ROMNHORÉ 14
E marĩ, wa dza ꞌmanharĩ dzaꞌra ni Ropotoꞌwa te te tsima rowẽ da ãma ĩwawata dzaꞌra dzém na hã.
Wa te ĩꞌmadöꞌödzéb dzarina romnhoré ĩꞌrata na, Ropotoꞌwai ma wẽ õ di uburé danhimidzadze norĩ hã. Tadzahã tsada hã Wapotoꞌwai ãma wawata dzaꞌra da tãma ĩbö dzarina. E ma hã ꞌdanhimidzadze ĩꞌuptabi hã duré tô tsena hã, ꞌRe ĩhöimana uꞌötsi mono Wamama hã te te ꞌre ĩꞌawẽtsãmri mono hã.’ (Tiago 1:27) Wa te ꞌmadöꞌö dzaꞌra na Ropotoꞌwai mreme te te ĩrowahutudzé.
1. E marĩ dzarina Ropotoꞌwai ãma wa dza wawata dzaꞌra ni.
Ropotoꞌwai ãma wa dza wawata dzaꞌra ni Ĩmreme dzarina. Jesus te tinha Ropotoꞌwai ma: ‘Atsimiroti hã tô tsena uptabi.’ (João 17:17) Ropotoꞌwai mreme te te tsadawa dzamarĩ dzaꞌra da nherẽ, danhimidzadze ĩꞌahö norĩ te tsadawa dzamarĩ dzaꞌra danhimirotsaꞌrada duré danhimirowahudu. Tadzahã, Jeová te te tsima wẽ õ di ĩtsimiroti hã ‘te te taré ꞌre ĩtsaꞌra dzaꞌra mono norĩ hã.’ (Tsõré na Marcos 7:9.) Taha waꞌrãmimhã, Jeová pẽꞌẽ ma wa dza rowẽ dzani dzaꞌra ni Bíblia nhimiroti wa te tsadawa dzamarĩ dzaꞌra wamhã.
2. E niha Jeová ãma wa dza wawata dzaꞌra ni.
Wapotoꞌwai wa, Jeová ãma tsi ĩwawata dzaꞌra da tsi. (Apocalipse 4:11) Taha wa, dahöiba ꞌmanharĩ ãma duré marĩ ĩhöiba amoi ãma wawata dzaꞌra õ di. Wanhimidzawidzé hã duré ãma ĩwawatadzé hã Jeová ãma tsi. — Tsõré na Êxodo 34:14.
Jeová ãma ĩwawata dzaꞌra da tsi ‘te te tsima ꞌre ĩwaꞌawẽ mono dzéb dzarina.’ (Hebreus 12:28) Ãne na hã, ꞌre ĩwahöimana dzaꞌra mono da tsi ĩtsimiroti dzarina. Ãma ĩtsimiré, Jeová dzawiꞌwa norĩ te dza ꞌre höimana dzaꞌra ĩtsimiroti dzarina datsina damro na hã. Te dza duré wẽꞌõ dzaꞌra warĩ, warĩtsipãrĩ, warĩ ꞌwatsari duré te te ãma tsipa dzaꞌra õ di ödzé hötsi na hã.a
3. E marĩ wa Jeová ãma wa dza datsiré wawata dzaꞌra ni.
Dadzawi te, Jeová te tinha datsiꞌrãꞌõtõ u watsiꞌabaꞌré da. Tãma waihuꞌu petse di ãne na hã rowẽ na dza ꞌre ĩwahöimana dzaꞌra mono na hã. Datsiꞌrãꞌõtõdzéb ãma, Jeová ãma wa dame wawata dzaꞌra ni. Taha wa, wa tãma wanhoꞌre dzaꞌra ni. (Tsõré na Salmo 104:33.) Wanhoꞌre na hã Jeová ãma ‘watsitsãnawã norĩ tsiré ꞌre tsiꞌrãꞌõtõ mono ré hã, wa dza ãma ꞌre wawata uꞌötsi dzaꞌra, ĩtsõꞌa dzaꞌra.’ (Hebreus 2:12) Duré, datsiꞌrãꞌõtõ ãma wa tsiptete dzaꞌra ni watsitsãnawã norĩ, duré õ norĩ hã te wanhiptete dzaꞌra.
WAIHUꞌU DURÉ
Te dza ĩꞌuptsibi me, e marĩ wa Jeová ma wẽ õ di ãma wawata dzaꞌra da dahöiba ꞌmanharĩ hawi. Te dza ĩꞌmadö duré e niha Ropotoꞌwa te tsima wẽ ãma wawata dzaꞌra da.
4. Dahöiba ꞌmanharĩ hawi ĩwawata dzaꞌra tõ da tsi Ropotoꞌwai ãma
E niha wama waihuꞌu petse dzaꞌra di tahã ĩwẽꞌõ na Ropotoꞌwai ma.ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ ãma piꞌrebamhã:
Bíblia dzarina duréihã niꞌwa Ropotoꞌwa nhibꞌaꞌuwẽ norĩ ma tô ãma tiwata upa dzaꞌra dahöiba ꞌmanharĩ hawi. E marĩ ma tô tsô tiwatobro dzaꞌra ãne wamhã.
Niꞌwam norĩ te nharĩ dzaꞌra dahöiba ꞌmanharĩ norĩ te te ĩpawaptob dzaꞌra na hã Ropotoꞌwa tẽme te te tsina rotété dzaꞌra da. E tahã ĩtsiti te te waꞌãma ropé dzaꞌra õ bö. Atsiré tsõré aba Êxodo 20:4-6 duré Juízes 2:12. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E nimahã na ma tô ĩꞌmadö niꞌwa Ropotoꞌwai ãma wata da marĩ ꞌmanharĩ hawi. E marĩ hawi.
