MAMBADGA MA BOÑGE BA WANDA
Inyuki me Nlama Soohe?
Ba bi bat ngadak boñge ba wanda i loñ Amérika mbadga inyu masoohe; ikété hiki jôm li boñge, juem yon i bé soohe, i bak ki le mu nsoñgi u, ba-na ndik bon ba bé soohe hiki kel. Jon ngim boñge ba wanda i mbadba le: “Baa masoohe ma yé toi nseñ, tole ma yé ndik kiki ba mbéna kal le, ‘lôk mañge i ta bé jam,’ ndik inyu mômôs ñem, ki le mut a ta bé nu a ñemble mo?”
Kii ba nsébél le masoohe?
Masoohe ma yé nkwel ni Nhek mam momasôna. Hégda le jam lini! Yéhôva a nloo bôt ba binam huum, ndi to hala, “a ta bé haa ni hiki wada wés.” (Minson mi baôma 17:27) Bibel i nleñ yak bés nsébla u tôbôtôbô unu: “Kôôgana bebee ni Nyambe, ndi yak nye a’ kôôge bé bebee.”—Yakôbô 4:8.
Lelaa ni u nla kôôge bebee ni Nyambe?
Njel yada i yé masoohe, hala wee, wen u mpôdôs Djob.
Njel ipe i yé yigil Bibel, hala wee, Djob nyen a “mpôdôs” we.
Ngéda nkwel u yé hala, kiki maboñ ma nkôgô—masoohe ma kihga ni yigil Bibel, ha nyen liwanda joñ ni Djob li nkônde let.
“I pot ni Yéhôva, hala wee i kwel lôñni Nungingii, i yé bisai bi nlôôha bikeñi inyu mut binam.”—Jeremy.
“Ngéda me mpahlene Yéhôva kété yem ñem, ni njel masoohe, me nôgda le me yé nye ipañ.”—Miranda.
Baa Djob a ñemble masoohe?
To ibale u nhémle le Djob a yé, bebek u soohege ki nye, i nla bane we ndutu i neebe le a ñemble toi masoohe més. Ndi to hala, Bibel i nsébél Yéhôva le, “A we nu u ñemble masoohe.” (Tjémbi 65:2) A boñge ba wanda, Bibel i naña bé i “bééga nye nduña nan yosôna.” Inyuki? “Inyule a ntôñ bé.”—1 Pétrô 5:7.
Hoñol le jam lini: Baa u mbéna tégbaha ngandak ngéda i kwel ni bañga yoñ mawanda? U nla boñ nlélém ni Djob. Bana lem i kwel ni nye, hiki ngéda, ni njel masoohe, u sim-ga jôl, le Yéhôva. (Tjémbi 86:5-7; 88:9) Ñ, Bibel yomede i nkal le: “Soohana hiki ngéda.”—1 Tésalônika 5:17.
“Masoohe ma yé nkwel ipôla bésboba, me lôñni Tata wem nu ngii, het me nyible yaga nye ñem wem.”—Moises.
“Ngéda me mpôdôs Yéhôva, me nyible nye kété yem ñem, nlélém kiki me nla kwel ni mama yem tole ni bañga yem liwanda.”—Karen.
Me nla soohe inyu mambe mam?
Bibel i nkal le: “Inyu mam momasôna, ni njel masoohe, ni minyemhe lôñni mayéga, boña le Nyambe a yi mayagal manan.”—Filipi 4:6.
Baa hala a nkobla le u kôli soohe inyu mandutu u mboma? Ñ! Hala yak nyen Bibel i mbat: “Bééga Yéhôva mbegee yoñ, a’ nit we.”—Tjémbi 55:22.
I yé maliga le di nlama ndik bé soohe Yéhôva inyu mandutu ma di mboma. Mañge muda wada, le Chantelle, nyen a nkal le: “Me nla bé kal le me yéne Yéhôva bañga liwanda ibale me nsoohe nye ndik inyu bat mahôla. Inyu yem, i ti nye mayéga li yé jam li bisu; mam me nlama tine mayéga ma yé ngandak kiyaga.”
Hoñol le jam lini: Inyu mambe mam u nla ti Yéhôva mayéga? Baa u nla sima mam maa ma nla ntinde we i ti nye mayéga i kel ini?
“Yak disii di mam, kiki bo i ngeñ di memle loñge mbôñji, di nla tinde bés i soohe Yéhôva inyu ti nye mayéga.”—Anita.
“Yoñ ngéda i wan ngim jam i nhélés we mu bihégél bi Djob, tole u wan nlôñ u Bibel u nlôôha tihba we, i mbus u ti Yéhôva mayéga inyu jam li.”—Brian.