ROMNHORÉ 15
E ꞌwa hã Jesus.
Duréi hawi, Tiꞌai mono bö Jesus dama waihuꞌu petse di. Ĩtsitsi dama waihuꞌu petse dzaꞌra nherẽ, daꞌahö na dama waihuꞌu prã ti Jesus watsuꞌu. Ãne wa, danhimirotsaꞌrada ahö di Jesus watsuꞌu uptabi ãma hã. E marĩ bété Ropotoꞌwai mreme te ãma rowatsuꞌu.
1. E ꞌwa hã Jesus.
Jesus ĩhöiba tsãmriꞌõ ĩtsiptete uptabi höiwa ãma ꞌre ĩhöimana mono hã. Uburé marĩ hã te te poto õ ré Jeová ma poto Jesus. Taha wa, Bíblia te tinha Jeová ‘marĩ poto na duréi uptabi te te ãma tsãnaꞌrata wana ré’ te te ĩꞌmanharĩ na hã Jesus. (Provérbios 8:22, 23) Bíblia te duré tinha Jesus Ropotoꞌwai ꞌra ‘mitsi’ na hã. Tahã te watsuꞌu Jeová tsiꞌuihö na te te ĩpoto na hã Jesus. (João 3:16) Jesus ma tô romhu Timama tsiré. Õ hã, ma tô pawapto Jeová uburé marĩ poto na. (Tsõré na Provérbios 8:30.) Jeová duré Jesus ꞌre tsitsawi petse dzahuré mono di. Jesus tsimiꞌẽ na te tsadawa watsuꞌu Jeová. Ãne, te dama ãma ropé Jeová nhimiromreme duré ĩtsimiroti. Taha wa, Bíblia dzarina Jesus ‘Ĩmreme na ĩtsitsi hã’. — João 1:14.
2. E marĩ wa Jesus ma tô wei mo Tiꞌai u.
Nimahã 2.000 wahu wana ré, Jeová ma tô ꞌmanha marĩ dama ĩwaihuꞌuꞌõ: tipẽꞌẽdzani na ma tô tsaprĩ Jesus höimanadzé höiwa hawi piꞌõ diꞌi u Maria na ĩtsitsi. Ãne, Jesus ma tô aibö na podo. (Tsõré na Lucas 1:34, 35.) Jeová ma we tsatõ Jesus Tiꞌai u Danhoꞌreptuiꞌwa da. Taha wa, Ropotoꞌwai mreme te ꞌmahö Jesus Messias na niwamhã Cristo na.a Jesus ma tô tsina uwaimra uburé Ropotoꞌwai mreme te te ĩrowatsuꞌu tsirõmodzé Messias ãma. Tahã ma tô dapawapto da te waihuꞌu dzaꞌra da Jesus ‘Cristo na, ꞌRe ĩhöimana uꞌötsi mono ĩdöꞌöꞌõ ꞌra’ na. — Mateus 16:16.
3. Ãhãna, e mahãta Jesus.
Döꞌö parimhã Jesus ma tô höiwaꞌudu ĩhöiba tsãmriꞌõ na duré höiwa u ma tô apö mo. Õme, ‘ꞌRe ĩhöimana uꞌötsi mono, ma tô Jesus hã pitsutu, pire uptabi na danhipai u dama ꞌre höimana mono da.’ (Filipenses 2:9) Ãhãna hã, Jesus ĩhöiba tsãmriꞌõ nhiptete uptabi na te ꞌre höimana. Jeová tsi, Jesus nhipai u tsiptete di.
WAIHUꞌU DURÉ
Te dza ĩꞌuptsibi me e ꞌwa hã tô tsena Jesus duré e marĩ wa ĩpire wa te ãma waihuꞌu dzaꞌra da.
4. Jesus Ropotoꞌwa uburé waihuꞌu petse uptabi õ di
Ropotoꞌwai mreme te rowahutu Jesus ĩhöiba tsãmriꞌõ ĩtsiptete uptabi na hã höiwa ãma ꞌre ĩhöimana mono hã. Tane nherẽ, Ĩmama Ropotoꞌwa Jeová nhimiroti dzarina te ꞌre höimana. E niha tahã wama waihuꞌu petse dzaꞌra di. ꞌMadöꞌö aba ĨROPODO waihuꞌu aba da Ropotoꞌwai mreme dzarina e marĩ wa Jesus aiwab õ di Ropotoꞌwa uburé ĩwaihuꞌu petse uptabi ne hã.
Romnhihötö norĩ piꞌrebamhã te höiꞌré dzaꞌra e marĩ wa Jeová duré Jesus aimawi na hã. Atsiré tsõré aba romnhihötö mono bö duré taha parimhã, atsima robdzanhamri aba ãhã dadzadanharĩ norĩ ãma:
Atsiré tsõré aba Lucas 1:30-32.
E niha höiwa ãma romhuriꞌwa te te ĩnharĩdzé te höiꞌré Jesus duré Jeová ‘danhipai u ĩpire uptabi hã’ tô mitsi dahöiba õ na hã.
Atsiré tsõré aba Mateus 3:16, 17.
Jesus rãtiꞌi parimhã e marĩ damreme hã höiwa hawi ĩwitsi hã te tinha.
Aima hã, e ꞌwai mreme hã.