E Jeová ma wẽ di ãma dawata dzaꞌra wamhã dahöiba ꞌmanharĩ hawi.
Aima hã, e ĩbö Ropotoꞌwai ãma dawada dahöiba ꞌmanharĩ hawi.
5. Jeová ãma tsi dawatadzé te dza wadzani dzaꞌra rowahutu uptabiꞌõ wi
ꞌMadöꞌö e niha Jeová ãma dawatadzé tãma ĩwẽ dzarina te dza wadzani dzaꞌra rowahutu uptabiꞌõ wi. ꞌMadöꞌö aba ĨROPODO.
Atsiré tsõré aba Salmo 91:14. Taha parimhã atsima robdzanhamri aba ãhã dadzadanharĩ ãma piꞌrebamhã:
Wa dza höiꞌré dzaꞌra ni Jeová wama ĩtsawi petse dzaꞌra na hã õhõ ãma tsi ꞌre wawata dzaꞌra mono wamhã. E marĩ na Jeová te wama ropitsutu dzaꞌra, ãne wa te ꞌmanharĩ dzaꞌra wamhã.
6. Watsiꞌrãꞌõtõ ãma Ropotoꞌwai ãma wa wawata dzaꞌra ni
Jeová ãma wa natsi wawata dzaꞌra ni duré wa danhiptete dzaꞌra ni wa te dame tsadaꞌöbö dzaꞌra wamhã duré dame wanhoꞌre dzaꞌra wamhã datsiꞌrãꞌõtõ ãma. Atsiré tsõré aba Salmo 22:22. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E wapari dze ti danhimidzadaꞌöbödzé datsiꞌrãꞌõtõ ãma.
E te atsima ĩwẽ atsitsaꞌra wẽ da dame tsadaꞌöbö da datsiꞌrãꞌõtõ ãma.
7. Jeová ma robdze ti dama wamreme dzaꞌra wamhã wa te ĩromnhoré dzaꞌra dzém na hã
Niha na ahö na tsada hã dama wamreme dzaꞌra da Ropotoꞌwai mreme nhimirowahutu uptabi na hã. Atsiré tsõré aba Hebreus 13:15 duré Salmo 34:1. Taha parimhã atsima robdzanhamri aba ãhã dadzadanharĩ ãma piꞌrebamhã:
Ropotoꞌwai mreme nhimirowahudu ahö na ma tô ĩwaihu. E marĩ na te atsima ĩwẽ dama aimreme da.
NIꞌWAM NORĨ TE NHARĨ DZAꞌRA ÃNE: “Ropotoꞌwa te dza wẽtsã niꞌwa te te ĩdapawapto hã tsiwaꞌru niha na hã ãma wata nherẽ.”
E ãne te ĩrotsaꞌra.
ĨWAIHUꞌUDZÉ HÃ
Wapotoꞌwai ma wa dza rowẽ dzaꞌra ni õhõ ãma tsi wawata dzaꞌra wamhã, tãma wanhoꞌre dzaꞌra wamhã duré wa te dame tsadaꞌöbö dzaꞌra wamhã datsiꞌrãꞌõtõ ãma duré dama wamreme dzaꞌra wamhã wa te ãma ĩromnhoré dzaꞌra dzém na hã.
Ãma aipoꞌre puꞌu
E niha wa dza waihuꞌu dzaꞌra ni Ropotoꞌwai ãma wawata dzaꞌra da tãma ĩbö dzarina.
E marĩ wa Jeová ãma tsi ĩwawata dzaꞌra da tsi.
E marĩ wa Ropotoꞌwai ãma ĩwawata dzaꞌra da tsi tãma ĩwẽ dzarina ꞌre ĩhöimana dzaꞌra mono norĩ me.
TSÔ AIRĨTĨ DURÉ
ꞌMadöꞌö e marĩ wa piꞌõi ma robdze ti te te rẽme parimhã romhõtsi nhipetse watsédé. Tsõré na rowatsuꞌu “Romhõtsi nhipetse watsété na hã dame ĩ̱höimana õ di oto.”
“Ropotoꞌwai mreme te te daꞌadzaprĩ waihuꞌu petse di” (Roꞌmadöꞌöꞌwa, 1.º julho na, 2011 na)
ꞌMadöꞌö ĩpawaptobdzé dame tsadaꞌöbö da datsiꞌrãꞌõtõ ãma.
“Jeová ãma aiwata datsiꞌrãꞌõtõ ãma hã” (Roꞌmadöꞌöꞌwa, janeiro 2019 na)
ꞌMadöꞌö, e niha datsiꞌrãꞌõtõ norĩ ma tô pawaptob dzaꞌra ãhã ĩhöibaté datsiꞌrãꞌõtõdzéb u morĩ pire nherẽ.
Daꞌahö na te tsadze dzaꞌra ni Cristo dzadawa dzamarĩꞌwa norĩ Ropotoꞌwai ãma ĩwata dzaꞌra da tsi wedepaihi hawi. E ãhã rotsaꞌrada ĩbö.
“E marĩ wa Jeová Watsuꞌuꞌwa norĩ wedepaihi ãma wata dzaꞌra õ di.” (Ĩtsihötödzé jw.org na)
a Wa dza waihuꞌu petse dzaꞌra ni taha na hã romnhoré ĩhöiba amo norĩ na.