E robꞌru ti ma atsô watobro

“Robdzé di pariptsi, wahötöꞌö uptabi dzaꞌra di. Marĩ uburé wanhibro öputsi duré tiꞌa tsitsaꞌwari ma uprotsi.” — Andrew, Serra Leoa hawi.

“Tsiꞌubura pariptsi wa tô aiꞌabaré ni wanhõrõwa u. Uburé ma uprotsi. Wama waihuꞌu õ di e marĩ wa dza ꞌmanharĩ dzaꞌra ni. Ĩ̱ꞌra piꞌõ hiꞌrãtitõ ma waptãrã duré te tiwawa.” — David, Ilhas Virgens hawi.

E ATSÕRÕWA ma tô ꞌrihãro. Niwamhã öputsi, tiꞌa tsitsaꞌwari duré tsiwaꞌru robꞌru ti e ãne hã ma tô atsô watobro. Tawamhã, aima waihuꞌu petse di, pire uptabi di. Ãté atsimirotsaꞌrata roꞌwaꞌrutu di, aihötöꞌö uptabi di, duré rotsawẽrẽ ĩwatsédé ãté ĩré hã. Ãne watobro wamhã, daꞌahö na ꞌre höimana dzei dzaꞌra õ di.

Ãté ãne te aihöiba. Ãté aihöimana dzei õ di. Tane nherẽ, Bíblia te ãma rowatsuꞌu aihöimanadzé rowẽ di dza.

BÍBLIA NHIMIROPITSUTU TE DZA AIPAWAPTO

Tiago 5:11 te tinha: ‘Ta norĩ hã te te ꞌre robdzépata dzaꞌẽtẽ dzaꞌra mono nherẽ, tsiptete tsina ma tô Wamama ãma tsi ꞌre höimana uꞌötsi dzaꞌra. Tahawa, tãma ꞌre rowẽ dzaꞌra mono di oto.’ Robꞌru ti pariptsi ãté te ĩrotsaꞌra aihöimanadzé rowatsété di. Tadzahã, atãma aihöimana. ꞌRe romhuri mono wamhã, aihöimanadzé rowẽ di dza.

Romhutu na ‘ꞌre datsiwaꞌõ dzaꞌra mono õ di dza oto.’ (Apocalipse 21:4) Ãne dza Höimanaꞌuꞌö Nhimirobꞌrudzé te te ãma tsaprĩ wamhã Tiꞌa hã ro ĩwẽ u. (Salmo 37:11, 29) Robꞌru ti ꞌre höimana mono õ di dza. Uburé marĩ norĩ hã aipahi di duré atsimirobdzépada te dza aiꞌutõ. E marĩ wa. Höimanaꞌuꞌö Danhipaiꞌwa te ropitsutu ãne: ‘Uburé ꞌre ĩromhöimana ꞌrata mono dzé hã tsiꞌutõrĩ petse wa oto.’ — Apocalipse 21:4.

Ãma rotsaꞌrata: Höimanaꞌuꞌö ‘te tsima wẽ ꞌre aihöimana wẽ mono da’ romharé uptabi na ĩtsimirobꞌrudzém ãma hã. (Jeremias 29:11) Ãhã rowatsuꞌu te dza aipawapto ꞌre aihöimana dze ti apö. Piꞌõ hã Sally duré te tinha: “Wa natsi rotsaꞌrata tiha norĩ ĩwẽ uptabi Höimanaꞌuꞌö Nhimirobꞌrudzé te dza ꞌmanha. Ãne wa ãma poꞌre haꞌö uburé ĩwatsété duré te ĩ̱pawapto ꞌre ꞌwapéi mono da.”

E te atsima ĩwẽ waihuꞌu da marĩ norĩ hã Höimanaꞌuꞌö Nhimirobꞌrudzé te dza ꞌmanha. Robꞌru ti ꞌre höimana mono õ di dza. Tahã waihuꞌu wamhã ꞌre aihöimana wẽ di dza apö, duré te dza aipawapto ꞌre ꞌwapéi mono da. Tadzahã, ãhã bötö na Bíblia te dza aipawapto robꞌru ti watobro wamhã. Atsimipari petse.

Bíblia te dza aipawapto

Atsõtõ wẽ na.

‘Tahawa, ma tô ãne tsatõrĩ dzaꞌra, Jesus hã: “Oto watsiꞌabaꞌréi waꞌaba aꞌubuni u, wawaꞌutu dzaꞌra da aꞌö, danhiti.”’ — Marcos 6:31.

Romnhoré petse ꞌwa norĩ te ãma rowatsuꞌu dzaꞌra ãne: “Atsõtõ wẽ na, tahã te dza aipawapto aihötöꞌö uptabi tõ da.”

Atsimirobdzépada watsuꞌu.

‘Marĩ na dapẽꞌẽ ꞌre, ꞌre ĩdahötöꞌö dzaꞌra mono dzé hã te dza te te ꞌre dahöiba pire dzaꞌra. Tane nherẽ, te dza damreme ĩwẽ hã te te dama ꞌre robdze dzani dzaꞌra.’ — Provérbios 12:25.

Maꞌãpé! Watsuꞌu na atsiwaihuꞌu norĩ ma niwamhã atsitsãnawã norĩ ma. Õ norĩ hã te dza aiwapari dzaꞌra, duré te dza aipawaptob dzaꞌra.a

Romhutu na rowẽ di dza.

‘Ãne dza romhöimana wa, höiwa ĩtéb dzô, duré tiꞌa ĩtéb dzô dzama, wa dza tsô ꞌre wanhimipari uꞌötsi dzaꞌra, tame dawẽ na tsi ꞌre ĩdahöimana dzaꞌra mono dzéb dzô. ꞌRe ĩhöimana uꞌötsi mono hã ãne ĩwẽ na te te dama ropitsutu wa, wa dza tsô ꞌre wanhimipari uꞌötsi dzaꞌra.’ — 2 Pedro 3:13.

a Niꞌwa robdzeiꞌõ uptabi niwamhã ĩhötöꞌö uptabi bötö ahö na, wẽ di dza te mo dawedeꞌwa dzô.