Atsiré tsõré aba João 14:28.
E ꞌwa ĩpotoꞌrada duré danhipai u ĩpire: e damama e daꞌra.
E marĩ wa, Jesus ma tô ꞌmahö Jeová Ĩmama na hã.
Atsiré tsõré aba João 12:49.
E Jesus te tsina rotsaꞌrata aiwam na Timama ne hã. Aima hã bété, e õ norĩ hã aiwa.
5. E marĩ te höiꞌré Jesus Messias na.
Ropotoꞌwai mreme ma tô roꞌmahörö tsiro Messias da te ꞌre ĩwaihuꞌu dzaꞌra mono dzéb da hã. Damreme hã Messias te watsuꞌu Ropotoꞌwa nhimipitsudu Danhoꞌreptuiꞌwa da hã. ꞌMadöꞌö aba ĨROPODO te te ĩhöiꞌré nimahã roꞌmahörö ꞌrata norĩ hã Jesus te te tsina ĩꞌuwaimrami hã Tiꞌai u wei morĩ wamhã.
Ãhã roꞌmahörö ꞌrata norĩ tsõré aba parimhã, atsima robdzanhamri aba ãhã dadzadanharĩ norĩ ãma piꞌrebamhã:
Atsiré tsõré aba Mateus 2:4-6 waihuꞌu aba da daro Messias waptãꞌãdzéb da hã.b
E ãhã roꞌmahörö ꞌrada ma tô ãma uwaimra. — Mateus 2:1.
Atsiré tsõré aba Salmo 34:20 duré João 19:37 waihuꞌu aba da Ropotoꞌwai mreme te te ĩrowatsuꞌu tsirõmodzé Messias döꞌödzém na hã.
E ãhã roꞌmahörö ꞌrata norĩ ma tô ãma uwaimrami dzaꞌra. — João 19:33-37.
Niꞌwam norĩ te nharĩ dzaꞌra Jesus romhöimanadzé te te ĩtsaprõni na hã roꞌmahörö ꞌrata norĩ ãne wairébé da. Aima hã, e ãhã rotsaꞌrada ĩbö.
E marĩ ãhã roꞌmahörö ꞌrata norĩ te aima waihuꞌu dzaꞌra Jesus ãma.
6. Jesus waihu wama rowẽdzé
Ropotoꞌwai mreme te tinha ĩmorĩꞌrata uptabi na hã wa te waihuꞌu dzaꞌra da Jesus duré romhuri Ropotoꞌwa te te tãma ĩpitsutu na hã. Atsiré tsõré aba João 14:6 duré 17:3. Taha parimhã atsima robdzanhamri aba ãhã dadzadanharĩ ãma piꞌrebamhã:
E marĩ wa Jesus ãma wa te ĩwaihuꞌu dzaꞌra da tsi.
Jesus ma tô tsitowa bödödi Ropotoꞌwai ãma watsiwaihuꞌu dzaꞌra da. Õ hã, ma tô dama waihuꞌu rowahutu uptabi hã Jeová ãma, duré Jesus uꞌöbö ꞌre wahöimana uꞌötsi waihuꞌu petse dzaꞌra mono di.
NIꞌWAM NORĨ TE NHARĨ DZAꞌRA ÃNE: “Jeová Watsuꞌuꞌwa norĩ te te tsadze dzaꞌra õ di Jesus.”
E niha te aré atsa ĩnha.
ĨWAIHUꞌUDZÉ HÃ
Jesus ĩhöiba tsãmriꞌõ ĩtsiptete uptabi. Õ hã, Ropotoꞌwai ꞌra duré Messias.
Ãma aipoꞌre puꞌu
E ꞌwa hã Ropotoꞌwa nhimipotoꞌrada hã.
E marĩ na Jesus ma tô romhu Tiꞌai u wei morĩ wana ré.
E marĩ dzarina wama waihuꞌu petse dzaꞌra di Jesus Messias na hã.
TSÔ AIRĨTĨ DURÉ
ꞌMadöꞌö marĩ ĩhöiba amo norĩ te te ĩhöiꞌré dzaꞌra Jesus Messias na.
Uptsibi me na e marĩ wa Bíblia te tinha Jesus Ropotoꞌwai ꞌra na.
“E marĩ wa Jesus ĩꞌmahörödzé Ropotoꞌwai ꞌra na.” (Ĩtsihötödzé jw.org na)
ꞌMadöꞌö e marĩ wa rowahudu Ropotoꞌwa höiba nhiꞌumdatõ na hã Ropotoꞌwai mreme hawib õ di.
Piꞌõi höimanadzé ma tô tsaprĩ te te waihuꞌu parimhã Ropotoꞌwai mreme te te ĩnharĩdzé Jesus ãma. Tsõré na ĩwatsuꞌu:
a Romnhoré 26 duré 27 na wa dza ꞌmadöꞌö dzaꞌra ni e marĩ wa danhoꞌreptudzéb dzô te dawi tsô rowaptö duré e niha Jesus ma tô waꞌanhoꞌreptu dzaꞌra.
b ꞌMadöꞌö da roꞌmahörö ꞌrada te te ĩhöiꞌré e niwa Messias ĩtsihöiꞌrédzéb da hã Tiꞌai ãma, ꞌmadöꞌö Ãma ĩrowatsuꞌudzé 2.