʼe tui papau ia Tavite ʼe ʼofa mamahi pea mo tokaga ia Sehova kia ia. Koia, neʼe tokoni ai ke mole hoha ki he meʼa kae ke fiafia ʼi te ʼu meʼa fuli ʼae ʼe ina maʼu.

14. ʼE tokoni feafeaʼi ia Sehova kia tatou ʼaki te ʼofa?

¹⁴ ʼE tokaga ia Sehova kia tatou ʼaki te ʼofa tafito moka tou felaveʼi mo he faigataʼa ia. Ko Claire,a kua taʼu 20 tana gaue ʼi te Petele neʼe mole ina iloʼi peʼe feafeaʼi tana tokoni ki tona kiʼi famili ʼae neʼe tau mo he ʼu fihifihia neʼe kovi ʼaupito. Ko tana tamai neʼe pa te ʼua ʼi tona ʼulu, pea ki muli age neʼe tau mo ni nunuʼa kovi. Ko he tahi ʼi ʼona kiʼi tehina neʼe fakamavae ʼi te moʼoni. Pea ʼi te mole kei feala ke hoko atu te fakahaʼele ʼo tanatou matagi gaue neʼe toe toʼo ai tonatou ʼapi ʼe te fale paʼaga. Neʼe tokaga feafeaʼi ia Sehova kia natou ʼaki te ʼofa? ʼE tali fenei e Claire: “Neʼe tokaga tuʼumaʼu ia Sehova ki toku kiʼi famili ke natou maʼu te meʼa ʼae ʼe ʼaoga kia natou ʼi te ʼaho fuli. Pea neʼe ina foaki ʼo lahi age ʼi te ʼu meʼa ʼaia. ʼE au manatuʼi tuʼumaʼu te faʼahiga tokoni mai ʼa Sehova pea ʼe mole galo kia au ia tona ʼofa. Neʼe tokoni mai kia au te ʼu faʼahi ʼaia ke hoko atu taku tauhi fiafia ʼae kia Sehova ʼi te ʼu temi ʼae neʼe au tau ai mo ʼihi atu fihifihia.”

15. Neʼe toe maʼu feafeaʼi e Tavite te malohi? (Vakaʼi mo te pāki.)

¹⁵ “ ʼE ina toe fakamalohiʼi au.” ʼI ʼihi temi neʼe lotohoha ia Tavite ʼuhi ko te ʼu fihifihia pea mo te ʼu ʼahiʼahi ʼae neʼe felaveʼi mo ia. (Pes. 18:4-6) Kae ʼuhi ko te ʼofa mamahi ʼa Sehova pea mo tana tokaga ʼofa neʼe toe maʼu e Tavite te malohi. Ka gaʼegaʼe ia Tavite ʼe ina taki ki te “ malaʼe lunaʼia” peʼe ko “ni maloloʼaga ʼe tuʼu ovi ki te vai tafe.” Neʼe toe maʼu e Tavite te malohi ʼo feala ai ke toe hoko atu tana tauhi fakafiafia ʼae kia Sehova.​—Pes. 18:28-32.

16. ʼE toe foaki feafeaʼi atu e te ʼofa ʼo Sehova ia te malohi?

¹⁶ ʼE toe feia pe ʼi te temi nei, moka tou felaveʼi mo he ʼu ʼahiʼahi ʼe “mole matou mamate ʼuhi ko te ʼofa agatonu ʼo Sehova.” (Tgl. 3:22; Kol. 1:11) Tou toʼo te faʼifaʼitaki ʼo Rachel. Lolotoga te taʼi mahaki COVID-19, neʼe liʼaki ia ia e tona ʼohoana feia mo Sehova. Neʼe lotomamahi ʼaupito. Neʼe tokoni feafeaʼi ia Sehova kia ia? Neʼe ina ui: “Neʼe faigaʼi e Sehova ke au logoʼi ʼe ʼofainaʼi au. Neʼe ina foaki mai hoku ʼu kaumeʼa. Neʼe natou fakatahi tuʼumaʼu mo au mo natou ʼaumai haku ʼu meʼa kai. Neʼe natou faitohi mai ʼo fakalotomalohiʼi au ʼaki he ʼu vaega fakatohi-tapu. ʼE natou mata malimali tuʼumaʼu mai pea mo fakamanatu mai ʼe tokaga tuʼumaʼu ia Sehova kia au. ʼE au fakamalo ʼaupito tuʼumaʼu kia Sehova ʼi tana foaki mai he toe famili manavaʼofa.”

17. He koʼe neʼe mole mataku ia Tavite ki he meʼa?

¹⁷ “ ʼE mole au mataku ki he meʼa, heʼe ke nofo mo au.” Neʼe fakamataku tuʼumaʼu te maʼuli ʼo Tavite pea neʼe toe malolohi ʼona fili. Kae ʼuhi ko te ʼofa ʼo Sehova ʼe ina logoʼi tona fimalie pea mo tona puipui. Pea tatau aipe pe kotea te aluʼaga ʼae ʼe tau mo ia neʼe sio ki te tokoni age ʼa Sehova, pea neʼe lotomalohi ai. Ko te tupuʼaga la ʼaia ʼo tana hiva fenei: ‘Neʼe fakaʼateainaʼi au e Sehova mai ʼoku tuʼania fuli.’ (Pes. 34:4) ʼE moʼoni neʼe tuʼania ia Tavite ʼi ʼihi temi, kae ʼi tana iloʼi ʼae ʼe ʼofa ia Sehova ia ia neʼe ina lava tekeʼi ai tana mataku.

