Ko He Tokoni Ki Te ʼu Fafine ʼAe ʼe Gaohi Koviʼi

ʼE kamata feia te alatike Fakafalani ʼi tatatou tuʼasila JW.ORG ko tona kupu tafito “La sécurité des femmes : ce qu’en dit la Bible.” ʼI te fakaʼosi ʼo te alatike ʼaia, ʼe feala ke ke kole ke ta ʼi he pepa pea ke haga ʼo pelu fa. Koʼeni te tala manatu ʼa Stacy, he tuagaʼane mai Amelika: “Neʼe au kole ke ta lahi mai haku ʼu pepa, pea neʼe au alu mo he tahi kiʼi tehina ʼo tuku te ʼu pepa ʼaia ʼi he fale ʼe nonofo ai te ʼu fafine, ʼae neʼe gaohi koviʼi. ʼE tuʼu te fale ʼaia ʼi te telituale ʼo taku kokelekasio.”

Neʼe kole e he fafine ʼe gaue ʼi te fale ʼaia hana tahi ʼu pepa ke ina tufa ki te ʼu fafine ʼae ʼe nonofo ai. Neʼe toe tufa ai he tahi ʼu pepa ʼe 40 pea mo kiʼi kate ʼe 30 ʼo tatatou tuʼasila jw.org. Ki muli age, neʼe kole e te fafine pule ʼo te fale ʼaia ki te kau Fakamoʼoni ʼa Sehova, pe ʼe mole feala ke natou fakaha ki te ʼu fafine ʼae ʼe nonofo ai pe ʼe feafeaʼi te ako ʼo te Tohi-Tapu.

Neʼe olo ia Stacy mo he ʼu tuagaʼane ʼe toko lua ki he tahi fale feia pe, neʼe natou tufa ai pepa ʼe nima. Pea neʼe toe kole age he tahi ʼu pepa. Neʼe ui e he fafine ʼi te kau gaue: “Ko te pepa ʼae ʼe ʼaoga ʼaupito anai ki te ʼu fafine ʼae ʼe nonofo ʼi heni.” Neʼe ina toe ui: “Ko he tokoni lelei ʼaeni ki tamatou gaue.” ʼI te toe liliu mai ʼa te ʼu tuagaʼane, ko ʼihi fafine neʼe natou fia iloʼi pe ʼe feafeaʼi te fai ʼo he ako Tohi-Tapu. Pea ko te toko lua ia natou ʼaia neʼe nā fia kau ki te fono ʼo te fakaʼosi vahaʼa, ʼae ʼe fai ʼi te Fale Fono.

ʼE ui fenei e Stacy: “Neʼe matou punamaʼuli ʼosi ʼi te fiafia ʼa te hahaʼi ʼi tanatou lau te alatike taulekaleka ʼaia. Ko te ta ʼo te alatike ki he pepa pea mo pelu, ʼe ko he faʼahiga fai lelei ʼaia moʼo tala te logo lelei ʼo te Puleʼaga ki te ʼu fafine ʼaia neʼe gaohi koviʼi. Neʼe malave ʼosi kia matou tamatou sisio ki te toe fiafia lahi neʼe maʼu e te hahaʼi ʼaia. ʼE matou loto ʼosi ke matou sisio pe ʼe tapuakinaʼi feafeaʼi e Sehova tamatou hoko atu te tala ʼo te logo lelei ki te ʼu fafine ʼaia.”