18. Ka ke tau mo ni aluʼaga fakatupu lotohoha, ʼe fakalotomalohiʼi feafeaʼi koe ʼi tau tui ʼae ʼe ʼofa ia Sehova ia koe?

¹⁸ ʼE fakalotomalohiʼi feafeaʼi tatou ʼi tatatou tui ʼae ʼe ʼofa ia Sehova ia tatou moka tou tau mo he ʼu aluʼaga fakatupu lotohoha? ʼE fakamatala e Susi ʼae ʼe pionie te fahaʼi ʼae neʼe ina logoʼi pea mo tona ʼohoana ʼi te fakamate ʼo tanā tama: “Ka hoko fakafokifa he tuʼutamaki fakamataku ʼe fakatupu lotomamahi pea ʼe tou tuʼania naʼa toe hoko he tahi ʼu aluʼaga kovi. Kae ʼaki te manavaʼofa ʼo Sehova ʼe tou logoʼi ai te fimalie pea mo totatou puipui.” ʼE ui e Rachel, ʼae kua tou ʼosi palalau ki ai: “ ʼI te tahi afiafi neʼe au toe logoʼi te lahi ʼo toku lotomamahi pea mo taku tuʼania, neʼe au faikole atu aipe mo tagi kia Sehova. Pea neʼe au logoʼi ai tana fakapelepele pea mo tana fakafimalieʼi au, ohage ko tona fai e he faʼe ki tana kiʼi toe, pea neʼe au maʼumoea ai. ʼE mole galo anai ia au te ʼu meʼa fuli ʼae neʼe fai e Sehova maʼaku.” Tou palalau fakaʼosi kia Tassos, ko te tagata ʼafea neʼe pilisoni taʼu fa ʼuhi ʼae neʼe fakafisi ki te solia. Neʼe tokaga feafeaʼi ia Sehova kia ia pea neʼe feafeaʼi tana fakaha age tona ʼofa? Neʼe ina tali fenei: “Neʼe foaki mai e Sehova ʼo lahi age ʼi te ʼu meʼa ʼae neʼe ʼaoga kia au. ʼAki te fahaʼi ʼaia ʼe toe malohi age taku tui papau ʼae ʼe feala taku falala kia Sehova. Pea ʼaki tona laumalie, neʼe feala ai ke au taupau toku fiafia logo la taku nofo ʼi te fale pilisoni. Neʼe tokoni mai te fahaʼi ʼaia ke au mahino, ka lahi age taku falala ʼae kia Sehova pea ʼe toe lahi age taku logoʼi ia tona ʼofa ʼae kia au. Koia neʼe au liliu ai leva ʼo pionie katoa ʼi taku kei nofo ʼi te fale pilisoni.”

FAKAOVI KI TOU ʼATUA FONU ʼI TE ʼOFA

19. (1) Kotea ʼae ʼe tou ui ʼi ʼatatou faikole moka tou tui ʼe ʼofa ia Sehova ia tatou? (2) Ko te vaega Tohi-Tapu fea ʼe palalau ai ki te ʼofa ʼo te ʼAtua pea ʼe malave feafeaʼi kia koe? (Vakaʼi te ʼa takai “Ko He ʼu Vaega Tohi-Tapu ʼe Tou Logoʼi Ai Te ʼOfa ʼo Sehova.”)

¹⁹ Ko te faʼahi ʼae neʼe hoko kia Tavite mo Claire mo Rachel mo Susi pea mo Tassos ʼe ha ai ko Sehova ko “te ʼAtua ʼo te ʼofa” ʼe nofo mo ʼana kaugana! (2 Ko. 13:11) ʼE tokaga ia kia tatou taki tokotahi. Pea ʼe ina puipui tatou ʼaki tona ʼofa agatonu. (Pes. 32:10) Ka lahi tatatou metitasio ʼae ki tana faʼahiga fakaha mai ʼo tona ʼofa, mo tatatou iloʼi ʼae ʼe tokaga kia tatou ʼe toe lahi age ai tatatou fakaovi kia te ia. ʼAua naʼa tou tuʼania ʼi te faikole kia te ia ʼo kole age ʼe ʼaoga ʼaupito kia tatou tona ʼofa. Fakaha kia te ia ʼotatou tuʼania fuli ʼaki tatatou tui ʼae ʼe loto mahino pea ʼe fia tokoni mai kia tatou.​—Pes. 145:18, 19.

20. He koe ʼe taki tatou ʼe te ʼofa ʼo te ʼAtua kia te ia?

²⁰ Ohage pe ko hatatou fakamafana ʼi he afi, ʼi he ʼaho momoko ʼe toe feala pe ke fakamalohiʼi tatou ʼe te ʼofa ʼo Sehova moka tou tau mo ni ʼahiʼahi. Tali te ʼofa ʼo Sehova ʼae ʼe ke maʼu ai te malohi mo te tokalelei. Pea ʼi tatatou fakamalo ki tona ʼofa ʼaua naʼa tou tuʼania ʼi te ui “ ʼE au ʼofa ia Sehova”!​—Pes. 116:1.